Read Samo, Southern Kiin2 14 Bible Online

Kiin2 14 - Samo, Southern bible

Kiin2 14

¹Zoakazi a nɛgiĩ Zoasi lɛ, Izirayeli gána a kii lɛa, bɛa kiibaa lɛ̀ paabaa ǹ wɔ, Zoasi a nɛgiĩ Amasiya Zudaa gána a kii baa.

²A bɛ́ kii biɛ, bɛ̀ a lɛ̀ fuəwensooro ne. Á lɛ̀ fuəwenmanangɔrɔ zɛnaa kiibaa la Zeruzalɛmu kiwi. Ǹ dan tɔ n Yoadan, a n boe Zeruzalɛmu.

³Sii mɛn bɛ́ pepere Dɛnaa Lawa yii li, Amasiya bɛ zɛnaa, sɛnɛ a bie ka a na á zɛnaa ka ǹ digolo Davida bɛ́ lɔn wa. A na á sii zɛnaa á kɔnpɛ ka ǹ di Zoasi wɔ-n ka te.

⁴Sɛnɛ wúlu bɔ ǹ bǎãn nə papaã wa, zaman lɛ na á goã tɔn woe wúlu boe, bɛa wúlu bɔ ǹ bǎãn lɛn la, ǹ da yon gìĩ kɔɔ̃n tã ǹ la.

⁵Kiibaa lɛ gòãn bɛ́ ǹ nə́ wɔ tán ǹ mɛn waáraa Amasiya gɔn, a kiodɛnan mɛnɛn nə goã ǹ nə́ ǹ di kii lɛ dɛ, á bɛn dɛ ǹ nə́ gã.

⁶ Sɛnɛ Amasiya gɛ̀-dɛlen lɛn nɛnyaanan dɛ wa. Màn mɛn bɛ́ kiɛ̃ nɛ Muizu a dí-pɛn sɛ́wɔ kɛ nɛ, a na á zɛnaa á kɔnpɛ ka bɛ nɛ. Dɛnaa Lawa na á goã á n gɔn waa ǹ nɛ walan: «Ǹ ba re díin nyin boe ǹ nɛnyaanan lɛa wa, ǹ ba re nɛnyaanan nyin boe ǹ díin lɛa wa. Didie din a sii baraa a lɛa nɛ, ǹ tá re a nyin boe.»

⁷Amasiya lɛ din na á goã á Edɔn minin dɛ yìsi nyankɔrɔ basa kɛ nɛ. A min mɛnɛn dɛ, giĩ duu fù ni (10 000). Zia lɛ gòã wuu li, á Selaa kiwi si á nɔmɔ a ganaa. Á ná a tɔ kɔ mà Yokiteli. Bɛa tɔ lɛ tá tɔn na a tan á da dɔ pelo ganaa.

⁸Bɛ kio, Zoakazi a nɛgiĩ Zoasi lɛ, Zewu a nɔ̀ɔn lɛa, Izirayeli gána a kii lɛa, Amasiya minin dia woe pii bɛ nɛ mà a da zia da kɔn ka asɛ nɛ!

⁹Izirayeli gána a kii Zoasi lɛ dɔ minin dia woe pii Zudaa gána a kii Amasiya lɛ-n kɛnɛn: — Liban gána a koronkoron nyandɛnaa, na á dia woe pii Liban gána a da kaka nɛ: «N nɛlɔ kɔ masɛ a nɛginin la lɔ lɛa!» Sɛnɛ, don siĩn mɛnɛn bɛ́ Liban, bɛn nə́ tɔtɔrɔ koronkoron lɛ la.

¹⁰Ń boo Edɔmu minin la, bɛ lɛ a din koa nɛ n tá we, bɛ n taãn lɛa. N gùrùn dii, sɛnɛ, giã n bǎã nɛ! Wàa na á baa n tá ǹ gòãn kiɛ zia nɛ, zia mɛn nə́ ke die bɔ̀n diɛ n ganaa, n din ni kɔnlɛ ka Zudaa minin lɛn nɛ.

¹¹Sɛnɛ, Amasiya nə n too kɔ a lon wa. Izirayeli gána a kii Zoasi tɔ́n woo zia lɛ la. Ǹ nə́ yoo kɔn gialaa Bɛtisemɛsi kiwi, Zudaa gána nɛ.

¹²Izirayeli minin lɛn nə́ boo Zudaa minin la, ǹ didie nə́ n gòã da baa nɛ, á woo a mɔnaa kion.

¹³Zudaa gána a kii Amasiya lɛ Ahaazia a nɔ́ɔn lɛa, Zoasi a nɛ lɛa, Izirayeli gána a kii Zoasi lɛ bɛ da kòso-n Bɛti-Semɛsi. Bɛ kio, Zoasi daa Zeruzalɛmu, á kiwi lɛ a kungɔn paǹ goon wuru. A sasabaa á doe mɛtərə biɛ paa (200) kɛ miã. A n kuĩ Efrayimu a kiɛnlɛ kɛ ganaa yǎa kɛ gùrù a kiɛnlɛ kɛ li.

¹⁴Wɔrɔ nɛ, sana nɛ, màn giɔ̀mɔ kakan mɛnɛn tumaa goã Dɛnaa Lawa a kion, ka kii a kion wɔn nɛ, Zoasi bɛn yii goa. Á minin dɔn kũ sii yɔrɔ bɔ ǹ giɔ̀mɔ lɛa, bɛ kio, á n bɔyaa á daa Samarii kiwi.

¹⁵Zoasi sii gialakunun mɛnɛn zɛnaa, a màn mɛn zɛnaa, a tɔ bɔ ǹ siin mɛnɛn zɛnaa, a zian mɛnɛn da kɔn ka Zudaa gána a kii Amasiya nɛ, bɛ yii tá kiɛ̃ nɛ sɛ́wɔ kɛ nɛ boo diɛ Izirayeli kiin wɔ gɔn la.

¹⁶Zoasi gã. Ǹ goã ǹ nə́ Izirayeli kiin bĩ bǎã mɛn nɛ, maǹ ná a dɔ bĩ walan Samarii kiwi. A nɛgiĩ Zeroboamu na á kii baa a bǎã nɛ.

¹⁷Izirayeli gána a kii Zoasi lɛ, Zoakazi a nɛ lɛa, bɛa gɛ̀ kio, Zudaa gána a kii Amasiya lɛ Zoasi a nɛ lɛa, bɛ wusoo á lɛ̀ fulusooro zɛnaa kanaa.

¹⁸Amasiya sii gialakunun mɛnɛn zɛnaa, bɛ tá kiɛ̃-n sɛ́wɔ kɛ nɛ boo diɛ Zudaa kiin wɔ gɔn la.

¹⁹Ǹ nə́ goã ǹ nə́ ga Amasiya lɛ a dɛ ǹ gɔn li Zeruzalɛmu kiwi, á tɔ́n baa si á woo Lakiisi. Sɛnɛ ǹ ná a basa bɔ ǹ nə́ woo dɛ Lakiisi lɛ nɛ.

²⁰Ǹ ná a gere saa ka sùin ni, ǹ goã ǹ nə́ ǹ digolon bĩ bǎã mɛn nɛ, ǹ ná a dɔ bĩ walan Zeruzalɛmu, "Davida a kiwi".

²¹Zudaa gána a zaman lɛ tumaa Azaria kũ ǹ nə́ baa kii lɛa ǹ di Amasiya bǎã nɛ, bɛ̀ a lɛ̀ fulusɔrɔ nɛ.

²²Azaria lɛ din na á wusoo á Elaati kiwi si, á zɛnaa á kɔ Zudaa gána la, kii Amasiya lɛ a gɛ̀ kio.

²³Zoasi a nɛgiĩ Amasiya lɛ Zudaa gána a kii lɛa, bɛa kiibaa lɛ̀ fulusooro baa ǹ wɔ, Zoasi a nɛgiĩ Zeroboamu Izirayeli gána a kii baa, lɛ̀ pusiwengoon Samarii kiwi.

²⁴Sii mɛn bɛ́ baraa Dɛnaa Lawa yii li, a na á bɛ zɛnaa. Nebaati a nɛgiĩ Zeroboamu goã á Izirayeli minin kaa sii baraan mɛnɛn zɛnaa ganaa, a n bɔ bɛ kɔn wɔlɔ li wa.

²⁵ Bǎãn mɛnɛn tumaa goã Izirayeli wɔ lɛa lɛlɛ, ǹ nə́ ǹ ba a wɔ lɛa doo wa, a kũ Lebo-Amaati ganaa a wo yǎa yìsi mu kɔsɛ kɔsɛ kɛ li, Zeroboamu lɛ din na á wusoo á bɛa bǎãn lɛn tumaa si. Bɛ na á n zɛnaa á kɔnpɛ ka boo kɛ nɛ, Izirayeli a Lawa, Dɛnaa Lawa lɛ goã a ná a dí-nyali Zonaasi da a pɛ ganaa, Amitayii a nɛgiĩ Zonaasi mɛn lɛ á ke Lawa a boo gii-dali lɛa boe Gaati-Efɛɛri.

²⁶Sonbore, Dɛnaa Lawa goã á Izirayeli minin nɔmaa gole lɛ yɛ. Min kɔn din goã a tan a nə́ n doe ǹ lɛ wa. A goã a tan bɛ̀rɛ lɛa wa, hinlaa min mɛn nə́ ke a din gɔn wìi a lɛa, a goã a tan bɛ lɛa wa.

²⁷Sɛnɛ Dɛnaa Lawa bɛ́ a bie á pɛ mà asɛ á die Izirayeli gána tɔ tuturi a bɔ kanaa wa, bɛ lɛ nɛ, á toa Zoasi a nɛgiĩ Zeroboamu gána lɛ bɔ sii ni.

²⁸Zeroboamu sii gialakunun mɛnɛn zɛnaa, a tɔ bɔ ǹ siin mɛnɛn zɛnaa, a zian mɛnɛn da, Damaasi laanka Amaati kiwin kɛn nɛ, Zeroboamu wusoo á bɛn si ka yɔrɔ mɛn nɛ, á ǹ kɔ Izirayeli gána la, bɛ yii tá kiɛ̃ nɛ sɛ́wɔ kɛ nɛ boo diɛ Izirayeli kiin wɔ gɔn la.

²⁹Zeroboamu gã. Ǹ goã ǹ nə́ Izirayeli gána a kiin bĩ bǎã mɛn nɛ, ǹ ná a dɔ bĩ walan. A nɛgiĩ Zakarii na á kii baa a bǎã nɛ.