Read Samo, Southern Kiin2 15 Bible Online

Kiin2 15 - Samo, Southern bible

Kiin2 15

¹Izirayeli gána a kii Zeroboamu a kiibaa lɛ̀ fuəwensɔbaabaa ǹ wɔ, Amasiya a nɛgiĩ Azaria Zudaa gána a kii baa.

²A bɛ́ kii biɛ, bɛ̀ a lɛ̀ fulusɔrɔ nɛ. A na á kiibaa zɛnaa lɛ̀ posoorowenpaa Zeruzalɛmu kiwi. Ǹ dan tɔ n Zekolia, boe Zeruzalɛmu.

³Sii mɛn bɛ́ pepere Dɛnaa Lawa yii li, Azaria bɛ zɛnaa ka ǹ di Amasiya wɔ bɛ́ lɔn ka te.

⁴Sɛnɛ wúlu bɔ ǹ bǎãn nə papaã wa, zaman lɛ na á goã tɔn woe wúlu boe wúlu bɔ ǹ bǎãn la, ǹ da yon gìĩ kɔɔ̃n tã ǹ la.

⁵Dɛnaa Lawa gɔ̀nɔn ki busu babaraa da kii lɛ-a, á nɔmaa á giã a gɔrɔn kion goon ne. A na á goã gɔ̀nɔn ki busu babaraadɛnaa lɛa, yǎa á woo kaa a gɛ̀ pinaa lɛ. Zoatamu mɛn nə́ ke kii a nɛgiĩ lɛa, bɛ na á goã kii a sumu laanka zaman lɛ mìi la.

⁶Azaria sii gialakunun mɛnɛn zɛnaa, a sii mɛn yii zɛnaa, bɛ tá kiɛ̃ nɛ sɛ́wɔ kɛ nɛ boo diɛ Zudaa kiin wɔ gɔn la.

⁷ Azaria gã, ǹ goã ǹ nə́ ǹ digolon bĩ bǎã mɛn nɛ, ǹ ná a dɔ bĩ walan "Davida a kiwi". A nɛgiĩ Zoatamu na á kii baa a bǎã nɛ.

⁸Zudaa gána a kii Azaria a kiibaa lɛ̀ pɔsɔɔwenkiwisibaa ǹ wɔ, Zeroboamu a nɛgiĩ Zakarii kii baa Izirayeli gána mìi la mui sɔrɔ Samarii kiwi.

⁹Sii mɛn bɛ́ baraa Dɛnaa Lawa yii li, á bɛ zɛnaa ka ǹ digolon wɔ bɛ́ lɔn. Nebaati a nɛgiĩ Zeroboamu goã á Izirayeli minin kaa sii baraan mɛnɛn zɛnaa ganaa, a n bɔ bɛn wɔlɔ li wa.

¹⁰Zaabɛsi a nɛgiĩ Salumu ga Zakarii bɔ a daa ǹ gɔn li, á dɛ zaman lɛ yii ni, á dɛ á gã á kii baa a bǎã nɛ.

¹¹Zakarii sii gialakunun mɛnɛn zɛnaa, bɛ tá kiɛ̃ nɛ sɛ́wɔ kɛ nɛ boo diɛ Izirayeli kiin wɔ gɔn la.

¹² Dɛnaa Lawa goã á boo mɛn pɛ Zewu ni, bɛ lɛ na á pã kɛnɛn. Dɛnaa Lawa na á goã á pɛ nɛ mà Izirayeli gána a kiibaa lɛ á die goɛ̃ a nɛnyaanan gɔn, yǎa a woe doe a nɔ̀ɔnɔn nɔ̀ɔnɔn ganaa. A na á n zɛnaa miɛ̃.

¹³Zudaa gána a kii Azaria ke ǹ nə́ bii Oziasi, bɛa kiibaa lɛ̀ pɔsɔɔwenmanangɔrɔbaa ǹ wɔ, Zaabɛsi a nɛgiĩ Salumu kii baa. A na á kiibaa zɛnaa mui goon Samarii kiwi.

¹⁴Gaadi a nɛgiĩ Menaahɛmu nə́ n toa Tirsaa kiwi á daa Samarii. Á Zaabɛsi a nɛgiĩ Salumu lɛ dɛ Samarii á gã, á kii baa a bǎã nɛ.

¹⁵Salumu sii gialakunun mɛnɛn zɛnaa, a bɔ a daa ǹ sii mɛn yɔrɔ bɔ, bɛ tá kiɛ̃ nɛ sɛ́wɔ kɛ nɛ boo diɛ Izirayeli kiin wɔ gɔn la.

¹⁶Menaahɛmu a pàã saa lɛ kio ne, á tɔ́n zia da Tifusaa kiwi ganaa. Min mɛnɛn tumaa goã kiwi lɛ nɛ, á ǹ tumaa dɛ. Á bɔ̀n da lɛkoro lɛ-a bǎãn ganaa, a kũ Tirsaa ganaa a woo. A na á zɛnaa miɛ̃ a giala, maǹ nə́ n piã mà ǹ ba kiwi lɛ a wɔ ǹ kiɛnlɛn buĩ wa. Lɔ mɛn yii tumaa goã nɔ̀nɔ-a lɛa, á bɛ yii nɔ̀ wɔsɔ.

¹⁷Zudaa gána a kii Azaria a kiibaa lɛ̀ pɔsɔɔwenmanangɔrɔbaa ǹ wɔ, Gaadi a nɛgiĩ Menaahɛmu kii baa Izirayeli gána mìi la, lɛ̀ fù Samarii kiwi.

¹⁸Sii mɛn bɛ́ baraa Dɛnaa yii li, á bɛ zɛnaa. Nebaati a nɛgiĩ Zeroboamu goã á Izirayeli minin kaa sii baraan mɛnɛn zɛnaa ganaa, Menaahɛmu a yiikoonaabaa tumaa gɔ́ɔ̃ nɛ a n bɔ bɛn wɔlɔ li wa.

¹⁹Asiirii gána a kii Puli daa gána lɛ si á n kɔ lɛ, sɛnɛ Menaahɛmu wɔrɔ kilo duu pɔsɔɔwensii (34 000) kɔ Puli lɛ la, màn mɛn bɛ́ toɛ a n dɔ lɛ pàã lɛ gòãn nə boo la ǹ wɔ tán a gɔn.

²⁰Izirayeli gána a min mɛnɛn tumaa bɛ́ màndɛnan lɛa, Menaahɛmu na á wɔrɔ lɛ si bɛn la, á kɔ Asiirii gána a kii lɛ la. Ǹ min gogoonmaa wɔ n wɔrɔ we posooro á saraa. Bɛ kio, Asiirii gána a kii lɛ nə́ n bɔyaa á woo, a golee gána lɛ-n wa.

²¹Menaahɛmu sii gialakunun mɛnɛn zɛnaa, a sii mɛn tumaa zɛnaa, bɛ tá kiɛ̃ nɛ sɛ́wɔ kɛ nɛ boo diɛ Izirayeli kiin wɔ gɔn la.

²²Menaahɛmu gã a nɛgiĩ Pekayia na á kii baa a bǎã nɛ.

²³Zudaa gána a kii Azaria a kiibaa lɛ̀ posoorobaa ǹ wɔ, Menaahɛmu a nɛgiĩ Pekayia kii baa Izirayeli gána mìi la lɛ̀ paa Samarii kiwi.

²⁴Sii mɛn bɛ́ baraa Dɛnaa Lawa yii li, á bɛ zɛnaa. Nebaati a nɛgiĩ Zeroboamu goã á Izirayeli minin kaa sii baraan mɛnɛn zɛnaa ganaa, Pekayia nə n bɔ bɛn wɔlɔ li wa.

²⁵A ziabaa ǹ mànan-gũlin Pekaa ke, Remalia a nɛgiĩ lɛa, bɛ ga a bɔ a daa ǹ gɔn li. Á Pekayia dɛ, ka Argɔbu laanka Arie ne Samarii, kii a kion a duru ǹ bǎã didimi kɛ gɔ́ɔ̃ nɛ. Galaati gána min posooro na á goã kun ka Pekaa lɛ nɛ. Á Pekayia dɛ á gã á kii baa a bǎã nɛ.

²⁶Pekayia sii gialakunun mɛnɛn zɛnaa, a sii mɛn yii zɛnaa, bɛ tá kiɛ̃ nɛ sɛ́wɔ kɛ nɛ boo diɛ Izirayeli kiin wɔ gɔn la.

²⁷Zudaa gána a kii Azaria a kiibaa lɛ̀ posoorowenpaabaa ǹ wɔ, Remaliya a nɛgiĩ Pekaa kii baa Izirayeli gána mìi la Samarii kiwi lɛ̀ fuə.

²⁸Sii mɛn bɛ́ baraa Dɛnaa Lawa yii li, á bɛ zɛnaa. Nebaati a nɛgiĩ Zeroboamu goã á Izirayeli minin kaa sii baraan mɛnɛn zɛnaa ganaa, Pekaa nə n bɔ bɛn wɔlɔ li wa.

²⁹Izirayeli gána a kii Pekaa a biikoo li, Asiirii gána a kii Teglati-Falasaara daa Iyɔn kiwi kũ á si, ka Abeli-Bɛti-Maakaa kiwi ni ka Yanoa kiwi ni, ka Kedɛsi kiwi ni, ka Asɔɔrɔ kiwi ni, ka Galaati gána nɛ, ka Galilee gána nɛ, ka Nɛfutalii gána tumaa nɛ. Teglati-Falasaara bɛa bǎãn kɛn lɛn minin goa á kiɛ̃ ǹ nɛ Asiirii gána nɛ.

³⁰Elaa a nɛgiĩ Oze ga Remaliawu a nɛgiĩ Pekaa bɔ a daa ǹ gɔn li, á dɛ á gã, á kii baa a bǎã nɛ, bɛ̀ Oziasi a nɛgiĩ Zoatamu a kiibaa lɛ̀ fuəbaa ǹ wɔ nɛ.

³¹Pekaa sii gialakunun mɛnɛn zɛnaa, a sii mɛn yii zɛnaa, bɛ tá kiɛ̃ nɛ sɛ́wɔ kɛ nɛ boo diɛ Izirayeli kiin wɔ gɔn la.

³²Remalia a nɛgiĩ Pekaa lɛ, Izirayeli gána a kii lɛa, bɛa kiibaa lɛ̀ paabaa ǹ wɔ, Oziasi a nɛgiĩ Zoatamu Zudaa gána a kii baa.

³³A bɛ́ kii biɛ, bɛ̀ a lɛ̀ fuəwensooro ne. A na á kiibaa zɛnaa lɛ̀ fulusɔrɔ Zeruzalɛmu kiwi. Ǹ dan tɔ n Yerusaa, Sadɔki a nɛlɔ nɛ.

³⁴Sii mɛn bɛ́ pepere Dɛnaa Lawa yii li, á bɛ zɛnaa. A na á ná a sii zɛnaa ka ǹ di Oziasi wɔ bɛ́ lɔn ka te.

³⁵Sɛnɛ wúlu bɔ ǹ bǎãn kɛn nə papaã wa, zaman lɛ na á goã tɔn woe wúlu boe wúlu bɔ ǹ bǎãn lɛn la, ǹ da yon gìĩ kɔɔ̃n tã ǹ la. Lawa a kion a kiɛnlɛ gole ke, Zoatamu din na á dɔ.

³⁶Zoatamu sii gialakunun mɛnɛn zɛnaa, a sii mɛn zɛnaa bɛ tá kiɛ̃ nɛ sɛ́wɔ kɛ nɛ boo diɛ Zudaa kiin wɔ gɔn la.

³⁷Bɛa biikoo lɛ nɛ, Dɛnaa Lawa ná a giala kɔ, á Siirii gána a kii Resini laanka Remalia a nɛgiĩ Pekaa dia woe Zudaa gána gialaa.

³⁸Zoatamu gã. Ǹ goã ǹ nə́ ǹ digolon bĩ bǎã mɛn nɛ, ǹ ná a dɔ bĩ walan, ǹ digolo "Davida a kiwi". A nɛgiĩ Ahaazi kii baa a bǎã nɛ.