Read Samo, Southern Kiin2 9 Bible Online

Kiin2 9 - Samo, Southern bible

Kiin2 9

¹Lawa a boo gii-dali Yiliizee lɛ dia Lawa a boo gii-dalin lɛn min goon la á pɛ nɛ: N binbin kũ n nyɔɔ màn kɛ saa n gɔn, n wo Ramɔti kiwi Galaati gána nɛ.

²Bɛ́ ń dɔ walan, Zozafati a nɛgiĩ Zewu lɛ, Nimusi a nɔ̀ɔn lɛa, n ga bɛ li. N bɛ́ re yii, n kũ n yoo ne ǹ dɔɔ̃nɔn bii n wo ne kion gialaan nɛ.

³N die n nyɔɔ màn lɛ saa, n nyɔɔ kaa a mìi ni, n pɛ: «Dɛnaa Lawa n nyɔɔ loe n ganaa, á n koɛ Izirayeli gána a kii lɛa!» Bɛ kio, n die n kiɛnlɛ bũ n soo n baa si n woo, n baran golee wa.

⁴Lawa a boo gii-dali ten, nɛ ten lɛ dɔ woo Ramɔti kiwi Galaati gána nɛ.

⁵A bɛ́ á dɔ, bɛ̀ sɔraasi goledɛnan nə́ ke giã-n tán kun. Yǎa a tɔn nə n toa: «Kiã, boo goon tá masɛ li, man die pii n ni!» Zewu nə́ n toa: «Wɔsɛn mɛn nɛ?» Lawa a boo gii-dali ten lɛ ná a lɛ si: «N dinmaa lɛ nɛ!»

⁶ Zewu tɔ́n yoo á wɔ kion. Tɔntɔraagiĩ lɛ nyɔɔ kaa a mìi ni, á pɛ: — Dɛnaa Lawa, Izirayeli a Lawa n kɛ pii: «Man nyɔɔ kɛ loe n ganaa, ma á n biɛ kii lɛa n koɛ maa zaman Izirayeli minin lɛn mìi la.

⁷N dɛnaagiĩ Akaabu lɛ, n die n bɛa kion minin dɛ. Masɛ a dí-nyalin kɛn maa boo gii diɛ, Zezabɛli bɛn mà mɛn kaa tán, ma á die bɛa dòo boe. A maa dí-nyali gialakunun mɛnɛn dɔn mà kaa tán, ma á die bɛ dɔ dòo boe.

⁸Akaabu a kion minin tumaa tá re bɔ̀n biɛ. Man die giĩn dii ma ǹ bɔ Akaabu a sumu n, bɛ̀rɛn nɛ ka min mɛnɛn bɛ ǹ ba bɛ̀rɛn lɛa wa Izirayeli gána nɛ.

⁹Man die Akaabu a kion lɛ biɛ ka Nebaati a nɛgiĩ Zeroboamu wɔ bɛ́ lɔn, man die biɛ ka Ayia a nɛgiĩ Bayesaa dɔ wɔ bɛ́ lɔn.

¹⁰ Zezabɛli sɛ, ginin tá re a gere soɛ̃ Zizereyɛli tán la, min ba re a gere yii a bĩ wa.» Bɛ kio, tɔntɔraagiĩ lɛ kiɛnlɛ bũ, á soo á baa si á woo.

¹¹Zewu soo á woo a dɛnaagiĩ a dí-nyalin lɛn li, ǹ nə́ nɔ̀n da la: Bǐɛ̃ tan? Wàa na á baa kɛa gàãndɛnaa kɛ daa n li? Á ǹ lɛ si: Ka dininmaan tá giĩ lɛ laanka a da ǹ boo doɛ̃.

¹²Ǹ nə́ n toa Zewu ganaa mà a n soɛ boe! Mà a boo lɛ pɛ ǹsɛn manɛ! Zewu tɔ́n nə ǹ lɛ si á pɛ: «A na á daa Dɛnaa Lawa a boo gii da ma nɛ. Dɛnaa Lawa na á nyɔɔ lɔ ma ganaa, a tá ma koɛ Izirayeli gána a kii lɛa.»

¹³Bɛa bǎã-n gɔrɔ, ǹ didie ná a mɔnaa naa tán dii ǹ bǎã kɔn a kòròn la, Zewu giulun. Ǹ nə́ bɛn pɛ, ǹ nə́ n lɛ dɛ ǹ nə́ pii: «Zewu n kii lɛa.»

¹⁴Zozafati a nɛgiĩ Zewu lɛ, Nimusi a nɔ̀ɔn lɛa, bɛ ga Zoramu bɔ a daa ǹ gɔn li. A bɛ́ bɛ zɛnɛɛ ǹ mɛn waáraa, bɛ̀ Zoraamu lɛ laanka Izirayeli minin tumaa na a gialaa zia biɛ Ramɔti kiwi Galaati gána nɛ. Maǹ nə́ goã bɛa zia lɛ biɛ kɔn ka Siirii gána a kii Azayeli ni.

¹⁵Siirii minin lɛn gɔn nə goã á Zoramu kũ a paǹ mɛnɛn ganaa, bɛ̀ a bɛ́ zia lɛ biɛ kɔn ka ǹ kii Azayeli ni, Zoramu lɛ nə́ n bɔyaa á daa dagòã da bɛn ganaa Zizereyɛli kiwi. Zewu nə́ n toa ǹ miãn lɛn ganaa: «Ka n ka kaa kun ka masɛ-n koɛ? A bɛ́ miɛ̃, min kɔn baran toa a soo kiwi lɛ nɛ, a wo a boo da Zizereyɛli kiwi wa!»

¹⁶Bɛ kio, Zewu wɔ a wotoro ne, á woo Zizereyɛli. Zoramu dɔ goã busu koe tán walan lɛ nɛ. Zudaa gána a kii Ahaazia daa n yii kɔ a ganaa.

¹⁷Bǎã-lɛduə̃li mɛn goã doa nɛ Zizereyɛli kiwi a kungɔn la, bɛ Zewu a sɔraasin yɛ die, á n toa: «Ma yii á sɔraasi kɔnɔn ganaa.» Zoramu nə́ n toa: «Sùidɛnaa goon bɔ n dia, a wo nɔ̀n da ǹ la, mà bǐɛ̃ nɛ?»

¹⁸Sùidɛnaa lɛ woo ǹ li á pɛ mà kii n nɔ̀n diɛ mà bǐɛ̃ nɛ? Zewu ná a lɛ si kɛnɛn: «Ta bǐɛ̃ nɛ, ǹ mɛn na a bǎã nɛ? Kiɛ̃ n kɔ ma kio lɛ.» Bǎã-lɛduə̃li lɛ tɔn pɛ: Dí-pɛli lɛ woo yǎa á dɔ ǹ li, sɛnɛ, a ba n bɔyɛɛ á die wa.

¹⁹Kii lɛ sùidɛnaa kɔsɔ dia, a dɔ woo yǎa ǹ li, á n toa: «Kii n nɔ̀n diɛ, mà bǐɛ̃ nɛ?» Zewu ná a lɛ si kɛnɛn: «Ta bǐɛ̃ nɛ, ǹ mɛn na a bǎã nɛ? Kiɛ̃ n kɔ ma kio lɛ.»

²⁰Bǎã-lɛduə̃li lɛ tɔn pɛ doo: «Dí-pɛli lɛ woo yǎa ǹ li, sɛnɛ, a ba n bɔyɛɛ á die wa. Ǹ nyɛɛnaan-bɔle lɛ a màn da baa ǹ gɔn na á bɔ Nimusi a nɔ̀ɔn Zewu wɔ li, a giala a n diɛ baa-a ka gàãnaa nɛ.»

²¹Zoramu nə́ n toa: «Ka wotoro yɔrɔ bɔ!» Ǹ nə́ tɔ́n na a wotoro yɔrɔ bɔ. Izirayeli gána a kii Zoramu lɛ soo, a laanka Zudaa gána a kii Ahaazia nɛ, didie ná a ziabaa ǹ wotoro ne, ǹ nə́ woo n da Zewu lɛ. Maǹ nə́ woo yǎa Zizereyɛli min Naabɔti a wuru-n.

²²Zoramu yii mɛ Zewu ganaa lɔn gɔrɔ, á n toa: «Zewu, bǐɛ̃ nɛ?» Zewu ná a lɛ si: «Wàa bǐɛ̃ nɛ! A da yaa n dan Zezabɛli lɛ n tɔn woe nyɛɛnɛ ka a dì guguru koe kɛ laanka a kɔnkoãbaa zaã kɛa zɛnaa nɛ.»

²³Zoramu tɔ́n nə n lɛ goa á baa si, á pɛ Ahaazia nɛ: «Ahaazia, Zewu na á n bɔlɔ si wɔ la!»

²⁴Sɛnɛ Zewu ná a sa dii á Zoramu pã nɛ a dɔ̀ɔ̃ bii. Kiɛ lɛ kiɛ̃ á woo a koron fɔ̃ á soo. Zoramu bɔ á n turuu tán a wotoro gɔ́ɔ̃ nɛ.

²⁵Zewu tɔ́n pɛ a ziabaa ǹ mànan-gũli Bidikaara nɛ: — Zoramu lɛ bɔ, wuru mɛn lɛ goã Zizereyɛli min Naabɔti wɔ lɛa, n zũ tán walan. N yiri kɔ: Wɔ bɛ́ wɔ́ goã wotoro la kun, ma laanka n din ni, Zoramu ǹ di Akaabu lɛ kio, Dɛnaa Lawa na á goã á boo kɛ da Akaabu wɔ paǹ li:

²⁶ «Ma Naabɔti mà yɛ gunun, ka a nɛnyaanan wɔ nɛ. Dɛnaa Lawa a da ǹ boo ne. Man die bɛ lɛ miã zɛnɛɛ n dɔ nɛ, a din wuru goon kɛ lɛ nɛ. Dɛnaa Lawa a da ǹ boo ne!» Sisia kəni, Zoramu lɛ bɔ n zũ bɛa wuru lɛ nɛ, ka Dɛnaa Lawa goã a ná a boo da lɔn.

²⁷Zudaa gána a kii Ahaazia bɛ́ á bɛ yɛ, á Bɛti-Gan zii saa á baa si á woo. Sɛnɛ, Zewu ná a kio loo á pɛ mà ǹ na a dɔ dɛ! Ǹ nə́ tɔ́n dɛ a wotoro ne, ǹ nə́ busu da a ganaa, bɛ á zɛnɛɛ, bɛ̀ a n zii la woe Guuru kele la kunu Yiibleyamu kiwi ganaa. Á baa si á woo Megidoo, á gã walan.

²⁸A dí-nyalin nə́ saa wotoro ne, ǹ nə́ woo ne Zeruzalɛmu. Ǹ goã ǹ nə́ ǹ din bĩ yala mɛn nɛ, ǹ ná a dɔ bĩ walan "Davida a kiwi".

²⁹Akaabu a nɛgiĩ Zoramu a kiibaa a lɛ̀ fulugoonbaa ǹ wɔ nɛ, Ahaazia goã á kii baa Zudaa gána mìi la.

³⁰Zewu daa wɔ Zizereyɛli kiwi, Zezabɛli ná a boo ma. Á kala lɔ a yii ganaa, á nyaǹ kaa a mìi ni, á n kanaa a tá n yii koe fenɛtərə ne.

³¹Zewu bɛ́ á wɔ á n die kiwi lɛ a kiɛnlɛ diɛ a kio ǹ mɛn waáraa, Zezabɛli nə́ n toa: «Bǐɛ̃ nɛ Zimirii, nsɛ mɛn bɛ n dɛnaagiĩ nyin-bɔle lɛa.»

³²Zewu tɔ́n nə n yɔrɔ saa á dia fenɛtərə lɛ la á pɛ: «Die n kun ka masɛ nɛ? Die ne?» Kii a kiodɛnaa min paa hinlaa min sɔɔ tɔ́n nə ǹ yii saa ǹ nə́ ga Zewu ganaa tán.

³³Zewu tɔ́n nə n toa: «Ka Zezabɛli kũ ka zũ tán.» Ǹ dɔn nə́ kũ ǹ nə́ zũ tán. Zezabɛli mà soo á n pɛsɛ̃ kiwi lɛ a kungɔn ganaa ka Zewu a sùin mɛnɛn nə tɔtɔrɔ la.

³⁴Bɛ kio, á wɔ kion, á màn bii, á màn mi, á tɔ́n pɛ: «Ka ga lɔ koedɛnaa kɛ walan, ka a gere bĩ, a giala, kii a nɛlɔ nɛ.»

³⁵Ǹ nə́ woo mà maǹ siɛ biĩ, sɛnɛ, maǹ nə́ woo a mìi paǹ we dinsɔɔ̃ yaa, ka a gòãn laanka a gɔn tisin ni.

³⁶ Ǹ nə́ n bɔyaa ǹ nə́ daa a boo da Zewu ni. Á n toa: «A din sii kɛ lɛ nɛ, Dɛnaa Lawa goã a ná a dí-nyali, Tisibu min Yilii da a boo diɛ ganaa, mà ginin tá re Zezabɛli gere soɛ̃ Zizereyɛli tán la.

³⁷Zezabɛli gere tá re n biɛ ka tɔɔn bù bɛ́ lɔn wuru fúlu bii, Zizereyɛli tán la, yǎa min ba re boe la a pɛ mà Zezabɛli gere n ke wa.»