Read Samo, Southern Kiin2 3 Bible Online

Kiin2 3 - Samo, Southern bible

Kiin2 3

¹Akaabu a nɛgiĩ Zoramu kii baa Izirayeli gána mìi la, Samarii kiwi, Zudaa gána a kii Zozafati a kiibaa lɛ̀ fulukiwisibaa ǹ wɔ li. Zoramu na á kiibaa zɛnaa lɛ̀ fulupaa.

²Sii mɛn bɛ́ baraa Dɛnaa Lawa yii li, Zoramu na á goã bɛ zɛnɛɛ, sɛnɛ a bie ka a na á goã ǹ di laanka ǹ dan wɔ kɛ miã tɔrɔ zɛnɛɛ wa. Ǹ di goã á tíĩ mɛn doa *Baali wɔ lɛa, Zoramu bɛ din wuru.

³Sɛnɛ Nebaati a nɛgiĩ Zeroboamu goã á Izirayeli minin da sii baraa mɛn a zɛnaa ganaa, Zoramu gɔn na á goã paraa-n bɛa zɛnaa ganaa, a n bɔ a zɛnaa wɔlɔ li wa.

⁴Moabu gána a kii Mesia na á goã tɔɔn toe. A na á goã sère ten duu paabiɛ (100 000) laanka sère gɔ̀lɔ̀ gusugə duu paabiɛ koe Izirayeli gána a kii lɛ la, nyin giɔ̀mɔ lɛa lɛ̀ woo lɛ̀.

⁵Sɛnɛ Izirayeli gána a kii Akaabu bɛ́ á gã, Moabu gána a kii lɛ nə́ n gòãn dii Izirayeli gána a kii ganaa.

⁶Kii Zoramu lɛ tɔ́n yoo gɔrɔ á soo á n bɔ Samarii, á Izirayeli a sɔraasin tumaa nimi.

⁷Bɛ kio, á yoo á zii saa, á minin dia woe pii Zudaa gána a kii Zozafati-n kɛnɛn: «Moabu gána a kii na á n gòãn dii ma ganaa, n tá re woe zia biɛ kun ka ma nɛ, Moabu gána lɛ ganaa ya?» Zozafati tɔ́n na a lɛ si: «Ma á woe. Man die n gòɛ̃ we zia lɛ nɛ ka n din bɛ́ lɔn. Maa zaman gòɛ̃ tá re goɛ̃ zia lɛ nɛ ka n wɔ bɛ́ lɔn, maa sùin gòɛ̃ tá re goɛ̃ a nɛ ka n wɔn bɛ́ lɔn.»

⁸Zozafati nə́ n toa doo: «Wɔ n die boe ka zii mɛn nɛ?» Zoramu ná a lɛ si: «Edɔmu a diə gole zii ke.»

⁹Bɛ kio, Izirayeli gána a kii ni, ka Zudaa gána a kii laanka Edɔmu gána a kii yoo ǹ nə́ zii saa. Ǹ bɛ́ ǹ nə́ dɔ lɛawaa sɔbaa zii la, ǹ mu nya ǹ ganaa. Mu goã a tan sɔraasi lɛn tá mii wa, tɔɔn mɛnɛn dɔn nə goã koe ǹ lɛ, a goã a tan bɛn dɔn tá mii wa.

¹⁰Izirayeli gána a kii tɔ́n nə n toa: «Bɔ̀n! Dɛnaa Lawa na á lɛ dia kii sɔɔ kɛ la, á n die ǹ we Moabu gána minin gɔn.»

¹¹Kii Zozafati nɔ̀n da: «Dɛnaa Lawa a boo gii-dali ba kànaa, wɔ n boe la wɔ n doa a ganaa, a nɔ̀n da Dɛnaa Lawa la wa?» Izirayeli gána a kii a dí-nyali goon boo saa á pɛ: «Safati a nɛgiĩ Yiliizee lɛ, á goã dí nyɛɛ Yilii giulun, bɛ tá kànaa.»

¹²Zozafati nə́ n toa: «Dɛnaa Lawa a boo gii-dali taãn nɛ.» Izirayeli gána a kii ni, ka Zudaa gána a kii laanka Edɔmu gána a kiin lɛn nə́ tɔ́n kiɛ̃, ǹ nə́ woo Yiliizee li.

¹³Yiliizee pɛ Izirayeli gána a kii lɛ nɛ: «Wàa dɔ n wɔsɛn bii ni? N di laanka ǹ dan goã woe Lawa a boo gii-dalin soɛ-bɔlin mɛnɛn lɛn li, wo bɛn lɛn li.» Izirayeli gána a kii lɛ ná a lɛ si: «Haayii! A giala Dɛnaa Lawa na á lɛ dia kii sɔɔ kɛ la, á n die ǹ we Moabu gána a kii gɔn.»

¹⁴Yiliizee pɛ: «Dɛnaa Lawa Pàãyiidɛnaa Yiikoonaa mɛn bɛ́ masɛ n dí nyɛɛ nɛ, bɛ lɛ tɔ taman yii, bɛ̀ ma bie n taasɛ Zudaa gána a kii Zozafati a lɛa wa, ma ba n yiri goon din diɛ li, ma ga n ganaa dinin wa.

¹⁵Kanna, ka da ka kɔnkoɛɛ̃-dɛli ni masɛ li.» A kɔnkoɛɛ̃-dɛli lɛ toa kɔnkoɛɛ̃ dii, Dɛnaa Lawa Pàã goã Yiliizee la.

¹⁶Yiliizee nə́ n toa: «Dɛnaa Lawa mà ka nyankɔrɔ didi fɔ̃ tán nyankɔrɔ lɛ kɛ nɛ.

¹⁷Dɛnaa Lawa mà ka a re piɛ̃ yii boe wa, ka a re la yii kiɛ wa, sɛnɛ, nyankɔrɔ lɛ dɔ n die piɛ̃ ka mu ni, ka tá re boe la ka mu mi, ka dinin ni, kaa sɔraasin laanka kaa tɔɔn nɛ.

¹⁸Sɛnɛ, bɛ din ba màn kɔn lɛa Dɛnaa Lawa yii li wa, a tá re Moabu minin lɛn dɔn we ka gɔn.

¹⁹Kungɔn bɛ́ ǹ kiwin mɛnɛn ganaa, ka á re bɛn kɛbɔlɔ kiɛ, ka ǹ kiwin mɛn tumaa bɛ́ barka nə́ ǹ nɛ. Ka á re ǹ da nɛ-kɔlen tumaa kiɛ, ka ǹ mu pìãn tumaa tã, ka kɔlɔn kaa tán ǹ buu kɔsɔ ǹ bǎã sonboren ne, ka ǹ ziziɛ̃.»

²⁰Baayɛlɛ, *wúlu màn tiɛ̃ biikoo li, bɛ̀ mu á ke á n toa Edɔmu gána li, á baa si á daa gána lɛ pã.

²¹Moabu gána minin tumaa ma, mà kii sɔɔ lɛ na á daa mà maǹ zia biɛ ǹsɛn ganaa, giĩn mɛnɛn tumaa lɛ̀ bɛ́ á dɔ ziabaa ganaa, ka min mɛn tumaa bɛ́ a lɛ̀ kiɛ̃ ziabaa la, ǹ nə́ lɛ dia bɛn yii la, ǹ nə́ n doa gèlè la.

²²Ǹ bɛ́ ǹ nə́ yoo baayɛlɛ, wasa yooreen bɛ́ mu lɛ dii tɛ pii, Moabu gána minin lɛn nə́ mu yɛ tán ǹ nyɛɛnɛ ka n pɛ mà mà nɛ.

²³Ǹ nə́ tɔ́n nə n toa: «Mà nɛ! Kiin lɛn dinin man nə́ yoo kɔn gialaa ǹ nə́ kɔn dɛ. Ka daa wɔ wo ǹ mànan kokoo sisia.»

²⁴Ǹ nə́ woo ǹ nə́ dɔ Izirayeli minin giã ǹ bǎã nɛ, yǎa Izirayeli minin lɛn nə tɔn yoo ǹ nə́ ǹ dɛ. Moabu gána minin lɛn nə́ tɔ́n nə n gòã da baa nɛ ǹ nyɛɛnɛ. Izirayeli minin lɛn nə́ woo ǹ kio Moabu gána nɛ ǹ nə́ ǹ dɛ.

²⁵Ǹ nə́ ǹ kiwin ziziɛ̃, buu kɔsɔ ǹ tánan mɛnɛn bɛ́ siĩni, ǹ nə́ kɔlɔn zuzũ tán bɛn yii ni, ǹ gɔ́ɔ̃ pã. Mu pìãn mɛnɛn bɛ́ ǹ tan, ǹ nə́ ǹ tumaa tatã, ǹ nə́ da nɛ-kɔlen tumaa kaa. A na á n zɔ̃ á goã Kiiri-Erɛsi kiwi ni, sɛnɛ baragii-zũlin nə́ bɛ lɛ dɔ lɛnpɛnɛ, ǹ nə́ kũ ka zia nɛ.

²⁶Moabu gána a kii yii bɛ́ a ganaa, zia lɛ pàã la nɛ, á giĩ gɔya zia-baali biɛsɔbaa (700) kũ á ǹ kaa kun ka a din ni, mà maǹ boe ǹ zɔ̀ɔn lɛn bii kiɛ̃ woe Edɔmu gána a kii li, sɛnɛ ǹ nə́ fɔ̃ li.

²⁷Moabu gána a kii lɛ gɔn binaa mɛn bɛ́ nɛginin lɛa, a kiibaa lɛ doamaa nɛ a n doe a ganaa, á bɛ kũ á wúlu bɔ nɛ kiwi lɛ a kungɔn la. Moabu minin lɛn foo yoo Izirayeli minin lɛn li parsiini, Izirayeli minin lɛn nə́ n wɔlɔ lui Moabu gána a kii lɛ ganaa, ǹ nə́ n bɔyaa ǹ nə́ woo ǹ gána nɛ.