Read Samo, Southern KZS2 15 Bible Online

KZS2 15 - Samo, Southern bible

KZS2 15

¹Lawa Yiri gisĩ Obɛdi a nɛ Azaria la.

²Azaria woo kii Azaa li á pɛ nɛ: «Azaa, Zudaa ka Bɛnzamɛn minin, ka tumaa nə n too kɔ ma lon! Dɛnaa Lawa n kun ka nɛ, bɛ̀ ka dɔn tá kun ni. Bɛ̀ ka ga li, á re toɛ ka yɛ. Sɛnɛ, bɛ̀ ka n la bɔ a ganaa, á re n la boe ka-a.

³Haalɛ bibi, wɔ digolo Izirayeli tɔrɔn lɛn man nə́ goã bii-a ǹ Lawa taãn na a banban wa. Lawa a wúlu-bɔle banban a tá ǹ darɛɛ wa, ǹ landa dɔ banban wa.

⁴Sɛnɛ, ǹ koe lɛ gɔ́ɔ̃ nɛ, ǹ nə́ wusoo ǹ nə́ daa Dɛnaa Lawa Izirayeli a Lawa li, ǹ nə́ ga li, á toa ǹ nə́ yɛ.

⁵Bɛa waáraa kɛ lɛ nɛ, min ba boe la n zii tɔ wɔ n yiri n waa-n wa, a giala sii lɔlɔkɔn gole kɔ gánan lɛn minin bii.

⁶Maǹ nə́ goã kɔn yɔyɔrɛ gána laanka gána, kiwi laanka kiwi. Lawa na á bìn da ǹ ganaa ka koe tɔrɔ tumaa nɛ.

⁷Sɛnɛ kasɛn, kanna kəni, ka toa ka goã kaka. Foo-ziziɛ̃ nyan ka kũ wa. Ka á re kaa nɔmaa lɛ a saraa yii.»

⁸Kii Azaa bɛ́ á Lawa a dia dí-a wɔle Obɛdi a nɛgiĩ Azaria a boon kɛn ma, a foo wusoo á taã. Dìn mɛnɛn bɛ́ ǹ tan Zudaa laanka Bɛnzamɛn gána nɛ, á bɛn papaã. A kiwin mɛnɛn dɔn kũ Efrayimu a kele yii kɛ nɛ, á zɛnaa miɛ̃ bɛn dɔn manɛ. Bɛ kio, á tɔn Dɛnaa Lawa a *wúlu bɔ ǹ bǎã kɛ zɛnaa Lawa a kion kɛa daã kiɛnlɛ-a.

⁹Á Zudaa laanka Bɛnzamɛn minin sɔkɔn, ka Efrayimu, Manaasee ka Simiɔn tɔrɔn kɛn nɛ gùlin lɛa ǹ bii. Izirayeli min gigiã daa n duwəə la, a gialaa, ǹ nə́ yɛ mà Dɛnaa Lawa tá kun ni.

¹⁰Azaa a kiibaa a lɛ̀ fulusoorobaa ǹ wɔ a mui sɔɔbaa ǹ wɔ li, ǹ tumaa nə́ n sɔkɔn Zeruzalɛmu.

¹¹Bɛa pinaa kɛ lɛ nɛ, ǹ mànan mɛnɛn si ǹ zɔ́ɔn la, ǹ nə́ ǹ tɛnɛn kɔ Dɛnaa Lawa la *wúlu màn lɛa: Dii biɛsɔbaa (700) ka sère duu sɔbaa (7 000).

¹²Ǹ tumaa lɛ kɔ kɔn la wɔ ka Dɛnaa Lawa nɛ, mà ǹsɛn tá re giɛ ǹ digolon Lawa lɛ li ka ǹ foo tumaa nɛ, ka ǹ yiri tumaa nɛ.

¹³Min woo min, nɛ ten lɛa hinlaa min gole lɛa, giĩ hinlaa lɔ lɛa a na a ga Dɛnaa Lawa, Izirayeli a Lawa li wa, bɛa dɛnaa nyin tá re n boe.

¹⁴Ǹ nə́ lɛ-kɔ wɔ ka Dɛnaa Lawa nɛ ka lɛ-dɛ gole ne, foo kɔɔ̃n lɛ-dɛ nɛ ka bɛnən wuu ni.

¹⁵Zudaa min tumaa foo kɔɔ̃n kɔ ka bɛa lɛ-kɔ wɔ kɛ nɛ, a giala, maǹ nə́ zɛnaa ka ǹ foo tumaa nɛ, ǹ nə́ ga Dɛnaa Lawa li ka ǹ yiri tumaa nɛ. Dɛnaa Lawa toa ǹ nə́ yɛ, á là nyantoro kɔ ǹ la paǹ tumaa li.

¹⁶Kii Azaa kiilɔbaa si ǹ dan Maakaa la, a giala mà a na á dì Aseeraa nyín zɛnaa. Azaa nə́ ǹ da dì nyin lɛ a yɔyɔrɛɛ ganaa, ǹ nə́ tɛ da a ganaa Sedrɔn nyankɔrɔ lɛ kɛ nɛ.

¹⁷Azaa a yiikoonaabaa tumaa gɔ́ɔ̃ nɛ, a foo din tumaa goã Lawa wɔ lɛa. Sɛnɛ, dì wúlu bɔ ǹ bǎã kɛn, bɛn nə papaã Izirayeli gána-n wa.

¹⁸Ǹ di laanka a din nə wúlu mànan mɛnɛn kɔ Lawa la, a wɔ lɛa, wɔrɔ lɛa, sana lɛa, ka màn tɔrɔ kɔsɔn nɛ, Azaa bɛn goa á daa ǹ kaa Lawa a kion.

¹⁹Azaa lɛ̀ pɔsɔɔ ka sooro bibinaa mɛn zɛnaa pàã la, zia yɛ wa.