Read Samo, Southern Kiin2 13 Bible Online

Kiin2 13 - Samo, Southern bible

Kiin2 13

¹Zudaa gána a kii Zoasi lɛ, Ahaazia a nɛ lɛa, bɛa kiibaa lɛ̀ fuəwensɔɔbaa ǹ wɔ, Zewu a nɛgiĩ Zoakazi kii baa Izirayeli gána mìi la, lɛ̀ fulusɔbaa Samarii kiwi.

²Sii mɛn bɛ́ baraa Dɛnaa Lawa yii li, a na á bɛ zɛnaa. Nebaati a nɛgiĩ Zeroboamu goã á Izirayeli minin kaa sii baraan mɛnɛn zɛnaa ganaa, Zoakazi dɔ na á kɔ bɛn lɛ, a n bɔ ǹ wɔlɔ li wa.

³Dɛnaa Lawa foo yoo Izirayeli minin li, a na á goã ǹ we Siirii gána a kii Azayeli gɔn duduu miɛ̃ ka Azayeli a nɛgiĩ Bɛn-Adaadi ni.

⁴Sɛnɛ Zoakazi Dɛnaa Lawa nyankɔ, Dɛnaa Lawa ná a nyankɔ lɛ si, a giala Siirii gána a kii lɛ goã boe Izirayeli minin lɛn yii-n lɔn, Dɛnaa Lawa lɛ bɛ yɛ.

⁵Dɛnaa Lawa bɔ sii-n wole kɔ Izirayeli minin lɛn la, bɛa bɔ sii-n wole lɛ nə́ ǹ si Siirii minin lɛn la. Bɛ kio, ǹ nə́ tɔ́n giã ǹ mɔnaa kionən ne, ka lɛlɛ bɛ́ lɔn.

⁶Sɛnɛ, Zeroboamu a kion minin nə goã ǹ nə́ Izirayeli minin kaa sii baraan mɛnɛn zɛnaa ganaa, Izirayeli minin lɛn nə n bɔ bɛn wɔlɔ li wa, ǹ gɔn na á goã tɔn paraa nɛ ǹ zɛnaa ganaa. Haalɛ dì Aseeraa ke, bɛ nyín na á goã bii-a lon Samarii kiwi.

⁷Zoakazi a zia-baali zaman lɛ tumaa bii, ǹ mɛnɛn nə kanbaa, sùidɛnaa posooro dinsɔɔ̃ nɛ, ka ziabaa ǹ wotoro fù ni, ka zia-baali duu fù ni. A giala, Siirii gána a kii na á goã á gialakunun kɛn dɛ. A na á goã á ǹ baa ka tán tii kɛ nɛ minin nə́ tɔrɛ la ǹ gòã giulun.

⁸Zoakazi sii gialakunun mɛnɛn zɛnaa, a sii mɛn yii tumaa zɛnaa, a tɔ bɔ ǹ siin mɛnɛn zɛnaa, bɛ yii tá kiɛ̃-n sɛ́wɔ kɛ nɛ boo die Izirayeli kiin wɔ gɔn la.

⁹Zoakazi gã, ǹ ná a gere bĩ Samarii kiwi. A nɛgiĩ Zoasi na á kii baa a bǎã nɛ.

¹⁰Zudaa gána a kii Zoasi a kiibaa lɛ̀ pɔsɔɔwensɔbaabaa ǹ wɔ, Zoakazi a nɛgiĩ Zoasi kii baa Izirayeli gána mìi la lɛ̀ fulusɔrɔ (16) Samarii kiwi.

¹¹Sii mɛn bɛ́ baraa Dɛnaa Lawa yii li, a na á bɛ zɛnaa. Nebaati a nɛgiĩ Zeroboamu goã á Izirayeli minin kaa sii baraan mɛnɛn zɛnaa ganaa, Zoasi nə n bɔ bɛ kɔn wɔlɔ li wa, á n gɔn paraa ǹ zɛnaa ganaa.

¹²Zoasi sii gialakunun mɛnɛn zɛnaa, a tɔ bɔ ǹ siin mɛnɛn zɛnaa, zian kɛn á ǹ da ka Zudaa gána a kii Amasiya nɛ, bɛ yii tá kiɛ̃-n sɛ́wɔ kɛ nɛ, boo diɛ Izirayeli kiin wɔ gɔn la.

¹³Zoasi gã, Zeroboamu giã a kiibaa lɛ la. Ǹ goã ǹ nə́ Izirayeli gána a kiin bĩ bǎã mɛn nɛ, maǹ nə́ Zoasi dɔ gere bĩ walan.

¹⁴ Busu Yiliizee kũ, bɛ lɛ dɔ n die n biɛ a gɛ̀ busu lɛa. Izirayeli gána a kii Zoasi woo a li, á wuu pɛ a mìi la, á pɛ: «Maa díi! Maa díi, ma nə n goã ka Izirayeli gána a zia wotoro ka a sùidɛnan bɛ́ lɔn.»

¹⁵Yǎa Yiliizee tɔn pɛ nɛ: «Sa laanka kiɛn goa!» Zoasi dɔ sa laanka kiɛn goa.

¹⁶Yiliizee pɛ Izirayeli gána a kii lɛ-n doo: «Sa lɛ dii!» A dɔ sa lɛ dii. Yiliizee nə́ n gɔnɔn goa á ǹ kaa kii lɛ wɔn la.

¹⁷Á tɔ́n pɛ: «Fenɛtərə ke dia-n lɛ̀ giala li, bɛ bũ!» Zoasi fenɛtərə lɛ bũ. Yiliizee tɔ́n pɛ nɛ: «Kiɛ lɛ zũ!» A dɔ́ kiɛ lɛ zũ. Yiliizee nə́ n toa: «Dɛnaa Lawa a min bɔ sii ni ǹ kiɛ nɛ. Boo Siirii minin la ǹ kiɛ nɛ. N tá re Siirii minin lɛn dii Afɛki kiwi, n nə ǹ nya.»

¹⁸Yiliizee pɛ Zoasi ni: «Kiɛn lɛn goa!» A dɔ kiɛn lɛn goa. Yiliizee wusoo á pɛ Izirayeli gána a kii lɛ nɛ: «Kiɛ lɛ dɔ tán.» Á kiɛ lɛ dɔ tán gunyin sɔɔ á n zɔ̃ á golee.

¹⁹Lawa a min lɛ foo yoo li á pɛ: «Bɛ̀ ma nə́ n kiɛ lɛ dɔ tán gunyin sooro hinlaa gunyin sɔrɔ ke, bɛ̀ n nə n boe Siirii minin lɛn la, n nə ǹ dɛ yǎa ǹ nyɛɛ. Kanna, gunyin sɔɔ dinsɔɔ̃ nɛ, n tá re boe Siirii minin lɛn la n nə ǹ dɛ.»

²⁰Yiliizee gã ǹ ná a gere bĩ. Bɛ a lɛ̀ n bui-a ke, Moabu minin sɔraasin nə́ daa n yiɛ Izirayeli gána lɛ nɛ.

²¹Bɛ daa yaa, bɛ̀ minin man ná a gialaa giĩ goon gere bĩ. Bɛa minin lɛn yii bɛ́ á mɛ sɔraasi kuru lɛ goon ganaa ǹ nə́ giĩ lɛ zũ fufuu Yiliizee a yala gɔ́ɔ̃ nɛ. Gere lɛ bɛ́ á woo n lɔ Yiliizee wen ganaa tán, giĩ lɛ yii wusoo á kaa, á yoo á n tele lon a gòãn la.

²²Siirii gána a kii Azayeli goã á bɔ Izirayeli gána minin yii ni Zoakazi a yiikoonaabaa tumaa gɔ́ɔ̃ nɛ.

²³Sɛnɛ Dɛnaa Lawa bǐɛ̃ kɔ Izirayeli minin lɛn ganaa, a ná a makara doɛ̃ nyaa ǹ nɛ, á n bɔyaa á n yɔrɔ bǐɛ̃ da ǹ la, a lɛ kɔ kɔn la kɛ taman yii, ǹ mɛn bɛ́ a bii ni ka Abrahamu ni, ka Izaaki laanka Zakɔba nɛ. Dɛnaa Lawa lɛ kɔ, á ǹ bɔ̀n baa wa, haalɛ tɔn pelo, Dɛnaa Lawa tɔn nə ǹ wɔlɔ lui a din-a wa.

²⁴Siirii gána a kii Azayeli lɛ gã, a nɛgiĩ Bɛn-Adaadi kii baa a bǎã nɛ.

²⁵Azayeli a nɛgiĩ Bɛn-Adaadi goã á kiwin mɛnɛn si Zoaasi ǹ di Zoakazi la, a nɛgiĩ Zoasi lɛ wusoo á bɛn si Azayeli a nɛgiĩ Bɛn-Adaadi la. Zoasi na á zia da Bɛn-Adaadi ganaa á boo la gunyin sɔɔ, á wusoo á Izirayeli gána a kiwin lɛn si.