Read Samo, Southern Kiin2 22 Bible Online

Kiin2 22 - Samo, Southern bible

Kiin2 22

¹ Zoziasi bɛ́ kii biɛ, bɛ̀ a lɛ̀ kiwisi ni. Á kiibaa zɛnaa lɛ̀ pɔsɔɔwengoon Zeruzalɛmu kiwi. Ǹ dan tɔ n Zedidaa, Bosikaati kiwi min Adayaa a nɛlɔ nɛ.

²Sii mɛn bɛ́ pepere Dɛnaa Lawa yii li, Zoziasi bɛ zɛnaa. Á ǹ digolo Davida a tɔ wɔ ǹ gɔn saa ka te. A kanaa á woo a gusin wa, a kanaa á woo a gɔsɛ dɔn wa.

³Kii Zoziasi lɛ a kiibaa lɛ̀ fulukiwisibaa ǹ wɔ, Asaliya a nɛgiĩ Safan ke sɛ́wɔ kiɛ̃, Mesulaamu a nɔ̀ɔn lɛa, Zoziasi bɛ dia Dɛnaa Lawa a kion, á pɛ nɛ:

⁴«Wo Lawa a wúlu-bɔlen kiã Ilkia li, màn mɛn bɛ́ toɛ, ǹ da ka wɔrɔ mɛn nɛ Lawa a kion, kiɛnlɛ-lɛduə̃lin nə́ si zaman lɛ la, Ilkia bɛ nimi a na a lɛ yɛ.

⁵Ǹ die ǹ bɛa wɔrɔ lɛ wɔ dí mìilandɛnan lɛn gɔn, ka Lawa a kion lɛ a dí yɔrɔ-bɔlen ne, màn mɛn bɛ́ toɛ, minin kɛn dí nyɛɛ Lawa a kion lɛ nɛ, ǹ ná a paǹ ziziɛ̃n lɛn zɛnɛɛ, ǹ bɛn saraa nɛ:

⁶Da-sɛlɛlin ni, kion-dɔlen ne ka min mɛnɛn bɛ́ dí nyɛɛ ǹ giulun. Ka bɛ dɔ nɛ, ǹ kion mɛnɛn pii, ka kɔlɔ sɛlɛɛ nɛ, ǹ kion lɛ zɛnaa nɛ.

⁷ Wɔrɔ mɛn nə n wɔ ǹ gɔn, min baran toa a nɔ̀n da ǹ la ka bɛa woo ǹ bǎã-n wa, a giala ǹ tá dí nyɛɛ ka peperebaa nɛ.»

⁸Lawa a wúlu-bɔlen kiã Ilkia pɛ sɛ́wɔ-kiɛ̃li Safan lɛ-n kɛnɛn: «Má dí-pɛn sɛ́wɔ lɛ yɛ Lawa a kion.» Ilkia tɔ́n sɛ́wɔ lɛ saa, á kɔ Safan la á pɛ.

⁹Bɛ kio, sɛ́wɔ-kiɛ̃li Safan lɛ daa kii lɛ yaa á boo lɛ yɔrɔ saraa la kɛnɛn: «Wɔrɔ mɛn yɛ kion lɛ nɛ, n dí-nyalin lɛn nə́ bɛ sɔkɔn, ǹ nə́ wɔ dí mìilandɛnan lɛn gɔn, ka Lawa a kion lɛ a dí sii yɔrɔ-bɔlen ne.»

¹⁰Bɛ kio, sɛ́wɔ-kiɛ̃li Safan lɛ ná a boo da kii lɛ nɛ á pɛ: «Lawa a wúlu-bɔlen Ilkia sɛ́wɔ goon kɔ ma la.» Yǎa Safan tɔn sɛ́wɔ lɛ pɛ kii lɛ yɔrɔ-a.

¹¹Kii lɛ bɛ́ á dí-pɛn sɛ́wɔ lɛ a boo ma, a ná a mɔnaan tɔtoɛ̃[3].

¹²Á tɔ́n pɛ Lawa a wúlu-bɔle Ilkia nɛ, ka Safan a nɛgiĩ Ayikaamu ni, ka Mikaya a nɛgiĩ Akibɔɔrɔ nɛ, ka sɛ́wɔ-kiɛ̃li Safan nɛ, ka kii a dí-nyali Asayia nɛ:

¹³«Sɛ́wɔ mɛn lɛ yɛ, boo mɛn bɛ́ bɛ gɔ́ɔ̃ nɛ, ka wo nɔ̀n da Dɛnaa Lawa la bɛ wɔ gɔn la, masɛ laanka zaman lɛ a lɛa, ka Zudaa minin tumaa nɛ. A giala Dɛnaa Lawa a foo yoo lɛ á gole. A foo na á yoo wɔ li, a giala wɔ digolon nə n too kɔ sɛ́wɔ kɛ lɛ a boo ganaa wa. Màn mɛn yii bɛ́ kiɛ̃ nɛ a nɛ, ǹ tɔ wɔ á kɔnpɛ ka bɛ-n wa.»

¹⁴Lawa a wúlu-bɔle Ilkia nɛ, ka Ayikaamu ni, ka Akibɔɔrɔ nɛ, ka Safan laanka Asayia nɛ, ǹ nə́ tɔ́n kiɛ̃ ǹ nə́ woo Huldaa yaa, lɔ ke Lawa a boo gii-dali lɛa. Huldaa lɛ n Saalumu a lɔ lɛa. Saalumu n Tikva a nɛ lɛa, Araasi a nɔ̀ɔn lɛa, a n dí-nya ǹ mɔnaan mìi la. Huldaa na á goã Zeruzalɛmu dala dii kɛ nɛ. Ń bɛ́ ǹ nə́ boo da nɛ á nya,

¹⁵á tɔ́n pɛ ǹ nɛ mà Izirayeli a Lawa, Dɛnaa Lawa n kɛ pii: — Giĩ mɛn lɛ ka dia ma li, ka pɛ nɛ,

¹⁶mà man die koe boe bǎã kɛ lɛ laanka a minin ganaa, sɛ́wɔ ke Zudaa gána a kii pɛ, a kɔnpɛ ka bɛa boon tumaa nɛ.

¹⁷Ka bɛ́ ka ma toa walan, ka da yon gìĩ kɔɔ̃n tã guguru kɔ ǹ mànan kɔsɔn manɛ, ka ma foo yoo ka kaa nya ǹ dín ni, bɛ lɛ nɛ ma foo yoo bǎã kɛ lɛ li, ma foo lɛ ná a die wɛɛ wa.

¹⁸Sɛnɛ, Zudaa a kii mɛn lɛ ka dia, mà ka da nɔ̀n da Dɛnaa Lawa la, ka die ka kɛ pɛ nɛ mà Izirayeli a Lawa, Dɛnaa Lawa n kɛ pii: «Ń bɛa boon kɛn lɛn ma taãn nɛ,

¹⁹a giala, boon lɛn nə́ dí nya n foo ne. Ma bɛ́ má màn mɛn pɛ bǎã kɛ lɛ laanka a minin wɔ paǹ li máa bɔ̀n tá re bǎã lɛ yii, koe dɔ bɔ bɔ-a, n bɛ́ ń bɛa boo lɛ ma, man nə́ n din gisĩ masɛ Dɛnaa Lawa yɔrɔ-a, n nə́ n mɔnaan tɔtoɛ̃, ń wuu pɛ ma yɔrɔ-a, ma dɔ tɔ́n nə n nyankɔ lɛ ma. Dɛnaa Lawa a da ǹ boo ne.

²⁰Á ke, bɛ lɛ nɛ, masɛ bɛ́ máa man die koe mɛn boe Zeruzalɛmu ganaa, n yii á re bɛ yii wa, yǎa n gɛ̀ kio. Ma á die toɛ n gã ka là nyantoro ne.» Bɛ kio, dia dí-a wolen lɛn ná a boo da kii lɛ nɛ.