Read Samo, Southern KZS2 21 Bible Online

KZS2 21 - Samo, Southern bible

KZS2 21

¹Zozafati bɛ́ á gã, ǹ nə́ bĩ kun ka ǹ digolon ne "Davida a kiwi". A nɛgiĩ Zoraamu na á kiibaa a bǎã nɛ.

²Zoraamu dɔɔ̃nɔn tan, ǹ tumaa n Zozafati a nɛgiĩ lɛa. Ǹ tɔn nə ke: Azaria nɛ, Yeyieli ni, Zakarii ni, Azaria nɛ, Mikayeli laanka Sefatiya nɛ.

³Ǹ díi Zozafati nə́ ǹ gɔ ka màn gigiã nɛ, sana lɛa, yɔrɔ lɛa, màn giɔ̀mɔ kaka-a lɛa. Á kiwin dɔn kɔ ǹ la Zudaa gána nɛ tamaa-n sɔnbɔraa nɛ, mà ǹ giã ǹ mìi la. Sɛnɛ, a na á gána lɛ toa Zoraamu gɔn a giala a din ni nɛgiĩ gole lɛa.

⁴Zoraamu kii baa a díi a bǎã nɛ, á pàã yɛ taãn taãnɛ. Á n dɔɔ̃nɔn tumaa dɛ ka Izirayeli gána a kiãn tɛnɛn nɛ.

⁵Zoraamu kiibaa yɛ bɛ̀ a lɛ̀ pɔsɔɔwenpaa nɛ, á kii baa Zeruzalɛmu lɛ̀ kiwisi.

⁶Akaabu a nɛlɔ na á goã a lɔ lɛa, bɛ lɛ nɛ, a dɔ Izirayeli gána a kiin lɛn tɔ wɔ ǹ gɔn saa ka Akaabu a kion minin wɔ bɛ́ lɔn. Sii mɛn bɛ́ baraa Dɛnaa Lawa yii li, a na á bɛ zɛnaa.

⁷ Sɛnɛ, Dɛnaa Lawa ba li a Davida a kion yu wa, a goã á lɛ kɔ kɔn la mɛn wɔ nɛ, bɛ lɛ taman yii. Taãnɛ, a lɛ kɔ Davida la ka sii mɛn nɛ, á ke: «N tɔrɔn tá re goɛ̃ kiibaa lɛ la miɛ̃ duduu.»

⁸ Zoraamu bɛ́ kii lɛa Zudaa ǹ mɛn waáraa, Edɔmu minin nə́ n gòãn dii a ganaa ǹ nə́ n dinin dùũ kii koa.

⁹Bɛ lɛ nɛ, Zoraamu woo ǹ gialaa ka a sɔraasin nyɛɛnaandɛnan nɛ, ka a ziabaa ǹ wotoron tumaa nɛ. Làan sorosoro, Edɔmu minin mɛnɛn bɛ́ ǹ lɛnpɛnɛ, ǹ nə́ bɛn ziabaa ǹ nə́ boo ǹ la.

¹⁰Sɛnɛ, Edɔmu zaman lɛ nə́ n gòãn dii Zudaa gána. A n tɔn miɛ̃ a da pelo yaa. A din biikoo goon lɛ nɛ, Libnaa kiwi nə́ n piã Zoraamu a pàã nɛ, a giala, a na á Dɛnaa Lawa, ǹ digolon Lawa toa walan.

¹¹Zoraamu lɛ wúlu bɔ ǹ bǎãn dɔ Zudaa kelen la, á Zeruzalɛmu minin laanka Zudaa min kɔsɔn kɛn kaa lawa kɔsɔn guguru kɔ ganaa.

¹²Ǹ kɔn pinaa, Lawa a boo gii-dali Yilii sɛ́wɔ dia Zoraamu la, kɛ n kiɛ̃ nɛ a nɛ: «Dɛnaa Lawa a boo á ke, n digolo Davida a Lawa lɛ. N ba koe n díi Zozafati a sii zɛnaa a kɔnboe lɛ wa, n ba koe n díi gole Zudaan kii Azaa dɔ wɔ lɛ wa.

¹³Sɛnɛ, n giã ǹ gɔn tá baraa á la Izirayelin kiin wɔ nɛ. Ń Zeruzalɛmu laanka Zudaa minin kaa lawa kɔsɔn guguru kɔ ganaa ka Akaabu a kion minin bɛ́ zɛnɛɛ lɔn. N nə́ n dɔɔ̃nɔn dɔn dinin dɛ, n díi a nɛgiĩn. A da yaa dɔn dinin ǹ tá soɛ n nɛ.

¹⁴Bɛ lɛ nɛ, Dɛnaa Lawa n die koe gole boe n zaman ganaa, n nɛgiĩn ni, n lɔn nɛ, ka màn mɛn tumaa bɛ́ n wɔ lɛa.

¹⁵N din, busu gigiã á re boe n yii ni. Nɔ̀ busii á re n kuĩ n nàn ganaa, màn nə́ miɛ a baraa kɔ li lɛawaa tumaa li. N nàn lɛ á re soe n gɔ̀nɔn nɛ.»

¹⁶Filisiti minin kɛn, ka Larabun kɛn Etiopii minin miãkɛnɛn lɛa, Dɛnaa Lawa bɛn zulu á ǹ kaa Zoraamu ziabaa ganaa.

¹⁷Ǹ nə́ daa yoo Zudaa gána gialaa, ǹ nə́ bbbcbbcwɔ a nɛ. Gɔn màn mɛn tumaa bɛ́ kii kion lɛ nɛ, ǹ ná a yii goa. Ǹ nə́ woo Zoraamu a nɛgiĩn laanka a lɔn nɛ. A nɛgiĩ goon toto dinsɔɔ̃ na á goã, Zoakazi. A din nə ǹ kiɛɛrɛ lɛa.

¹⁸Bɛ tumaa kio, Dɛnaa Lawa nɔ̀ busii da Zoraamu ganaa, nàn busu lɛa a ná a boe la á nyɛɛ wa.

¹⁹Lɛawaan nə́ kiɛ̃, lɛ̀ a paabaa ǹ wɔ a giala nyɔmiɛ̃ li, busu lɛ taman yii, a nàn nə soe a gɔ̀nɔn nɛ. Zoraamu na á gã la paparɛɛ baraa gɔ́ɔ̃ nɛ. A zaman lɛ tɛ gole bũ ka ǹ bɛ́ nɛn bɛ̀ ǹ zɛnaa ǹ digolon man lɔn wa.

²⁰Zoraamu na á goã á kii baa bɛ̀ a lɛ̀ pɔsɔɔwenpaa nɛ. Á kii baa Zeruzalɛmu lɛ̀ kiwisi. A bɛ́ á gã, a gɛ̀ busu min kɔn-a wa. Ǹ nə́ bĩ ǹ di "Davida a kiwi". Sɛnɛ, ǹ da kiin yalan kɛn gɔ́ɔ̃-n wa.