Read Samo, Southern KZS1 12 Bible Online

KZS1 12 - Samo, Southern bible

KZS1 12

¹Davida bɛ́ á goã á woo n duru Siklagi, ń giɛ a tá liɛ Kiisi a nɛgiĩ Sayulu la, minin kɔnɔn nə́ woo kaa kun ni walan. Ǹ dɛnan man nə́ goã zia-baali footaãnaan lɛa, ǹ yɔrɔ n boe ne ǹ zia da kun ni.

²San laanka baragiin man nə́ goã ǹ gɔn. N nə́ goã boe la ǹ kɔlɔ hinlaa kiɛ zũ ka ǹ gɔsɛ laanka ǹ gusin ni. Maǹ Sayulu a sumu minin lɛa, boe Bɛnzamɛn tɔrɔn nɛ. Ǹ tɔn nə́ ke:

³Goledɛnaa Ayiezɛɛrɛ laanka Zoasi ni, kɛn Gibea min Semaa a nɛgiĩn lɛa. Bɛ kio, Yeziyeli laanka Pelɛti ni, kɛn Azimawɛti a nɛgiĩn lɛa. Bɛ kio, Beraka laanka Anaatɔti kiwi min Yewu ni,

⁴ka Yisimaya kɛ nɛ boe Gabawɔ̃ sɛ̀mɔɔ lɛa, zia-baali pɔsɔɔ kɛ bii, a nə́ ǹ goleedɛnaa lɛa.

⁵Bɛ kio, Yirmeya nɛ, Yahaziyɛli ni, Zoanan nɛ, Gederaa kiwi min Zozabaadi ni,

⁶Eluuzayii ni, Yerimɔti ni, Bealia nɛ, Semariawu ni, ka Harifu kiwi min Sefatiawu ni.

⁷Bɛ kio, Ɛlkaana nɛ, Yisiyawu ni, Azareli ni, Zoyezɛɛrɛ laanka Zakobamu ni, kɛn Kooraa tɔrɔn lɛa.

⁸Bɛ kio, Yeroamu ke boe Gedɔɔrɔ bɛa nɛgiĩ paa nɛ, Zoela laanka Zebadia nɛ.

⁹Min kɔsɔn dɔn nə́ goã ǹ nə́ n na Gaadi tɔrɔn bii, ǹ nə́ woo kaa kun ka Davida nɛ, a duru ǹ bǎã lɛ nɛ diə gole ne. Maǹ nə́ goã zia-baali foo taãnaan lɛa, ǹ gɔn kaa ziabaa-n sɔnbɔraa nɛ, goóro laanka sɛmiɛ̃ nə ǹ gɔn. Maǹ nə́ goã nyɛ́ɛ diɛ ka yàran bɛ́ lɔn, ǹ yii ń fuu ka woreen man kiɛ̃ kele la.

¹⁰Maǹ nə́ goã min fulugoon: Ezɛɛrɛ nɛ, Odavia nɛ, Eliabu ni, Misemanaa nɛ, Zeremii ni, Atayii ni, Eliyeli ni, Zoanan nɛ, Elzabaadi ni, Zeremii ni, ka Makbanayii ni.

¹⁵Bɛa Gaadi tɔrɔn kɛn lɛn man nə́ goã sɔraasin goledɛnan lɛa. Bɛ̀ min mɛn tá kiɛɛrɛ ǹ bii bɛ n goon ka sɔraasi paabiɛ nɛ, bɛ̀ min mɛn tá gole ǹ bii bɛ n goon ka sɔraasi duu goon (1 000) ne.

¹⁶Ǹ dinin lɛn man nə́ Zurdɛ̃ tà kuru a pã a toɛ̃ biikoo li, lɛ̀ a mui bibinaa gɔ́ɔ̃ nɛ. Min mɛnɛn tumaa goã tà gòã lɛ nɛ ǹ nə́ bɛn tumaa loo, a lɛ̀gialadɛnan laanka a lɛ̀nyɛɛndɛnan nɛ.

¹⁷Bɛnzamɛn tɔrɔ kɔsɔn laanka Zudaa tɔrɔn nə́ woo Davida li a duru ǹ bǎã lɛ nɛ.

¹⁸Davida soo á n da ǹ lɛ, á boo da ǹ nɛ á pɛ: «Bɛ̀ là nyantoro a lɛa nɛ ka daa ma li ka n die n doe ma lɛ, ma á kun ka nɛ ka ma foo tumaa nɛ. Sɛnɛ, bɛ̀ ka n ka daa ka n die ma mìi doe li, ka ma kɔ maa zɔ́ɔn la, a da yaa maán ma sii kɔn dɔ la wa, wɔ digolon Lawa lɛ die a n baa bɛa siére lɛa a dɔlɔ bɔ ka ganaa!»

¹⁹Amasayi mɛn bɛ́ zia-baali pɔsɔɔ lɛ a goledɛnaa lɛa, Lawa Yiri wɔ bɛ nɛ á tɔ́n pɛ: «Wɔ nə n din wɔn lɛa Davida, wɔ n kun ka n din ni Zesee a nɛgiĩ. Là nyantoro goã n nɛ, min mɛnɛn bɛ́ n doe n lɛ, a goã bɛn dɔn manɛ. A giala n Lawa lɛ nə n li!» Bɛ kio, Davida lɛ kɔ ǹ ganaa, á goledɛnaabaa ǹ dí kɔ ǹ la kun ka a zia nɛn nɛ.

²⁰Davida bɛ́ á goã á woo kaa kun ka Filisiti minin ni mà maǹ woe zia biɛ Sayulu ganaa, bɛa biikoo lɛ li, Manaasee tɔrɔn dɔn nə́ goã ǹ nə́ kaa kun ka Davida lɛ nɛ. Sɛnɛ Davida laanka a minin lɛn nə boo la ǹ nə́ zia da kun ka Filisiti minin lɛn nɛ wa, a giala Filisiti minin lɛn kiin man nə́ goã ǹ nə́ ǹ kurəə. Maǹ nə́ goã taasɛ, mà Davida lɛ n die kiɛ kun ka a dɛnaagiĩ zizi Sayulu lɛ nɛ, a ǹsɛn wɔ a gɔn.

²¹Davida bɛ́ wusii woe Siklagi ǹ mɛn waáraa, Manaasee tɔrɔn lɛn man nə́ woo kaa kun ni bɛa biikoo li. Ǹ dɛnan tɔn nə́ ke: Adnaa nɛ, Zozabaadi ni, Yediayeli ni, Mikayeli ni, Zozabaadi ni, Eliwu laanka Siletayii ni. Bɛa minin kɛn lɛn man zia-baali duu goon mìilandɛnan lɛa Manaasee tɔrɔn lɛn bii.

²²Ǹ dinin lɛn man nə́ n dɔ Davida laanka a zia-baalin lɛn lɛ, a giala ǹ tumaa na á goã giĩ foo taãnaan lɛa. Bɛ lɛ n ke ǹ nə́ Davida a zia-baalin lɛn mìilandɛnan baa.

²³Sonbore, lɛawaa gogoonmaa, minin man nə́ goã die kiɛ kun Davida nɛ, ǹ nə́ n doe lɛ, yǎa a zia-baalin lɛn nə́ zaman baa a tɔ-a taãn-taãnɛ ka Lawa a zia kuru bɛ́ lɔn.

²⁴Min mɛnɛn nə wo kaa kun ka Davida nɛ Ebrɔn kiwi, ǹ nə́ boe ziabaa la, màn mɛn bɛ́ toɛ ǹ Sayulu a kiibaa lɛ si ǹ kɔ la ka Dɛnaa Lawa pɛ lɔn, bɛa minin lɛn lɛ n ka kɛ nɛ:

²⁵Zudaa tɔrɔn bii: Zia-baali duu sɔrɔ ka biɛkiwisi (6 800), goóron laanka sɛmiɛ̃n nə́ n gɔn.

²⁶Simiɔn tɔrɔn bii: zia-baali zanbia duu sɔbaa ka paabiɛ (7 100).

²⁷*Levii tɔrɔn bii: giĩ duu sii ka biɛsɔrɔ (4 600).

²⁸Aarɔn a tanlɛ minin goledɛnaa Zozadaa dɔ goã a tan, giĩ duu sɔɔ ka biɛsɔbaa (3 700) ń kun ni.

²⁹Sadɔki ke zia-baali ten foo taãnaa lɛa, bɛ dɔ goã a tan, kun ka a din dikion min nyɛɛnaandɛnaa fuəwenpaa nɛ.

³⁰Bɛnzamɛn tɔrɔn kɛn, Sayulu din tɔrɔn lɛa, bɛn bii: min duu sɔɔ (3 000), ǹ para na á goã dí nyɛɛ Sayulu a kion minin manɛ yǎa a da kaa bɛa biikoo lɛ lɛ.

³¹Efrayimu tɔrɔn bii: min duu fuə ka biɛkiwisi (20 800). Maǹ zia-baali zanbian lɛa, tɔdɛnan lɛa ǹ tanlɛn nɛ.

³²Manaasee tɔrɔn talɛɛ bii: Min duu fulukiwisi (18 000). Maǹ nə́ goã ǹ nə́ ǹsɛn bɔ a tɔ-a ǹ nə́ woo Davida koa kii lɛa.

³³Isakaara tɔrɔn bii: nyɛɛnaandɛnaa biɛpaa (200) kɔnlɛ ka min mɛnɛn bɛ́ ǹ giulun. Izirayeli minin lɛn doamaa bɛ́ ǹ sii mɛn zɛnaa, bɛa nyɛɛnaandɛnan lɛn nə́ goã bɛ doɛ̃, ka a zɛnaa biikoo ne.

³⁴Zabulɔn tɔrɔn bii: Giĩ duu posooro (50 000) ǹ yɔrɔ ń boe ne wo zia la dan la, ziabaa ǹ mànan tɔrɔ tumaa nə́ ǹ ganaa, ziabaa ǹ foo nə́ ǹ lon taãn-taãnɛ.

³⁵Nɛfutalii tɔrɔn bii: Sɔraasi nyɛɛnaandɛnaa duu goon (1 000) kun ka sɔraasi duu pɔsɔɔwensɔbaa (37 000) nɛ goóron laanka sɛmiɛ̃n nə́ ǹ gɔn.

³⁶Dan tɔrɔn bii: sɔraasi duu fuəwenkiwisi ka biɛsɔrɔ (28 600), ǹ yɔrɔ n boe ne ziabaa taman yii.

³⁷Asɛɛrɛ tɔrɔn bii: Giĩ duu pusi (40 000) ǹ yɔrɔ ń boe-n wo zia la dan la.

³⁸Tɔrɔn lɛ mɛnɛn bɛ́ giã-n Zurdɛ̃ tà a lɛ̀giala gɔn la, Urubɛn tɔrɔn nɛ, Gaadi tɔrɔn nɛ ka Manaasee tɔrɔ talɛɛ nɛ, bɛn bii: Giĩ duu paabiɛ ka fuə (120 000), ziabaa ǹ mànan tɔrɔ tumaa nə́ ǹ gɔn.

³⁹Bɛa zia nɛn kɛn lɛn, ǹ yɔrɔ ń boe ne ziabaa dan la, ǹ tumaa daa Ebrɔn ka ǹ foo din tumaa nɛ màn mɛn bɛ́ toɛ ǹ Davida koa kii lɛa Izirayeli gána kuturu mìi la. Izirayeli min gialakunun lɛn tumaa dɔ goã ǹ nə́ daa ka gɔ́ɔ̃ goon ne, màn mɛn bɛ́ toɛ ǹ Davida lɛ koa kii lɛa.

⁴⁰N nə́ lɛawaa sɔɔ zɛnaa Ebrɔn lɛ nɛ kun ka Davida nɛ, bɛ̀ ǹ tá màn bii ǹ nə́ màn mii. Ǹ dɔɔ̃nɔn mɛnɛn bɛ́ walan bɛn man nə́ goã ǹ nə́ bɛa màn-biin lɛn zɛnaa ǹ nɛ.

⁴¹Ka bɛ dɔ nɛ, bǎãn mɛnɛn bɛ́ Ebrɔn lɛkoro-a, bɛn minin dɔn nə́ daa ka màn-bii gigiã nɛ. Isakaara minin dɔn dinin nə́ daa nɛ, ka Zabulɔn minin laanka Nɛfutalii minin ni. Maǹ nə́ bɛa màn-biin kɛn lɛn gũ ka dundunun ni, nyɔɔmaan nɛ, dundunsùin ni, ka diin ni, ǹ nə́ tɔ́n daa ǹ nɛ. Wùsu goã a tan gɔ́rɔ kɔtɔrɔn nɛ, rezɛ̃ nɛ laa nɛ, rezɛ̃ nɛ, ka nyɔɔ nɛ. N nə́ goã ǹ nə́ daa ka diin laanka sère gigiã nɛ. Sonbore, Izirayeli a zaman lɛ tumaa goã foo kɔɔ̃nbaa gɔ́ɔ̃ nɛ.