Read Samo, Southern Kiin1 6 Bible Online

Kiin1 6 - Samo, Southern bible

Kiin1 6

¹Kii Salomɔn lɛ Dɛnaa Lawa a kion lɛ a dɔ giala kɔ, bɛ̀ Izirayeli minin soo Ezipti gána nɛ a lɛ̀ biɛsii ka pɔkiwisi (480) ni. D+i lɛ na á n giala kɔ *Zibu mui ni, mui mɛn bɛ́ lɛ̀ a mui a paabaa ǹ wɔ lɛa. Bɛa biikoo lɛ li, bɛ̀ Salomɔn dɔ a tá Izirayeli gána mìi la a lɛ̀ siibaa ǹ wɔ nɛ.

²Kion mɛn lɛ bɛ́ Salomɔn dɔ Dɛnaa Lawa wɔ lɛa, a gùrù sasa na á goã mɛtərə pɔsɔɔ, a gùrù kunun na á goã mɛtərə fù a wo lon na á goã mɛtərə fulusooro.

³Dàã mɛn bɛ́ n tá niɛ̃ n tɔn dɔ kion lɛ a gɔ́ɔ̃ gole lɛ nɛ, bɛa gùrù sasa n mɛtərə fù kion lɛ a gùrù kunun li, a kununbaa n mɛtərə sooro kion lɛ a sasabaa li.

⁴Salomɔn fenɛtərən kaa kion lɛ-a, á lɛ pìi wɔ ǹ lɛ. Bɛa lɛ pìin lɛn man fɔlɔ lɛa, ǹ là n kekerekaã nɛ.

⁵Á kionən dɔ kɔn mìi-n sɔɔ, á doa kion lɛ gɔ̀nɔn ganaa á ná a lɛnpɛnɛ nɛ. Maǹ nə́ goã doa nɛ kion lɛ a gɔ́ɔ̃ gole lɛ-a ka kion gialaan bǎã sonbore kɛ nɛ.

⁶Tán kionən lɛn wo lon na á goã mɛtərə paa ka talɛɛ a bii wɔn wo lon na á goã mɛtərə sɔɔ, a lalan wɔn wo lon na á goã mɛtərə sɔɔ ka talɛɛ. Maǹ nə́ goã, ǹ nə́ kion lɛ kìri da kanaa ǹ ná a lɛnpɛnɛ nɛ, màn mɛn bɛ́ toɛ mɛnɛn mìi baran goã kion gɔ̀nɔn lɛ-n wa.

⁷Kion lɛ, ǹ bɛ́ doe, maǹ ná a dɔ ǹ kɔlɔ yii sɛlɛ lenlen, ǹ nə́ tɔ́n goa ǹ nə́ dɔ nɛ. Bɛ lɛ na á toa, ǹ bɛ́ doe, min nə yele wuu ma wa, min nə sukun wuu ma wa, min nə fɔlɔ màn kɔn wuu ma wa.

⁸Kiɛnlɛ goon na á goã kion lɛ a gusin a lɛ̀gɔn la, tán kionən lɛn wɔ ǹ bǎã lɛa. Dii ǹ bǎã goã woe bii kionən lɛn laanka lalan wɔn lɛn ganaa.

⁹Salomɔn bɛ́ á kion lɛ dɔ á nya, á da kaka gɔn baa a pɛlɛ laanka a mɛnɛn lɛa, á kaa la.

¹⁰Á tán-a kionən dɔ á kion lɛ lɛnpɛnɛ nɛ, ǹ wo lon na á goã mɛtərə paa ka talɛɛ. Da kaka gɔnɔn man nə́ goã ǹ kuĩ doɛ kion lɛ ganaa.

¹¹Dɛnaa Lawa tɔ́n boo da ka Salomɔn nɛ; á pɛ nɛ:

¹²«Kion kɛ lɛ n tá doe, bɛ̀ ń tɔ wɔ á kɔnpɛ ka maa landa boon ne, ń maa sii yɔrɔ bɔ ǹ boon kɛn sii zɛnaa, ń maa gɔn waa ǹ boon kɛn tamaa ń kɔ ǹ lɛ, ma goã má boo mɛn pɛ n di Davida nɛ, ma á die bɛ zɛnɛɛ n din ni.

¹³Man die goɛ̃ Izirayeli minin lɛn bii, ma ba re maa zaman Izirayeli minin lɛn toɛ walan wa.»

¹⁴Salomɔn Lawa a kion lɛ dɔ á nya.

¹⁵Á tɔ́n da kaka gɔn patara patara naa kion lɛ gɔ̀nɔn ganaa a gɔ́ɔ̃ nɛ, a saa a tán ganaa a wo a pele yaa lon. Á siprɛsi gɔn patara patara dɔ naa tán kion lɛ gɔ́ɔ̃ nɛ.

¹⁶ Bɛ kio, kion gialaan bǎã mɛn bɛ́ a gɔ́ɔ̃ n mɛtərə fù, Salomɔn da kaka gɔn patara patara naa tán bɛ nɛ, á kɛ dɔ naa a gɔ̀nɔn ganaa á woo kɛ pele kũ. Á bɛa kion gialaan lɛ gɔ́ɔ̃ zɛnaa, a baa bǎã sonbore sonbore lɛa.

¹⁷Kion gialaan bǎã sonbore sonbore lɛ bɛ́ doanɛ kion lɛ a gɔ́ɔ̃ gole mɛn ganaa, bɛa sasabaa n mɛtərə fùə.

¹⁸Ǹ kion lɛ gɔ́ɔ̃ zɛnaa ka da kaka gɔnɔn mɛnɛn nɛ, ǹ nə́ pàan nyínin laanka da buũ lɛ tii wolen sɛlɛ bɛn la. A yii na á goã da kaka gɔn lɛa, yii goã kɔlɔ lɛ yii wa.

¹⁹Kion gole lɛ gɔ́ɔ̃ nɛ, Salomɔn bǎã sonbore sonbore yɔrɔ bɔ Dɛnaa Lawa a *lɛ kɔ kɔn la ǹ goo lɛ a da ǹ bǎã lɛa.

²⁰Bɛa bǎã lɛ gɔ́ɔ̃ a gùrù sasa na á goã mɛtərə fù a gùrù kunun na á goã mɛtərə fù, a wo lon dɔ na á goã mɛtərə fù, sana yoreen yoreen na á goã a paǹ yii la. Bɛa bǎã lɛ yɔrɔ-a, da yon giĩ kɔɔ̃n tã ǹ bǎã tan da kaka gɔn lɛa, ǹ nə sana kaa bɛ dɔ la.

²¹Salomɔn sana yoreen yoreen kaa kion lɛ gɔ́ɔ̃ nɛ, á sana zɔrɔkan kerekaã kion gialaan bǎã sonbore sonbore lɛ a wɔ ǹ bǎã nɛ, á sana dɔ kaa a gɔ́ɔ̃ la.

²² A na á goã á sana kaa kion lɛ din kuturumaa gɔ́ɔ̃ nɛ. Màn giĩ kɔɔ̃n tã ǹ bǎã ke bǎã sonbore sonbore lɛ wɔ lɛa, á sana kaa bɛ yii la.

²³ Salomɔn lon màn yiikoonaan nyínin zɛnaa màn paa ka *olivie gɔn nɛ, á n kaa bǎã sonbore sonbore lɛ nɛ. Ǹ là a wo-lon na á goã mɛtərə sooro.

²⁴Lon màn yiikoonaa nyín lɛ a nyàa gogoonmaa na á goã mɛtərə paa ka talɛɛ. A saa a nyàa lɛwɔn lɛn goon ganaa a wo dɔ lɛwɔn kɔsɔ kɛ dɔ ganaa mɛtərə sooro ne.

²⁵Lon màn yiikoonaa nyín lɛ a kɔsɔ kɛ dɔ wɔ na á goã mɛtərə sooro. Lon màn yiikoonaa nyínin lɛn goleebaa na á goã goon, ǹ nə́ kɔn bɔ dɔn.

²⁷Salomɔn lon màn yiikoonaan nyínin lɛn kaa Lawa a kion lɛ bii a gɔ́ɔ̃ nɛ. Lon màn yiikoonaan lɛn nyàan lɛ na á goã boe ne. Lon màn yiikoonaan nyínin lɛn gogoonmaa nyàa lɛwɔn goon nə́ goã ǹ doɛ kion lɛ wàãn ganaa. Ǹ nyàa lɛ a màn paa mɛn bɛ́ dia-n woe kion lɛ bii, bɛa nyàan lɛn nə́ goã n loe kɔn ganaa.

²⁸Salomɔn sana kaa lon màn yiikoonaa nyínin lɛn la.

²⁹Salomɔn nyaǹ kaa Lawa a kion lɛ gɔ̀nɔn tumaa la. Bɛa nyaǹan lɛn man nə́ goã lon màn yiikoonaan nyínin lɛa, ka sèwo dan laanka da buu lɛ tii wolen nyínin ni.

³⁰Á sana kaa kion lɛ a tán yii la, kion lɛ a gɔ́ɔ̃ gole lɛ a tán nɛ, ka kion gialaan bǎã sonbore sonbore lɛ wɔ nɛ.

³¹Á olivie gɔn goo lɛ paa wɔ bǎã sonbore sonbore lɛ a kiɛnlɛ lɛ. Goo lɛ laanka a bìbìn lɛn bɛ́ bǎã mɛn siɛ, a tá kion lɛ a gùrù kununbaa a na kɔn sooro goon boe.

³²A na á goo lɛ paa lɛ zɛnaa ka olivie da nɛ. Á lon màn yiikoonaa nyínin sɛlɛ goo lɛ ganaa, ka sèwo dan laanka da buu lɛ tii wolen nyínin ni. Á sana kaa ǹ tumaa la.

³³A din yɔrɔ goon la á goo lɛ paa zɛnaa ka siprɛsi gɔn nɛ á wɔ kion gole lɛ a kiɛnlɛ lɛ. Gɔn mɛn bɛ́ goo lɛ kuĩ gole ne, bɛ n olivie gɔn lɛa. Goo lɛ a gogoonmaa nə n bibiĩ tàan màn paa la.

³⁵Ǹ nə́ lon màn yiikoonaan nyínin sɛlɛ la, ka sèwo dan laanka da buu lɛ tii wolen nyínin ni. Ǹ nə́ sana kaa bɛa nyínin bǎã lɛ la.

³⁶Bǎã mɛn bɛ́ Lawa a kion lɛ yɔrɔ-a, ǹ nə́ kungɔn dɔ walan. Bɛa kungɔn lɛ a koa na á goã wowee ne kɔn bii ni: kɔlɔ koa sɔɔ, da kaka gɔn koa goon.

³⁷Dɛnaa Lawa a kion lɛ giala na á n wɔ Zibu mui ni, kii Salomɔn a kiibaa a lɛ̀ a siibaa ǹ wɔ li.

³⁸*Bulu mui ke, lɛ̀ a mui a kiwisibaa ǹ wɔ lɛa, bɛa mui lɛ gɔ́ɔ̃ nɛ, Salomɔn a kiibaa a lɛ̀ fùlugoon baa ǹ wɔ li, kion lɛ a dí yii nya yoreen ne, a yɔrɔ li. Salomɔn na á Lawa a kion lɛ dɔ lɛ̀ sɔbaa gɔ́ɔ̃ nɛ.