Read Samo, Southern Kiin2 20 Bible Online

Kiin2 20 - Samo, Southern bible

Kiin2 20

¹Bɛa biikoo lɛ li, busu kɔn Ezekiasi kũ, á woo dɔ gɛ̀ gɔn la. Amɔsi a nɛgiĩ Izayii lɛ Lawa a boo gii-dali lɛa, bɛ daa yaa, á pɛ nɛ: — Dɛnaa Lawa n kɛ pii: «N gɔ́ɔ̃ pɛ n kion minin manɛ. A giala, busu lɛ a re n toɛ wa, n tá re giɛ̃.»

²Ezekiasi tɔ́n nə n yɔrɔ bɔyaa á dia kɛ gɔ̀nɔn la, á Dɛnaa Lawa nyankɔ, á pɛ:

³«Ee Dɛnaa Lawa, bǐɛ̃ kɔ n nə n yiri gisĩ ka ma nɛ. Má tɔ wɔ n yɔrɔ-a ka bɔlɔgoondɛnaabaa nɛ, ka gɔ́ɔ̃-fubaa nɛ. Ka bɛ dɔ nɛ, sii mɛn bɛ́ siĩni n yii li, má bɛ zɛnaa.» Yii mu gigiã soo Ezekiasi yɔrɔ nɛ.

⁴Izayii tɔn soo á n bɔ kiwi lɛ-n wa, bɛ̀ Dɛnaa Lawa á ke á boo da nɛ:

⁵— N lɛ goa n pɛ maa zaman a kii Ezekiasi lɛ nɛ, mà ǹ di Davida a Lawa, Dɛnaa Lawa lɛ mà kɛnɛn: «Má n nyankɔ lɛ ma. Má n yii mu lɛ yɛ. Á ke, man die n kaka koe. Pelo lɛawaa sɔɔ, n tá re woe Dɛnaa Lawa a kion.

⁶Man lɛ̀ fulusooro kiɛ n lɛ̀ li. Man die n sii Asiirii gána a kii lɛ la ma n da, kɔnlɛ ka kiwi kɛ lɛ nɛ. Man die kiwi kɛ lɛ tamɛɛ ma din taman yii, ka maa dí-nyali Davida nɛ.»

⁷Izayii nə́ n toa: «Ka gɔ́rɔ kɔtɔrɔn saa.» Ǹ nə́ gɔ́rɔ kɔtɔrɔn saa, ǹ nə́ lɔ kii a baayɛrɛ lɛ lɛ-a, á kakabaa yɛ.

⁸Ezekiasi tɔ́n nɔ̀n da Izayii la: «Man die doɛ̃ wàa li, máa Dɛnaa Lawa á re ma kaka koe, ma boo la ma wo Dɛnaa Lawa a kion, kànaa ka pelo lɛawaa sɔɔ?»

⁹Izayii ná a lɛ si: «Dɛnaa Lawa boo mɛn da, n bɛ́ re doɛ̃ màn mɛn li, mà Dɛnaa Lawa tá re bɛ lɛ piɛ̃, bɛ á ke: Wúlu gòã yii fù baa da a baa li hinlaa a gòã yii fù baa bɔ lɛ?»

¹⁰Ezekiasi tɔ́n na a lɛ si: «Á nanaa wúlu ganaa a gòã yii fù baa da a baa li. Sɛnɛ, masɛ má a gòã yii fù baa bɔ a baa lɛ.»

¹¹Bɛ kio, Lawa a boo gii-dali Izayii Dɛnaa Lawa nyankɔ. Dɛnaa Lawa dɔ toa wúlu gòã yii fù baa bɔ a baa lɛ. Wúlu lɛ wusoo ka a kio ne gòã yii fù.

¹²Bɛa biikoo lɛ li, Balaadan a nɛgiĩ Merodaki-Balaadan ke, *Baabilonii gána a kii lɛa, bɛ́ sɛ́wɔ dia Ezekiasi la, ka bǐɛ̃ baa ǹ mànan nɛ, a giala, á goã á ma mà Ezekiasi lɛ goã lon wa.

¹³Ezekiasi nə́ n nyɛnyaa ka dia dia-a wolen lɛn daa nɛ. Á tɔ́n nə n gɔn mànan koa ǹ bǎãn tumaa nyaa ǹ nɛ, wɔrɔ nɛ, sana nɛ, da yon gìĩ kɔɔ̃n nɛ, nyɔɔ gìĩ kɔɔ̃n nɛ, ziabaa ǹ mànan nɛ, ka a gɔn mànan tumaa nɛ. Màn kɔn din goã Ezekiasi a kion laanka a bǎãn nɛ, bɛ̀ a ná a nyaa wa.

¹⁴Lawa a boo gii-dali Izayii tɔn daa kii Ezekiasi yaa á pɛ nɛ: «Minin kɛn man nə́ wàa boo da n nɛ? Maǹ boe maa?» Ezekiasi ná a lɛ si mà maǹ boe gána sɔsɔɔ goon ne: «Baabilonii.»

¹⁵Izayii tɔ́n pɛ: «Ǹ yii na á wàa mɛn yɛ n kion?» Ezekiasi ná a lɛ si: «Màn mɛn din tumaa bɛ́ maa kion, ǹ yii yɛ. Ma gɔn màn kɔn din goã bɛ̀ man ma nyaa ǹ nɛ wa.»

¹⁶Izayii tɔ́n pɛ Ezekiasi ni: — N too kɔ Dɛnaa Lawa a boo ganaa:

¹⁷ «Á ke, a pinaa á die, màn mɛn yii bɛ́ n kion, n digolon nə màn mɛn yii sɔkɔn á daa dɔ pelo ganaa, ǹ tá re bɛ yii goɛ ǹ kiɛ̃ nɛ Baabilonii gána nɛ, màn kɔn ná a die goɛ̃ wa. Dɛnaa Lawa mà miɛ̃.

¹⁸ Ǹ tá re woe ka n nɛnyaan gigiã nɛ, n din gɔ́ɔ̃gɔ́ɔ̃ ǹ nɛnyaanan lɛa, n nə́ ǹ yɛ. Ǹ tá re kii a sumu dí-nyalin biɛ Baabilonii gána a kii a piɛ.»

¹⁹Ezekiasi nə́ n toa Izayii ganaa: «N Dɛnaa Lawa a boo mɛn da, á kɔɔ̃nɛ.» A giala a na á pɛ mà, là nyantoro laanka susui n die goɛ̃ a tan asɛ a biikoo lɛ gɔ́ɔ̃ nɛ.

²⁰Ezekiasi sii gialakunun mɛnɛn zɛnaa, a tɔ bɔ ǹ siin mɛnɛn tumaa zɛnaa, a màn mɛn zɛnaa, a mu tamaa ǹ bǎã laanka mu a kiɛ̃ ǹ zii mɛn zɛnaa, kiwi lɛ mu yɛ, bɛ yii tá kiɛ̃ nɛ sɛ́wɔ kɛ nɛ boo diɛ Zudaa gána a kiin wɔ gɔn la.

²¹Ezekiasi gã. A nɛgiĩ Manaasee kii baa a bǎã nɛ.