Read Samo, Southern Kiin1 5 Bible Online

Kiin1 5 - Samo, Southern bible

Kiin1 5

¹A kũ tà kɛ ganaa ǹ nə́ bíi Efrati a wo Filisiti minin gána laanka Ezipti gána gèlè yaa, gánan mɛnɛn bɛ́ walan, Salomɔn nə́ ǹ yii kaa a pàã giulun. A Salomɔn yii toa koo, maǹ nə́ goã dí nyɛɛ nɛ miɛ̃, ǹ nə́ nyín giɔ̀mɔ sarɛɛ la.

²Salomɔn a kion a pinin goon màn-bii na á goã *wùsu sonbore tɔnɔ manangɔrɔ, wùsu tɔnɔ fulukiwisi,

³dii toe kasiɛ̃ fù, zìã dii fuə ka sère paabiɛ nɛ. Bɛa tɔɔn kɛn dininsɔɔ̃nɔn bie wa, yuùnun dɔn tán, tiaãn nɛ, woreen ne ka màn kanaan mɛnɛn bɛ́ ǹ tá ǹ toe.

⁴A giala, tà mɛn bɛ́ ǹ nə́ bíi Efrati, màn mɛn tumaa bɛ́ bɛa gusin a lɛ̀gɔn la, a kũ Tifusaa kiwi ganaa yǎa Gaazaa Salomɔn na á goã bɛ yii mìi la. Kiin mɛnɛn nə goã tà lɛ lɛ koro-a, á goã bɛn mìi la. Là nyantoro goã a bii ni ka a lɛ-a ǹ gánan tumaa nɛ.

⁵Salomɔn a yiikoonaabaa tumaa gɔ́ɔ̃ nɛ, a n kuĩ Dan ganaa, a wo Bɛɛr-Sebaa yia, Zudaa minin lɛn laanka Izirayeli minin lɛn didie na á goã yii nyɛɛ la, ǹ *rezɛ̃ da laanka ǹ gɔ́rɔ da giulun.

⁶ Ziabaa ǹ wotoro gũ ǹ sùin kaa ǹ bǎã goã Salomɔn lon, sùi duu pusi (40 000) ń boe la a wɔ a nɛ. Min mɛnɛn nə goã dii Salomɔn a sùin la, bɛn man min duu fulupaa (12 000).

⁷Salomɔn min fulupaa mɛn koa gánadɛnan lɛa, bɛn man nə́ goã Salomɔn lɛ laanka a màn-bii kun wolen bii boe diɛ kɔn la mui gogoon. Ǹ goã toɛ màn kɔn tá nyaabiɛ a ganaa wa.

⁸*Ɔrzi mɛn laanka làpaa mɛn bɛ́ ǹ tá koe sùin laanka tɔɔ kɔsɔn la, gánadɛnan man nə́ goã die kii lɛ yiɛ a bǎã nɛ ka bɛn nɛ, a kɔnpɛ ka a din a gɔn waa nɛ.

⁹Lawa Salomɔn yiri bũ, á sii-doɛ̃ gole laanka yiridɛnaabaa gole kɔ la ka sii-doɛ̃-gole nɛ a ná a ba n zoɛ̃ doɛ̃ wa.

¹⁰Sii-doɛ̃ wolen mɛnɛn tumaa bɛ́ lɛ̀giala-n, ka Ezipti gána nɛ, Salomɔn a sii-doɛ̃ la bɛn yii wɔ nɛ.

¹¹ A sii-doɛ̃ la min tumaa wɔ nɛ. Etan mɛn nə́ ke boe Eziraa, a sii-doɛ̃ la bɛ wɔ nɛ, ka Eman wɔ nɛ, Kalkɔli wɔ nɛ, Dardaa wɔ nɛ, kɛn Mawoli a nɛn lɛa. Gánan mɛnɛn tumaa da bii, bɛn yii ná a tɔ ma.

¹² Salomɔn na á suusu duu sɔɔ da (3 000). A na á loe duu goon ka sooro lɔ (1 005).

¹³Á boo da dan wɔ gɔn la: A n siɛ Liban da kaka kɛ ganaa a wo *izopi da kɛ yaa boe kungɔnɔn ganaa. Á boo da tɔɔ gòã siinaan wɔ gɔn la, ka bàanan nɛ, ka tɔɔ nɔ̀ giɛɛraa tán wolen laanka zɔ̀n nɛ.

¹⁴Kanaa a kiin mɛnɛn tumaa Salomɔn a sii-doɛ̃ lɛ boo ma, bɛn tumaa minin dia ǹ nə́ woo ǹ too kɔ a lon.

¹⁵Tiiri kiwi a kii Iraamu na á goã Davida a giaára lɛa miɛ̃ duduu. A bɛ́ á ma mà ǹ nə́ Salomɔn koa kii lɛa ǹ di bǎã nɛ, á ná a dí-nyalin dia Salomɔn li bɛ taman yii.

¹⁶Salomɔn dɔ minin dia pii Iraamu ni:

¹⁷— N tá doɛ̃, ma di Davida lɛ boo la á kion dɔ Dɛnaa Lawa, a Lawa wɔ lɛa wa. A giala a zɔ́ɔn mɛnɛn nə goã a lɛnpɛnɛ, bɛn nə goã toɛ ka zia-n wa, yǎa Dɛnaa Lawa bɛ́ á toa Davida boo ǹ la ǹ mɛn waáraa.

¹⁸Sɛnɛ kanna, Dɛnaa Lawa susui kɔ masɛ la paǹ yii li. Maa zɔ́ɔ banban wa, bɔ̀n dɔ wɔlɔ á lui ni ma ganaa.

¹⁹ Bɛ lɛ nɛ, Dɛnaa Lawa lɛ, maa Lawa lɛa, ma gɔ́ɔ̃ na a ganaa ma kion dɔ a tɔ la a kɔnpɛ ka a boo kɛ nɛ, Dɛnaa Lawa din goã á pɛ ma di Davida nɛ kɛnɛn: «N din a nɛgiĩ mɛn lɛ á ke má n die diɛ n bǎã nɛ n kiibaa lɛ la, bɛ lɛ n die bɛa kion lɛ doe ma tɔ la.»

²⁰Sisia, minin kaa Liban da kaka kɛ a kurii ganaa ǹ kɔ ma la. Maa dí-nyalin tá re dí nyɛɛ kun ka n wɔn lɛn nɛ. N bɛ́ re saraa lɛ mɛn pii, ma á die bɛ lɛ piɛ̃ koe n dí-nyalin lɛn la. A giala n tá doɛ̃ mà wɔsɛn min kɔn ba da kuri doɛ̃, ka Sidɔn minin lɛn bɛ́ boe la lɔn wa.

²¹Iraamu bɛ́ á Salomɔn a boo lɛ ma lɔn gɔrɔ, a foo yii kɔɔ̃n kɔ, á pɛ: «Dɛnaa Lawa mɛn nɛgiĩ sii-doɛ̃ wole kɔ Davida la, á giã bɛa zaman damata kɛ lɛ mìi la, barka tá bɛ ganaa pelo!»

²²Iraamu minin dia woe pii Salomɔn nɛ: «Boo lɛ dɔ ma li. Ń bɛ́ giɛ da kaka gɔn laanka siprɛsi gɔn mɛn yii li, ma á re bɛ koe n la.

²³Maa dí-nyalin tá re gɔn lɛ goɛ Liban, ǹ wo-n kɔ̀ mu lɛ-a. N bɛ́ re bǎã mɛn nyɛɛ ma nɛ, maa dí-nyalin lɛn tá re gɔn lɛ yii kɔn, ǹ kaa mu la yǎa walan. Maa dí-nyalin tá re ǹ fore walan, n dɔ wɔ n nə ǹ goa. Man giɛ li máa n dɔ màn-bii kɔ maa minin la.»

²⁴Bɛa biikoo li, Salomɔn bɛ́ giɛ da kaka gɔn laanka

²⁵siprɛsi gɔn lɛ mɛn li, Iraamu bɛ kɔ la. Salomɔn tɔ́n *belee tɔnɔ duu sɔrɔ (6 000) kɔ Iraamu la a minin màn-bii lɛa, ka *olivie nyɔɔ litiri biɛmanangɔrɔ (900) nɛ. Lɛ̀ bɛ́ boe lɔn, Salomɔn na á goã bɛ lɛ koe Iraamu la.

²⁶Dɛnaa Lawa sii-doɛ̃ kɔ Salomɔn la, ka a bɛ́ á goã á pɛ-n lɔn. Iraamu laanka Salomɔn bii goã siĩn parsiini, ǹ dinin paanan nə́ lɛ-kɔ wɔ kɔn nɛ.

²⁷Kii Salomɔn lɛ minin bɔ Izirayeli gána kuturu ni, á ǹ kaa pàã dí ganaa. Bɛa minin lɛn man nə́ goã min duu pɔsɔɔ (30 000).

²⁸ Salomɔn na á goã ǹ dia boboe Liban gána nɛ, mui goon, min duu fù. Maǹ nə́ goã mui goon zɛnɛɛ Liban, ǹ nə́ mui paa zɛnɛɛ piɛ. Adoniramu na á goã pàã dí mìi la.

²⁹Min duu pɔsɔbaa (70 000) na á goã Salomɔn lon, guĩ goɛ, min duu pɔkiwisi (80 000) na á goã kɔlɔ sɛlɛ kele la.

³⁰Salomɔn goã á min duu sɔɔ ka biɛsɔɔ (3 300) mɛn bɔ, á ǹ kaa pàã dí-nyalin lɛn mìi la, bɛn ba a-n wa.

³¹Kii lɛ mà ǹ kɔlɔ sɛlɛ lɛ bɔ dadara, siĩni sɔnbɔraanɛ, Lawa a kion lɛ a giala wɔ ǹ wɔ lɛa.

³²Salomɔn a dí-nyalin lɛn nɛ, ka Iraamu wɔn nɛ kun ka Gebaali kiwi minin ni, ǹ nə́ bɔ ǹ nə́ kaa kɔlɔ sɛlɛɛ laanka gɔn yɔrɔ boe la Lawa a kion lɛ a dɔ ǹ wɔ lɛa.