Read Samo, Southern Kiin1 22 Bible Online

Kiin1 22 - Samo, Southern bible

Kiin1 22

¹Siirii minin laanka Izirayeli minin nə́ goã ǹ nə́ dɔ lɛ̀ sɔɔ, zia na á ba ǹ gánan bii ni wa.

²A lɛ̀ sɔɔbaa ǹ wɔ, Zudaa gána a kii Zozafati woo dɔ Izirayeli gána a kii li.

³Izirayeli gána a kii lɛ na á goã á pɛ a dí-nyalin manɛ kɛnɛn: «Ka á doɛ̃, mà Ramɔti kiwi lɛ, Galaati gána nɛ, mà wɔsɛn dinin wɔ nɛ. Sɛnɛ wɔ n tán wɔ́ n wɔ ba sii Siirii gána a kii lɛ la wa!»

⁴Izirayeli gána a kii lɛ nɔ̀n da Zozafati la: «N tá li n wo zia baa Ramɔti kiwi ganaa Galaati gána nɛ kun ka masɛ-n ya?» Zozafati ná a lɛ si: «N bɛ́ re n sii we zia lɛ-n lɔn, ma dɔ n die maa wɔ we a-n miɛ̃. N zaman sii bɛ́ re goɛ̃ zia lɛ-n lɔn, ma dɔ a zaman sii n die goɛ̃ a-n miɛ̃. N sùin sii bɛ́ re goɛ̃ zia lɛ-n lɔn, ma dɔ wɔn sii n die goɛ̃ a-n miɛ̃.»

⁵Zozafati wusoo á pɛ Izirayeli gána a kii lɛ nɛ mà a nɔ̀n da Dɛnaa Lawa la bɔrɔ.

⁶Izirayeli gána a kii lɛ tɔ́n Lawa a boo gii-dali, biɛsii (400) kɛ miã lɛ sɔkɔn, á pɛ ǹ nɛ: «Ma á boe la ma wo zia baa Ramɔti kiwi Galaati gána nɛ, hinlaa ma a lɛ da?» Lawa a boo gii-dalin lɛn ná a lɛ si ǹ nə́ pɛ: Woo! Dɛnaa Lawa tá re we n gɔn.

⁷Sɛnɛ Zozafati nɔ̀n da: «Dɛnaa Lawa a boo gii-dali kɔsɔ ba kànaa, wɔ n boe la wɔ n doa a ganaa, wɔ nɔ̀n da Dɛnaa Lawa la wa?»

⁸Izirayeli gána a kii lɛ pɛ Zozafati nɛ: Giĩ goon tá tɔn a tan, min nə́ boe la a n doa a ganaa a nɔ̀n da Dɛnaa Lawa la. Sɛnɛ bɛa giĩ lɛ sii ba masɛ ganaa wa, a giala, a ba Lawa a boo gii-dalibaa ǹ boo kɔɔ̃n pii masɛ wɔ paǹ li wa, yǎa a baraa dinsɔsɔɔ̃. Yimulaa a nɛgiĩ Misee ne. Zozafati nə́ n toa mà kii lɛ baran pɛ miɛ̃ wa.

⁹Izirayeli gána a kii lɛ tɔ́n lɛ dia a kiodɛnaa goon la, á pɛ nɛ: «Wo Yimulaa a nɛgiĩ Misee kũ kɛnɛn kɛnɛn n da nɛ!»

¹⁰Izirayeli gána a kii lɛ laanka Zudaa gána a kii Zozafati na á goã giã-n tán, ǹ didie ná a kii dankan la, a kii mɔnaan ná a ganaa. Maǹ nə́ goã tán bii-a Samarii kiwi a wɔ ǹ kiɛnlɛ-a, Lawa a boo gii-dalin lɛn tumaa ná a gialaa Lawa a boo gii-dali baa ǹ siin zɛnɛɛ ǹ yɔrɔ-a.

¹¹Kenaanaa a nɛgiĩ Sedekiasi sɛ na á goã á màn bɛnɛn zɛnaa ka fɔlɔ nɛ, á pɛ Akaabu ni mà Dɛnaa Lawa n kɛ pii: «Akaabu tá re Siirii minin lɛn dii ka màn bɛnɛn kɛn nɛ a ǹ nya lenlen.»

¹²Lawa a boo gii-dalin lɛn tumaa a boo na á goã goon ka Sedekiasi wɔ lɛ nɛ. Maǹ nə́ goã pii mà Akaabu wo zia baa Ramɔti kiwi Galaati gána nɛ, mà a tá re gɔ̀lɔ̀baa yii! Mà Dɛnaa Lawa tá re we a gɔn.

¹³Ǹ goã ǹ nə́ min mɛn dia woe lɛ diɛ Misee la, bɛ pɛ nɛ: «Á ke, boo kɔɔ̃n tá boe Lawa a boo gii-dalin lɛn tumaa lɛ-n kii lɛ wɔ paǹ li. Toa n dɔ a boo lɛ kɔn saa ka ǹ wɔ lɛ nɛ! Boo kɔɔ̃n da!»

¹⁴Sɛnɛ, Misee tɔ́n nə n toa: «Dɛnaa Lawa Yiikoonaa tɔ lɛ taman yii, Dɛnaa Lawa bɛ́ re màn mɛn pii ma nɛ, bɛ nɛ masɛ tá re pii!»

¹⁵Misee bɛ́ á dɔ kii lɛ li, kii lɛ nɔ̀n da la: «Misee, wɔ á boe la wɔ wo zia baa Ramɔti kiwi Galaati gána nɛ? Hinlaa wɔ a lɛ da?» Misee ná a lɛ si kɛnɛn: «Woo, n tá re gɔ̀lɔ̀baa yii! Dɛnaa Lawa tá re we n gɔn.»

¹⁶Kii lɛ wusoo á nɔ̀n da Misee la: «Ma doa nɛ ma n da liɛ ganaa gunyin gia? Ka Dɛnaa Lawa tɔ nɛ, Boo goon pɛ ma nɛ.»

¹⁷ Misee ná a lɛ si: «Má Izirayeli minin tumaa yɛ pɛsiɛ̃-n kelen la, ka n pɛ mà sèren mɛnɛn nə́ ke ǹ lɛduə̃ wole ná a banban. Dɛnaa Lawa pɛ: Dɛnaagiĩ ba minin kɛn lon wa. Didie nə n bɔyaa a wo piɛ ka là nyantoro ne!»

¹⁸Izirayeli a kii lɛ tɔ́n pɛ Zozafati ni: «Ma pɛ n nɛ wa? Misee bie Lawa a boo gii-dali baa ǹ boo kɔɔ̃n diɛ masɛ wɔ paǹ li wa, yǎa a baraa.»

¹⁹ Misee nə́ n toa kəni: — Haya le! N too kɔ Dɛnaa Lawa a boo ganaa. Má Dɛnaa Lawa yɛ giã nɛ a kii dankan la, lon a dí-nyalin tumaa ǹ golee ne a genli, a gusin laanka a gɔsɛ.

²⁰Dɛnaa Lawa nə́ n toa: «Die n die Akaabu mìi doe li, màn mɛn bɛ́ toɛ a wo zia baa Ramɔti kiwi Galaati gána nɛ, ǹ dɛ walan?» Lon a dí-nyalin lɛn ná a lɛ sisi, kɛn mà kɛnɛn, kɔsɔn dɔn mà kɛnɛn.

²¹Yǎa yiri goon tɔn nə n zɔ̃, á daa giã Dɛnaa Lawa yɔrɔ-a á pɛ nɛ: «Masɛ á re a mìi doe li.» Dɛnaa Lawa nɔ̀n da la: «Ma n die a mìi doe li lɔn?»

²²Yiri lɛ pɛ Dɛnaa Lawa nɛ: «Man die woe ma Akaabu a Lawa a boo gii-dalin lɛn tumaa kaa soɛ bɔ ganaa.» Dɛnaa Lawa tɔ́n pɛ nɛ: «Woo n na a mìi dɔ li, n tá re boe la. Wo zɛnaa miɛ̃.»

²³Misee tɔ́n pɛ: «Á ke! Dɛnaa Lawa yiri goon dia á daa Akaabu a Lawa a boo gii-dalin lɛn kaa soɛ bɔ ganaa, bɛ giala, mà Dɛnaa Lawa din ni mà a n koe boe Akaabu ganaa.»

²⁴Bɛ kio, Kenaanaa a nɛgiĩ Sedekiasi nə́ n zɔ̃ á dɔ, á Misee dɛ a pàã ganaa, á pɛ nɛ: «Dɛnaa Lawa yiri na á n toa maa á soo masɛ nɛ, á daa boo da n nɛ?»

²⁵Misee ná a lɛ si: «Hayaa le! N bɛ́ re kion gialan kiɛ kɔn la ǹ mɛn pinaa, n nə́ n duri, n tá re doɛ̃ bɛa pinaa.»

²⁶Izirayeli gána a kii lɛ tɔ́n pɛ a kiodɛnaa goon ne: «Misee kũ n wo ne kiwi lɛ a kiã Amɔn laanka maa nɛgiĩ Yoasi li.

²⁷N pɛ ǹ nɛ, mà kii mà ǹ giĩ kɛ da kòso-n. Ǹ kòso nɛn màn-bii laanka ǹ mu kɔ la, yǎa ma boe zia la ma die, ma din yii lɛa.»

²⁸Misee tɔ́n pɛ kii lɛ nɛ: «Bɛ̀ n dɔ woo zia lɛ la, n nə ń bɔyaa ń din yii lɛa sonbore, Dɛnaa Lawa bie á masɛ da boo lɛ a diɛ ganaa wa. Misee wusoo á pɛ mà zaman lɛ din tumaa nə n too da!»

²⁹Bɛ kio, Izirayeli gána a kii lɛ laanka Zudaa gána a kii Zozafati woo zia lɛ da Ramɔti kiwi Galaati gána nɛ.

³⁰Izirayeli gána a kii lɛ pɛ Zozafati ni: «Masɛ n die n din biɛ ka sɔraasi kooro ne, minin baran ma dɔ̃ wa, ma dɔ zia lɛ baa. Sɛnɛ, nsɛ nə n kii mɔnaan wɔ.» Izirayeli gána a kii lɛ nə́ n din baa ka sɔraasi kooro ne, á n dɔ zia lɛ nɛ.

³¹Min mɛnɛn nə goã Siirii gána a kii a ziabaa ǹ wotoron mìi la, min pɔsɔɔ ka paa, Siirii gána a kii lɛ goã á pɛ bɛn manɛ kɛnɛn: «Ka baran zia da sɔraasin laanka ǹ nyɛɛnaandɛnan ganaa wa. Sɛnɛ, ka zia lɛ da Izirayeli gána a kii lɛ dinsɔɔ̃ ganaa.»

³²Ziabaa ǹ wotoro mìilandɛnan lɛn bɛ́ ǹ nə́ Zozafati yɛ, ǹ nə́ taasɛ mà Izirayeli gána a kii lɛ n ka a din ni. Ǹ nə́ yoo ǹ nə́ tele a ganaa ǹ nə́ die zia biɛ a ganaa, yǎa Zozafati bɔ á mɛ la a tá n lɛ dii.

³³Ǹ bɛ́ ǹ nə́ dɔ̃ ǹ mɛn waáraa, mà Izirayeli gána a kii kɛ bie wa, ǹ nə́ n lɛ goã a ganaa.

³⁴Sɛnɛ Siirii minin sɔraasi goon sa zũ tapaan kɛnɛn, a gɔn kiɛ̃ á woo zɛnɛ ka Izirayeli gána a kii lɛ nɛ, a ziabaa ǹ mɔnaa a bǎã koo ganaa. Min mɛn bɛ́ kii lɛ a ziabaa ǹ wotoro diɛ baa-a, kii lɛ tɔ́n pɛ bɛ nɛ: «N lɛ goa n soo n nə n bɔ ka ma nɛ zia dù lɛ nɛ, a giala gɔn n ma kũ.»

³⁵Zia lɛ goã á wɔ̃ bɛa pinaa kɛ lɛ nɛ taãn-taãnɛ, yǎa ǹ nə́ kii lɛ toa a ziabaa ǹ wotoro ne, Siirii minin lɛn yɔrɔ-a. Sɛnɛ wasamiɛ̃nɛ, kii lɛ gã. A kiɛ lɛ bǎã lɛ goã á mà bɔ, á baa si á kaa tán ziabaa ǹ wotoro lɛ gɔ́ɔ̃ nɛ.

³⁶Wasa a yii siɛ̃ biikoo li, lɛ-dɛ bɔ Izirayeli minin bǎã nɛ mà didie nə n bɔyaa a wo a kiwi, didie nə n bɔyaa a wo a gána nɛ!

³⁷Kii Akaabu a gɛ̀ lɛ kio, ǹ nə́ daa ká a gere ne Samarii kiwi, ǹ nə́ bĩ walan.

³⁸A minin toa mà pii boe Akaabu a ziabaa ǹ wotoro lɛ ganaa, Samarii pɛrɛ lɛ-a, ginin man nə́ goã a mà piɛ̃, lɔ kɔrɔn man nə́ goã n zoe pɛrɛ lɛ nɛ, ka Dɛnaa Lawa goã á pɛ lɔn.

³⁹Akaabu sii gialakunun mɛnɛn zɛnaa, a màn mɛn yii zɛnaa, a kion mɛn dɔ á don a díi sɔ kaa la nyaǹ lɛa, a kiwin mɛnɛn koa, bɛ yii boo tá kiɛ̃-n sɛ́wɔ kɛ nɛ, boo diɛ Izirayeli kiin wɔ paǹ li.

⁴⁰Akaabu bɛ́ á woo ǹ digolon li, a nɛgiĩ Ahaazia na á giã a bǎã nɛ kiibaa la.

⁴¹Izirayeli gána a kii, Akaabu a kiibaa lɛ̀ siibaa ǹ wɔ, Azaa a nɛgiĩ Zozafati kii baa Zudaa gána mìi la.

⁴²Zozafati bɛ́ kii biɛ, bɛ̀ a lɛ̀ pɔsɔɔ ka sooro ne. A na á kiibaa zɛnaa lɛ̀ fuəwensooro Zeruzalɛmu kiwi. Ǹ dan tɔ na á goã Azubaa, Siili a nɛlɔ nɛ.

⁴³Zozafati na á ǹ di a tɔ wɔ ǹ gɔn saa, a ǹ kɔn toa walan wa. Màn mɛn bɛ́ pepere Dɛnaa Lawa yɔrɔ-a, a na á goã bɛ zɛnɛɛ.

⁴⁴Sɛnɛ wúlu bɔ ǹ bǎãn mɛnɛn nə goã ǹ tan, bɛn nə papaã wa. Zaman lɛ na á goã tɔn woe wúlu boe bɛa wúlu bɔ ǹ bǎãn lɛn la, ǹ da yon gìĩ kɔɔ̃n tã ǹ la.

⁴⁵Zozafati goã là nyantoro la, a laanka Izirayeli gána a kii bii ni.

⁴⁶Zozafati sii gialakunun mɛnɛn zɛnaa, a tɔ bɔ ǹ siin mɛnɛn zɛnaa, a zian mɛnɛn baa, bɛn tá kiɛ̃ nɛ sɛ́wɔ kɛ nɛ, boo diɛ Zudaa kiin wɔ paǹ li.

⁴⁷Min mɛnɛn nə goã wo dì la ǹ kɔrɔbaa zɛnɛɛ, Zozafati ǹ di Azaa a biikoo li, bɛn gialakunun mɛnɛn nə n si, ǹ nə́ goã, Zozafati bɛn yii papaã á ǹ bɔ gána lɛ nɛ.

⁴⁸Bɛa biikoo li kii goã koa nɛ Edɔmu gána mìi la wa. Gánadɛnaa dinsɔɔ̃ na á goã a tan, Zudaa n kii bɔ á koa.

⁴⁹Zozafati mu la ǹ goo zɛnaa, bǎã sɔsɔɔ zii tɔ wɔ ǹ wɔn lɛa, mà ǹ wo ga sana li Ofiiri kiwi. Sɛnɛ, ǹ boo la ǹ nə woo wa, a giala, goon lɛn nə́ ziziɛ̃ Esiɔn-Gebɛɛrɛ.

⁵⁰Akaabu a nɛgiĩ Ahaazia tɔ́n pɛ Zozafati nɛ: «Maa dí-nyalin tá re we mu la ǹ goon lɛn nɛ kun ka n dí-nyalin lɛn nɛ, ǹ woo. Sɛnɛ Zozafati lɛ kɔ wa.»

⁵¹Zozafati gã, ǹ nə ǹ di-golon bĩ maa, ǹ na a dɔ bĩ walan, "Davida a kiwi". A nɛgiĩ Zoraamu na á giã a bǎã nɛ, kiibaa la.

⁵²Zudaa gána a kii Zozafati a kiibaa lɛ̀ fulusɔbaabaa ǹ wɔ, Akaabu a nɛ Ahaazia kii baa Izirayeli gána mìi la, Samarii kiwi. A na á kiibaa zɛnaa Izirayeli gána mìi la lɛ̀ paa.

⁵³Sii mɛn bɛ́ baraa Dɛnaa Lawa yii li, a na á goã bɛ zɛnɛɛ. A na á ǹ di laanka ǹ dan a tɔ wɔ ǹ gɔn saa. Nebaati a nɛgiĩ Zeroboamu mɛn lɛ goã á Izirayeli minin kaa sii baraa zɛnaa ganaa, Ahaazia bɛ lɛ dɔ a tɔ wɔ ǹ gɔn saa.

⁵⁴Ahaazia *Baali guguru kɔ, á dí nya nɛ. Á wɔ Izirayeli a Lawa, Dɛnaa Lawa lon, ka ǹ di lɛ dɔ goã á zɛnaa lɔn.