Read Samo, Southern KZS1 16 Bible Online

KZS1 16 - Samo, Southern bible

KZS1 16

¹Davida bǎã mɛn zɛnaa mɔnaa kion lɛa Lawa a goo lɛ wɔ lɛa, ǹ nə́ woo ne walan ǹ nə́ da tán bii, ǹ nə́ tɔn *wúlu màn tiɛ̃n laanka zɔɔ da Lawa nɛ ǹ wúlu mànan kɔ Lawa yɔrɔ-a.

²Davida bɛ́ á wúlu màn tiɛ̃n lɛn kɔ ka zɔɔ da Lawa nɛ ǹ wúlu mànan lɛn nɛ á nya ǹ mɛn waáraa, á barka da zaman lɛ ganaa ka Dɛnaa Lawa tɔ nɛ.

³Bɛ kio, á tɔn màn-bii gii Izirayeli minin lɛn manɛ, ta giĩ ni hinlaa ta lɔ nɛ, ǹ gogoonmaa buuru mìi goon yɛ, sɛmɛlɛ mɔ̀mɔ goon ne, ka rezɛ̃ mɔ̀mɔ goon ne.

⁴Levii tɔrɔn mɛnɛn bɛ́ Lawa a dí nyɛɛ, Davida nə n tɛnɛn bɔ á ǹ giã ǹ bǎã koa Dɛnaa Lawa a goo lɛ yɔrɔ-a, màn mɛn bɛ́ toɛ ǹ yiri gisĩ Dɛnaa, Izirayeli a Lawa nɛ, ǹ na a tɔ bɔ, ǹ na a guguru kɔ:

⁵Kiã Asaafu ni ka a koamala wole Zakarii ni, ka Yeyieli, Semiramɔti, Yeyieli, Matitia, Eliabu, Benayahu ka Obɛdi-Edɔmu. Yeyieli n tùtùun laanka kɔnkoɛ̃ɛnɛn dii, Asaafu n gɔn pere dɛ ǹ mànan dii.

⁶Lawa wúlu-bɔle Benayahu laanka Yahaziyɛlin bɛnɛn pii biikoo tumaa li Lawa a *lɛ kɔ kɔn la ǹ goo lɛ yɔrɔ-a.

⁷A din pinaa kɛ lɛ dɔ nɛ a bibinaa lɛa, Davida zii kɔ Asaafu la ka ǹ dɔɔ̃nɔn nɛ, mà ǹ loe lɔ ǹ Dɛnaa Lawa tɔ bɔ nɛ.

⁸Ka Dɛnaa Lawa guguru kɔ, ka a tɔ kɛ kalaa, ka a nya ǹ dí dadaran kɛn boo da tɔrɔ kɔsɔn bii.

⁹Ka loe lɔ Dɛnaa Lawa nɛ, ka a guguru kɔ ka kaa bɛ̀ dɛ ǹ mànan nɛ, ka a kaãbaa ǹ siin kɛn tumaa pɛ, ka timəə la.

¹⁰Ka n dinin koa, ka Dɛnaa Lawa tɔ sonbore kɛ nɛ. Ka n nyɛnyɛɛ, kasɛn mɛnɛn bɛ́ giɛ Dɛnaa Lawa li.

¹¹Ka ga Dɛnaa Lawa lɛ li, ka ga a pàã kɛ dɔ li. Ka ga li, ka n mɔrɔ a ganaa biikoo tumaa li.

¹²Ka n yiri koa a kaãbaa ǹ siin kɛn nɛ, á ǹ zɛnaa, a sii-nyaa ǹ siin kɛn nɛ, ka a kiri boon kɛn nɛ, ǹ nə́ soo a lɛ-n.

¹³Ka zɛnaa miɛ̃, kasɛn kɛn lɛn Lawa din a dí-nyali Izirayeli tɔrɔn lɛa, kasɛn kɛn lɛn Zakɔba a nɛnyaanan lɛa, ka n Lawa din a yii gɔgɔɔ̃ wolen lɛa.

¹⁴Dɛnaa Lawa lɛ n wɔa Lawa lɛa, a din lɛ n kii lɛa, kanaa tumaa mìi la.

¹⁵Ka n yiri kɔ a lɛ kɔ kɔn la kɛ nɛ biikoo tumaa li. Ka yiri nyan bɔ ka a lɛ-kɔ kɛ dɔ-n wa, yǎa wasa lɛ minin koa kɔn kio duu goon.

¹⁶ A lɛ-kɔ mɛn wɔ ka Abrahamu ni, bɛ lɛ nɛ. A na á baa liɛ lɛa Izaaki ni.

¹⁷ A na á barka wɔ a-n doo, á baa dí-pɛ lɛa, á kɔ Zakɔba la, lɛ kɔ kɔn la duduu ni, Izirayeli minin wɔ lɛa.

¹⁸A na á pɛ a gɔ́ɔ̃-n kɛnɛn: «Man die Kanaan gána kɛ koe n la, a kaa wɔ baa.

¹⁹Bɛa biikoo li, bɛ̀ ka a gigiã wa. Ka n ka goã tii kuru boɛɛn kooro lɛa gána lɛ gɔ́ɔ̃ nɛ.»

²⁰Maǹ nə́ goã gánan kiɛ kɔn la.

²¹ A laanka bɛ tumaa nɛ, Dɛnaa Lawa toa min kɔn nə mɛnaa ǹ la wa. Á dɔlɔ bɔ kiin ganaa ǹ taman yii, á n gɔn waa ǹ nɛ kɛnɛn:

²²«Ka baran n gɔn da maa yii-gɔgɔɔ̃ wolen kɛn-a wa. Ka baran sii baraa zɛnaa maa boo gii-dalin kɛn man wa.»

²³Kqnaa min din tumaa loe lɔ Dɛnaa Lawa nɛ. Ka a minin si sii la lɛ laakalaa baraabaraa.

²⁴Ka a gugurubaa lɛ pɛ gána kɔsɔn minin bii, ka a nya ǹ dí sonboren kɛn dɔn pɛ, tɔrɔn tumaa bii.

²⁵Sonbore, Dɛnaa Lawa lɛ n gole. A din lɛ doamaa-n ka tɔ-bɔ nɛ. Á kakaarɛ á la lawan tumaa nɛ.

²⁶Tɔrɔ kɔsɔn bɛ́ lawan mɛnɛn tumaa guguru koe, bɛn man màn kooron lɛa. Sɛnɛ, wɔsɛn Dɛnaa Lawa lɛ na á lon zɛnaa.

²⁷Lon màn siĩnin laanka a tɛ-pɛlen man a lɛnpɛnɛ, a kion kɛ piɛ̃maa nɛ, ka a din pàã laanka a zín ni.

²⁸Kanaa a tɔrɔn lɛn, ka da zín kɔ Dɛnaa Lawa la. Ka golee li, mà gugurubaa laanka pàã n Dɛnaa Lawa lɛ wɔ lɛa.

²⁹Ka golee li, mà gugurubaa lɛ na a din tɔ wɔ lɛa. Ka da ka kaa Lawa gɔ ǹ mànan nɛ, ka wɔ a kion lɛ a sumu-n. Bɛ̀ Dɛnaa Lawa ná a sonborebaa a la yii-n kɛ nyã, ka tumaa kaa tán a yɔrɔ-a.

³⁰Ka tumaa bìn da a yɔrɔ-a. Bɛ lɛ nɛ kanaa lɛ á golee ne, a ná a ba talɛɛ wa.

³¹Lon mànan nə n nyɛnyɛɛ, tán wɔn nə bɛ̀ baa ka foo kɔɔ̃n nɛ! Ka pɛ tɔrɔn bii mà Dɛnaa Lawa n kii lɛa!

³²Yìsi mu dɔ laanka a gɔ́ɔ̃gɔ́ɔ̃ ǹ wɔn nə bìn da. Don dɔ laanka a mànan tumaa zɔ́n zɛnaa.

³³Dan mɛnɛn dɔn tumaa bɛ́ daãn gɔ́ɔ̃ nɛ, bɛn dɔn nə loe lɔ, ǹ nə n nyɛnyɛɛ Dɛnaa Lawa lɛ yɔrɔ-a, a giala, mà á die kiri we tán ganaa.

³⁴ Ka barka da Dɛnaa Lawa nɛ, a giala á siĩni, a minin narɛɛ a nyɛɛ duduu wa.

³⁵Ka pɛ: «Wɔ si sii la, Dɛnaa Lawa, wɔa Lawa, wɔ sɔkɔn wɔa gána nɛ, n wɔ bɔ tɔrɔ kɔsɔn bii. Bɛa biikoo li, wɔ á re barka diɛ n nɛ, wɔ n tɔ sonbore kɛ laakalaa, wɔ wɔ dinin koa n guguru kɔ gɔ́ɔ̃ nɛ.

³⁶Barka Dɛnaa Lawa, Izirayeli a Lawa. Barka nə n wɔ lɛa duduu yǎa duduu!» Zaman tumaa pɛ mà hiĩ mà a n miɛ̃! Ka Dɛnaa Lawa tɔ bɔ!

³⁷Bɛ kio Davida pɛ Asaafu ni ka Levii tɔrɔ gialakunun kɛn nɛ maa ǹ giã kunu Dɛnaa Lawa a lɛ kɔ kɔn la ǹ goo lɛ li. Walan, ǹ doamaa nɛ ǹ nə dí nya, lɛ kurəə ná a ba la wa, ka ǹ bɛ koɛ kɔn la lɛawaa yii li lɔn.

³⁸Á Yedutunu a nɛgiĩ Obɛdi-Edomu laanka Hasaa koa kiɛnlɛ-lɛduə᷉lin lɛa ka ǹ dɔɔ̃ngii᷉ min pɔsɔrɔ ka kiwisi ni.

³⁹Dɛnaa Lawa a mɔnaa kion ke bǎã sonbore kɛ nɛ Gabawɔ̃, Davida bɛa dí kɔ Sadɔki la ka ǹ dɔɔ̃n Lawa a wulu-bɔlen ne.

⁴⁰Ǹ doamaa nɛ ǹ wúlu màn lɛpiɛ᷉ kɔ Lawa la baayɛlɛ ka wasamiɛ̃n nɛ wúlu man tã ǹ bǎã kɛ nɛ. Sii mɛn yii bɛ́ kiɛ̃ nɛ Lawa a dí-pɛn sɛ́wɔ nɛ á kɔ Izirayeli la, ǹ doamaa nɛ ǹ na a tumaa zɛnaa.

⁴¹Eman laanka Yedutunu, ka min kɔsɔn mɛnɛn nə n bɔ, ǹ nə́ ǹ bíi ka ǹ tɔ nɛ maa ǹ Dɛnaa Lawa guguru kɔ, a giala, a kɔn-narɛɛ n duduu wɔ lɛa.

⁴²Eman laankaa Yedutunu n bɛnɛn pii ǹ nə́ gɔn pere dɛ ǹ mànan dii, ka sàn kɔ ǹ màn tɔrɔ kɔsɔn nɛ, ǹ nə́ diɛ Lawa a loen kɛn li. Yedutunu a nɛnyaanan man nə goã kiɛnlɛ lɛduĩ.

⁴³ Bɛ kio zaman lɛ tumaa woo, didie woo piɛ, Davida dɔ wusoo á woo piɛ á barka da a kion minin ganaa.