Read Samo, Southern KZS1 11 Bible Online

KZS1 11 - Samo, Southern bible

KZS1 11

¹Izirayeli minin tumaa nə́ n sɔkɔn Davida li Ebrɔn, ǹ nə́ pɛ nɛ: Á ke, wɔsɛn manə n din wɔ taãnan lɛa.

²Táa lɛlɛ, bɛ̀ Sayulu bɛ́ kii lɛa dinin, n din Davida nə ń goã miɛ̃ wɔsɛn Izirayeli minin zia-baalin nyɛɛnɛ, bɛ̀ n wo ǹ ne zia la, n nə n bɔyaa ǹ nɛ. Dɛnaa Lawa, n Lawa goã á kɛ pɛ n nɛ dɔn dinin: «N din nə die giɛ masɛ a zaman Izirayeli lɛ walan, n din nə die maa zaman Izirayeli minin lɛn mìilandɛnaa biɛ.»

³Izirayeli minin lɛn min golen tumaa daa dɔ kii lɛ li Ebrɔn. Kii Davida lɛ-kɔ wɔ ǹ nɛ walan, Dɛnaa Lawa yɔrɔ-a. N nə́ nyɔɔ kaa Davida mìi-n walan, ǹ nə́ bɔ ǹ nə́ koa Izirayeli minin lɛn kii lɛa, ka Dɛnaa Lawa goã á Samayeli da a pɛ ganaa lɔn.

⁴ Davida lɛ laanka Izirayeli minin tumaa woo kɔ Zeruzalɛmu lɛ. Maǹ nə́ goã Zeruzalɛmu kiwi lɛ bíi Zebuzu dɔn. Zebuzu minin man nə́ goã walan.

⁵Zebuzu kiwi minin lɛn nə́ pɛ Davida nɛ: «N gòã ba miɛ kànaa wa.» Sɛnɛ, Davida *Siɔn kiwi a duru ǹ bǎã kaka kɛ si. A din lɛ nɛ ǹ tá bíi "Davida a kiwi".

⁶Sonbore, Davida na á goã á pɛ mà min mɛn bɛ́ re yui Zebuzu minin lɛn gialaa bibinaa nɛ, mà bɛa dɛnaa tá re zia-baalin goledɛnaa biɛ a goã ǹ mìi la. Zoabu mɛn nə́ ke ǹ dan tɔ n Seruya, bɛ na á zia lɛ lɛ kaa. Bɛ lɛ nɛ, a din lɛ zia-baalin lɛn goledɛnaa baa.

⁷Davida giã duru ǹ bǎã kaka lɛ nɛ; bɛ lɛn ke ǹ nə́ bíi mà "Davida a kiwi".

⁸Bɛ kio, á kiwi lɛ dɔ a paǹ yii-a, a n siɛ tán Miloo banbaran kɛ li a woo. Zoabu dɔ́ goã kiwi lɛ a bǎã gialakun zɛnɛɛ.

⁹Màn na á goã miɛ Davida a golebaa li woe nyɛɛnɛ, a giala, Dɛnaa Lawa Pàãyiidɛnaa lɛ goã kun ni.

¹⁰Davida a zia-baali babaraa nyɛɛnaadɛnan mɛnɛn nə n dɔ lɛ sɔɔ̃nɛ a pàã biikoo lɛ tumaa gɔ́ɔ̃ nɛ, kun ka Izirayeli minin tumaa nɛ, ǹ nə́ koa kii lɛa Izirayeli mìi la, ka Dɛnaa Lawa goã á pɛ lɔn, bɛn man ka kɛn nɛ.

¹¹Min mɛnɛn nə goã zia-baali babaraan lɛa kun ka Davida nɛ, bɛn man ka kɛn nɛ: Akimonii tɔrɔ Isibaali ke Davida a zia-baali babaraa min sɔɔ kɛ a gole lɛa, bɛ nə n goon lɛa. A din lɛ na á zia baa ka sa nɛ min biɛsɔɔ ganaa, á ǹ tumaa dɔ dɛ bǎã goon ne.

¹²Bɛ kio n ka Eleyazaara nɛ. Dodo mɛn bɛ́ Awokii a tanlɛ min lɛa, bɛa nɛgiĩ ni. Zia-baali babaraa sɔɔ lɛ a goon ne.

¹³A din lɛ na á goã kun ka Davida nɛ Pas-Damimu, bɛ̀ Filisiti minin lɛn bɛ́ ǹ nə́ n sɔkɔn a nɛ zia-baa taman yii, Izirayeli a Minin lɛn nə́ yoo ǹ nə́ baa si ǹ nyɛɛnɛ. *Ɔrzi wuru goon goã bɛa bǎã lɛ nɛ.

¹⁴Eleyazaara sɛ laanka a minin man nə́ woo n doa bɛa wuru lɛ fùlu bii, ǹ nə́ Filisiti minin lɛn dɛ. Bɛa yɔrɔ lɛ la, Dɛnaa Lawa gɔ̀lɔ̀baa gole kɔ Izirayeli minin la.

¹⁵Ǹ kɔn pinaa, min pɔsɔɔ mɛn goã Davida lɛduĩ, bɛn min sɔɔ daa dɔ a li Adulaamu a kele yala kɛ nɛ. A giala, Filisiti minin kɛn zia-baalin kɔnɔn man nə́ daa golee Refrayimu a nyankɔrɔ basa kɛ nɛ.

¹⁶Davida lɛ na á goã a duru ǹ bǎã sonbore kɛ nɛ, bɛ á zɛnɛɛ bɛ̀ Filisiti minin lɛn kɔnɔn tá doa-n Bɛtlehɛmu kiwi.

¹⁷Sii mɛn a zɛnaa sii bɛ́ Davida ganaa, á tɔ́n bɛ pɛ kɛnɛn: Tù ke Bɛtlehɛmu *kiwi a kiɛnlɛ-a, die n die woe bɛa mu sii a da kɔ ma la, ma mi?

¹⁸Yǎa zia-baali babaraa sɔɔ lɛ tɔ́n wo kiɛ̃ Filisiti minin giã ǹ bǎã lɛ nɛ ka pàã nɛ. Tù mɛn lɛ bɛ́ Bɛtlehɛmu kiwi a kiɛnlɛ-a, ǹ nə́ woo bɛ lɛ a mu si ǹ nə́ daa kɔ Davida la. Sɛnɛ, Davida lɛ kɔ á mu lɛ mi wa, á kaa tán á Dɛnaa Lawa gɔ nɛ.

¹⁹Á pɛ: «Dɛnaa Lawa, kɛa zɛnaa a taasiɛ din wɔlɔ á lui ni masɛ ganaa! A giala, minin kɛn lɛn ǹ nə́ n nyin kɔ ǹ nə́ woo, mu kɛ lɛ n goon ka ǹ dinin mà nɛ.» Bɛ lɛ nɛ, á n piã a mi wa. Zia-baali babaraa sɔɔ lɛ màn mɛn zɛnaa a din nə ka bɛ lɛ nɛ.

²⁰Zoabu ǹ dɔɔ̃ngiĩ Abisayii ke, bɛ na á goã zia-baali sɔɔ mìi la. Ǹ kɔn pinaa, a din na á ǹ zɔ́ɔn lɛn min biɛsɔɔ (300) dɛ ka sɛmiɛ̃ nɛ. Bɛ lɛ n ke min sɔɔ lɛ bii, tɔ bǐɛ̃ bie á yɛ wa!

²¹Sonbore asɛ gugurubaa yɛ á n timəə min sɔɔn kɛn wɔ la kuru paabaa ǹ wɔ nɛ, á n baa ǹ goledɛnaa lɛa. Sɛnɛ, a dɔ min sɔɔn kɛn li kuru bibinaa kɛ-n wa.

²²Goon dɔ n ka Zozadaa a nɛgiĩ Benazaa nɛ, ǹ digole n zia-baali babaraa lɛa, boe Kabsɛli kiwi. Benazaa sii dadaraa gigiã zɛnaa: A din na á Moabu gána a sɛ̀mɔɔ min paa lɛ dɛ. Ǹ kɔn pinaa, nyan a mu da nyuù wɔ ganaa biikoo li, a din na á wɔ nyankɔrɔ goon ne, á yàra dɛ.

²³A din dɔ na á Eziptin giĩ goon dɛ, ǹ dɛnaa mìila á doe mɛtərə paa ka talɛɛ. Sɛmiɛ̃ kurunbirin na á goã bɛa giĩ lɛ gɔn ka kɔ̀rɔ gɔn bɛ́ lɔn. Bàbala na á goã Benazaa sɛ gɔn. Á tele Eziptin giĩ lɛ ganaa, á ná a sɛmiɛ̃ lɛ baã á bɔ a gɔn á dɛ ka a din a sɛmiɛ̃ lɛ nɛ.

²⁴Zozadaa a nɛgiĩ Benazaa sii mɛn zɛnaa, a din lɛn ka bɛ nɛ. Á tɔ gole yɛ bɛa min sɔɔ lɛ bii.

²⁵Á gugurubaa yɛ á la min pɔsɔɔ lɛ nɛ, sɛnɛ, a dɔ min sɔɔn kɛn li kuru bibinaa kɛ-n wa. Davida na á da kun ka a din lɛduə̃lin ni.

²⁶Zia-baali zanbia kɔsɔn tɔn man ka kɛn nɛ: Zoabu ǹ dɔɔ̃ngiĩ Azayeli ni, Dodo a nɛgiĩ Elanan kɛ nɛ boe Bɛtlehɛmu,

²⁷Saamɔti ni boe Arɔɔrɔ, Elisi ni boe Palɔn,

²⁸Ikɛsi a nɛgiĩ Iraa nɛ boe Tekoa, Abiezɛɛrɛ nɛ boe Anaatɔti,

²⁹Sikayii ni boe Usaa, Ilayii ni boe Awokii,

³⁰Marayii ni boe Netofaa, Baanaa a nɛgiĩ Elɛbu ni boe a din Netofaa lɛ nɛ,

³¹Ribayii a nɛgiĩ Itayii ni boe Gibeyaa Bɛnzamɛn tɔrɔn bǎã nɛ. Benazaa nɛ boe Piratɔn,

³²Urayii ni boe Gaasi a mu nyankɔrɔ basa kɛ nɛ, Abiyeli ni boe Arabaa,

³³Azimabɛti ni boe Barumu, Eliabaa nɛ boe Saalbɔn,

³⁴Bene-Hasɛmu ni boe Giizɔn. Saagee a nɛgiĩ Zonaatan nɛ boe Haraara,

³⁵Sakaara a nɛgiĩ Ayiamu ni boe a din Haraara lɛ nɛ, Uuru a nɛgiĩ Elifaali ni

³⁶Hefɛɛrɛ nɛ boe Mekeraa, Ayaa nɛ boe Pelɔn.

³⁷Esiro ne boe Karmɛli, Ezibayii a nɛgiĩ Naarayii ni,

³⁸Natan ǹ dɔɔ̃ngiĩ Zowɛli ni, Agaara a nɛgiĩ Mibaara nɛ,

³⁹Amɔn tɔrɔ Selɛki ni, Narayii ni boe Beerɔti, ke Seruzaa a nɛgiĩ Zoabu a ziabaa ǹ mànan gũli lɛa.

⁴⁰Bɛ kio, Iraa nɛ boe Yetɛɛrɛ, Garɛbu ni boe a din Yetɛɛrɛ tɔrɔ lɛ nɛ,

⁴¹Ɛti tɔrɔ Urii ni, Alayi a nɛgiĩ Zabaadi ni,

⁴²Sizaa a nɛgiĩ Adina nɛ, ke Urubɛn tɔrɔn nyɛɛnaandɛnaa goon lɛa, zia-baali pɔsɔɔ n kun ni.

⁴³Bɛ kio, Maakaa a nɛgiĩ Hanan nɛ, Zozafati ni boe Metɛn,

⁴⁴Uzia nɛ boe Asitarɔti, Aroɛɛrɛ kiwi min Hotamu kɛa nɛgiĩ min paa nɛ: Saama laanka Yeyeli ni.

⁴⁵Bɛ kio, Simrii a nɛgiĩ Yediayeli ni, ka ǹ dɔɔ̃ngiĩ Zoa kɛ nɛ boe Tisi.

⁴⁶Eliyeli ni boe Mahabaa, Elnaamu a nɛgiĩ paa nɛ: Yeribayii laanka Zosabia nɛ. Bɛ kio, Itmaa nɛ boe Moabu gána nɛ,

⁴⁷ka Eliyeli ni, Obɛdi ni, ka Yasiyeli ni boe Sobaa.