Read Samo, Southern Kiin2 10 Bible Online

Kiin2 10 - Samo, Southern bible

Kiin2 10

¹Akaabu a nɛgiĩn man nə́ goã min pɔsɔbaa Samarii kiwi. Zewu sɛ́wɔn kiɛ̃ á ǹ dia Samarii. A na á bɛa sɛ́wɔn lɛn dia kiwi lɛ a min golen la, ka kiwi lɛ a nyɛɛnaandɛnan laanka Akaabu a nɛgiĩn gama walan wolen ne. A na á goã á kiɛ̃ sɛ́wɔn lɛn nɛ:

²«Bɛ̀ sɛ́wɔ kɛ dɔ ka li lɔn gɔrɔ, kaa dɛnaagiĩ lɛ a nɛgiĩn bɛ́ kun ka nɛ, wotoron dɔn bɛ́ ka lon, sùin bɛ́ ka lon, kungɔn bɛ́ kaa kiwi ganaa, ziabaa ǹ mànan bɛ́ ka gɔn,

³ka ga kaa dɛnaagiĩ lɛ a nɛgiĩn bii, ǹ mɛn a sii lɛ bɛ́ piɛ̃ nɛ, á la ǹ miãn manɛ, a peperebaa dɔ la ǹ wɔ nɛ, ka bɛ kũ ka da ǹ di a kiibaa lɛ la. Bɛ kio, ka ziabaa kaa dɛnaagiĩ lɛ a kion minin lɛa.»

⁴Nyɛ́ɛ nə́ ǹ kũ parsiini, ǹ nə́ tɔ́n pɛ kɔn nɛ: «Á ke, kii min paa din boo la ǹ nə́ golee a nyɛɛn wa, wɔsɛn dininmaan kɛn man die boe la wɔ golee?»

⁵Kii a kion mìilandɛnaa nɛ, kiwi lɛ a sii yɔrɔ-bɔle ne, min golen ne, ka kii a nɛgiĩn gama walan wolen ne, bɛn nə́ minin dia woe pii Zewu ni kɛnɛn: «Wɔsɛn ma nə n dí-nyalin lɛa, bɛ̀ n boo woo boo pɛ wɔsɛn manɛ, wɔ á bɛ zɛnɛɛ. Wɔsɛn ba re min kɔn koɛ kii lɛa wa. Bɛ̀ sii mɛn tá siĩni n din yii li, n bɛ zɛnaa.»

⁶Zewu wusoo á sɛ́wɔ paabaa ǹ wɔ dia ǹ la. A n kiɛ̃-n bɛa sɛ́wɔ lɛ nɛ: «Bɛ̀ ka lɛ á kun ka masɛ nɛ, bɛ̀ ka tá ma bɔlɔ sii, ka kaa dɛnaagiĩ lɛ a nɛgiĩn tumaa mìin gũ, ka da ǹ nɛ ma li biɛ̃ kɛnɛn yirəə, Zizereyɛli kiwi.» A da yaa, Akaabu a nɛgiĩn min pɔsɔbaa lɛ na á goã koa nɛ kiwi lɛ a min dadaran li, bɛn nə́ ǹ toe.

⁷Sɛ́wɔ lɛ dɔ ǹ li lɔn gɔrɔ, ǹ nə́ kii lɛ a nɛgiĩn pɔsɔbaa lɛn yii bɔlɔ kuru, bɛ kio, ǹ nə́ ǹ mìin kaa kɛsɛn nɛ, ǹ nə́ ǹ dia Zewu la, Zizereyɛli kiwi.

⁸Dí-pɛli goon daa a boo da Zewu ni: «Ǹ nə́ daa ka kii a nɛgiĩn lɛn mìin ni.» Zewu nə́ n toa: «Ka wo ǹ da kɔn la tán, bǎã paa, kiwi lɛ a kiɛnlɛ-a, yǎa lɛ̀ wɛɛ ma die ǹ yiɛ tán!»

⁹Baayɛlɛ, Zewu soo, á golee a gòãn la, á pɛ zaman lɛ tumaa nɛ: Ka tá pepere! Á ke, ma din ni má ga maa dɛnaagiĩ bɔ a daa ǹ gɔn li, ma din ni má dɛ, sɛnɛ, die na á kɛn tumaa dɛ?

¹⁰Ka dɔ̃ kəni, mà Dɛnaa Lawa a boo goon ba re goɛ̃ kooro lɛ pã baã wa. A boo mɛn yii da Akaabu a kion minin wɔ paǹ li, bɛ goon ba re goɛ̃ kooro lɛ pã baã wa. Dɛnaa Lawa na a dí-nyali Yilii da boo mɛn pɛ ganaa, á bɛ lɛ pã.

¹¹ Bɛ kio, min mɛnɛn tumaa bɛ́ tɔn nə ǹ tan Zizereyɛli kiwi, Akaabu a kion minin lɛa, Zewu nə́ ǹ yii dɛ. Akaabu a min dadaran tumaa nɛ, a kɔn doɛ̃ wolen ne, a wúlu-bɔlen ne, Zewu bɛn kɔn yii toa koo wa.

¹²Bɛ kio, Zewu zii saa mà a n woe Samarii kiwi.

¹³A bɛ́ re doe tɔɔn-lɛduə̃lin zàã bǎã kɛ nɛ, á kaa Zudaa gána a kii Ahaazia dɔɔ̃nɔn lɛ. Zewu nɔ̀n da Ahaazia dɔɔ̃nɔn lɛn la: «Dien man ka kasɛn nɛ?» Ǹ ná a lɛ si: «Ahaazia dɔɔ̃nɔn man ka wɔsɛn nɛ. Wɔsɛn man woe fòo sonbore diɛ kii a nɛgiĩn manɛ, ka kii n dan a nɛgiĩn ni.»

¹⁴Zewu tɔ́n nə n toa: «Ka ǹ kũ ǹ yii n koo.» Ǹ nə́ ǹ kũ ǹ yii n koo, ǹ nə́ ǹ dɛ, ǹ nə́ ǹ goa ǹ nə́ ǹ zũ Bɛti-Ekɛdi a nyankɔrɔ zuzulu kɛ nɛ. Maǹ nə́ goã, min pusi ka paa, Zewu nə ǹ kɔn toa walan wa.

¹⁵Zewu bɛ́ á kiɛ̃ á n bɔ walan, á n da Rekabu a nɛgiĩ Zonaadaabu lɛ, a nyɛɛnɛ die n diɛ lɛ. Zewu fòo da nɛ á pɛ nɛ: «N gɔ́ɔ̃ tá fu masɛ wɔ paǹ li ka maa wɔ bɛ́ fu n wɔ paǹ li lɔn?» Zonaadaabu ná a lɛ si: «Á fu.» Zewu nə́ n toa: «Bɛ̀ n gɔ́ɔ̃ lɛ á fu, n gɔn kɔ ma la.» Zonaadaabu nə́ n gɔn lɛ kɔ la. Zewu Zonaadaabu kũ á da a din genli, a wotoro ne,

¹⁶á pɛ nɛ: «Da kun ka masɛ nɛ, n masɛ a gɔ̀nɔn da ma din-a kɛ yɛ Dɛnaa Lawa a sii wɔ paǹ li.» Bɛ kio, Zewu tɔ́n kiɛ̃ ka Zonaadaabu ni a wotoro lɛ la, á woo ne.

¹⁷Zewu bɛ́ á dɔ Samarii kiwi, Akaabu a kion minin mɛnɛn tumaa goã kiwi lɛ nɛ, ǹ nə́ kanbaa gɛ̀ ganaa, á bɛn yii dɛ lenlen, ka Dɛnaa Lawa goã a ná a boo da Yilii-n lɔn.

¹⁸Zewu zaman lɛ tumaa sɔkɔn á pɛ ǹ nɛ: Akaabu na á *Baali guguru kɔ boɛɛnɛ, Zewu sɛ n die a guguru koe taãn-taãnɛ.

¹⁹Sisia, ka lɛ dia Baali a boo gii-dalin lɛn tumaa la, ǹ da ma li. Min mɛn tumaa bɛ́ dí nyɛɛ Baali lɛ nɛ, min mɛnɛn tumaa bɛ́ a wúlu-bɔlen lɛa, ka lɛ dia bɛn tumaa la, ǹ da ma li. A giala, man giɛ li ma wúlu gole bɔ Baali lɛ nɛ. Min mɛn bɛ́ re wusi a bǎã nɛ, bɛa dɛnaa ba re goɛ̃ a yii n koo wa. Zewu na á bɛ baa yiri lɛa, á n die Baali a dí-nyalin lɛn bɔ̀n biɛ.

²⁰Zewu pɛ: Ka Baali guguru kɔ ǹ lɛ sɔkɔn a lɛ dia. Ǹ nə́ tɔ́n lɛ lɛ dia.

²¹Zewu minin dia woe boo lɛ pii Izirayeli gána tumaa nɛ. Min mɛnɛn tumaa goã dí nyɛɛ Baali ni, bɛn yii daa, ǹ kɔn din goã bɛ̀ a ná a daa wa. Ǹ nə́ kaa Baali guguru kɔ ǹ kion ǹ nə́ pã ka kɛkɛ.

²²Min mɛn goã dì dí nya ǹ mɔnaan mìi la, Zewu tɔ́n pɛ bɛ nɛ: Min mɛnɛn tumaa bɛ́ dí nyɛɛ Baali ni, soo ka mɔnaan lɛn nɛ n nə ǹ kɔ ǹ la. A dɔ soo ka mɔnaan lɛn nɛ, á kɔ ǹ la.

²³Zewu laanka Rekabu a nɛgiĩ Zonaadaabu daa Baali guguru kɔ ǹ kion lɛ nɛ. Min mɛnɛn lɛn bɛ́ dí nyɛɛ Baali ni, Zewu pɛ ǹ nɛ: Ka ga ka dinin bii, kɔntan Dɛnaa Lawa a dí-nyalin tá kànaa kun ka nɛ, hinlaa ǹ tumaa n Baali a dí-nyalin lɛa?

²⁴Bɛ kio, Zewu laanka Zonaadaabu wɔ mà man wúlu boe ǹ nə́ *wúlu màn tiɛ̃. A da yaa, Zewu na á goã á sɔraasi pɔkiwisi doa bii-a kanaa, á pɛ ǹ nɛ: Giĩn mɛnɛn bɛ́ má n die ǹ we ka gɔn, bɛ̀ ka mɛn nə́ toa bɛn goon mɛn nə́ n si ka la á woo, ǹ dɛnaa nyin nə goɛ̃ baa-sili lɛ wɔ bǎã nɛ.

²⁵Ǹ bɛ́ ǹ nə́ wúlu-màn lɛ tã ǹ nə́ nya, Zewu pɛ sɔraasin goledɛnan lɛn laanka ǹ kiodɛnan manɛ: Ka wɔ ka ǹ dɛ, ka baran toa goon nə la a wo wa! Ǹ dɔn nə́ tɔ́n nə ǹ dɛdɛ ka gɔya nɛ, ǹ nə́ ǹ goa ǹ nə́ woo ǹ zũ kanaa. Bɛ kio, ǹ nə́ wusoo ǹ nə́ daa Baali guguru kɔ ǹ kion lɛ nɛ.

²⁶Tíĩn mɛnɛn bɛ́ Baali guguru kɔ ǹ kion lɛ nɛ, ǹ nə́ soo ka bɛn nɛ, ǹ nə́ tɛ da ǹ ganaa.

²⁷Ǹ bɛ́ ǹ nə́ Baali a tíĩn lɛn ziziɛ̃ ǹ nə́ nya, ǹ nə́ Baali guguru kɔ ǹ kion lɛ dɔ wuru, bɛa bǎã lɛ lalaa kɔ ǹ bǎã baa. Bɛa lalaa kɔ ǹ bǎã lɛ goã yǎa á daa dɔ pelo ganaa.

²⁸Zewu na á Baali papaã á bɔ Izirayeli gána nɛ ka bɛa yɔrɔ lɛ nɛ.

²⁹ Sɛn kəni, Nebaati a nɛgiĩ Zeroboamu mɛn lɛ goã á Izirayeli minin kaa sii baraa zɛnaa ganaa, bɛa sii baraan kɛn, Zewu nə n bɔ bɛn wɔlɔ li wa. Diin nɛ nyín sanadɛnan mɛnɛn nə goã Betɛli laanka Dan nɛ, a n bɔ bɛn wɔlɔ li wa.

³⁰Dɛnaa Lawa pɛ Zewu ni: N sii sonbore zɛnaa, sii mɛn bɛ́ pepere ma yii li, n bɛ zɛnaa. N màn mɛn zɛnaa Akaabu a kion minin manɛ, ma n má goã giɛ li miɛ̃ lɛn ka te. Bɛ lɛ tɔ ganaa, Izirayeli a kiibaa lɛ á die goɛ̃ n nɛnyaanan gɔn, yǎa a woe doe n nɔ̀ɔnɔn nɔ̀ɔnɔn ganaa.

³¹Sɛnɛ, Zewu nə n din tamaa á Izirayeli a Lawa, Dɛnaa Lawa lɛ a dí-pɛ zii tɔ wɔ ka a foo din tumaa-n wa. Zeroboamu goã á Izirayeli minin kaa sii baraan mɛnɛn zɛnaa ganaa, Zewu nə n bɔ bɛn wɔlɔ li wa.

³²Bɛa biikoo lɛ li, Dɛnaa Lawa ná a giala kɔ, á màn bɔ Izirayeli gána a golebaa lɛ. Azayeli zia da Izirayeli minin lɛn ganaa, á boo ǹ la Izirayeli gána gèlèn tumaa la.

³³A saa Zurdɛ̃ tà ganaa, dia-n woe lɛ̀ giala li, Azayeli zia da Galaati gána kuturu ganaa á boo la, á da Gaadi minin gána ganaa á boo la, á da Urubɛn tɔrɔn laanka Manaasee tɔrɔn gána ganaa á boo ǹ la, Aroyɛri kiwi ke Arnɔn pɛrɛ li a n siɛ walan ganaa a da kaa Galaati laanka Basan lɛ.

³⁴Zewu sii gialakunun mɛnɛn zɛnaa, a màn mɛn yii zɛnaa, a tɔ bɔ ǹ siin mɛnɛn zɛnaa, bɛ yii tá kiɛ̃-n sɛ́wɔ kɛ nɛ, boo diɛ Izirayeli kiin wɔ gɔn la.

³⁵Zewu gã, ǹ ná a gere bĩ Samarii kiwi. A nɛgiĩ Zoakazi giã kiibaa la a bǎã nɛ.

³⁶Zewu na á lɛ̀ fuəwenkiwisi zɛnaa kiibaa la Izirayeli gána mìi la, Samarii kiwi.