Read Samo, Southern Kiin1 16 Bible Online

Kiin1 16 - Samo, Southern bible

Kiin1 16

¹Dɛnaa Lawa boo da ka Anaanii a nɛgiĩ Lawa a boo gii-dali Zewu ni. A boo lɛ yɔrɔ na á goã dia-n Bayesaa la:

²«Bayesaa goã màn kɔn lɛa wa, sɛnɛ, masɛ n má kũ má baa maa zaman Izirayeli minin nyɛɛnaandɛnaa lɛa. Kanna kəni, a n sii baraa zɛnɛɛ ka Zeroboamu wɔ bɛ́ lɔn, á maa zaman Izirayeli minin lɛn kiɛ sii baraa nɛ, a n we ma lon ne.

³Bɛ lɛ nɛ, ma á re wɛɛ a din laanka a kion minin la. Man die a kion lɛ biɛ ka Nebaali a nɛgiĩ Zeroboamu wɔ bɛ́ lɔn.

⁴A kion minin mɛnɛn tumaa bɛ́ re giɛ̃ kiwi, ginin tá re bɛn gere soɛ̃. A kion minin mɛnɛn tumaa bɛ́ re giɛ̃ don, bàanan tá re bɛn gere mui.»

⁵Bayesaa sii gialakunun mɛnɛn zɛnaa, a màn mɛn yii zɛnaa, a tɔ bɔ ǹ siin mɛnɛn zɛnaa, bɛ yii tá kiɛ̃-n sɛ́wɔ kɛ nɛ boo diɛ Izirayeli gána kiin wɔ gɔn la.

⁶Bayesaa gã ǹ ná a gere bĩ Tirsaa kiwi. A nɛgiĩ Elaa na á kii baa a bǎã nɛ.

⁷Dɛnaa Lawa a boo mɛn lɛ yɔrɔ bɛ́ dia-n Bayesaa laanka a kion minin la, Anaanii a nɛgiĩ Zewu, Lawa a boo gii-dali lɛ na á bɛ pɛ, Bayesaa a sii baraan taman yii, a wɔ Dɛnaa Lawa lon ka ǹ mɛnɛn lɛn nɛ. A sii baraa mɛn zɛnaa ka Zeroboamu goã á zɛnaa lɛlɛ lɔn, a bie á Dɛnaa Lawa foo busu ka bɛ dinsɔɔ̃-n wa, a Zeroboamu a kion minin dɛ kɛ dɔ sii tá a nɛ.

⁸Zudaa gána a kii Azaa a kiibaa lɛ̀ fuəwensɔrɔbaa ǹ wɔ, Bayesaa a nɛgiĩ Elaa kii baa Izirayeli gána mìi la, lɛ̀ paa Tirsaa kiwi.

⁹A dí-nyali Zimri mɛn bɛ́ a ziabaa ǹ wotoron talɛɛ mìi la, bɛ ga a bɔ a daa ǹ gɔn li. Ǹ kɔn pinaa, Tirsaa kiwi, Elaa na á goã a gialaa duvɛ̃ mii liɛ a din ni kii a kion mìilandɛnaa Arsaa a piɛ.

¹⁰Zimri daa wɔ kion, á Elaa dɛ á gã, á giã kiibaa la a bǎã nɛ. Bɛ́ á zɛnɛɛ, bɛ̀ Azaa a Zudaa gána a kiibaa lɛ̀ fuəwensɔbaabaa ǹ wɔ nɛ.

¹¹Zimri dii pàã lɛ la lɔn gɔrɔ, á Bayesaa a kion minin tumaa dɛ. A na a kion min goon toa walan giĩ lɛa wa. Ǹ dɔɔ̃n nɛ hinlaa a tá-kun wole ne, a bɛ kɔn toa walan wa.

¹²Zimri Bayesaa a kion minin tumaa dɛ, á kɔnpɛ ka Dɛnaa Lawa a boo kɛ nɛ, á na á boo gii-dali Zewu da a pɛ ganaa Bayesaa wɔ paǹ li.

¹³Bayesaa laanka a nɛgiĩ Elaa na á wɔ Izirayeli a Lawa, Dɛnaa Lawa lon, ka ǹ dì guguru kɔ laanka ǹ Izirayeli minin kaa sii baraa zɛnaa-n kɛ nɛ.

¹⁴Elaa sii gialakunun mɛnɛn tumaa zɛnaa, a màn mɛn yii zɛnaa, bɛ yii tá kiɛ̃ nɛ sɛ́wɔ kɛ nɛ boo diɛ, Izirayeli kiin wɔ gɔn la.

¹⁵Zudaa gána a kii Azaa a kiibaa lɛ̀ fuəwensɔbaabaa ǹ wɔ, Zimri kii baa lɛawaa sɔbaa Tirsaa kiwi, Izirayeli gána a sɔraasin man nə́ goã Filisiti minin kiwi Guibetɔn gialaa kuĩ.

¹⁶Ǹ bɛ́ ǹ nə́ ma, mà Zimri ga kii bɔ a daa ǹ gɔn li, mà á dɛ dinin, a din pinaa lɛ nɛ, ǹ giã ǹ bǎã nɛ, Omrii mɛn nə́ ke sɔraasin goledɛnaa lɛa, Izirayeli kuturu bɛ koa Izirayeli a kii lɛa.

¹⁷Omrii laanka a sɔraasin lɛn nə́ kiɛ̃ ǹ nə́ n bɔ Guibetɔn, ǹ nə́ woo Tirsaa kiwi kũ.

¹⁸Zimri bɛ́ á yɛ mà ǹ nə́ kiwi lɛ kũ, kii kion lɛ a paǹ mɛn bɛ́ duru ǹ bǎã lɛa, á wɔ walan. Á tɛ da kion lɛ-a, a lalan, á gã a nɛ.

¹⁹A sii baraan mɛnɛn lɛn zɛnaa, bɛn man nə́ daa ka kɛ nɛ. Sii mɛn bɛ́ baraa Dɛnaa Lawa yii li, a na á goã bɛ zɛnɛɛ. A na á kɔ Zeroboamu a nya ǹ dín lɛ. Zeroboamu din sii baraa zɛnaa lɔn, a Izirayeli minin kaa a zɛnaa ganaa lɔn, Zimirii dɔ na á zɛnaa miɛ̃.

²⁰Zimirii sii gialakunun mɛnɛn zɛnaa, a ga kii a bɔ a daa ǹ gɔn li lɔn, bɛ tá kiɛ̃-n sɛ́wɔ kɛ nɛ boo diɛ Izirayeli kiin wɔ gɔn la.

²¹Izirayeli a zaman lɛ na á goã á n tala kɔn wɔlɔ paa. Paǹ lɛ a goon na á goã giɛ li mà Guinaati a nɛgiĩ Tibni kii baa, paǹ lɛ a kɔsɔ kɛ dɔ na á goã giɛ li mà Omrii baa.

²²Min mɛnɛn nə goã Omrii kio, bɛn nə́ kiɛ̃ Guinaati a nɛgiĩ Tibni wɔn lɛn la. Tibni gã, Omrii kii baa.

²³Zudaa gána a kii Azaa a kiibaa lɛ̀ pɔsɔɔ ka goonbaa ǹ wɔ, Omrii kii baa Izirayeli gána mìi la, lɛ̀ fulupaa. Á kiibaa zɛnaa lɛ̀ sɔrɔ Tirsaa kiwi.

²⁴Bɛ kio á Samarii kele kɛ pii giĩ goon lon wɔrɔ we duu sɔrɔ (6 000), bɛa giĩ lɛ tɔ n Semɛɛrɛ. Á kungɔn dɔ kele lɛ ganaa, a kiwi mɛn giala wɔ kele lɛ la, a ná a tɔ kɔ mà Samarii. A na á bɛa tɔ lɛ zɔɔ̃ kele lɛ a dɛnaa Semɛɛrɛ tɔ li á tɔ́n kɔ.

²⁵Sɛnɛ, sii mɛn bɛ́ baraa Dɛnaa Lawa yii li, Omrii bɛ zɛnaa. A koa min mɛnɛn la, asɛ wɔ lɛ baraa kɔ á la bɛn wɔ nɛ.

²⁶A zɛnaa ǹ siin nə baraa kɔ ka Nebaati a nɛgiĩ Zeroboamu wɔ bɛ́ lɔn, n mɛn lɛ goã á Izirayeli minin kaa sii baraa nɛ, yǎa ǹ nə́ wɔ Izirayeli a Lawa, Dɛnaa Lawa gasɛ nɛ, ka ǹ dìn guguru kɔ nɛ.

²⁷Omrii sii gialakunun mɛnɛn zɛnaa, a màn mɛn zɛnaa, a tɔ bɔ ǹ siin mɛnɛn zɛnaa, bɛ yii tá kiɛ̃-n sɛ́wɔ kɛ nɛ boo diɛ Izirayeli kiin wɔ gɔn la.

²⁸Omrii gã, ǹ ná a gere bĩ Samarii kiwi. A nɛgiĩ Akaabu na á kii baa a bǎã nɛ.

²⁹Zudaa gána a kii Azaa a kiibaa lɛ̀ pɔsɔɔ ka kiwisibaa ǹ wɔ, Omrii a nɛgiĩ Akaabu kii baa Izirayeli gána mìi la. Omrii a nɛgiĩ Akaabu lɛ na á kiibaa zɛnaa lɛ̀ fuəwenpaa Izirayeli gána mìi la, Samarii kiwi.

³⁰Sii mɛn bɛ́ baraa Dɛnaa Lawa yɔrɔ-a, Omrii a nɛgiĩ Akaabu bɛ zɛnaa. A koa min mɛnɛn la, asɛ wɔ lɛ baraa kɔ á la bɛn tumaa wɔ nɛ.

³¹A bie á kɔ Nebaati a nɛgiĩ Zeroboamu a sii zɛnaan dininsɔɔ̃nɔn lɛ wa, sɛnɛ á woo ǹ daa Sidɔn minin kii Etibaali a nɛlɔ Zezabɛli la, á saa lɔ lɛa. Ka bɛ dɔ nɛ, á woo dì *Baali kɛ guguru kɔ, á kaa tán a giulun.

³²A goã á kion mɛn dɔ Samarii kiwi Baali lɛ wɔ lɛa, á Baali lɛ a guguru kɔ ǹ bǎã dɔ bɛ gɔ́ɔ̃ nɛ.

³³Akaabu bìbĩ dɔ zɛnaa dì Aseeraa nyín lɛa. Izirayeli gána a kiin mɛnɛn tumaa kiɛ̃ Akaabu nyɛɛnɛ, Akaabu goã we Izirayeli a Lawa, Dɛnaa Lawa lɛ gasɛ nɛ, ka sii kɔsɔn nɛ, á la bɛn tumaa nɛ.

³⁴ A pàã lɛ a biikoo li, Betɛli kiwi min Iyɛli Zerikoo kiwi dɔ. Iyɛli a nɛgiĩ gole Abiramu bɔ̀n baa kiwi lɛa gòã daa biikoo li. A bɛ́ a kiɛnlɛn dɔn we biikoo mɛn li, a nɛgiĩ Segubu mɛn bɛ́ koɛ a nɛgiĩ gole lɛ la, bɛ dɔ gã á kɔnpɛ ka Dɛnaa Lawa a boo kɛ nɛ á Nunu a nɛgiĩ Zozoe da a pɛ ganaa.