Read Samo, Southern KZS2 16 Bible Online

KZS2 16 - Samo, Southern bible

KZS2 16

¹Azaa a kiibaa lɛ̀ pɔsɔɔwensɔrɔbaa ǹ wɔ li, Izirayelin kii Bayesaa yoo Zudaa gána gialaa. Á kungɔn dɔ á Ramaa kiwi tamaa nɛ, a n giɛ li mà a Azaa laanka Zudaa minin kurəə bɔ walan ganaa.

²Bɛ lɛ nɛ, Azaa tɔn wɔrɔ laanka sana bɔ Lawa a kion gɔn màn nɛ ka kii kion wɔ nɛ, á dia Damaasi, Siiriin kii Bɛn-Hadaadi la ka bɔlɔ kɛ nɛ:

³«Daa wɔ lɛ kɔ kɔn la wɔ ka maa díi laanka n díi á ke ǹ nə́ zɛnaa lɔn. Wɔrɔ laanka sana á ke, ma á n goe ne. Wusoo n lɛ kɔ kɛ kio, n nə n mɛn wɔ ka Izirayelin kii Bayesaa nɛ, màn mɛn bɛ́ toɛ a na a sɔraasin bii a ǹ bɔ ma la.»

⁴Bɛn-Hadaadi zɛnaa ka Azaa bɛ́ á nɔ̀n da la lɔn. A ná a sɔraasin nyɛɛnaandɛnan dia woe zia biɛ Izirayeli a kiwin ganaa: Ǹ nə́ Yoni kũ, Dan nɛ, Abeli-Mayimu ni, ka Nɛfutalii a kiwin tumaa nɛ màn-bii tɔrɔ tumaa n tamaa nɛ ǹ nɛ.

⁵Bayesaa bɛ́ á bɛ ma, a bɛ́ dí mɛn tumaa nyɛɛ Ramaa kiwi tamaa taman yii, á bɛn lɛ da.

⁶Kii Azaa soo kun ka Zudaa min tumaa nɛ. Bayesaa kɔlɔ laanka gɔn mɛn tumaa sɔkɔn Ramaa kiwi tamaa taman yii, ǹ nə́ bɛ tumaa goa ǹ nə́ woo kungɔnɔn dɔ nɛ, ǹ nə́ Gebaa laanka Mispaa lɛnpɛnɛ nɛ.

⁷Bɛa waáraa, Lawa a boo gii-dali Anaanii daa Zudaan kii Azaa yaa á pɛ nɛ: «N bɛ n nə́ n foo doa Siiriin kii ganaa, n nə́ n nə n foo doa Dɛnaa Lawa, n Lawa ganaa wa, bɛ lɛ n die toɛ Siiriin kii a sɔraasin nə n si n la.

⁸Etiopiin ka Libii minin bie ǹ nə́ goã sɔraasin lɛa pàã nə́ ǹ lon taã-taãnɛ wa? Ǹ ziabaa ǹ wotoro laanka ǹ sùi da baa-a wolen nə́ goã mɔnaa nɛ wa? Sɛnɛ, Dɛnaa Lawa na á ǹ wɔ n gɔn a giala, ma n nə́ n foo doa a din ganaa.

⁹A giala, Dɛnaa Lawa n giɛ tán la, kanaa paǹ tumaa ganaa, min mɛnɛn bɛ́ narɛ ka ǹ foo tumaa nɛ, a n dɔ bɛn lɛ. Sisia kəni, ń baãnaabaa zɛnaa. Bɛ lɛ nɛ, a kũ sisia ganaa, n zɔ́ɔn man die yui n gialaa ka zia nɛ.»

¹⁰Azaa foo yoo Lawa a boo gii-dali Anaanii li, á kũ á da kòso-n. A foo yoo Anaanii a boon kɛn li Parsiini. Bɛa waáraa kɛ lɛ nɛ, Azaa nə n bɔyaa á kakaarɛ kɔ zaman lɛ a min tɛn ganaa.

¹¹Azaa a sii kɔsɔn kɛn, a kũ a bibinaa ganaa a wo a giala-nyɔmiɛ̃ yaa, ǹ ta kiɛ̃ nɛ Zudaa laanka Izirayeli a kiin sɛ́wɔ nɛ.

¹²Azaa a kiibaa lɛ̀ pɔsɔɔwenmanangɔrɔbaa ǹ wɔ li, busu kaka kũ a gòãn ganaa. Haalɛ a busu lɛ a kuĩ gɔ́ɔ̃ nɛ, a ga Dɛnaa Lawa a dɔmalɛ li wa, yǎa dagòã-bɔlen.

¹³A kiibaa lɛ̀ pusi ka goonbaa ǹ wɔ li, Azaa woo n digolon li.

¹⁴A yala mɛn fɔ̃ "Davida a kiwi", ǹ nə́ bĩ walan. Ǹ nə́ da piì kɔn la piɛ̃ nɛ ka màn gìĩ kɔɔ̃n nɛ ka màn tɔrɔn kɔnɔn nɛ ǹ nə́ zɛnaa a tɔa, màn mɛn bɛ́ toɛ ǹ na a gɔ̀nɔn tamaa. Ǹ nə́ tɛ gole bũ a lɛa.