Read Samo, Southern Kiin1 20 Bible Online

Kiin1 20 - Samo, Southern bible

Kiin1 20

¹Siiriii gána a kii Bɛn-Adaadi ná a sɔraasin tumaa lɛ sɔkɔn. Kii pɔsɔɔwenpaa na á goã kun ka Bɛn-Adaadi lɛ nɛ. Sùin laanka zia da ǹ wotoron dɔn nə́ goã a lon. Á woo kɔ Samarii kiwi lɛ, á zia da a ganaa.

²Á minin dia kiwi lɛ nɛ, mà ǹ wo pɛ Izirayeli gána a kii Akaabu ni,

³mà Bɛn-Adaadi mà kɛnɛn: «Wɔrɔ laanka sana mɛn bɛ́ n lon, bɛn man masɛ din wɔ lɛa. N lɔn laanka n nɛgiĩ sonboren man masɛ din wɔn lɛa.»

⁴Izirayeli gána a kii lɛ ná a lɛ si: «Maa dɛnaagiĩ kii, n din bɛ́ diɛ lɔn, a n miɛ̃ lɛn, masɛ dinmaa nɛ, ma gɔn mànan nɛ, ǹ tumaa nə n din wɔn lɛa.»

⁵Sɛnɛ dia dí-a wolen lɛn nə́ wusoo ǹ nə́ n bɔyaa ǹ nə́ daa pɛ Akaabu ni, mà Bɛn-Adaadi pɛ: «Má minin dia pii n ni, máa n doamaa nɛ n nə n wɔrɔ laanka n sana kɔ ma la, ka n lɔn laanka n nɛnyaanan nɛ.

⁶Biɛ̃ kɛnɛn yirəə sɛn, ma tá re maa dí-nyalin diɛ n li, ǹ nə n kion gugusi ka n dí-nyalin kionən ne. N dinmaa yii bɛ́ á bɔ màn mɛn tumaa li, ǹ tá re ǹ gɔn diɛ ǹ bɛn yii goa.»

⁷Izirayeli gána a kii lɛ gána lɛ a min golen bii, á pɛ ǹ nɛ: «Ka yii tá a ganaa foaãnɛ, giĩ kɛ n giɛ li a baraa zɛnaa masɛ nɛ! Á pɛ mà yǎa ma maa lɔn laanka maa nɛnyaanan koe asɛ la, ka maa wɔrɔ laanka maa sana nɛ. Man piã nɛ ka bɛ kɔn nɛ wa.»

⁸Min golen lɛn laanka zaman lɛ tumaa ná a lɛ si: «N baran n too kɔ a lon wa, n baran lɛ din kɔ wa.»

⁹Akaabu tɔ́n pɛ Bɛn-Adaadi a dia dí-a wolen lɛn manɛ: «Ka pɛ maa dɛnaagiĩ kii lɛ nɛ, mà a goã á minin dia ǹ nə́ daa nɔ̀n da ma la ka mànan mɛnɛn nɛ bibinaan ne ke, mà ma á re bɛ zɛnɛɛ. Sɛnɛ, ke kanna, mà maa die boe la wa.» Dia dí-a wolen lɛn nə́ woo, ǹ ná a boo da Bɛn-Adaadi ni.

¹⁰Bɛn-Adaadi tɔ́n minin dia pii Akaabu ni: «Min mɛnɛn bɛ́ re koe masɛ lɛ ǹ da Samarii kiwi, bɛ̀ Samarii kiwi lɛ a yu ǹ tii bɛn gɔnɔn pã, dìn die ǹ dɔlɔ babaraa bɔ ma ganaa.»

¹¹Izirayelin kii lɛ dɔ tɔ́n a lɛ si kɛnɛn: «Min mɛn bɛ́ woe zia la, bɛ doamaa bie a n din laakalaa ka bɔ zia la wole bɛ́ lɔn wa[6].»

¹²Bɛn-Adaadi bɛ́ bɛa boo lɛ miɛ, bɛ̀ a n tán màn mii kun ka kiin ni mɔnaa kionən ne. Á n toa a dí-nyalin ganaa: «Ka n yɔrɔ bɔ ka zia da kiwi lɛ-a.» Dí-nyalin lɛn nə́ n yɔrɔ bɔ, ǹ nə́ die zia biɛ kiwi lɛ ganaa.

¹³Sɛnɛ Lawa a boo gii-dali goon daa n mɔrɔ Izirayeli gána a kii Akaabu lɛ ganaa, á pɛ nɛ: — Á ke, Dɛnaa Lawa n kɛ pii: «Ń sɔraasi damata kɛ yɛ? Ga! Man die ǹ we n gɔn pelo, n tá re doɛ̃ sonbore, mà masɛ n Dɛnaa Lawa lɛa.»

¹⁴Akaabu tɔ́n nɔ̀n da: «Die n die toɛ wɔsɛn gɔn dɔ ǹ ganaa?» Lawa a boo gii-dali lɛ Akaabu lɛ si: — Dɛnaa Lawa n kɛ pii: «Nɛ tenən mɛnɛn bɛ́ gána lɛ a nyɛɛnaandɛnan kio, bɛn lɛn man die toɛ n gɔn dɔ minin lɛn ganaa.» Akaabu wusoo á nɔ̀n da: «Die n die zia lɛ giala koe?» Lawa a boo gii-dali lɛ pɛ nɛ mà Akaabu din ni.

¹⁵Nɛ tenən mɛnɛn lɛn bɛ́ gána lɛ a nyɛɛnaandɛnan kio, Akaabu nə́ ǹ nimi, maǹ nə́ goã min biɛ paa ka pɔsɔɔwenpaa (232). A bɛ́ á bɛn nimi á nya, á Izirayeli sɔraasin tumaa nimi. Giĩn man nə́ goã min duu sɔbaa (7 000).

¹⁶Bɛ kio, ǹ nə́ soo ka zia nɛ penleen ne. Bɛ daa yaa bɛ̀ Bɛn-Adaadi tá a gialaa yɔ mii liɛ a din ni, mɔnaa kionən ne, kun ka kii pɔsɔɔwenpaa kɛ nɛ, ǹ doe lɛ.

¹⁷Nɛ tenən mɛnɛn bɛ́ gána lɛ a kiwin nyɛɛnaandɛnan kio, bɛn man nə́ woo zia lɛ la bibinaa nɛ. Bɛn-Adaadi minin dia ǹ nə́ woo ga, ǹ nə́ daa pɛ nɛ: «Minin nə́ soo Samarii kiwi, ǹ tá die.»

¹⁸Bɛn-Adaadi nə́ n toa: «Bɛ̀ là nyantoro a lɛa nɛ ǹ nə́ soo, ka ǹ yiikoonaamaa kũ. Ta zia dɔ din a lɛa nɛ, ka ǹ yiikoonaamaa kũ!»

¹⁹Bɛa biikoo li, nɛ tenən mɛnɛn bɛ́ gána lɛ a nyɛɛnaandɛnan kio, bɛn nə́ soo ǹ nə́ n bɔ kiwi, sɔraasin nə́ kɔ ǹ kio lɛ.

²⁰Didie boo a min la á dɛ. Siirii minin lɛn nə́ n gòã da baa nɛ, Izirayeli minin lɛn nə́ ǹ kio loo. Siiriii gána a kii Bɛn-Adaadi lɛ baa si sùi la á la kun ka sùidɛnan gialakunun ni.

²¹Bɛ kio, Izirayeli a kii soo, á Siirii minin lɛn sùin dɛ á ǹ zia da ǹ wotoron ziziɛ̃, á bɔ̀n gole da ǹ ganaa, á boo ǹ la.

²²Lawa a boo gii-dali lɛ tɔ́n nə n mɔrɔ kii Akaabu lɛ ganaa, á pɛ nɛ: «Wo nyɛɛnɛ ka foo tãbaa nɛ. Sɛnɛ n doamaa bɛ́ nɛ n màn mɛn zɛnaa, n taasɛ bɛ ganaa. A giala, lɛ̀-boe doo, Siiriii gána a kii lɛ á die n gialaa ka zia nɛ.»

²³Siirii gána a kii a dí-nyalin nə́ pɛ nɛ: «Izirayeli nɛnyaanan lawa lɛ n kele bǎã wɔ lɛa, bɛ lɛ na á toa ǹ nə́ boo wɔ la. Sɛnɛ, bɛ̀ wɔ́ zia da ǹ ganaa nyankɔrɔ lɛ nɛ, wɔ n boe ǹ la a giala yii li.

²⁴Sii lɛ a kɛ zɛnaa: kiin lɛn tumaa kaa, n nə ǹ bɔ ǹ dí ni, n kiwin sii yɔrɔ-bɔlen kaa ǹ bǎã nɛ.

²⁵Bɛ kio, n din nə sɔraasin bɔ, pipiã ka n lɛlɛ a sɔraasin kɛn bɛ́ lɔn, ǹ nə́ goã ǹ nə́ ǹ dɛ. Toa ǹ sùin laanka ǹ zia da ǹ wotoron nə goã mɔnaa nɛ ka lɛlɛ wɔn lɛn bɛ́ lɔn. Wɔsɛn man zia lɛ diɛ nyankɔrɔ lɛ nɛ, wɔ n boe ǹ la a giala yii li. Kii lɛ dɔ nə́ n too kɔ ǹ boo-a, á lɛ kɔ ǹ doroo ganaa.»

²⁶Lɛ̀ bɛ́ á bɔ kəni, Bɛn-Adaadi tɔ́n Siirii minin sɔkɔn, á woo Afɛki kiwi, á n die zia diɛ Izirayeli gána ganaa.

²⁷Bɛa biikoo li, ǹ nə́ Izirayeli minin dɔn kaa kɔn li. Ǹ laadoo bɛ́ mànan mɛnɛn ganaa ǹ tɔn wo zia la, ǹ nə́ bɛn kɔ ǹ la, bɛ kio, ǹ nə́ woo Siirii minin lɛn gialaa. Izirayeli minin lɛn nə́ golee ka mɔ́, Siirii minin lɛn yɔrɔ-a, nsɛ n pii, mà bòe kuru bɔnboɛɛn paa nɛ. A da yaa, gána lɛ na á goã piɛ̃-n ka Siirii minin sɛn nɛ.

²⁸Lawa a boo gii-dali lɛ nə́ n zɔ̃ á dɔ, á boo da ka Izirayeli gána a kii lɛ nɛ, á pɛ: «Á ke, Dɛnaa Lawa n kɛ pii: Siirii minin bɛ́ ǹ nə́ pɛ, mà Dɛnaa Lawa n kele bǎãn lawa lɛa, mà a ba nyankɔrɔ lɛ wɔ lɛa wa, bɛ lɛ nɛ, ma á re bɛa zaman damata kɛ lɛ we n gɔn, n din laanka n minin tá re doɛ̃, mà masɛ n Dɛnaa Lawa lɛa.»

²⁹Ǹ nə́ golee ǹ nə́ n yɔrɔ da kɔn la lɛawaa sɔbaa gɔ́ɔ̃ nɛ. A sɔbaabaa ǹ wɔ, zia lɛ nə n giala kɔ. Izirayeli minin lɛn nə́ Siirii minin lɛn min duu paabiɛ (100 000) dɛ wasa zii goon gɔ́ɔ̃ nɛ.

³⁰Ǹ min mɛnɛn yii goã koo, bɛn nə́ baa si ǹ nə́ kaa Afɛki kiwi. Maǹ nə́ goã min duu fuəwensɔbaa (27 000). Sɛnɛ kungɔn kaa bɛn lɛn dɔn la walan. Bɛn-Adaadi sɛ na á goã á baa si, á woo n duru, kion gialaan nɛ, kiwi lɛ nɛ.

³¹Bɛn-Adaadi a dí-nyalin nə́ pɛ nɛ mà ǹsɛn nə́ ma minin lɛ-n, mà Izirayeli gána a kiin lɛn tá min makara doɛ̃. Mà ǹsɛn man die gɛ̀ koa ǹ mɔnaa yii ǹ bɔsɔ-n, ǹsɛn nə biɛn da ǹ mìi ni[7], ǹsɛn nə soo, ǹ wo Izirayeli a kii lɛ yaa. Mà kɔntan, mà á die n yii toɛ koo.

³²Ǹ nə́ tɔ́n gɛ̀ koa ǹ mɔnaan lɛn yii ǹ bɔsɔ-n, ǹ nə́ biɛn da ǹ mìi ni, ǹ nə́ woo dɔ Izirayeli gána a kii lɛ li, ǹ nə́ pɛ nɛ: «N dí-nyali Bɛn-Adaadi na á pɛ, mà asɛ nə n nyín nyankoe!» Akaabu nə́ n toa mà a yii á tɔn koo? Ma asɛ dɔɔ̃n nɛ dɔn!

³³Minin lɛn nə́ yɛ, mà Akaabu tá bɔlɔ bǐɛ̃ pii. Ǹ nə́ n nanaa, ǹ nə́ kũ ka a din lɛ gɔ́ɔ̃ ǹ boo ne, ǹ nə́ pɛ: «Bɛn-Adaadi lɛ nə ǹ dɔɔ̃n lɛa.» Akaabu wusoo á n toa: «Ka wo Bɛn-Adaadi lɛ kũ ka da nɛ.» Bɛn-Adaadi soo á daa Akaabu li, Akaabu da a din a zia da ǹ wotoro la.

³⁴Bɛ kio, Bɛn-Adaadi pɛ nɛ: «Ma di goã á bǎãn mɛnɛn si n di la, man bɛn koe n la. N die n pii kɔ ǹ bǎã doa Damaasi kiwi, ka ma di goã á doa lɔn Samarii kiwi.» Akaabu na a lɛ si mà lɛ kɔ kɔn la n die yii asɛ tɔn nə n gɔn bɔ-a a woo. Akaabu lɛ kɔ kɔn la doa kɔn nɛ, á toa á woo.

³⁵Bɛ kio, Lawa a boo gii-dalin lɛn, zaman lɛa kun, Dɛnaa Lawa bɛa goon da a pɛ ganaa ǹ miã n kɛnɛn: «Bǐɛ̃ kɔ n masɛ dɛ.» Sɛnɛ a pɛ giĩ mɛn lɛ nɛ, bɛ nə́ n piã a dɛ wa.

³⁶ Ǹ miã lɛ tɔ́n pɛ-n kɛnɛn: «Ń bɛ́ n Dɛnaa Lawa bɔlɔ si wa, bɛ lɛ na á toa, ń bɛ́ re kiɛ̃ n nə n bɔ masɛ li lɔn gɔrɔ, yàra tá re n kuĩ.» Ǹ miã lɛ dɔ bɛ́ á kiɛ̃ á n bɔ a li lɔn gɔrɔ, á woo kaa yàra lɛ, yàra lɛ kũ.

³⁷Lawa a boo gii-dali lɛ nə́ n da giĩ kɔsɔ dɔ lɛ, á pɛ bɛ nɛ: «Bǐɛ̃ kɔ n masɛ dɛ!» Bɛa giĩ lɛ dɛ á busu da a ganaa.

³⁸Bɛ kio, yǎa Lawa a boo gii-dali lɛ kiɛ̃ á woo giã kii lɛ a kiɛ̃ ǹ zii la. A bɛ́ a goã giɛ li mà min na asɛ dɔ̃ wa, a na á mɔnaa goon wɔ, á n kɔ a yɔrɔ lɛ.

³⁹Kii lɛ bɛ́ kiɛ̃, á n lɛ dɛ a ganaa á pɛ: — Maa dɛnaagiĩ, man má goã zia la, bɛ̀ ǹ kɔn nə́ ke, á kiɛ̃ á n bɔ sɔraasin lɛn bii, á daa wɔa zɔ́ɔn lɛn min goon kɔ ma la, á n toa ma ganaa: «Giĩ kɛ lɛduə̃, bɛ̀ ń toa á papaã, n nyín nə miɛ bɛ lɛ wɔ bǎã nɛ, hinlaa ma n wɔrɔ we duu sɔɔ (3 000) sarɛɛ.

⁴⁰Sɛnɛ, a masɛ toa sii kɔsɔn zɛnɛɛ, giĩ lɛ papaã.» Izirayeli a kii lɛ tɔ́n pɛ-n kɛnɛn: «N kiri lɛ a kurii n ka kɛ n dɔn! N din dɔ màn kuru!»

⁴¹Bɛ kio, mɔnaa mɛn goã koe-n Lawa a boo gii-dali lɛ yɔrɔ lɛ, á bɛ bɔ fufuu, bɛa biikoo li, Izirayeli a kii lɛ tɔ́n dɔ̃, mà Lawa a boo gii-dalin lɛn goon ne.

⁴²Lawa a boo gii-dali lɛ pɛ Akaabu ni: «Dɛnaa Lawa n kɛ pii: Ma bɛ́ má ǹ min mɛn nyín bɔ, n bɛ́ n nə n gɔn bɔ bɛ ganaa á woo, n din nyín nə die miɛ bɛ lɛ wɔ bǎã nɛ. Sii mɛn doamaa bɛ́ nɛ a Bɛn-Adaadi a zaman yɛ, bɛ n die kuĩ n din kɛ lɛ a zaman mìi ni.»

⁴³Bɛ kio, Izirayeli gána a kii lɛ woo piɛ, Samarii kiwi, ka foo ziziɛ̃ laanka foo yoo ne.