Read Samo, Southern KZS2 22 Bible Online

KZS2 22 - Samo, Southern bible

KZS2 22

¹Zeruzalɛmu minin nə́ Ahaazia bɔ, Zoraamu a nɛgiĩ kiɛɛrɛ dɛnaa lɛ, mà a kii baa ǹ di bǎã nɛ. Taãnɛ, ǹ dɔɔ̃nɔn mɛnɛn bɛ́ zizi ni, zia kuru goon laanka Larabun man nə́ wɔ Zudaa sɔraasin giã ǹ bǎã nɛ, ǹ nə́ ǹ tumaa dɛ. Bɛ lɛ nɛ, Zoraamu a nɛgiĩ Ahaazia Zudaan kii baa.

²A lɛ̀ fuə ne. Á lɛ̀ goon zɛnaa pàã la Zeruzalɛmu. A náa tɔ n Ataalii, Ɔmrii tɔrɔ nɛ.

³Ahaazia na á kɔ Akaabu a kion minin gòɛ̃ lɛ, a giala, ǹ dan na á doroo baraa kɔ la.

⁴Sii mɛn bɛ́ bɔnɛɛ Dɛnaa Lawa yii li, a na á bɛ zɛnaa ka Akaabu a kion minin wɔ bɛ́ lɔn. Ǹ díi a gɛ̀ kio, ǹ dinin man nə́ goã a dorolin lɛa, ǹ nə́ koe bɔ a ganaa.

⁵Á kɔ ǹ doroo lɛ, á woo kun ka Izirayelin kii Akaabu a nɛgiĩ Zoramu ni, ǹ nə́ woo zia baa Siiriin kii Azayeli ganaa, Ramɔti kiwi Galaati gána nɛ. Zia lɛ gɔ́ɔ̃ nɛ, Siirii minin gɔn nə́ Zoramu kũ.

⁶Á n bɔyaa á woo dagòã da a din ganaa Zizereyɛli, a giala mà gɔn kũ Ramaa, a wo zia baa Siiriin kii Azayeli ganaa lɛ gɔ́ɔ̃ nɛ. Bɛ lɛ nɛ, Ahaazia woo n yii kɔ Zoramu ganaa bɛa kiwi lɛ nɛ, a giala busu lɛ a kaka a ganaa.

⁷Lawa bɛa yiikɔmaa lɛ baa koe lɛa Ahaazia ganaa. Sonbore, a bɛ́ á dɔ lɔn gɔrɔ, Ahaazia laanka Zoramu woo n da Nimisi a nɛgiĩ Zewu lɛ. Yǎa Dɛnaa Lawa na á Zewu bɔ á koa kii lɛa mà a Akaabu a kion minin nyin bɔ.

⁸Lawa boo mɛn da Akaabu a kion minin lɛn wɔ paǹ li, Zewu na á zɛnaa miɛ̃. Á n da Zudaa gána a kiãn lɛ ka Ahaazia ǹ dɔɔ̃nɔn nɛnyaanan kɛn nɛ dí nyɛɛ Ahaazia a kii kion, á ǹ tumaa dɛ.

⁹Bɛ kio, á tɔn minin kaa kii Ahaazia a gamali ganaa. Minin nə́ kũ a duru ǹ bǎã nɛ Samarii, ǹ nə́ daa kɔ Zewu la, á dɛ á gã. Ǹ nə́ bĩ yala-n a giala, maǹ pii mà Ahaazia lɛ n Zozafati tɔrɔ lɛa, ke á ga Dɛnaa Lawa li ka a foo tumaa nɛ. Ahaazia a kion, min kɔn goã a n boe la a kii baa wa.

¹⁰Kii Ahaazia ǹ dan Ataalii ná a nɛgiĩ a gɛ̀ ma. Bɛ lɛ nɛ, á Zudaa a kii kion minin tumaa nyin bɔ.

¹¹Sɛnɛ, ǹ bɛ́ ǹ gialaa ǹ dii, kii a nɛlɔ Yosebaa Ahaazia a nɛgiĩ Zoasi kũ ka durii ni, á duru Lawa a kion kɛa waa ǹ kion goon ne kun ka lɔ mɛn bɛ́ màn-bii koe la. Yosebaa ke Zudaan kii Zoramu a nɛlɔ lɛa, Lawa a wúlu-bɔle Zozadaa a lɔ lɛa, Ahaazian miãnɛn lɛa, bɛ Ataalii kurəə Zoasi dɛ ganaa.

¹²Zoasi na á goã durii ni lɛ̀ sɔrɔ Lawa a kion kun ka a lɛduə̃lin ni. Bɛa waáraa, bɛ̀ Ataalii n kiilɔ lɛa Zudaa gána nɛ.