Read Samo, Southern Kiin1 19 Bible Online

Kiin1 19 - Samo, Southern bible

Kiin1 19

¹Yilii bɛ́ á sii mɛn tumaa zɛnaa, a bɛ́ á *Baali a wúlu-bɔlen lɛn dɛ yɔrɔ mɛn nɛ, Akaabu bɛ yii boo da a lɔ Zezabɛli ni.

²Zezabɛli min dia woe pii Yilii-n kɛnɛn: «N dɔ Baali a wúlu-bɔlen nyín bɔ lɔn, ma dɔ n die n dɔ wɔ boe miɛ̃ biɛ̃ kɛnɛn yirəə. Bɛ̀ ma bɛ zɛnaa duduu wa, dìn die ǹ dɔlɔ babaraa bɔ ma ganaa.»

³Yilii bɛ́ á yɛ miɛ̃, á yoo á ga la ǹ wɔlɔ li. Á ná a dí-nyali kũ, ǹ nə́ woo Bɛɛr-Sebaa kiwi, Zudaa gána nɛ. Ǹ bɛ́ ǹ nə́ dɔ walan, Yilii ná a dí-nyali lɛ toa walan.

⁴ Yilii dinmaa lɛ sɛ pinin goon tɔ wɔ diə gole ne. Á giã tán da goon giulun, á nɔ̀n da gɛ̀ li bɛ̀ á n pii: «Sii lɛ ma gɔ̀nɔn bɔ kanna. Dɛnaa Lawa, masɛ nyín si ma la, a giala, ma ba soɛ ma digolon man wa.»

⁵Bɛ kio, á waa tán da lɛ giulun, nyuù saa tán. Sɛnɛ a toa nyuù lɛ nɛ, lon a diadi-a wole goon daa ǹ gɔn tɔ a nɛ, á pɛ nɛ: «Yoo n màn bii.»

⁶Yilii tɔ́n ga, bɛ̀ mɔ̀mɔ-diɛ á ke tán kɔlɔ fuu la a mìi wɔlɔ-a li, ka mu tɔn goon ne. Á màn bii, á mu mi, bɛ kio, á wusoo á waa tán doo.

⁷Dɛnaa Lawa a lon a diadi-a wole lɛ wusoo á daa, á n gɔn tɔ Yilii ni, á pɛ nɛ: «Yoo n màn bii, bɛ̀ bie sɛn wa, zii lɛ á die sɔsɔɔ koe n gɔn a la yii ni.»

⁸Yilii dɔ tɔ́n yoo, á màn bii, á mu mi. Bɛa màn-bii lɛ bɛ́ á Yilii gù kaa, á tɔ wɔ lɛawaa pusi laanka tèlò pusi gɔ́ɔ̃ nɛ, yǎa á dɔ Lawa a kele kɛ li, ǹ nə́ bíi Orɛbu.

⁹A bɛ́ á dɔ walan, kele yala goon tan, Yilii na á lɛ̀ waa bɛ gɔ́ɔ̃ nɛ. Dɛnaa Lawa boo da ka Yilii ni á pɛ nɛ: «Yilii, wàa na á baa n tá kànaa?»

¹⁰ Yilii ná a lɛ si: «Ma la n paparɛ ka Lawa Pàãyiidɛnaa, Dɛnaa Lawa lɛ a sii ni. Izirayeli minin lɛn nə́ n lɛ kɔ kɔn la lɛ toa walan, ǹ nə́ n wúlu bɔ ǹ bǎãn ziziɛ̃, ǹ nə́ n boo gii-dalin dɛ. Masɛ dinsɔɔ̃ n má goã, maǹ giɛ li, ǹ ma dɔ dɛ.»

¹¹Dɛnaa Lawa pɛ nɛ: «Soo n golee bii-a kele lɛ la, masɛ din Dɛnaa Lawa yɔrɔ-a.» Á ke man die kiɛ̃. Dɛnaa Lawa tɔ́n piɛ̃ gole gole kɔn da bɔ ganaa bɔrɔ a nyɛɛnɛ. Bɛa piɛ̃ lɛ kelen yuyu, á paran yɔyɔrɛ, sɛnɛ Dɛnaa Lawa goã kun ka bɛa piɛ̃ lɛ-n wa. Piɛ̃ lɛ a bɔ kio, tán bìn da sɛnɛ, Dɛnaa Lawa goã kun ka bɛa tán bìn diɛ lɛ-n wa.

¹²Tán bìn diɛ lɛ kio, tɛ bɔ, sɛnɛ Dɛnaa Lawa goã kun ka bɛa tɛ lɛ-n wa. Tɛ lɛ dɔ kio, màn wuu bɔ ka piɛ̃ lɔnlɔɔn wuu bɛ́ lɔn.

¹³Yilii bɛ́ a ná a wuu ma, a ná a dɔnkɛ gole saa, á kɔ a yɔrɔ lɛ. Yilii soo á giã kele yala lɛ lɛ-a. Lɛn kɔn nə́ n toa Yilii ganaa kəni: «Yilii, wáa na á baa n tá kànaa?»

¹⁴Yilii ná a lɛ si: «Masɛ la n paparɛ ka Lawa Pàãyiidɛnaa, Dɛnaa Lawa lɛ a sii ni. Izirayeli minin nə́ n lɛ kɔ kɔn la lɛ toa walan, ǹ nə́ n wúlu bɔ ǹ bǎãn ziziɛ̃, ǹ nə́ n boo gii-dalin dɛ. Masɛ dinsɔɔ̃ n n má goã, maǹ giɛ li, ǹ tá masɛ dɔ dii.»

¹⁵ Dɛnaa Lawa pɛ nɛ: «Woo, wusoo n nə zii saa n nə n yɔrɔ dia Damaasi don li. N die n wo nyɔɔ lɔ Azayeli ganaa, n koa Siirii gána a kii lɛa.

¹⁶ N die n nyɔɔ lɔ Nimisi a nɛgiĩ Zewu ganaa, n koa Izirayeli gána a kii lɛa. Saafaati mɛn bɛ́ boe Abeli-Mewolaa kiwi, n die n nyɔɔ lɔ bɛa nɛgiĩ Yiliizee dɔ ganaa, n koa Lawa a boo gii-dali lɛa n din dòo.

¹⁷Bɛ̀ min woo min kanbaa Azayeli a gɔya sa ganaa, Zewu tá re bɛa dɛnaa dii. Bɛ̀ min woo min kanbaa Zewu dɔ a gɔya sa ganaa, Yiliizee tá re bɛa dɛnaa dii.

¹⁸ Sɛnɛ man die min duu sɔbaa (7 000) yii toɛ koo Izirayeli gána nɛ, ǹ mɛnɛn lɛn tumaa á ke, ǹ lɛ kɔ, ǹ nə́ ǹ musin kuruməə tán Baali yɔrɔ-a, ǹ ná a guguru kɔ wa.»

¹⁹Bɛ kio, Yilii kiɛ̃ á n bɔ walan, á woo Saafaati a nɛgiĩ Yiliizee yaa, bɛ̀ á ke diin buu kɔsɛ. Buu kɔsɔ ǹ dii fuəwensii na á goã a li. A din na á goã buu lɛ kɔsɛ ka dii lɛ a màn paa giala nyɔmɛɛn kɛn nɛ. Yilii kiɛ̃ Yiliizee genli, a ná a dɔnkɛ gole bɔ, á zũ Yiliizee la[5].

²⁰Yiliizee diin lɛn toa walan, á baa si Yilii kio, á pɛ: «Toa ma maa woo ǹ fòo da ma di laanka ma dan nɛ. Bɛ kio, ma tɔn wo kunun n ni.» Yilii ná a lɛ si: «Woo, sɛnɛ wusoo n nə n bɔyaa n daa, a giala ma sii mɛn zɛnaa n nɛ, n din tá doɛ̃.»

²¹Yiliizee wɔlɔ bɛ́ á lui Yilii ganaa, á n bɔyaa á daa dii màn paa kũ á wúlu bɔ ǹ nɛ. Á ǹ siĩ kɔrɛ ka diin lɛn da kána ganaa ǹ gɔn nɛ, á kɔ a minin la, ǹ nə́ sɔ̃. Bɛ kio, á yoo á kɔ Yilii kio lɛ, á dí nya a giulun.