Read Samo, Southern Kiin2 11 Bible Online

Kiin2 11 - Samo, Southern bible

Kiin2 11

¹Ataalii lɛ, Ahaazia ǹ dan lɛa, a bɛ́ á yɛ mà a nɛgiĩ lɛ gã, á yoo á kii lɛ tɔrɔn tumaa bɔ̀n baa.

²Sɛnɛ, ǹ bɛ́ kii a nɛgiĩn lɛn gialaa ǹ dii ǹ mɛn waáraa, kii Zoraamu a nɛlɔ Yosebaa lɛ Ahaazia ǹ miãnɛn lɛa, bɛ Ahaazia a nɛginin Zoasi kũ ka durii ni á bɔ ǹ bii. Ǹ bɛ́ ǹ nə́ kion mɛn bɔ waa ǹ bǎã lɛa, Yosebaa nɛginin lɛ da walan kun ka lɔ mɛn nə́ ke toe. A na á nɛginin lɛ duru Ataalii nyɛɛnɛ bɛa yɔrɔ kɛ lɛ la, bɛ lɛ nɛ, ǹ yɛ ǹ nə́ dɛ wa.

³Nɛginin lɛ goã durii ni Dɛnaa Lawa a kion lɛ nɛ kun ka a tooli lɛ nɛ, lɛ̀ sɔrɔ, bɛ̀ Ataalii dɔ n pàã la gána lɛ nɛ.

⁴A lɛ̀ sɔbaabaa ǹ wɔ, Lawa a wúlu-bɔle Zozadaa minin dia mà ǹ wo ga Sɔraasi paabiɛ mìilandɛnan li ka bǎã-lɛduə̃lin ni. Zozadaa sɔraasi paabiɛ mìilandɛnan lɛn laanka bǎã-lɛduə̃lin lɛn bíi ǹ nə́ daa a din li Dɛnaa Lawa a kion. Á lɛ kɔ wɔ ǹ nɛ, á ǹ kaa liɛ ganaa Dɛnaa Lawa a kion lɛ nɛ, á tɔ́n kii a nɛginin lɛ nyaa ǹ nɛ.

⁵Bɛ kio, á pɛ ǹ nɛ: Ka bɛ́ re sii mɛn zɛnɛɛ, bɛ á ke: Ka mɛnɛn bɛ́ re die dí la *susu ǹ pii pinaa, ka n na kɔn wɔlɔ sɔɔ. Kuru lɛ goon nə wo kii a piɛ lɛduə̃,

⁶kuru lɛ goon nə wo n doa kiɛnlɛ kɛ lɛ-a dia-n woe Suuru kiwi la, goon dɔ wo n doa kiɛnlɛ kɛ lɛ-a bǎã-lɛduə̃lin kion lɛ kio. Ka kɔn bobo kion lɛ a lɛduə̃ ganaa.

⁷Ka mɛnɛn nə́ ke gisĩ dí la susu ǹ pii pinaa, ka n niɛ-n kɔn kuru paa, bɛn die ǹ Dɛnaa Lawa a kion lɛ lɛduə̃ ǹ kii lɛ tamaa.

⁸Ka die ka kii lɛ lɛnpɛnɛ, ziabaa ǹ mànan nə́ didie gɔn, bɛ̀ min mɛn nə́ n mɔrɔ ka ganaa, ka ǹ dɛnaa dɛ a gã. Ka die ka goã kii lɛ genli a soo biikoo li ka a wɔ biikoo ne.

⁹Lawa a wúlu-bɔle Zozadaa lɛ màn mɛn yii pɛ mà ǹ zɛnaa, sɔraasi paabiɛ mìilandɛnan lɛn nə́ bɛ yii zɛnaa. Ǹ didie ná a minin kũ, a wo dí la susu ǹ pii pinaa wolen ne, a gisĩ dí la susu ǹ pii pinaa wolen ne, ǹ nə́ woo Lawa a wúlu-bɔle Zozadaa li.

¹⁰Sɛmiɛ̃n laanka goóron mɛnɛn nə goã Dɛnaa Lawa a kion, Davida wɔn lɛa, Lawa a wúlu-bɔle lɛ bɛn goa á ǹ kɔ sɔraasi paabiɛ mìilandɛnan lɛn la.

¹¹A saa kion lɛ a gusin a wàã ganaa, a wo kaa a gɔsɛ a wàã lɛ, bǎã-lɛduə̃lin lɛn nə́ ǹ doa bii-a kunu *wúlu bɔ ǹ bǎã lɛ laanka kion lɛ ganaa, ziabaa ǹ mànan nə́ ǹ didie gɔn, ǹ nə́ kii lɛ lɛnpɛnɛ.

¹²Zozadaa tɔ́n kii a nɛginin lɛ kũ á soo ne, á kii bafolo wɔ a mìi-a, á lɛ kɔ kɔn la ǹ sɛ́wɔ kɔ la. Ǹ nə́ kii a nɛginin lɛ koa kii lɛa, ǹ nə́ nyɔɔ lɔ a ganaa. Bɛ kio, ǹ nə́ ǹ gɔn dɛ, ǹ nə́ n lɛ dɛ: Kii lɛ die a nyin sasa yɛ.

¹³Ataalii bǎã-lɛduə̃lin lɛn laanka zaman lɛ lɛ ma. Á tɔ́n kiɛ̃ á woo zaman lɛ li Dɛnaa Lawa a kion.

¹⁴ Á n yii saa á ga, bɛ̀ kii lɛ á ke golee-n lon banbaran la, ka a bɛ́ nɛn bɛ̀ a n zɛnaa lɛlɛ lɔn. Goledɛnan laanka bɛn-pɛlen nə́ goã kii lɛ genli, gána lɛ a zaman tumaa goã nyɛnyɛɛ la, ǹ nə́ bɛnɛn pipii. Ataalii ná a mɔnaan kũ á ǹ tɔtoɛ̃, á n lɛ dɛ á n pii: «Sii wɔ kɔn nə ke! Sii wɔ kɔn nə ke!»

¹⁵Sɔraasi paabiɛ mìilandɛnan mɛnɛn bɛ́ sɔraasin lɛn mìi la, Lawa a wúlu-bɔle Zozadaa lɛ pɛ bɛn manɛ: «Ka Ataalii lɛ kũ ka bɔ bǎã-lɛduə̃lin lɛn bii! Min mɛn bɛ́ re koe a kio lɛ, ǹ dɛnaa tá re gɔya gɛ̀ we!» A giala Lawa a wúlu-bɔle lɛ na á goã á pɛ, mà ǹ doamaa bie ǹ na a nyin bɔ Dɛnaa Lawa a kion lɛ-n wa.

¹⁶Ǹ gɔn dɔ Ataalii ganaa ǹ nə́ kũ. Á bɔ ka sùin kiɛnlɛ kɛ nɛ á woo kii a piɛ, ǹ nə́ tɔ́n dɛ walan, á gã.

¹⁷Lawa a wúlu-bɔle Zozadaa lɛ zaman lɛ laanka kii kaa lɛ kɔ ganaa Dɛnaa Lawa la, mà ǹ tá re goɛ̃ Dɛnaa Lawa a zaman lɛa. Zozadaa lɛ lɛ-kɔ dɔ da zaman lɛ laanka kii lɛ bii ni.

¹⁸Bɛ kio, gána lɛ a zaman tumaa woo *Baali guguru kɔ ǹ kion bǎã nɛ, ǹ nə́ wuru. Ǹ ná a wúlu bɔ ǹ bǎãn ziziɛ̃ lenlen, ka a nyín sɛlɛɛn kɛn nɛ. Matan mɛn bɛ́ Baali a dì wúlu-bɔle lɛa, ǹ nə́ bɛ dɔ dɛ wúlu bɔ ǹ bǎãn lɛn yɔrɔ-a. Lawa a wúlu-bɔle Zozadaa minin kaa Dɛnaa Lawa a kion lɛ a lɛduə̃ ganaa.

¹⁹Bɛ kio, á sɔraasi paabiɛ mìilandɛnan lɛn kũ ka bǎã-lɛduə̃lin lɛn laanka gána lɛ a zaman tumaa nɛ, ǹ nə́ kii lɛ bɔ Dɛnaa Lawa a kion lɛ nɛ, ǹ nə́ soo ne. Ǹ nə́ bɔ ka bǎã-lɛduə̃lin kiɛnlɛ kɛ nɛ, ǹ nə́ woo kii a piɛ. Zoasi tɔ́n giã kiin kii dankan la.

²⁰Gána lɛ a zaman tumaa na á goã nyɛnyɛɛ la, kiwi lɛ goã kiĩni. Man nə́ goã ǹ nə́ Ataalii sɛ dɛ ka gɔya nɛ kii a piɛ, á gã.