Read Samo, Southern KZS2 18 Bible Online

KZS2 18 - Samo, Southern bible

KZS2 18

¹Kii Zozafati pàãma baa parsiini á gugurubaa dɔ yɛ. Á sumu n kɔn we zɛnaa a laanka Izirayelin kii Akaabu a sumu ni[1].

²Lɛ̀ lɛ kɔn-a kiɛ̃ kio, Zozafati woo Akaabu li Samarii. Akaabu tɔɔ bisin laanka tɔɔ dadaraa gigiã dɛ a wɔ lɛa ka min mɛn tumaa bɛ́ kun ni. Á sii gigiã zɛnaa màn mɛn bɛ́ toɛ Zozafati lɛ kɔ a wo zia baa Ramɔti kiwi ganaa Galaati gána nɛ kun ka asɛ nɛ.

³Izirayelin kii Akaabu nɔ̀n da Zudaa n kii Zozafati la: «N tá lɛ koe n da zia baa Ramɔti kiwi Galaati gána nɛ kun ka masɛ nɛ?» Zozafati ná a lɛ si kɛnɛn: «Wɔ n màn goon lɛa, nsɛ ka masɛ nɛ. Maa zaman nə n zaman lɛa, ma á woe zia biɛ kunun n ni.»

⁴Sɛnɛ, Zozafati ná a lɛ si kɛnɛn doo: Bǐɛ̃ kɔ n nɔ̀n da Dɛnaa Lawa la bɔrɔ.

⁵Izirayelin kii Lawa a boo gii-dalin sɔkɔn kəni. Maǹ min biɛsii (400). Akaabu nɔ̀n da ǹ la kɛnɛn: «Wɔ doamaa nɛ wɔ wo zia baa Ramɔti kiwi Galaati gána nɛ wɔ si hinlaa wɔ a lɛ da?» Lawa a boo gii-dalin na á lɛ si: «N tá boe la n woo. Lawa á re kiwi lɛ we n gɔn.»

⁶Sɛnɛ, Zozafati nɔ̀n da doo: «Lawa a boo gii-dali taãn kɔn banban a nɔ̀n da Dɛnaa Lawa la a kɔ ma la wa?»

⁷Izirayelin kii ná a lɛ si: «Giĩ goon tan wɔ n boe la wɔ nɔ̀n da bɛ la, Imila a nɛgiĩ Misee ne, sɛnɛ, a tìĩ n boe ne masɛ nyin ni. Taãnɛ, a tɔn boo sonbore kɔn da masɛ-n wa, yǎa boo baraa biikoo tumaa li.» Zozafati nə n lɛ dɛ mà kii nyan pɛ miɛ̃ wa!

⁸Bɛ lɛ nɛ, Izirayelin kii lɛ ná a sumu dí-nyali goon dia mà a wo Imila a nɛgiĩ Misee bíi wɔ fufuu.

⁹Izirayelin kii lɛ laanka Zudaan kii lɛ n giã-n bǎã mɛn nə́ ke kunu Samarii kiɛnlɛ ganaa. Didie n giã nɛ a kii dankan nɛ, ǹ nə́ ǹ kiibaa ǹ dɔnkɛn wɔ. Maǹ nə n too koe Lawa a boo gii-dalin lɛn lon ǹ nə́ ǹ boon diɛ.

¹⁰Ǹ bii, Lawa a boo gii-dali goon tan, a tɔ n Sedekiasi, Kenaanaa a nɛgiĩ lɛa. Á bɛnən zɛnaa fɔlɔ lɛa, a nə n lɛ dii Akaabu ganaa: «N tá re woe zia biɛ Siirii minin lɛn ganaa ka kɛn lɛn nɛ, n tá re ǹ yɔyɔrɛ.»

¹¹Lawa a boo gii-dali gialakunun lɛn dɔn man nə́ bɛa boo goon kɛ lɛ pɛ: «N tá boe la n wo zia baa Ramɔti kiwi Galaati gána nɛ. N tá re boe ǹ la, Dɛnaa Lawa á re kiwi lɛ we n gɔn.»

¹²Bɛa waáraa, dia dí-a wole goon woo ga Misee li, á pɛ nɛ: «Ga, Lawa a boo gii-dali tumaa n gɔ̀lɔ̀baa boo diɛ kii ni. N dɔ zɛnaa miɛ̃, n gɔ̀lɔ̀baa boo da.»

¹³Misee ná a lɛ si: «Dɛnaa Lawa Yiikoonaa tɔ lɛ taman yii, Lawa bɛ́ re boo mɛn pii ma nɛ, man die bɛ lɛ dinsɔɔ̃ pii.»

¹⁴Yǎa Misee tɔn dɔ kii Akaabu li. Kii lɛ tɔn nɔ̀n da la: «Misee, wɔ doamaa nɛ wɔ wo zia baa Ramɔti kiwi Galaati gána nɛ wɔ si hinlaa wɔ a lɛ da?» Misee Akaabu lɛ si á pɛ: «Ka á boe la ka woo á re yɔrɔ yii, Dɛnaa Lawa á re kiwi lɛ we ka gɔn.»

¹⁵Sɛnɛ, Akaabu pɛ nɛ: «Ma gunyin gia nə n diɛ liɛ ganaa máa n sonbore pɛ ma nɛ Dɛnaa Lawa wɔ lɛa!»

¹⁶ Misee tɔ́n pɛ kəni: «Sii yɛ gɔ́ɔ̃ nɛ, má Izirayeli minin tumaa yɛ sawaa nɛ kele mìi ni ka tɔɔn bɛ́ lɔn lɛduə̃li ná a ba ǹ la wa. Dɛnaa Lawa pɛ: Minin kɛn nyɛɛnnaandɛnaa banban doo wa. Didie tumaa wo piɛ ka là nyantoro ne.»

¹⁷Izirayelin kii tɔn pɛ kii Zozafati ni: «Táa má goã má pɛ n nɛ máa giĩ kɛ lɛ a boo taãn pii masɛ nɛ ǹ kɔn pinaa wa, sɛnɛ yǎa a baraa dinsɔɔ̃.»

¹⁸Misee woo ka boo-n nyɛɛnɛ: — Haya, Dɛnaa Lawa bɛ́ boo mɛn pii, ka n too kɔ bɛ li: Á ke, má Dɛnaa Lawa yɛ giã-n tán a kii dankan la ka a dí-nyalin tumaa nɛ golee-n a gusin ka a gɔsɛ nɛ lon gɔ́ɔ̃ nɛ.

¹⁹Dɛnaa Lawa nɔ̀n da: «Die n lɛ koe a wo Akaabu mìi dɔ li a wo zia baa Ramɔti kiwi Galaati gána nɛ, màn mɛn bɛ́ toɛ a gã walan?» Lon a dí-nyalin lɛn ná a lɛ si, kɛn mà kɛnɛn, kɔsɔn dɔn mà kɛnɛn.

²⁰Yǎa yiri goon tɔn nə n zɔ̃, á daa giã Dɛnaa Lawa yɔrɔ-a á pɛ nɛ kɛnɛn: «Masɛ á re a mìi doe li.» Dɛnaa Lawa nɔ̀n da la: «Ma n die a mìi doe li lɔn?»

²¹Yiri lɛ pɛ Dɛnaa Lawa nɛ: «Man die woe ma Akaabu a Lawa a boo gii-dalin lɛn tumaa kaa soɛ bɔ ganaa.» Dɛnaa Lawa tɔ́n pɛ: «Woo n na a mìi dɔ li, n tá re boe la. Woo n zɛnaa miɛ̃.»

²²Misee tɔ́n pɛ: «Á ke! Dɛnaa Lawa yiri goon dia á daa Akaabu a Lawa a boo gii-dalin lɛn kaa soɛ bɔ ganaa, bɛ giala, mà Dɛnaa Lawa din ni á koe bɔ Akaabu ganaa.»

²³Bɛ kio, Kenaanaa a nɛgiĩ Sedekiasi nə́ n zɔ̃ á dɔ, á Misee dɛ a pàã ganaa, á pɛ nɛ: «Dɛnaa Lawa yiri na á n toa maa á soo ma nɛ, á daa boo da n nɛ?»

²⁴Misee ná a lɛ si: «Haya le! N bɛ́ re kion gialan kiɛ kɔn la ǹ mɛn pinaa, mà n nə n duri, n tá re doɛ̃ bɛa pinaa.»

²⁵Izirayeli gána a kii lɛ tɔ́n pɛ a kiodɛnaa goon ne: «Misee kũ n wo ne kiwi lɛ a kiã Amɔn laanka kii a nɛ Yoasi li.

²⁶A pɛ ǹ nɛ mà masɛ mà kɛnɛn: Ka giĩ kɛ da kòso-n. Ka kòso nɛn màn-bii laanka ǹ mu kɔ la, yǎa ma boe zia la ma die ma din yii lɛa.»

²⁷Misee tɔ́n pɛ kii lɛ nɛ: «Bɛ̀ n dɔ woo zia lɛ la, n nə́ n bɔyaa n din yii lɛa sonbore, Dɛnaa Lawa bie á masɛ da boo lɛ a diɛ ganaa wa.» Misee wusoo á pɛ: «Zaman lɛ din tumaa nə n too da!»

²⁸Bɛ kio, Izirayelin kii laanka Zudaan kii Zozafati woo zia baa Ramɔti kiwi Galaati gána nɛ.

²⁹Akaabu pɛ Zozafati ni: «Man die maa dɔnkɛ lonkoe ma wo zia la. Sɛnɛ, nsɛ nə n kii mɔnaan wɔ.» A bɛ́ miɛ̃, Izirayelin kii dɔnkɛ kɔsɔ wɔ màn mɛn bɛ́ toɛ ǹ nyan dɔ̃ wa. Kiin lɛn paanan nə woo zia baa.

³⁰Sɛnɛ, Siiriin kii na á kɛa boo kɛ da a ziabaa ǹ wotoron nyɛɛnaandɛnan manɛ: «Ka nyan zia baa sɔraasin ganaa ka nyɛɛnaadɛnan kɛn nɛ wa. Ka zia baa Izirayelin kii dinsɔɔ̃ ganaa.»

³¹Ziabaa ǹ wotoro nyɛɛnaandɛnan lɛn bɛ́ ǹ nə́ Zozafati yɛ, ǹ nə́ pɛ: «Izirayelin kii lɛ n ka kɛ nɛ.» Ǹ nə́ tele a ganaa ka zia nɛ, sɛnɛ, Zozafati nə́ n lɛ dɛ. Dɛnaa Lawa daa a gu ganaa, á ǹ lɛ goa á ǹ bɔ li.

³²Ziabaa ǹ wotoro da baa-a wolen lɛn nə́ tɔn dɔ̃ kəni mà Izirayelin kii bie wa. Ǹ nə́ n bɔ a wɔlɔ li kiĩn ni.

³³A da yaa, Siirii minin lɛn sɔraasi goon na á kiɛ zũ a mìi gialaa, bɛa kiɛ lɛ Izirayelin kii lɛ kũ a fɔlɔ dɔnkɛ wɔ kɔnlɛ ǹ bǎã ganaa. Kii pɛ a zia wotoro da baa-a wole ne: «Gɔn n ma kũ. Soo n nə n bɔ ka ma nɛ zia dù lɛ nɛ.»

³⁴Bɛa pinaa lɛ nɛ, zia lɛ baraa kɔ á la yii ni. Kii lɛ goã golee-n lon miɛ̃ a ziabaa ǹ wotoro gɔ́ɔ̃ nɛ yǎa wasamiɛ̃nɛ ǹ yɔrɔ n dia-n Siirii minin la. Wasamiɛ̃nɛ, á tɔn gã.