Read Samo, Southern Kiin2 19 Bible Online

Kiin2 19 - Samo, Southern bible

Kiin2 19

¹Kii Ezekiasi bɛa boon kɛn lɛn ma lɔn, a foo ziziɛ̃, á ná a mɔnaan kũ á ǹ tɔtoɛ̃, á gɛ̀ koa ǹ mɔnaa wɔ a din-a á woo Dɛnaa Lawa a kion.

²Bɛ kio, á kii a sumu mìilandɛnaa Eliakimu laanka sɛ́wɔ-kiɛ̃li Sebunaa dia kun ka Lawa a wúlu-bɔlen lɛn min zizin ni, mà ǹ wo boo da ka Amɔsi a nɛgiĩ Izayii kɛ nɛ Lawa a boo gii-dali lɛa. A bɛ́ ǹ diɛ woe, gɛ̀ koa ǹ mɔnaa na á goã ǹ tumaa ganaa.

³Kii lɛ mà ǹ pɛ Izayii ni, mà Ezekiasi n kɛ pii: «Pelo a lɛawaa kɛ n foo ziziɛ̃ ǹ lɛawaa lɛa, dɔlɔ bɔ laanka sìi da ǹ lɛawaa lɛa. Nɛnyaan a yɛ dɔ, sɛnɛ toɛ̃ ǹ pàã banban ǹ dan tá yii wa!

⁴Asiirii gána a kii sɔraasin goledɛnaa mɛn dia, mà a da sɔ kɔ Lawa yiikoonaa lɛ ganaa, kɔntan, Izayii a Lawa, Dɛnaa Lawa lɛ a die bɛa boon kɛn lɛn tumaa miɛ wa? Kɔntan n Lawa, Dɛnaa Lawa lɛ boon mɛnɛn lɛn ma, a die bɛn dɔlɔ boe wa? Bɛ lɛ nɛ, zaman lɛ a gialakun mɛn bɛ́ tɔn na a tan, Lawa nyankɔ bɛn lɛn lɛa.»

⁵Kii Ezekiasi a dí-nyalin lɛn nə́ woo dɔ Izayii li.

⁶Izayii pɛ ǹ nɛ, mà ǹ die ǹ pɛ ǹ dɛnaagiĩ lɛ-n kɛnɛn: «Dɛnaa Lawa n kɛ pii: N boon mɛnɛn lɛn ma, kɛn lɛn Asiirii gána a kii a di-nyanlin nə́ da ǹ nə́ wɔ masɛ lon ne, bɛn baran nyɛ́ɛ da n ganaa wa.

⁷Á ke, ma á die taasiɛ we Asiirii gána a kii lɛ yiri ni, á re boo miɛ, a n bɔyaa a wo a gána nɛ, bɛa boo lɛ taman yii. Ma á re toɛ a gɔya gɛ̀ wɔ a din a gána nɛ.»

⁸Bɛ kio, Asiirii minin sɔraasin goledɛnaa lɛ bɛ́ á ma, mà Asiirii gána a kii lɛ woo á n bɔ Lakiisi, á kiɛ̃ á woo kii lɛ yaa Libnaa bɛ̀ a na a gialaa zia biɛ.

⁹Maǹ nə́ kɛ pɛ Asiirii gána a kii lɛ nɛ, Etiopii gána a kii Tirakaa wɔ gɔn la: — Tirakaa soo á die zia biɛ n ganaa.

¹⁰Asiirii gána a kii lɛ tɔ́n wusoo doo á minin dia Ezekiasi li, á pɛ ǹ nɛ, mà ǹ pɛ Zudaa gána a kii Ezekiasi n kɛnɛn: «N Lawa mɛn bɛ́ n tá n foo doɛ a ganaa, bɛ baran toa a n yiri sã n pɛ mà Zeruzalɛmu ba re n we Asiirii gána a kii gɔn wa.»

¹¹Á ke, Asiirii gána a kiin lɛn nə sii mɛn zɛnaa gánan tumaa nɛ, n dinmaa lɛ tá bɛ doɛ̃, ǹ nə́ ǹ ziziɛ̃ lenlen. Sɛnɛ, nsɛ n die n boe a nɛ?

¹²Gánan lawan kɛn, ma digolon nə́ ǹ ziziɛ̃, bɛn nə́ boo ǹ gánan lɛn la ǹ nə́ ǹ si ǹ nə́ ǹ kaa? Goozan kiwi ni, Karan kiwi ni, Resɛfu kiwi ni ka Edɛn tɔrɔn kɛn nɛ giã-n Telasaara.

¹³Amaati kiwi a kii ni, Arpaadi kiwi wɔ nɛ, Layiiri wɔ nɛ, Sefaravayimu wɔ nɛ, Enaa wɔ nɛ ka Iva wɔ nɛ, bɛn man maa?

¹⁴Ezekiasi sɛ́wɔ lɛ si á bɔ dia dí-a wolen lɛn gɔn á pɛ, bɛ kio, á woo Dɛnaa Lawa a kion. Ezekiasi sɛ́wɔ lɛ lɛ bɔ kɔn Dɛnaa Lawa yɔrɔ-a.

¹⁵ Á tɔ́n Dɛnaa Lawa nyankɔ á pɛ: «Izirayeli gána a Lawa, Dɛnaa Lawa, nsɛ mɛn bɛ́ lon màn yiikoonaan mìi la, n dinsɔɔ̃ n kanaa gánan tumaa a Lawa lɛa, a giala n din nə n lon laanka tán zɛnaa.

¹⁶Dɛnaa Lawa, n too naa, n nə n too kɔ, Dɛnaa Lawa, n yii bũ n ga! Senankeribu mɛn lɛ minin dia mà ǹ da sɔ kɔ n din Lawa yiikoonaa ganaa, n too kɔ bɛa boon kɛn ganaa!

¹⁷Dɛnaa Lawa, taãn nɛ, Asiirii gána a kiin lɛn nə́ basaã kɔ tɔrɔn manɛ ka ǹ gánan nɛ.

¹⁸Ǹ nə́ bɛa tɔrɔn lɛn lawan kaa tɛ-n, sɛnɛ bɛa lawan kɛn lɛn ba lawa taãnan lɛa wa. Màn minbuiin nɛ a màn zɛnaa kooron lɛa, gɔn laanka kɔlɔ lɛa, bɛ lɛ nɛ Asiirii gána a kiin lɛn nə́ ǹ ziziɛ̃.

¹⁹Sɛnɛ nsɛ Dɛnaa Lawa ke wɔsɛn Lawa lɛa, wɔsɛn kanbaa Senankeribu ganaa. Dɛnaa, gánan tumaa á die doɛ̃ kəni mà n dinsɔɔ̃ n Lawa lɛa.»

²⁰Amɔsi a nɛgiĩ Izayii minin dia woe pii Ezekiasi ni mà Izirayeli a Lawa, Dɛnaa Lawa n kɛ pii: — N nyan mɛn kɔ ma la Asiirii gána a kii Senankeribu wɔ paǹ li, má ma.

²¹Dɛnaa Lawa bɛ́ boo mɛn diɛ Senankeribu ganaa bɛ á ke: A n zɔ̀ɔ doe n ne, a n yaa we n ganaa, *Siɔn nɛlɔ kɛ lɛ, a ná a giĩ doɛ̃ wa. A nə n kɔkɔrɔ zuĩ n kio wɔlɔ-a, Zeruzalɛmu a nɛlɔ lɛ.

²²Ma n nə́ n sɔ kɔ die-a, ń wɔ a lon baraa? Ma n nə́ n lɛn saa lon die li, ń ga a ganaa ka din koa nɛ? Izirayeli a Lawa sonbore kɛ nɛ.

²³Ń minin dia n sɔ gii koe Dɛnaa ganaa ń pɛ: «Ká maa zia da ǹ wotoro zaã kɛ nɛ, má bɔ kelen mìi ni, ka Liban gána a wasagialaan nɛ, má a da kaka lɛ a sɔsɔrɔn kuru, ka a siprɛsi da lɛ a sɔsɔrɔn nɛ má dɔ a kele lɛ a baã bii, a daã tì kɛ lɛ.

²⁴Má tùn fɔ̃, má bǎã kɔsɔn mu mi. Má ǹ piɛ̃ ma gòã giulun, Ezipti gána a tàn lɛn tumaa.»

²⁵N ba doɛ̃, ma má siin kɛn zɛnaa yɔrɔ bɔ haalɛ bibi wa? N ba doɛ̃, mà haalɛ bibi ni, mà má ǹ yɔrɔ bɔ wa? Ma nə ǹ zɛnɛɛ sisia. Kungɔn bɛ́ kiwin mɛnɛn lɛnpɛnɛ, má toa ń bɛn baa kɛbɔlɔ da kɔn la lɛa.

²⁶Ǹ minin pàã banban ǹ gù gã, sìi nə ǹ ganaa, maǹ ka buu buruu bɛ́ lɔn, ka wuru buu bɛ́ lɔn, maǹ ka kala buu bɛ́ lɔn, ka wuru gɔ́ɔ̃ màn bɔlɔn bɛbɛnɛɛ bɛ́ lɔn.

²⁷Sɛnɛ, ma tá n piɛ doɛ̃, n soo ne, ka n wɔ nɛ, ma tá doɛ̃. Bɛ̀ n foo á yoo-n ma li má á bɛ dɔ doɛ̃.

²⁸N foo mɛn yoo masɛ li ke, n din gole kɔ ǹ boo mɛn da má ma. Man die kaaran we n nyin ni, ma karafɔ wɔ n lɛ-n, n kɔ zii mɛn lɛ ń daa, ma bɛa zii saa n nɛ, ma wo n koa.

²⁹Kɛ n die sii a kɔnboe biɛ n gɔn Ezekiasi: Màn nàn mɛn nə n si á kaa, man die bɛ bii miɛ̃la. Lɛ̀-boe, kaãsaã gɔ́ɔ̃ màn nɛ, ǹ tá re bii. Sɛnɛ, a lɛ̀ sɔɔbaa ǹ wɔ, ka màn da ka kuru, ka *rezɛ̃ dan zumu ka ǹ nɛ bii.

³⁰Zudaa tɔrɔ gialakun mɛn nə n si á goã, ǹ nə ǹ mɛn toa walan, ǹ gòonən tá re we tán, ka da bɛ́ lɔn, ǹ nɛ kɔ.

³¹A giala min mɛnɛn bɛ re goɛ̃, ǹ tá re soe Zeruzalɛmu, Yiikoonaan mɛnɛn bɛ re goɛ̃, ǹ tá re gisĩ *Siɔn kele la. Dɛnaa Lawa a kɔn narɛ gole lɛ n die bɛ zɛnɛɛ.

³²Bɛ lɛ nɛ, Dɛnaa Lawa n kɛ pii, Asiirii a kii lɛ wɔ paǹ li: A ba re we kiwi kɛ-n wa. A ba re kiɛ zuĩ a-n wa. A ba re zia diɛ a-a ka goóro-n wa. A ba re tii diɛ kɔn la a lɛ a wa.

³³A zii mɛn saa á daa, á re n bɔyɛɛ ka bɛ lɛ nɛ. A we kiwi kɛ-n wa. Ma din Dɛnaa Lawa a da ǹ boo ne.

³⁴Man die kiwi kɛ tamɛɛ, ma a kanbaa ma din laanka maa dí-nyali Davida taman yii.

³⁵Bɛa tèlò lɛ nɛ, Dɛnaa Lawa a lon a dia dí-a wole woo giĩ duu paabiɛ ka pɔkiwisiwensooro (185 000) dɛ, Asiirii minin bǎã nɛ. Baayɛlɛ, minin bɛ́ ǹ nə́ yoo, a yii minbuiin nɛ gere tán, ǹ nə́ gã!

³⁶Asiirii gána a kii Senankeribu lɛ yoo á n bɔ a bǎã nɛ, á n bɔyaa á woo Ninivu kiwi, á goã walan.

³⁷Sɛnɛ, ǹ kɔn pinaa a toa kuməə-n tán a dì kion Nisirɔki giulun, a nɛgiĩ min paa, Adramelɛki laanka Saresɛɛrɛ nɛ, bɛn nə́ dɛ ka gɔya nɛ, ǹ nə́ baa si ǹ nə́ woo Araraa gána nɛ. A nɛgiĩ Asaradɔn na á kii baa a bǎã nɛ.