Read Samo, Southern Kiin2 12 Bible Online

Kiin2 12 - Samo, Southern bible

Kiin2 12

¹Zoasi bɛ́ kii biɛ, bɛ̀ a lɛ̀ sɔbaa nɛ.

²Zewu a kiibaa a lɛ̀ sɔbaabaa ǹ wɔ nɛ, Zoasi kii baa. A na á kiibaa zɛnaa lɛ̀ pusi Zeruzalɛmu kiwi. Ǹ dan tɔ n Sibia, a n boe Bɛɛr-Sebaa kiwi.

³Sii mɛn bɛ́ pepere Dɛnaa Lawa yii li, Zoasi bɛ zɛnaa a yiikoonaabaa tumaa gɔ́ɔ̃ nɛ. A giala Lawa a wúlu-bɔle Zozadaa lɛ na á goã darɛɛ.

⁴Sɛnɛ, wúlu bɔ ǹ bǎãn kɛn nə papaã wa. Zaman lɛ na á goã tɔn woe wúlu boe wúlu bɔ ǹ bǎãn lɛn la, ǹ nə́ da yon gìĩ kɔɔ̃n dɔ tiɛ̃ ǹ la.

⁵ Zoasi pɛ Lawa a wúlu-bɔlen lɛn manɛ: «Wɔrɔ mɛn tumaa bɛ́ ǹ nə́ boe kiɛ a gɔrɔn, ǹ nə́ die ne Dɛnaa Lawa a kion: wɔrɔ mɛn bɛ́ didie n sarɛɛ wusuru laanka minin nimi ǹ giɔ̀mɔ lɛa, wɔrɔ mɛn din tumaa bɛ́ didie bɔ a foo ganaa á daa-n Lawa a kion lɛ nɛ,»

⁶Lawa a wúlu-bɔlen lɛn nə bɛa wɔrɔ lɛ si ǹ wɔrɔ koa-lin la. Lawa a kion lɛ a paǹan mɛnɛn bɛ́ kɔnboe ka zɛnaa nɛ, ka die ka bɛn zɛnaa nɛ.

⁷Sɛnɛ Zoasi woo dɔ lɛ̀ fuəwensɔɔ pàã la bɛ̀ Lawa a wúlu-bɔlen lɛn nə tɔn Lawa a kion lɛ a bǎã ziziɛ̃n lɛn zɛnaa wa.

⁸Kii Zoasi lɛ tɔ́n lɛ dia Lawa a wúlu-bɔle Zozadaa lɛ laanka Lawa a wúlu-bɔle gialakunun lɛn la, á pɛ ǹ nɛ: «Wàa na á baa ka a kion lɛ a bǎã ziziɛ̃n lɛn zɛnɛɛ wa? Kanna, paa mɛn bɛ́, kaa paa-koalin lɛn tá die ne, ka baran n gɔn da bɛ-a doo wa, sɛnɛ ka kɔ kion lɛ a zɛnaa ǹ paa lɛa.»

⁹Lawa a wúlu-bɔlen lɛn nə́ lɛ kɔ, mà ǹ ba re n gɔn diɛ zaman lɛ a paa lɛ ganaa wa, ka bɛ dɔ nɛ, mà ǹ ba re kion lɛ a bǎã ziziɛ̃n lɛn zɛnɛɛ wa.

¹⁰Lawa a wúlu-bɔle Zozadaa tɔ́n ga goo goon li, á yala fɔ̃ a lɛpii ganaa, á da tán *wúlu bɔ ǹ bǎã kɛ genli. Bɛ̀ n tá we Dɛnaa Lawa a kion lɛ nɛ, goo lɛ n tán gusin. Ǹ goã die ka paa mɛn din tumaa nɛ Dɛnaa Lawa a kion lɛ nɛ, Lawa a wúlu-bɔlen mɛnɛn bɛ́ kiɛnlɛ mìi lɛduĩ, bɛn maǹ nə́ goã bɛa paa lɛ yii kiɛ goo lɛ nɛ.

¹¹Bɛ̀ ǹ nə́ yɛ lɔn gɔrɔ paa lɛ mɔnaa goo lɛ nɛ, kii a sɛ́wɔ-kiɛ̃li laanka Lawa a wúlu-bɔlen kiã lɛ n die, paa mɛn bɛ́ Dɛnaa Lawa a kion lɛ nɛ ǹ waa ǹ nimi.

¹²Bɛ̀ ǹ nə́ paa lɛ nimi ǹ nə́ nya, dí nyɛɛnaandɛnan mɛnɛn bɛ́ Lawa a kion dí mìi la, maǹ paa lɛ koe bɛn la. Bɛn dɔn nə tɔn paa lɛ saa, ǹ da-sɛlɛlin saraa nɛ ka kion dí-nyalin mɛnɛn bɛ́ Dɛnaa Lawa a kion lɛ zɛnɛɛ.

¹³Ǹ nə́ goã kion-dɔlen dɔn laanka kɔlɔ-bɔlen sarɛɛ nɛ. Ǹ nə́ goã gɔn dɔ laanka kɔlɔ sɛlɛɛ pii ka paa lɛ nɛ, màn mɛn bɛ́ toɛ ǹ Dɛnaa Lawa a kion lɛ zɛnaa nɛ. Maǹ nə́ goã kion lɛ a zɛnaa ǹ mìi gɔ́ɔ̃ ǹ sii tumaa siɛ ka bɛa paa lɛ nɛ.

¹⁴Sɛnɛ, ǹ da ka paa mɛn lɛ nɛ Dɛnaa Lawa a kion, ǹ saa ǹ nə́ wɔrɔ kaaran zɛnaa-n wa, ǹ saa ǹ nə́ gɔyan zɛnaa-n wa, ǹ saa ǹ nə́ mà pɛsɛ̃ ǹ tàanan zɛnaa-n wa, ǹ saa ǹ nə́ bɛnɛn zɛnaa-n wa, ǹ saa ǹ nə́ wɔrɔ màn hinlaa sana màn kɔn zɛnaa nɛ, Dɛnaa Lawa a kion lɛ wɔ lɛa wa.

¹⁵Maǹ nə́ goã paa lɛ koe dí-nyalin lɛn la, ǹ tá siɛ Dɛnaa Lawa a kion lɛ zɛnɛɛ nɛ.

¹⁶ Ǹ goã paa lɛ koe min mɛnɛn lɛn la mà ǹ dí-nyalin saraa nɛ, min goã nɔ̀n diɛ bɛn la ka paa lɛ a sii-n wa, a giala ǹ nə́ goã ǹ dí nyɛɛ ka peperebaa nɛ.

¹⁷ Ǹ goã paa mɛn boe sii la ǹ wúlu laanka sii baraa sawaa ǹ wúlu wɔ lɛa, bɛ bie á goã Dɛnaa Lawa a kion wɔ lɛa wa, a na á goã Lawa wúlu-bɔlen wɔ lɛa.

¹⁸Bɛa biikoo lɛ li, Siirii gána a kii Azayeli daa zia da Gaati kiwi ganaa á si á nɔmɔ a ganaa. Bɛ kio, Azayeli zia lɛ bɔ, die woe diɛ Zeruzalɛmu kiwi ganaa.

¹⁹Zudaa gána a kii Zoasi ǹ din lɛn, ǹ nə́ goã Zudaa gána a kiin lɛa, Zozafati ni, Zoramu ni, ka Ahaazia nɛ, bɛn nə goã ǹ nə́ mànan mɛnɛn bɔ ǹ nə́ ǹ kaa ǹ gɔrɔn Lawa wɔ lɛa, a din dɔ mànan mɛnɛn bɔ á ǹ koa Lawa wɔ lɛa, á bɛn dɔn goa, sana mɛn tumaa goã kun ka Dɛnaa Lawa a kion gɔn mànan kɛn laanka kii a kion wɔn nɛ, á bɛ yii goa, á ǹ dia Siirii gána a kii Azayeli la. Azayeli dɔ goã mà a n die zia mɛn diɛ Zeruzalɛmu kiwi ganaa, á bɛ lɛ da.

²⁰Zoasi sii gialakunun mɛnɛn zɛnaa, a màn mɛn yii tumaa zɛnaa, bɛn tá kiɛ̃-n sɛ́wɔ kɛ nɛ boo diɛ Zudaa gána a kiin wɔ gɔn la.

²¹Zoasi a dí-nyalin nə́ yoo ǹ nə́ n gòãn dii ǹ ná a bɔ a daa sii yɔrɔ bɔ. Ǹ nə́ Zoasi dɛ á gã Bɛti-Miiloo kunu Silaa zii ganaa.

²²A dí-nyalin lɛn mɛnɛn nə goã ǹ nə́ dɛ lɛn, Simeyati a nɛgiĩ Zozabaadi ni, ka Somɛɛrɛ a nɛgiĩ Yewozabaadi ni. Ǹ goã ǹ nə́ Zoasi lɛ digolon bĩ bǎã mɛn nɛ, ǹ ná a dɔ gere bĩ walan "Davida a kiwi". A nɛgiĩ Amasiya na á kii baa a bǎã nɛ.