Read Samo, Southern Kiin2 25 Bible Online

Kiin2 25 - Samo, Southern bible

Kiin2 25

¹ Sedekiasi a kiibaa lɛ̀ manangɔrɔbaa ǹ wɔ, lɛ̀ a mui a fùbaa ǹ wɔ a lɛawaa fù, *Baabilonii gána a kii Nebukadenezɔɔrɔ daa Zeruzalɛmu kiwi gialaa, kun ka a zia-baalin tumaa nɛ. Á giã kiwi lɛ yɔrɔ-a, ǹ nə́ bèlèn dɔ, ǹ nə́ kiwi lɛ lɛnpɛnɛ nɛ.

²Kiwi lɛ na á goã kuĩ gɔ́ɔ̃ nɛ yǎa Sedekiasi a kiibaa lɛ̀ fulugoonbaa ǹ wɔ.

³Lɛ̀ a mui siibaa ǹ wɔ a lɛawaa manangɔrɔbaa ǹ wɔ pinaa, bòo gole bɛ́ á goã kiwi lɛ gialaa, minin yii ná a ba màn-bii ganaa ǹ nə́ bii doo wa,

⁴ ǹ nə́ yala bɔ kiwi lɛ a kungɔn ganaa. Zia-baalin lɛn tumaa baa si tèlò basa li, kiɛnlɛ ke kungɔn màn paa lɛ biin ni, kunu kii a dù gɔrɔ kɛ li, ǹ nə́ bɔ bɛ nɛ. A laanɛ, Kalde minin nə́ goã ǹ nə́ kiwi lɛ da bii, nyankɔrɔ lɛ ke ǹ nə́ bíi Arabaa, ǹ nə́ bɛa zii kɛ saa ǹ nə́ woo.

⁵Kalde minin zia-baalin lɛn nə́ tɔ́n kii lɛ kio loo, ǹ nə́ woo dɔ a ganaa Zerikoo kiwi a nyankɔrɔ lɛ kɛ nɛ. A zia-baalin tumaa sawaa ǹ nə́ toa walan.

⁶Kalde minin lɛn nə́ kii lɛ kũ, ǹ nə́ woo ne Ribla kiwi, Baabilonii gána a kii li, ǹ nə́ kiri wɔ a ganaa.

⁷ Ǹ nə́ Sedekiasi a nɛgiĩn bɔlɔ kuru a dinmaa yii ni. Bɛ kio, ǹ nə́ Sedekiasi yii nànan puru, ǹ nə́ yii ka zan zɔrɔka naakɔn paa nɛ, ǹ tɔ́n woo ne Baabilonii.

⁸Lɛ̀ a mui soorobaa ǹ wɔ a lɛawaa sɔbaabaa ǹ wɔ, Baabilonii gána a kii Nebukadenezɔɔrɔ a kiibaa lɛ̀ fulumanangɔrɔbaa ǹ wɔ, a dí-nyali Nebuzaradan mɛn bɛ́ minin-lɛduə̃lin mìi la, bɛ́ wɔ Zeruzalɛmu.

⁹Á tɛ da Lawa a kion kɛ laanka kii a kion ganaa, ka Zeruzalɛmu kiwi a kionən tumaa nɛ. Á tɛ da min dadaran kionən tumaa ganaa.

¹⁰Kalden zia-baalin mɛnɛn tumaa goã minin-lɛduə̃lin mìilandɛnaa lɛ diɛ zii, bɛn nə́ kungɔn kɛ wuru, Zeruzalɛmu lɛnpɛnɛ.

¹¹Bɛ kio, zaman gialakun mɛn bɛ́ tɔn kiwi lɛ nɛ, bɛn nɛ, ka min mɛnɛn nə wo n dinin kɔ Baabilonii gána a kii lɛ la, minin-lɛduə̃lin mìilandɛnaa Nebuzaradan lɛ bɛn goa á woo ǹ ne bɛ̀rɛbaa ǹ bǎã nɛ, kɔnlɛ ka zaman damata gialakun lɛ nɛ.

¹²Sɛnɛ, minin-lɛduə̃lin mìilandɛnaa lɛ gána lɛ a doobaan gialakun toa walan, mà ǹ buu-kɔsɔlin baa, ka *rezɛ̃ da dí-nyalin ni.

¹³ Dɛnaa Lawa a kion a bìbìn kɛn zan lɛa, Kalde minin lɛn nə́ bɛn yɔyɔrɛ. Ǹ nə́ wotoron kɛn dɔn yɔyɔrɛ, ka zan doo kaaraa kɛ dɔ nɛ Lawa a kion. Bɛ kio, ǹ nə́ bɛa zan lɛ gũ ǹ nə́ woo ne Baabilonii.

¹⁴ Kalde minin lɛn nə́ ton kaa ǹ mànan kɛn goa, ka lasanan kɛn nɛ, ka gɔyan nɛ, duvɛ̃ kaa ǹ mànan kɛn nɛ, ka mànan mɛnɛn tumaa goã zan lɛa, ǹ nə́ Lawa a dí nyɛɛ ǹ nɛ.

¹⁵Minin-lɛduə̃lin mìilandɛnaa lɛ da yon gìĩ kɔɔ̃n tã ǹ mànan kɛn goa, ka mà pɛsɛ̃ ǹ tàanan nɛ. Ǹ tumaa n wɔrɔ hinlaa sana lɛa.

¹⁶Salomɔn bìbì màn paa mɛn zɛnaa, a doo kaara goon toto mɛn zɛnaa, a wotoron mɛnɛn zɛnaa Lawa a kion lɛ wɔn lɛa, zan mɛn wɔ bɛa mànan kɛn lɛn zɛnaa nɛ, lɛ ba a gugurubaa diɛ wa.

¹⁷Bìbì màn paa lɛ na á goã goon. A gogoonmaa a wo lon na á goã mɛtərə manangɔrɔ nyaǹ màn nə́ goã a gogoonmaa mìi ni zan lɛa, a wo lon nə́ dɔ mɛtərə goon ka talɛɛ. Ǹ nə́ da nɛ nyaǹan zii bɔ, ǹ nə́ gogoonmaa lɛ dɛ nɛ: a tumaa n zan lɛa.

¹⁸Bɛ kio, minin-lɛduə̃lin mìilandɛnaa Nebuzaradan lɛ Lawa a wúlu-bɔlen kiã Seraya kũ, ka a koamala wole Sefania laanka kiɛnlɛ-lɛduə̃li min sɔɔ kɛ nɛ.

¹⁹Á kii a kiodɛnaa goon dɔ yɛ kiwi lɛ nɛ, á kũ. Bɛa kiodɛnaa lɛ n sɔraasin sii yɔrɔ boe. Á giĩ sooro dɔ yɛ kiwi lɛ nɛ á ǹ kũ. Bɛa giĩ sooro lɛn man yiri koe kii la. Nebuzaradan lɛ sɔraasin goledɛnaa a sɛ́wɔ-kiɛ̃li dɔ kũ. Bɛa sɛ́wɔ-kiɛ̃li lɛ na á goã gána lɛ a minin boe sɔraasi lɛa. Nebuzaradan lɛ zaman lɛ a min pɔsɔrɔ dɔ yɛ kiwi lɛ nɛ, á ǹ kũ.

²⁰Minin-lɛduə̃lin mìilandɛnaa, Nebuzaradan lɛ nə́ ǹ baa kòso nɛn lɛa, á woo ǹ ne Baabilonii gána a kii li, Ribla kiwi.

²¹Baabilonii gána a kii lɛ tɔ́n nə ǹ dɛ ǹ nə́ gã Ribla kiwi, Amaati gána nɛ. Maǹ nə́ Zudaa minin goa ka bɛa yɔrɔ lɛ nɛ, ǹ nə́ woo ǹ ne ǹ wɔlɔ n lui ni ǹ gána ganaa.

²² Zaman gialakun mɛn nə wusoo á goã Zudaa gána lɛ nɛ, kɛn lɛn *Baabilonii gána a kii Nebukadenezɔɔrɔ lɛ nə́ ǹ toa walan, á Saafan a nɔ̀ɔn, Ayikaamu a nɛgiĩ Gedalia koa ǹ mìi la pàãdɛnaa lɛa.

²³Zudaa gána a sɔraasin mìilandɛnaa tumaa laanka ǹ kiodɛnan bɛ́ ǹ nə́ ma, mà Baabilonii gána a kii lɛ Gedalia koa pàãdɛnaa lɛa, ǹ nə́ daa Gedalia yaa Misipaa kiwi. Bɛa kiodɛnan lɛn man ka kɛn nɛ: Netania a nɛgiĩ Isimayeli ni, Kareya a nɛgiĩ Zoanan nɛ, Netofaa kiwi min Tamewumɛti a nɛgiĩ Seraya nɛ, ka Yazania kɛ nɛ Maakaa tɔrɔ goon a nɛ lɛa.

²⁴Gedalia nə́ n liɛ sɔraasi mìilandɛnan lɛn laanka ǹ kiodɛnan lɛn manɛ, á pɛ: «Kalde minin dí-nyalibaa baran nyɛ́ɛ da ka ganaa wa. Ka giã gána lɛ nɛ, ka dí nya Baabilonii gána a kii lɛ nɛ. Ka yii á re goɛ̃ nyɛɛ nɛ.»

²⁵ Sɛnɛ, lɛ̀ a mui sɔbaabaa ǹ wɔ li, Isimayeli, Elisamaa a nɔ̀ɔn ke Netania a nɛ lɛa, kii tɔrɔ lɛa, bɛ daa kun ka giĩ fù ni, ǹ nə́ Geladia dɛ á gã kɔnlɛ ka Zudaa minin laanka Kalde minin kɛn nɛ ǹ nə́ goã kun ni Misipaa.

²⁶ Zaman lɛ tumaa, doobaan laanka pàãman nɛ, sɔraasi mìilandɛnan nɛ, ǹ nə́ bɔ ǹ nə́ kaa zii la, ǹ nə́ woo Ezipti gána nɛ, a giala man nə́ goã nyɛ́ɛ biɛ Kalde minin lɛn manɛ.

²⁷Zudaa gána a kii Zoakini a saa wo ne lɛ̀ pɔsɔɔwensɔbaabaa ǹ wɔ, bɛa lɛ̀ lɛ a mui fulupaabaa ǹ wɔ a lɛawaa fuəwensɔbaa, Baabilonii gána a kii Evili-Merodaaki bǐɛ̃ kɔ Zudaa gána a kii Zoakini ganaa, á bɔ kòso-n á da. Bɛ á zɛnɛɛ, bɛ̀ Evili-Merodaaki lɛ a kiibaa lɛ̀ din ni.

²⁸Evili-Merodaaki boo da ka Zoakini ni doɛ̃ sɔnbɔraanɛ, á kũ á goledɛnaabaa kɔ la. Bɛa goledɛnaabaa kɛ lɛ á soɛ kiin kɛn wɔ nɛ, ǹ nə́ goã kun ni Baabilonii.

²⁹Kòso mɔnaan mɛnɛn nə goã Zoakini ganaa, Evili-Merodaaki bɛn lon kɔ. Bɛ kio, Zoakini goã màn bii kun ka kii lɛ-n miɛ̃ duduu a yiikoonaabaa tumaa gɔ́ɔ̃ nɛ.

³⁰Zoakini laadoo goã mànan mɛnɛn ganaa, kii lɛ na á goã bɛn koe la baraabaraa, a yiikoonaabaa tumaa gɔ́ɔ̃ nɛ.