Read Samo, Southern Kiin2 1 Bible Online

Kiin2 1 - Samo, Southern bible

Kiin2 1

¹Izirayeli gána a kii Akaabu a gɛ̀ kio, Moabu gána nə́ ń gòãn dii Izirayeli gána ganaa.

²Ahaazia bɔ a sanabolo kion banbaran la lon, á mɛnaa. Mɛnaa lɛ wɔ a ganaa parsiini. Bɛ lɛ nɛ, á tɔ́n minin dia mà ǹ wo nɔ̀n da Ekrɔn kiwi a dì Baali-Zebubu la, mà asɛ á die n boe a mɛnaa lɛ-n ya.

³Sɛnɛ Tisibu min Yilii lɛ, Lawa a boo gii-dali lɛa, Dɛnaa Lawa a lon a dia dí-a wole goon pɛ bɛ nɛ, mà a wo n da Samarii gána a kii a dia dí-a wolen lɛn lɛ, a pɛ ǹ nɛ kɛnɛn: — Lawa na a banban Izirayeli gána nɛ ka tá nɔ̀n diɛ la wa, yǎa ka woe Ekrɔn kiwi a dì Baali-Zebubu li?

⁴Bɛ lɛ na á toa, Dɛnaa Lawa n pii: «Kii lɛ mɛ tán piì mɛn la, a die yui a n bɔ bɛ la doo wa, a giala a n die giɛ̃ a giala yii li.» Yilii dɔ́ kiɛ̃ á woo.

⁵Dia dí-a wolen lɛn nə́ n bɔyaa ǹ nə́ daa Ahaazia li, á nɔ̀n da ǹ la: «Wàa na á baa ka n bɔyaa ka daa?»

⁶Ǹ nə́ kii lɛ lɛ si mà giĩ goon na á daa n da ǹsɛn lɛ, á pɛ ǹsɛn man kɛnɛn: — Kii mɛn ka dia, ka n bɔyaa ka wo bɛ li ka pɛ nɛ: «Dɛnaaa Lawa mà Lawa na a banban Izirayeli gána nɛ a tá nɔ̀n diɛ la wa, yǎa a woe Ekrɔn kiwi a dì Baali-Zebubu li? Bɛ lɛ nɛ, a mɛ tán piì mɛn la, a die yui a n bɔ bɛ la doo wa, a giala a n die giɛ̃ a giala yii li.»

⁷Kii lɛ tɔ́n nɔ̀n da ǹ la kɛnɛn: «Giĩ kɛ lɛ, á daa n da ka lɛ, á bɛa boon kɛn lɛn pɛ ka nɛ, a n lɔn?»

⁸ Dí-pɛlin lɛn ná a lɛ si mà mɔnaa kadɛnaa n bɛa giĩ lɛ-a, ka ki maabɛlɛ nɛ a binbin ni. Kii lɛ tɔ́n nə n toa: «Tisibu kiwi min Yilii ni.»

⁹Kii lɛ tɔ́n sɔraasi posooro mìilandɛnaa goon laanka a kiodɛnaa posooro dia, mà ǹ wo Yilii gialaa. Yilii na á goã giã-n tán kele mìi ni. Sɔraasin goledɛnaa lɛ pɛ Yilii ni: «Lawa a min, kii mà n da gisĩ.»

¹⁰ Sɛnɛ, Yilii sɔraasi posooro mìilandɛnaa lɛ lɛ si á pɛ: «Bɛ̀ Lawa a min ni ka masɛ-n sonbore, tɛ bɔ lon a da n kũ, n din laanka n kiodɛnaa posooro lɛ nɛ!» Boo lɛ a diɛ kio, tɛ bɔ lon á kũ, a din laanka a kiodɛnaa posooro lɛ nɛ.

¹¹Bɛ kio, kii wusoo doo á sɔraasi posooro mìilandɛnaa goon laanka a kiodɛnaa posooro dia woe Yilii gialaa. Sɔraasi posooro mìilandɛnaa lɛ boo saa á pɛ Yilii ni: «Lawa a min, kii mà n nə n nanaa n da gisĩ.»

¹²Sɛnɛ, Yilii nə́ ǹ lɛ si á pɛ: «Bɛ̀ masɛ n Lawa a min lɛa sonbore, tɛ bɔ lon a n kũ, n din laanka n kiodɛnaa posooro lɛ nɛ!» Boo lɛ a diɛ kio, tɛ bɔ lon á kũ, a din laanka a kiodɛnaa posooro lɛ nɛ.

¹³Kii lɛ sɔraasi posooro mìilandɛnaa lɛ a sɔɔbaa ǹ wɔ dia doo, a laanka a kiodɛnaa posooro ne. Bɛa sɔɔbaa ǹ dɔn wɔ lɛ woo, sɛnɛ a bɛ́ á dɔ, á na á kaa tán Yilii giulun, a ná a nyankɔ á pɛ: «Lawa a min, n dí-nyali posooro ke, toa barka goã bɛn yiikoonaabaa nɛ n gɔn, ka masɛ dɔ wɔ nɛ.

¹⁴Sɔraasi mìilandɛnaa min paa mɛn da bibinaa nɛ, á ke, tɛ bɔ lon á bɛn kũ, ǹ laanka ǹ kiodɛnan nɛ. Sɛnɛ, kanna, toa masɛ a yiikoonaabaa guguru kɔ n gɔn.»

¹⁵Dɛnaa Lawa a lon a dia dí-a wole tɔ́n boo da ka Yilii ni á pɛ: «Da gisĩ, n dɔ a ganaa n woo, n baran nyɛ́ɛ baa-n wa.» Bɛa biikoo li, Yilii tɔ́n yoo, á gisĩ á dɔ a ganaa á woo kii lɛ li.

¹⁶Yilii pɛ kii lɛ nɛ: «Dɛnaa Lawa mà n bɛ́ ń minin dia woe nɔ̀n diɛ Ekrɔn kiwi a dì Baali-Zebubu la, mà Lawa na a banban Izirayeli gána nɛ min nə́ boe la a nɔ̀n da la wa? Bɛ lɛ nɛ, n mɛ tán piì mɛn la, n ba re yui n nə n bɔ bɛ la doo wa, a giala n tá re giɛ̃ a giala yii li.»

¹⁷Dɛnaa Lawa goã á Yilii da boo mɛn lɛ a pɛ ganaa, Ahaazia gã á kɔnpɛ ka bɛ nɛ. Ahaazia din a nɛgiĩ bɛ́ a bie á goã a tan wa, ǹ dɔɔ̃ngiĩ Zoramu na á kii baa a bǎã nɛ, Zozafati a nɛgiĩ Zoraamu a kiibaa lɛ̀ paabaa ǹ wɔ li Zudaa gána mìi la.

¹⁸Ahaazia sii gialakunun mɛnɛn zɛnaa, a màn mɛn yii zɛnaa, bɛ tá kiɛ̃-n sɛ́wɔ kɛ nɛ, boo diɛ Izirayeli kiin wɔ gɔn la.