Read Samo, Southern KZS2 13 Bible Online

KZS2 13 - Samo, Southern bible

KZS2 13

¹Zeroboamu a Izirayelin kiibaa lɛ̀ fulukiwisibaa ǹ wɔ li, Abiya Zudaa a kii baa.

²Á kii baa Zeruzalɛmu lɛ̀ sɔɔ. A náa tɔ n Mikaya. Uriyeli a nɛlɔ nɛ Gibeya. Abiya laanka Zeroboamu yoo kɔn-a zia nɛ.

³Abiya na á zia lɛ giala kɔ ka sɔraasi kaka duu biɛsii (400 000) ni, ǹ foo n tã zia-baa gɔ́ɔ̃ nɛ. Zeroboamu dɔ yoo a gialaa ka sɔraasi duu biɛkiwi (800 000) ni, min kakan lɛa ǹ foo n tã ziabaa gɔ́ɔ̃ nɛ.

⁴Abiya dii Semarayimu kele mìi ni, Efrayimu kele yii kɛ nɛ. Á n toa lon walan, á n lɛ dɛ a n pii: «Ka n too kɔ ma lon, Zeroboamu laanka Izirayeli a zaman tumaa.

⁵Dɛnaa Lawa, Izirayeli a Lawa na á Izirayeli a kiibaa kɔ Davida la ká a kion minin ni yǎa duduu. A lɛ kɔ kɔn la mɛn wɔ nɛ, màn kɔn ba boe la a bɛ ziziɛ̃ wa. Ka n kaa bɛ doɛ̃ wa?

⁶Táa Nebaati a nɛgiĩ Zeroboamu na á goã Davida a nɛgiĩ Salomɔn a dí-nyali lɛa, a na á n gòãn dii a mìilandɛnaa ganaa.

⁷Fɔ̃ ma din li wolen man nə́ goã kun ni. Min babaraan manɛ, ǹ nə́ kaka kɔ ǹ nə́ la Salomɔn a nɛgiĩ Roboamu ni, nɛ ten ke-a ná a tɔn sii dɔ̃ bɔrɔ wa. A boo la á gòã doa ǹ bǎã yɛ ǹ li wa.

⁸Kanna kəni, ka n taasɛ mà pàã tá ka lon, ka nə́ n gòãn dii Dɛnaa *Lawa a kiibaa kɛ ganaa á kɔ Davida a kion minin la. Ka n gigiã sɔraasi zaman lɛa. Sana dii nɛn tá kun ka ka nɛ, Zeroboamu nə ǹ mɛnɛn kɔ ka la, mà ǹ kaa lawan baa.

⁹Ká Dɛnaa Lawa a wúlu-bɔlen loo, Aarɔn tɔrɔn laanka *Levii tɔrɔn nɛ. Ka n kaa wúlu-bɔlen boe ká tɔrɔ kɔsɔn kɛn wɔ bɛ́ lɔn. Bɛ̀ min daa ka dii gɔ̀lɔ̀ goon laanka sère gɔ̀lɔ̀ sɔbaa nɛ, bɛ n wúlu-bɔle biɛ a dí nya lawa kooron kɛn manɛ.

¹⁰Sɛnɛ, Dɛnaa Lawa n wɔsɛn Lawa lɛa, wɔ n la bɔ a ganaa wa. Lawa a wúlu-bɔlen mɛnɛn bɛ́ Dɛnaa Lawa a dí nyɛɛ, Aarɔn tɔrɔn manɛ, Levii tɔrɔn dɔn nɛ, ǹ nya ǹ dí nyɛɛ.

¹¹Baayɛlɛ ka wasamiɛ̃nɛ, wɔ n wúlu mànan tiɛ̃ koe Dɛnaa Lawa la kɔn lɛ ka da yon gìĩ kɔɔ̃n nɛ. Buurun mɛnɛn bɛ́ n koe Lawa la, wɔ n bɛn kiɛ tabala sonbore kɛ la. Wasamiɛ̃nɛ, wɔ n tɛ diɛ bolonən kɛn ganaa bolon koa ǹ bǎãn kɛn nɛ sana lɛa. Wɔsɛn, wɔ n koe Dɛnaa Lawa a landa boon kɛn lɛ. Sɛnɛ, kasɛn, ka n la bɔ ǹ ganaa.

¹²Kanna, Lawa dinmaa n wɔa kiã lɛa. Lawa a wúlu-bɔlen nə́ ke bii-a, ǹ yɔrɔ n boe ne ziabaa ǹ bɛn pɛ a lɛa ka ganaa. Izirayeli minin lɛn, ka nyan zia baa Dɛnaa Lawa, ka digolon Lawa ganaa wa! Kaa wɔ ba a-n ma!»

¹³Bɛa biikoo li, Zeroboamu sɔraasi kuru goon dia mà ǹ wo n pɛnɛ Zudaa sɔraasin lɛn kio, n nə́ ǹ tɔwaa. A sɔraasin man Zudaa yɔrɔ-a, sɔraasi kuru goon kɛ dɔ n durii ni ǹ kio.

¹⁴Zudaa sɔraasin lɛn nə́ n bɔyaa, ǹ nə́ yɛ mà ǹsɛn doamaa nɛ ǹ zia baa nyɛɛnɛ, ka kio ne. Ǹ nə́ gu da Dɛnaa Lawa nɛ, bɛ̀ Lawa a wúlu-bɔlen tá bɛnən pii.

¹⁵Zudaa sɔraasin lɛn nə́ ziabaa ǹ lɛ-dɛ wɔ. Bɛa waáraa, Dɛnaa Lawa boo Zeroboamu la ka Izirayeli a sɔraasin tumaa nɛ Abiya nyɛɛnɛ ka Zudaa a sɔraasin ni.

¹⁶Izirayeli sɔraasin lɛn nə́ baa si Zudaa wɔn nyɛɛnɛ. Lawa nə́ ǹ wɔ Zudaa sɔraasin gɔn.

¹⁷Abiya laanka a minin nə́ bɔ̀n gole da Izirayeli sɔraasin ganaa parsiini. Ǹ nə́ sɔraasi kaka duu biɛsooro (500 000) dɛ.

¹⁸Bɛa pinaa kɛ lɛ nɛ, ǹ nə́ sìi da Izirayeli minin ganaa. Zudaa minin sɛn nə gɔ̀lɔ̀baa yɛ, a giala, maǹ nə́ ǹ pàã doa Dɛnaa Lawa la, ǹ digolon Lawa.

¹⁹Abiya Zeroboamu kio loo, á Betɛli kiwi kũ, Yekanaa laanka Efrɔn nɛ ka ǹ lɛkoro-a kiwin ni.

²⁰Abiya a kiibaa biikoo li, Zeroboamu nə n din yɛ doo wa. Dɛnaa Lawa dɛ, á gã.

²¹Abiya sɛ a pàã gòã wɔ tán. Á lɔ fulusii wɔ, á nɛgiĩ fuəwenpaa yɛ ka nɛlɔ fulusɔrɔ nɛ.

²²Abiya a nya ǹ dí gialakunun kɛn, a dí mɛn yii nya, a boo mɛn yii da, bɛn tá kiɛ̃ nɛ «Lawa a boo gii-dali Idoo a yiri gisĩ ǹ siin sɛ́wɔ kɛ nɛ.»

²³Abiya bɛ́ á gã á woo ǹ digolon li, maǹ nə́ bĩ "Davida a kiwi". A nɛgiĩ Azaa na á kii baa a bǎã nɛ. A kiibaa waáraa, gána, lɛ goã yii-nyɛɛ la yǎa lɛ̀ fù.