Read Samo, Southern KZS1 5 Bible Online

KZS1 5 - Samo, Southern bible

KZS1 5

¹ Urubɛn na á goã Izirayeli a nɛgiĩ bibinaa lɛa. Sɛnɛ a bɛ́ á giã kun ka ǹ di a lɔ goon nə́, a goledɛnaabaa lɛ na á dɔ Izirayeli a nɛgiĩ Zozɛfu a nɛgiĩn ganaa, Zozɛfu lɛ dɔ n Izirayeli a nɛ goon lɛa. A bɛ́ á n baa miɛ̃, ǹ goã giɛ Urubɛn ganaa nɛgiĩ gole lɛa doo wa. Zudaa sɛ màn gole baa á la ǹ dɔɔ̃nɔn lɛn manɛ. A din lɛ tɔrɔ goon na á Izirayeli gána a kii baa. Sɛnɛ, a laanka bɛ yii ni, nɛgiĩ goledɛnaabaa na á dɔ Zozɛfu ganaa. Zakɔba a nɛgiĩ bibinaa Urubɛn lɛa nɛgiĩn man ka kɛn nɛ: Anɔɔki ni, Paluu ni, Ɛsirɔn nɛ, ka Karmii ni.

⁴Zowɛli tɔrɔn nə koa kɔn la lɔn, di laanka nɛ nɛ, bɛn nə́ ke: Semayia nɛ, Gɔgə nə́, Simeyii ni,

⁵Mikaa nɛ, Rehaya nɛ, Baali ni,

⁶ ka Beeraa nɛ. Beeraa lɛ sɛ na á goã Urubɛn tɔrɔn goledɛnaa goon lɛa, Asiirii gána a kii Teglati-Falasaara kɛ goã á saa á woo ne bɛ̀rɛbaa ǹ bǎã nɛ.

⁷Beeraa dɔɔ̃nɔn kɛn tanlɛn nyɛɛnaandɛnan lɛa, hinlaa kɛdɛnan lɛa, bɛn tɔn nə́ goã minin tɔ kiɛ̃ ǹ sɛ́wɔn lɛn nɛ. Yeyieli tɔ na á goã bibinaa nɛ, bɛ kio Zakarii ni,

⁸ka Belaa nɛ. Azaazi a nɛ n ka Belaa lɛ nɛ, Semaa dɔ wɔ n ka Azaazi ni, Zowɛli dɔ wɔ n ka Semaa nɛ. Urubɛn tɔrɔn lɛn man nə́ goã giã-n Aroɛɛrɛ kiwi, ǹ nə́ giã ǹ nə́ woo soo yǎa Neboo kele laanka Baali-Meɔn kiwi ni.

⁹Lɛ̀giala gɔn la, maǹ nə́ goã ǹ nə́ woo soo diə gole kɛ lɛkoro-a. Bɛa diə gole lɛ na á goã ǹ tán laanka Efrati tà kɛ bii n ni, a giala ǹ tɔɔn man nə́ goã didi Galaati gána nɛ.

¹⁰Sayulu a biikoo li, ǹ nə́ goã ǹ nə́ zia baa Agaara tɔrɔn ganaa, ǹ nə́ boo ǹ la, ǹ nə́ ǹ kaa ǹ pàã giulun. Bɛ kio, ǹ nə́ goã giã nɛ ǹ zìãn nɛ Galaati gána a lɛ̀giala gɔn la a bǎãn tumaa nɛ.

¹¹Gaadi tɔrɔn man nə́ goã giã-n Urubɛn tɔrɔn lɛn genli Basan gána nɛ, ǹ nə́ woo soo yǎa Salkaa kiwi.

¹²Zowɛli a tanlɛ n tanlɛ gialakunun kɛn nyɛɛnɛ, a paabaa ǹ wɔ n ka Safumu a tanlɛ nɛ, bɛ kio n ka Yanayii a tanlɛ laanka Safati wɔ nɛ.

¹³Ka bɛ dɔ nɛ, tanlɛ sɔbaa kɔsɔ dɔ gɔã a tan: Mikayeli a tanlɛ nɛ, Mesulaamu wɔ nɛ, Sebaa wɔ nɛ, Zorayii wɔ nɛ, Yakan wɔ nɛ, ka Zia wɔ laanka Ebɛɛrɛ wɔ nɛ.

¹⁴Min mɛnɛn nə bɛa tanlɛn kɛn lɛn koa, bɛn man Abiayili a nɛnyaanan lɛa. Ǹ digolon nə koa kɔn la lɔn di laanka nɛ nɛ, bɛ á ke: Uuri ni, Yaroa nɛ, Galaati ni, Mikayeli ni, Yesikayii ni, ka Yaadoo laanka Buuzu ni.

¹⁵Gunii a nɔ́ɔn Ahii ke, Abdiyeli a nɛ lɛa bɛ na á goã bɛa tanlɛn kɛn lɛn nyɛɛnaandɛnaa lɛa.

¹⁶Gaadi tɔrɔn man nə́ goã giã-n Galaati gána laanka Basan gána bǎã nɛ, ka kiwi mɛnɛn bɛ́ ǹ kio, kɔnlɛ ka Saarɔn a tɔɔn buu sɔ̃ ǹ bǎãn kɛn tumaa nɛ.

¹⁷Maǹ nə́ goã ǹ nə́ bɛa minin kɛn lɛn tumaa tɔn kiɛ̃ tɔrɔ basan sɛ́wɔ kɛ nɛ, Zudaan kii Zoatamu a biikoo li, ka Izirayeli gána a kii Zeroboamu a biikoo ne.

¹⁸Urubɛn tɔrɔn bii, ka Gaadi tɔrɔn laanka Manaasee tɔrɔn talɛɛ bii, zia-baali duu pusiwensii ka biɛ ɔbaa ka pɔsɔrɔ (44 760) na á goã a tan ǹ nə́ boe la ǹ nə́ woe zia la. Bɛa zia-baalin lɛn gɔn kaa zia baa nɛ. N nə́ zia biɛ doɛ̃ ka goóro ne, ka gɔya sa nɛ, hinlaa ka sa nɛ.

¹⁹Ǹ nə́ zia baa Agaraa tɔrɔn ganaa, Yetuuru tɔrɔn nɛ, Nafisi tɔrɔn nɛ, ka Nodaabu tɔrɔn nɛ.

²⁰Bɛa zia lɛ wuu li, ǹ nə́ Lawa nyankɔ mà a n dɔ ǹsɛn lɛ, a giala ǹ foo goã doa nɛ a ganaa. Lawa dɔ nə́ ǹ nyankɔ si, á n dɔ ǹ lɛ. Bɛa yɔrɔ lɛ la, ǹ nə́ boo Agaraa tɔrɔn lɛn la ǹ nə́ ǹ kaa ǹ pàã giulun, ka min mɛnɛn dɔn nə ǹ wɔ kaa kun ka Agaraa tɔrɔn lɛn nɛ.

²¹Ka bɛ dɔ nɛ, ǹ nə́ ǹ tɔɔn kũ: nyɔɔmaa duu posooro (50 000), tɔɔ bisin duu biɛpaa ka posooro (250 000), dundun duu paa (2 000). Maǹ nə́ min duu paabiɛ (100 000) kũ kòso nɛ lɛa.

²²Ǹ nə́ goã ǹ nə́ zɔ́ɔn lɛn min didi dɔ dɛ. Bɛ na á goã á n zɛnaa, a giala bɛa zia lɛ na á goã boe Lawa li. Bɛ kio, ǹ nə́ giã Agaara tɔrɔn lɛn bǎã nɛ, ǹ nə́ goã walan yǎa wo bɛ̀rɛbaa ǹ bǎã-n kɛa biikoo li.

²³Manaasee tɔrɔn talɛɛ na á giã gána lɛ nɛ, a saa Basan ganaa a wo yǎa Baali-Ɛrmɔn ka Siniiri ni, yǎa Ɛrmɔn kele li. Ǹ nə́ goã mɔnaa nɛ.

²⁴Ǹ kɛdɛnan tɔn man ka kɛn nɛ: Efɛɛrɛ nɛ, Iseyii ni, Eliyeli ni, Azireyeli ni, Zeremii ni, Obavia nɛ, ka Yadiyeli ni. Ǹ tumaa na á goã kɛdɛnan lɛa, zia-baali sonboren lɛa, min tɔdɛnan lɛa.

²⁵ Urubɛn tɔrɔn laanka Gaadi tɔrɔn nɛ, ka Manaasee tɔrɔn talɛɛ nɛ, ǹ nə́ n baa bɔlɔgoonbaãdɛnan lɛa, ǹ digolon Lawa nɛ. Lawa goã á tɔrɔn mɛnɛn bɔ̀n baa ǹ dɔ lɛ a biikoo li, maǹ nə́ Lawa lɛ din toa walan ǹ nə́ bɛn dìn guguru koe. Bɛ lɛ nɛ, Lawa tɔ́n Asiirii gána a kii min paa gòãn sɔmɔ, Puli laanka Teglati-Falasaara nɛ, bɛn nə́ ǹ goa ǹ nə́ kiɛ̃ ǹ nɛ Halaa, Abɔɔrɔ nɛ, Aara nɛ, ka Goozan tà lɛ-a nɛ, yǎa á daa dɔ pelo ganaa.

²⁷Levii a nɛnyaanan man ka kɛn nɛ: Gɛrsɔn nɛ, Keyati ni, ka Merarii ni.

²⁸Keyati a nɛnyaanan man ka kɛn nɛ: Amuramu ni, Yisehara nɛ, Ebrɔn laanka Uziili ni.

²⁹Amuramu a nɛnyaanan man ka kɛn nɛ: Aarɔn nɛ, Muizu ni, ka Miriyamu ni. Aarɔn a nɛnyaanan man ka kɛn nɛ: Nadaabu ni, Abiu ni, Eleyazaara nɛ, ka Itamaara nɛ.

³⁰Eleyazaara na á Pinaasi yɛ, Pinaasi na á Abisuwa yɛ.

³¹Abisuwa na á Bukii yɛ. Bukii na á Uzii yɛ.

³²Uzii na á Zeraya yɛ. Zeraya na á Merayɔti yɛ.

³³Merayɔti na á Amariya yɛ, Amariya na á Ayituubu yɛ.

³⁴Ayituubu na á Sadɔki yɛ. Sadɔki na á Ayimaasi yɛ.

³⁵Ayimaasi na á Azaria yɛ, Azaria na á Zoanan yɛ.

³⁶Zoanan na á Azaria yɛ. Salomɔn kion mɛn dɔ Zeruzalɛmu, Azaria lɛ na á goã Lawa a wúlu-bɔle lɛa walan.

³⁷Azaria na á Amariya yɛ, Amariya na á Ayituubu yɛ.

³⁸Ayituubu na á Sadɔki yɛ. Sadɔki na á Salumu yɛ.

³⁹Salumu na á Ilkiya yɛ, Ilkiya na á Azaria yɛ,

⁴⁰Azaria na á Seraya yɛ. Seraya na á Zozadaki yɛ,

⁴¹Nebukadenezɔɔrɔ na á woo Zozadaki lɛ nɛ bɛ̀rɛbaa ǹ bǎã nɛ bɛ̀ Dɛnaa Lawa á ke á Zeruzalɛmu minin laanka Zudaa gána minin dia gùli kɔ ǹ bǎã nɛ gána kɔsɔ nɛ.