Read Samo, Southern Kiin1 17 Bible Online

Kiin1 17 - Samo, Southern bible

Kiin1 17

¹ Tisibii min, Yilii mɛn nə́ ke Galaati gána min goon lɛa, bɛ pɛ Akaabu ni: «Dɛnaa Lawa Yiikoonaa tɔ nɛ, Izirayeli a Lawa lɛ, ma bɛ́ dí nyɛɛ ǹ mɛn lɛn nɛ, lɛ̀n kɛn die giɛ̃, la ba re kiɛ wa, pele dɔ a die koe wa, bɛ̀ ma bie ma boo da wa.»

²Dɛnaa Lawa boo da ka Yilii ni,

³woo n nə n bɔ kanaa. Wo lɛ̀giala li, n nə n duru Keriti a mu zii kɛ genli, Zurdɛ̃ tà lɛ-a.

⁴N die n bɛa mu zii lɛa mu mi. Ma á die pii zankoon manɛ, ǹ màn-bii kɔ n la walan.

⁵Yilii Dɛnaa Lawa bɔlɔ si, á giã Keriti a mu zii lɛ lɛ-a, ǹ mɛn lɛ bɛ́ Zurdɛ̃ tà a lɛ̀ giala gɔn la.

⁶Zankoon man nə́ goã die màn-bii laanka siĩ koe la, baayɛlɛ laanka wasamiɛ̃nɛ. A na á goã mu mii mu zii lɛ nɛ.

⁷Biikoo kɔn daa á dɔ, mu zii lɛ a mu piɛ̃, a giala la goã kiɛ gána lɛ-n wa.

⁸Dɛnaa Lawa tɔn boo da ka Yilii-n kəni:

⁹ «Yoo, Sarɛptaa kiwi ke Sidɔn gána nɛ, n wo walan n giã a nɛ. Má pɛ lɔ giɔɔrɔ goon ne walan, má a die a màn-bii kɔ n la.»

¹⁰Yilii yoo á woo Sarɛptaa kiwi. A bɛ́ doe kiwi lɛ a lalaa lɛ-a, bɛ̀ lɔ giɔɔrɔ goon dɔ n walan, a gialaa gɔn yoe. Yilii lɛ dia la á pɛ nɛ: «Bǐɛ̃ kɔ n wo mu kɔn si paan nɛ, n da kɔ ma la ma mi.»

¹¹Lɔ giɔɔrɔ lɛ woo mu lɛ si. Yilii lɛ dia la doo á pɛ nɛ: «Bǐɛ̃ kɔ n wo ga màn-bii kɔn li, n da kɔ ma la.»

¹²Lɔ giɔɔrɔ lɛ ná a lɛ si: «N Lawa, Dɛnaa Lawa Yiikoonaa lɛ tɔ nɛ, màn-bii kɔn ba ma lon wa. Wùsu gɔn yii goon dinsɔɔ̃ n ke ma lon kunun ni piɛ, ka nyɔɔ boɛɛn kɔn nɛ tàan nɛ. Bɛ̀ má gɔn kɔn yɔ, man woe piɛ, ma bɛ lɛ zɛnaa, ma laanka maa nɛgiĩ a màn-bii lɛa, wɔ bii, bɛ kio wɔ tɔn gã.»

¹³Yilii tɔ́n pɛ nɛ: — N baran nyɛ́ɛ baa wa! Wo piɛ, n màn mɛn pɛ, bɛ lɛ zɛnaa. Sɛnɛ màn mɛn bɛ́ n lon, mɔ̀mɔ boɛɛn da ka bɛ-n bɔrɔ n da kɔ ma la, bɛ kio n tá re n din laanka n nɛ wɔ diɛ.

¹⁴A giala, Izirayeli a Lawa, Dɛnaa Lawa n pii kɛnɛn: «Wùsu ba re nyɛɛ kunun lɛ-n wa, nyɔɔ ba re nyɛɛ tàan lɛ-n wa yǎa a doe Dɛnaa Lawa a la kaa tán la pinaa ganaa.»

¹⁵Lɔ giɔɔrɔ lɛ woo á zɛnaa ka Yilii goã á pɛ-n lɔn. Bɛ kio, á màn-bii yɛ á bii lɛawaa didi gɔ́ɔ̃ nɛ, a din ni, a kion minin ni ka Yilii ni.

¹⁶Wùsu lɛ goã nyɛɛ kunun lɛ-n wa, nyɔɔ lɛ dɔ goã nyɛɛ tàan lɛ-n wa, ka Dɛnaa Lawa goã á Yilii da a pɛ ganaa lɔn.

¹⁷Bɛa siin kɛn lɛn kiɛ̃ kio, Yilii bɛ́ lɔ giɔɔrɔ mɛn lɛ li, busu ná a nɛginin kũ. A busu lɛ kaka kɔ a ganaa taãn-taãnɛ, yǎa á nɔmaa á dɛ.

¹⁸Lɔ lɛ pɛ Yilii ni: «Wàa dɔ n wɔ biin ni, Lawa a boo gii-dali? Ma nə ń daa ma li, n tá ma yiri gisĩ ka maa sãn nɛ, n maa nɛ dɛ ń kɔ ma la.»

¹⁹Yilii ná a lɛ si: «N nɛginin lɛ kɔ.» Yilii si á bɔ lɔ lɛ gɔn, a bɛ́ á goã kion mɛn nɛ sanabolo-n lon, á woo n walan, á naa tán piì la.

²⁰Bɛ kio, á goã kũ da Dɛnaa Lawa ganaa á pɛ: «Maa Lawa, Dɛnaa Lawa, ma da n yu lɔ giɔɔrɔ mɛn la ma nə ń sii kaka da bɛ dɔ mìi ni, n nə́ yui a nɛgiĩ dii?»

²¹ Yilii tɔ nə n lɛ bɔ tán nɛ lɛ la gunyin sɔɔ, á Dɛnaa Lawa nyankɔ á pɛ: «Maa Lawa, Dɛnaa Lawa, toa nɛ kɛ yii wusoo a kaa.»

²²Dɛnaa Lawa Yilii a nyankɔ lɛ si, nɛ lɛ wusoo á fɔfoã si a yii n koo.

²³Yilii nɛnyaan lɛ saa á gisĩ ni á n bɔ sanabolo kion lɛ-n lon, á daa kɔ ǹ dan la. Yilii na á n toa lɔ giɔɔrɔ lɛ ganaa kɛnɛn: «Ga dɛ! N nɛginin lɛ yii á koo.»

²⁴Lɔ lɛ pɛ Yilii ni: «Sonbore, ma á doɛ̃ kanna, máa man Lawa a min lɛa, a giala n bɛ boo mɛn diɛ Lawa a boo gii lɛa, sonbore ne.»