Read Samo, Southern Kiin2 16 Bible Online

Kiin2 16 - Samo, Southern bible

Kiin2 16

¹Remalia a nɛgiĩ Pekaa a kiibaa lɛ̀ fulusɔbaabaa ǹ wɔ, Zoataamu a nɛgiĩ Ahaazi Zudaa gána a kii baa.

²Ahaazi bɛ́ kii biɛ, bɛ̀ a lɛ̀ fuə ne. A na á kiibaa zɛnaa lɛ̀ fulusɔrɔ Zeruzalɛmu kiwi. Sii mɛn bɛ́ pepere a Lawa, Dɛnaa Lawa lɛ yii li, a bɛ zɛnaa ka ǹ digolo Davida bɛ́ lɔn wa.

³ Sɛnɛ a na á Izirayeli kiin tɔ wɔ ǹ gɔn saa. Á wúlu din bɔ ka a nɛgiĩ ni. Dɛnaa Lawa goã á gánan mɛnɛn minin loo á ǹ bɔ ǹ bǎãn nɛ Izirayeli nɛnyaanan lɛn nyɛɛnɛ, bɛn bɛ́ sii bɔbɔnɛɛn mɛnɛn zɛnɛɛ Ahaazi dɔ n koe bɛn lɛn lɛ.

⁴Á goã wúlu boe bɛ̀ a màn giĩ kɔɔ̃n tã, wúlu bɔ ǹ bǎãn la, tentenen la nɛ, dan mɛnɛn tumaa luu bɛ́ buruu ka bɛn giulun ni.

⁵ Siirii gána a kii Resini ni ka Remalia a nɛgiĩ Pekaa kɛ nɛ Izirayeli gána a kii lɛa, bɛn nə́ woo zia da Zeruzalɛmu ganaa, ǹ ná a lɛnpɛnɛ, sɛnɛ ǹ boo Ahaazi la wa.

⁶Bɛa biikoo lɛ li, Siirii gána a kii Resini goã á wusoo á Elaati kiwi si á da Siirii gána kio. Á Zudaa minin loo á ǹ bɔ Elaati kiwi lɛ nɛ, Edɔn minin nə́ daa giã a nɛ, ǹ nə́ goã a nɛ yǎa á daa dɔ pelo ganaa.

⁷Ahaazi minin dia woe pii Asiirii gána a kii Tiglati-Falasaara-n kɛnɛn: «Masɛ nə n dí-nyali lɛa, ma nə n nɛ lɛa. Siirii gána a kii laanka Izirayeli gána kii ke, ǹ nə́ yoo masɛ gialaa, da ma si ǹ la.»

⁸Wɔrɔ laanka sana mɛn goã Dɛnaa Lawa a kion, ka kii a kion ne, Ahaazi bɛn goa á ǹ dia woe bǐɛ̃ biɛ ǹ nɛ Asiirii gána a kii la.

⁹Asiirii gána a kii lɛ lɛ kɔ Ahaazi a boo lɛ ganaa, a dinmaa tɔ́n yoo á woo Damaasi kiwi gialaa, á si á nɔmɔ a ganaa. Á kiwi minin lɛn goa á kiɛ̃ ǹ nɛ Kiiri. Á Resini dɛ á gã.

¹⁰Kii Ahaazi lɛ woo Damaasi, mà a n woe Asiirii gána a kii Tiglati-Falasaara li walan. *Wúlu bɔ ǹ bǎã mɛn goã Damaasi kiwi, Ahaazi yii bɛ yɛ. Ahaazi bɛa wúlu bɔ ǹ bǎã lɛ nyín zɛnaa, ka a dɔ ǹ gɔn nɛ, á dia Lawa a wúlu-bɔle Uria la.

¹¹Bɛ kio, Uria wúlu bɔ ǹ bǎã dɔ. Kii Ahaazi goã á n toa Damaasi kiwi, á wúlu bɔ ǹ bǎã lɛ a dɔ ǹ gɔn a kɔnboe mɛn dia Uria la, Uria dɔ na á wúlu bɔ ǹ bǎã lɛ dɔ bɛ li ka te. Lawa a wúlu-bɔle Uria lɛ bɛa dí lɛ nya, bɛ̀ kii Ahaazi lɛ tɔn nə n bɔyaa Damaasi á daa dinin bɔrɔ wa.

¹²Kii lɛ bɛ́ á n bɔyaa Damaasi lɛ nɛ, a da lɔn gɔrɔ, a yii wúlu bɔ ǹ bǎã lɛ yɛ, á n zɔ̃ á dɔ a li, á dii la.

¹³A na á wúlu màn-tiɛ̃ tã, ka a Lawa gɔ ǹ wúlu màn nɛ, á duvɛ̃ zuməə, a na á zɔ́ɔ da nɛ ǹ wúlu mànan mà pɛsɛ̃ wúlu bɔ ǹ bǎã lɛ ganaa.

¹⁴ Wúlu bɔ ǹ bǎã mɛn goã zan lɛa, Dɛnaa Lawa yɔrɔ-a, kii lɛ bɛ sɛ saa, á bɔ a bǎã nɛ kion lɛ nyɛɛnɛ, wúlu bɔ ǹ bǎã dii lɛ laanka Dɛnaa Lawa a kion lɛ bii ni, á da wúlu bɔ ǹ bǎã dii lɛ genli, dia-n woe gɔsɛ a lɛ̀gɔn la.

¹⁵Bɛ kio, kii Ahaazi lɛ tɔ́n pɛ Lawa a wúlu-bɔle Uria-n kɛnɛn: «*Wúlu màn mɛn bɛ́ n tiɛ̃ baayɛlɛ, ka Lawa gɔ ǹ màn mɛn bɛ́ n boe wasamiɛ̃nɛ, bɛn bɔ wúlu bɔ ǹ bǎã gole lɛ la. Kii a wúlu màn-tiɛ̃ nɛ, ka a Lawa gɔ ǹ màn nɛ, bɛn bɔ wúlu bɔ ǹ bǎã gole lɛ la. Gána lɛ a zaman tumaa a wúlu màn-tiɛ̃ nɛ, ka ǹ Lawa gɔ ǹ màn nɛ, bɛn bɔ wúlu bɔ ǹ bǎã gole lɛ la. N duvɛ̃ zuməə la. Wúlu màn-tiɛ̃n kɛn tumaa mà nɛ, ka wúlu mànan kɛn tumaa mà nɛ, bɛ yii kaa tán wúlu bɔ ǹ bǎã gole lɛ la. Wúlu bɔ ǹ bǎã kɛ sɛ zan lɛa, ma á die giɛ bɛ walan.»

¹⁶Lawa a wúlu-bɔle Uria dɔ sii lɛ zɛnaa á kɔnpɛ ka boon kɛn tumaa nɛ, kii Ahaazi lɛ goã á pɛ nɛ mà a ǹ zɛnaa.

¹⁷ Wotoron kɛn Lawa a kion, ǹ goã ǹ nə́ bɛn zɛnaa ka zan pəpəmən mɛnɛn nɛ, kii Ahaazi bɛn nana kɔn, á wotoro tɔ́nɔn lɛn waa á ǹ bɔ ǹ ganaa. Doo kaaraa ke ǹ nə́ bíi "yìsi mu", a giala n diɛ nɛ dii gɔ̀lɔ̀ nyínin dɔ̀ɔ̃ nɛ, kii Ahaazi lɛ bɛ gisĩ á da kɔlɔ-nyɔmaa kɔn la tán.

¹⁸Ǹ goã ǹ nə́ dàã mɛn dɔ Dɛnaa Lawa a kion lɛ nɛ, *susu ǹ pii pinaa wɔ lɛa, Asiirii gána a kii lɛ taman yii, Ahaazi bɛ bɔyaa kion lɛ nɛ, ka kii a wɔ ǹ bǎã kɛ nɛ kanaa.

¹⁹Ahaazi sii gialakunun mɛnɛn zɛnaa, a sii mɛn zɛnaa, bɛ tá kiɛ̃-n sɛ́wɔ kɛ nɛ boo diɛ Zudaa kiin wɔ gɔn la.

²⁰ Ahaazi gã. Ǹ goã ǹ nə́ ǹ digolon bĩ bǎã mɛn nɛ, ǹ ná a dɔ bĩ walan "Davida a kiwi". A nɛgiĩ Ezekiasi na á kii baa a bǎã nɛ.