Read Samo, Southern KZS1 17 Bible Online

KZS1 17 - Samo, Southern bible

KZS1 17

¹Davida bɛ á giã a kii kion ne biikoo mɛn li, á pɛ Lawa a boo gii-dali Natan nɛ: «Ma á ke má giã da kaka kion ne, sɛnɛ Dɛnaa Lawa a *lɛ kɔ kɔn la ǹ goo kɛ n tɔn bǎã nɛ, mɔnaa kion lɛa.»

²Natan Davida lɛ si á pɛ nɛ: «Sii mɛn tumaa bɛ́ n yiri ni n ta li n zɛnaa, a zɛnaa, a giala Dɛnaa Lawa tá kunun n ni.»

³A din tèlò kɛ lɛ nɛ Lawa boo da Natan nɛ á pɛ mà

⁴a wo pɛ asɛ a dí-nyali Davida nɛ mà Dɛnaa Lawa mà kɛnɛn: «Nsɛ bie re kion doe n kɔ ma la ma giã-n wa.

⁵A giala, ma tɔn giã kion wa, a kũ ma Izirayeli bɔ lɛawaa mɛn, li a da kaa pelo lɛ, man má goã bǎãn koe kɔn lɛ, mɔnaa kion ne má giã a nɛ.

⁶Bǎã tumaa nɛ, ma wo ǹ mɛnɛn nɛ kun ka Izirayeli tumaa nɛ, ma kiãn mɛnɛn bɔ má ǹ koa máa ǹ maa zaman lɛ lɛduə̃, man má boo da ǹ mɛn nɛ má pɛ máa wàa na á baa ka a da kaka kion doe káa koe ma la wa.»

⁷Kanna kəni, kɔ pɛ maa dí-nyali Davida nɛ mà Dɛnaa Lawa Pàãyiidɛnaa n kɛ pii: «Man má n kũ tɔɔn lɛduə̃ ǹ bǎã nɛ, tɔɔn kio, máa n maa zaman, Izirayeli mìilandɛnaa baa.

⁸N wo bǎã mɛn tumaa nɛ, má goã kunun nni. Má n zɔ́ɔn tumaa dɛ n yii ni, man die n tɔ boe ka tán a min dadaran wɔ bɛ́ lɔn.

⁹Man die bǎã goon boe Izirayeli, ma zaman wɔ lɛa, man die ǹ gòã we tán walan ǹ goã walan, ǹ bǎã lɛa. N gɔ̀nɔn ba re bìn diɛ doo wa, min baraan kɛn ba re wusii ǹ da bɔ n yii-n doo wa,

¹⁰Ka lɛlɛ bɛ́ lɔn, má sii yɔrɔ-bɔlen koa maa zaman Izirayeli mìi la. Má n zɔ́ɔn tumaa wɔ n gɔn, man pii n ni máa ma din Dɛnaa Lawa á re n kion koɛ.

¹¹Bɛ̀ n lɛawaan lɛ pã ń nə́ die woe n din li, ma á re n tɔrɔn lɛn siɛ lon n kio, n din a nɛ goon ne ma á re a kiibaa gòã we tán.

¹²Bɛ lɛn die kion doe a kɔ ma la. Ma á re a kii dankan doɛ tán yǎa duduu.

¹³ Man die a díi biɛ, á re maa nɛ biɛ. Ma a re maa bɔlɔgoondɛnaabaa sii la wa, ka ma bɛ ma si min mɛn goã kiibaa la n nyɛɛnɛ wa.

¹⁴Ma á re toɛ a yii goã koo maa kion, maa kiibaa gɔ́ɔ̃ nɛ yǎa duduu. Kiibaa ǹ pàã kɛ n die goɛ a kion minin wɔ lɛa lɛawaa yii li.»

¹⁵Natan boo mɛn tumaa ma Lawa li, a sii mɛn tumaa yɛ, a na á boo da Davida nɛ á kɔnpɛ ka bɛ lɛ nɛ.

¹⁶Bɛ kio, kii Davida daa giã tán Dɛnaa Lawa yɔrɔ-a á pɛ: «Dɛnaa Lawa, die n ka masɛ nɛ? Maa kion minin man wàa lɛa? Ma bɛ́ bǎã mɛn nɛ pelo, man má wàa zɛnaa n nɛ ń tɔn daa ma-n yǎa kànaa?

¹⁷Maa Lawa, bɛ dɔ din na á goã kiɛɛrɛ n yii li. Ń lɛ kɔ din wɔ ma tɔrɔn wɔ paǹ li. Á ke Dɛnaa Lawa, ń ma baa min yii guguru-a lɛa.

¹⁸Masɛ Davida n boe la ma wàa boo da n nɛ doo kəni, tɔ gugurubaa kɛ taman yii ń kɔ ma la. Ń din tá n dí-nyali doɛ̃.

¹⁹Dɛnaa Lawa, ń tá n dí-nyali lɛ narɛ, bɛ lɛ na á toa ń sii dadaran kɛn zɛnaa, ń tá n din a golebaa nyɛɛ.

²⁰Dɛnaa Lawa, n miã banban. Wɔ boo mɛn yii tumaa ma ka wɔ toon ne, lawa kɔn banban á dɔ n li wa.

²¹Tɔrɔ kɔn tá yii tán la a n kɔnboe ka n zaman Izirayeli ni? Ń wɔ si, ń wɔ baa n din a zaman lɛa. Ń kaãbaa ǹ siin dadaran zɛnaa wɔ a lɛa, ń nə́ n din tɔ bɔ nɛ. Ń nə́ n zaman lɛ si Ezipti minin la, ń tɔrɔn loo ǹ nyɛɛnɛ.

²²Dɛnaa, ń Izirayeli baa n zaman lɛa duduu, n nə́ n baa a Lawa lɛa.

²³Kanna kəni Dɛnaa Lawa, n boo mɛn da masɛ wɔ paǹ li ka maa kion minin ni, bɛ zɛnaa duduu. N lɛ-kɔ lɛ lɛ pã baraa nɛ!

²⁴Toa a yɔrɔ yɛ! N tɔ n die goɛ gole biikoo yii tumaa li. Minin tá re pii mà Dɛnaa Lawa Pàãyiidɛnaa, Izirayeli a Lawa lɛ n Lawa lɛa, Izirayeli wɔ lɛa sonbore! Toa n dí-nyali Davida a kion lɛ gòã wɔ tán n din yɔrɔ-a!

²⁵A da yaa n dinmaa nə ń pɛ n dí-nyali lɛ nɛ mà n tá re a kion koɛ a wɔ lɛa. Bɛ lɛ nɛ, n dí-nyali lɛ foo taã á Lawa nyan kɛ koe n lɔn.

²⁶Kanna kəni Dɛnaa Lawa, n din ni Lawa lɛa, ń lɛ kɔ n dí-nyali la ka bɛa sii sonbore kɛ lɛ nɛ.

²⁷Kanna kəni, barka da n dí-nyali a kion lɛ ganaa, a goã n yɔrɔ-a duduu. A giala nsɛ Dɛnaa Lawa, bɛ̀ ń barka da màn mɛn ganaa, barka goɛ̃ bɛ nɛ yǎa duduu.»