Read Samo, Southern Kiin2 2 Bible Online

Kiin2 2 - Samo, Southern bible

Kiin2 2

¹Dɛnaa Lawa bɛ́ Yilii siɛ kun ka kurunkurun ni, woe-n lon ne, bɛ̀ Yilii laanka Yiliizee nə n toɛ Gilgaali kiwi woe bǎã kɔsɔ nɛ.

²Yilii pɛ Yiliizee ne: «Bǐɛ̃ kɔ n golee kànaa, a giala Dɛnaa Lawa n ma diɛ yǎa Betɛli kiwi.» Yiliizee ná a lɛ si kɛnɛn: «N bɛ́ nə n tan, Dɛnaa Lawa Yiikoonaa lɛ tɔ nɛ, ma ba n niɛ̃ n ganaa wa.» Ǹ nə́ tɔ́n kiɛ̃, ǹ nə́ woo Betɛli.

³Lawa a boo gii-dalin mɛnɛn bɛ́ giã-n Betɛli, bɛn nə́ soo ǹ nə́ n da Yiliizee lɛ, ǹ nə́ nɔ̀n da la: «Ń tá doɛ̃ mà Dɛnaa Lawa n die n dɛnaagiĩ Yilii lɛ siɛ pelo, a n lɛ kɔ-n lon n mìi lalan?» Yiliizee nə́ ǹ lɛ si: «Ma dɔ á doɛ̃, ka n lɛ tã.»

⁴Yilii pɛ Yiliizee-n doo: «Bǐɛ̃ kɔ n golee kànaa, a giala Dɛnaa Lawa n ma diɛ Zerikoo.» Yiliizee ná a lɛ si: «N bɛ́ nə n tan, Dɛnaa Lawa Yiikoonaa lɛ tɔ nɛ, ma ba n niɛ̃ n ganaa wa.» Ǹ nə́ kiɛ̃ ǹ nə́ woo dɔ Zerikoo.

⁵Lawa a boo gii-dalin mɛnɛn bɛ́ giã-n Zerikoo, bɛn nə́ ǹ zɔ̃ ǹ nə́ dɔ Yiliizee li ǹ nə́ pɛ nɛ: «N tá doɛ̃ mà n Dɛnaa Lawa n die n dɛnaagiĩ Yilii lɛ siɛ pelo, a n lɛ kɔ-n lon n mìi lalan?» Yiliizee nə́ ǹ lɛ si: «Ma á doɛ̃, ka n n lɛ tã.»

⁶Yilii wusoo á pɛ Yiliizee ne: «Bǐɛ̃ kɔ n golee kànaa a giala Dɛnaa Lawa n ma diɛ Zurdɛ̃ tà lɛ-a.» Yiliizee ná a lɛ si: «N bɛ́ nə n tan, Dɛnaa Lawa Yiikoonaa lɛ tɔ nɛ, ma ba n niɛ̃ n ganaa wa.» Ǹ dinin min paa kiɛ̃ ǹ nə́ woo.

⁷Lawa a boo-gii dali zaman lɛ a min posooro woo giã Zurdɛ̃ tà lɛ yɔrɔ-a tìã lɛa, Yilii laanka Yiliizee sɛ golee kunu tà lɛ li.

⁸Yilii tɔ́n na a dɔnkɛ bɔ, á timəə á tà mu lɛ dɛ nɛ, tà mu lɛ nə́ n na kɔn. Yilii laanka Yiliizee tɔ wɔ tán gere la ǹ dinin min paa ǹ nə́ soo.

⁹ Ǹ bɛ́ ǹ nə́ soo ǹ mɛn waáraa, Yilii pɛ Yiliizee ne: «Lawa laan bɛ́ a n ma siɛ a wo ka ma-n lon, ń bɛ́ giɛ màn mɛn li masɛ li, bɛ nyankɔ.» Yiliizee pɛ Yilii ni: «Bǐɛ̃ kɔ, Lawa Yiri mɛn bɛ́ n la, n toa ma bɛa laman paa yɛ.»

¹⁰Yilii nə́ n toa: «N bɛ́ giɛ màn mɛn li, bɛ á kaka. Sɛnɛ, Lawa bɛ́ re ma siɛ n li biikoo mɛn li, a wo ka ma nɛ ka ziɛɛ̃nɛ n ganaa, bɛ̀ ń ma yɛ bɛa biikoo lɛ li, n màn mɛn nyankɔ, n tá re bɛ yii. Bɛ̀ n ma yɛ wa, n ba re bɛa màn lɛ yii wa.»

¹¹A ǹ toa zii la sùn biɛ woe, bɛ̀ wotoro tɛdɛnaa goon laanka sùi tɛdɛnan nə́ ke ǹ nə́ daa wɔ ǹ biin ni, ǹ nə́ ǹ sawaa kɔn. Yilii dii á woo lon kurunkurun li.

¹² Yiliizee yii bɛ́ á sii lɛ yɛ, á n lɛ dɛ Yilii ganaa: «Maa díi! Maa díi, ma nə n goã ka Izirayeli gána a zia wotoro ka a sùidɛnan bɛ́ lɔn.» Bɛ kio, Yiliizee yii Yilii yɛ doo wa. Yiliizee ná a mɔnaa kũ á toɛ̃ kɔn paa.

¹³Dɔnkɛ gole mɛn bɔ Yilii ganaa á mɛnaa, Yiliizee bɛ saa, á n lɛ goa á daa golee Zurdɛ̃ tà lɛ-a.

¹⁴Dɔnkɛ gole mɛn lɛ bɔ Yilii ganaa á mɛnaa, Yiliizee bɛ bɔ á tà mu lɛ dɛ nɛ, á n toa: «Dɛnaa Lawa n maa, Yilii a Lawa lɛ?» Yiliizee dɔ bɛ́ á tà mu lɛ dɛ, tà mu lɛ nə́ n na kɔn wɔlɔ paa, Yiliizee kiɛ̃.

¹⁵Lawa a boo gii-dalin mɛnɛn bɛ́ giã-n Zerikoo kiwi, bɛn nə́ goã ǹ nə́ Yiliizee yɛ ǹ yɔrɔ-a, ǹ nə́ tɔ́n pɛ: «Yiri mɛn goã Yilii la bɛ lɛ n Yiliizee la.» Ǹ nə́ daa n da lɛ, ǹ nə́ kaa tán a giulun,

¹⁶ǹ nə́ pɛ nɛ: «Á ke, n dí-nyalin lɛn bii, giĩ posooro kaka tan. Toa ǹ wo ga n dɛnaagiĩ lɛ li. Kɔntan Dɛnaa Lawa yiri lɛ na á saa á woo zũ kele kɔn la, hinlaa nyankɔrɔ lɛ kɔn nɛ.» Yiliizee pɛ ǹ nɛ: «Ka baran min dia wa.»

¹⁷Sɛnɛ, ǹ nə́ n laa a ganaa, yǎa a tɔn nɔmaa á pɛ: «Ka ǹ dia le!» Ǹ nə́ tɔ́n giĩ posooro lɛ dia woe giɛ Yilii li, ǹ nə́ ga li ǹ lɛawaa sɔɔ ǹ yɛ wa.

¹⁸Yiliizee na á goã á golee Zerikoo, giĩ posooro lɛ nə́ n bɔyaa ǹ nə́ woo a li. Yiliizee pɛ ǹ nɛ: «Táa má pɛ ka-n lɛn máa ka baran wo wa.»

¹⁹Zerikoo kiwi minin nə́ pɛ Yiliizee ne: «Ka wɔa dɛnaagiĩ din yii bɛ́ a ganaa lɔn, kiwi lɛ a giãma-n tá kɔɔ̃n nɛ, sɛnɛ a mu na a ba siĩn wa, a toɛ màn tá búu biɛ gána lɛ-n wa.»

²⁰Yiliizee tɔ́n nə n toa: «Ka wo ga tasa dii li, ka yìsi kaa a nɛ, ka da kɔ ma la.» Ǹ nə́ daa tasa lɛ kɔ la.

²¹Mu lɛ bɛ́ soe tán bǎã mɛn nɛ, Yiliizee soo á woo walan, á yìsi kaa bɛa bǎã lɛ nɛ, á pɛ: «Dɛnaa Lawa pɛ mà asɛ n mu kɛ lɛ yoreen koe, a ba re gɛ̀ dii doo wa, a ba re màn kurii búu baa ganaa doo wa.»

²²A saa bɛa pinaa kɛ lɛ ganaa, mu lɛ yoreen kɔ, ka Yiliizee goã a ná a boo da lɔn.

²³Yiliizee kiɛ̃ walan á woo Betɛli. A bɛ́ zii la woe, nɛ tenən nə́ soo kiwi gɔ́ɔ̃ nɛ, ǹ nə́ goã yaa we a ganaa, bɛ̀ ǹ tá pii: «N tan baã fu-a! N tan baã fu-a!»

²⁴Yiliizee nə́ n bɔyaa á ga ǹ ganaa, á lɛn baraa bíi ǹ li ka Dɛnaa Lawa tɔ nɛ. Bɛ kio, yǎa don màn dadaraa paa babaraa soo da lɛ-n, ǹ nə́ bɛa nɛ tenən lɛn min pusiwenpaa wɔ̃woɛ̃ kɔn.

²⁵Yiliizee nə́ n toa walan, á woo Karmɛli kele la, á n toa walan dɔ nɛ á n bɔyaa á woo Samarii.