Read Samo, Southern KZS2 24 Bible Online

KZS2 24 - Samo, Southern bible

KZS2 24

¹Zoasi á kii biɛ, bɛ̀ a lɛ̀ sɔbaa nɛ. Á kiibaa Zeruzalɛmu lɛ pusi. Ǹ dan nə boe Bɛɛr-Sebaa, a tɔn Sibia.

²Zozadaa a yiikoonaabaa tumaa gɔ́ɔ̃ nɛ, Zoasi a zɛnaa n sii tumaa goã siĩni Dɛnaa Lawa yɔrɔ-a.

³Zozadaa tɔn lɔ paa kɔ la á ǹ wɔ lɔ lɛa. Á nɛgiĩn laanka nɛlɔn yɛ ǹ ganaa.

⁴Bɛ kio, Zoasi golee Lawa a kion kɛ a zɛnaa li.

⁵Á Lawa a wúlu-bɔlen laanka *Levii tɔrɔn sɔkɔn á pɛ ǹ nɛ: «Ka wo Zudaa a gánan tumaa nɛ, lɛ̀ woo lɛ̀ ka wɔrɔ sɔkɔn Izirayeli minin tumaa li. Bɛ á re toɛ, ka boo la ka Lawa a kion kɛ zɛnaa. Ka bɛ zɛnaa fufuu!» Sɛnɛ, Levii tɔrɔn lɛn nə́ toa sii lɛ nə́ n lɔlɔɔ.

⁶ Bɛ lɛ nɛ, kii tɔ́n lɛ dia Lawa a wúlu-bɔle gole Zozadaa la á pɛ nɛ: «A na á saa lɔn, Lawa a dí-nyali Muizu goã á Izirayeli a zaman da nyin giɔ̀mɔ mɛn a saraa ganaa, Levii tɔrɔn nə Zeruzalɛmu laanka Zudaa a zaman da bɛa saraa ganaa wa? Bɛa nyin giɔ̀mɔ lɛ n Lawa a mɔnaa kion kɛ wɔ lɛa.

⁷Ataalii, bɛa lɔ baraa kɛ laanka a nɛnyaanan man nə́ toa Lawa a kion lɛ ziziɛ̃. Ka bɛ dɔ din ni, Lawa a kion lɛ a màn sonboren kɛn Lawa wɔn lɛa, ǹ nə́ woo *Baali a dí nya ka bɛn nɛ.»

⁸Kii lɛ pɛ maǹ goo zɛnaa, ǹ koa kanaa Lawa a kion lɛ a kiɛnlɛ-a.

⁹Bɛ kio, ǹ nə́ pɛ Zeruzalɛmu laanka Zudaa gána din tumaa nɛ mà didie doamaa nɛ a nyin giɔ̀mɔ kɛ saraa Dɛnaa Lawa wɔ lɛa, Lawa a dí-nyali Muizu goã á da Izirayeli zaman mìi ni diə gole ne.

¹⁰Kiãn tumaa nɛ, ka zaman lɛ tumaa nɛ, ǹ doamaa bɛ́ ǹ màn mɛn da goo lɛ nɛ, maǹ die ne ka foo kɔɔ̃nbaa nɛ yǎa goo lɛ pã.

¹¹Ǹ bɛ́ ǹ nə́ woo kɔ Levii tɔrɔn la maǹ ga wɔrɔ lɛ-a ǹ nimi ka kii tɔ nɛ, ǹ nə́ woo yaa bɛ á mɔnaa á la yii ni. Ǹ nə́ tɔn kii a dí gii-nyali laanka Lawa a wúlu-bɔle a sii yɔrɔ-bɔle bii. Bɛa minin lɛn nə́ goo lɛ saa ǹ nə́ woo binyəə ǹ nə́ wusoo ǹ nə́ daa koa a bǎã nɛ. Maǹ zɛnɛɛ miɛ̃ baraa nɛ. Ǹ nə́ wɔrɔ gigiã sɔkɔn.

¹²Bɛ kio, min mɛnɛn bɛ́ Lawa a kion lɛ a dí lɛ la, kii laanka Zozadaa wɔrɔ lɛ kɔ bɛn la. Ǹ dinin lɛn man kɔlɔ-bɔlin laanka Lawa a kion lɛ zɛnaa wolen sarɛɛ. Maǹ gɔn dí-nyalin dɔn sarɛɛ, ǹ mɛnɛn bɛ́ fɔlɔ laanka zan dí doɛ̃, màn mɛn bɛ́ toɛ Lawa a kion lɛ nə n zɛnaa.

¹³Dí-nyalin lɛn nə́ ǹ dí giala kɔ. Ǹ dí doɛ̃ taman yii, dí lɛ tɔ wɔ. Maǹ Lawa a kion lɛ zɛnɛɛ a kɔnpɛ ka a lɛlɛ a golebaa laanka a kakabaa nɛ.

¹⁴Dín lɛn bɛ́ ǹ nə́ nya ǹ mɛn waáraa, dí-nyalin goledɛnan lɛn nə́ daa wɔrɔ gialakun lɛ kɔ kii laanka Zozadaa la. Gɔn dí-nyalin nə́ goã Lawa a kion lɛ a dí nya ǹ mànan zɛnɛɛ nɛ: Dí nya ǹ mànan manɛ, *wúlu màn lɛpiɛ̃ kɔ ǹ mànan nɛ, tàanan nɛ ka mànan nɛ sana laanka wɔrɔ lɛa. Zozadaa a yiikoonaabaa tumaa gɔ́ɔ̃ nɛ, Izirayeli minin man nə́ goã wúlu màn lɛpiɛ̃ koe Lawa a kion kɛ nɛ biikoo yii li.

¹⁵Zozadaa zizi kɔ á la yii ni. A bɛ́ giɛ̃ bɛ̀ a lɛ̀ paabiɛ ka pɔsɔɔ (130) nɛ.

¹⁶Ǹ nə́ bĩ kiin yala bǎã nɛ "Davida a kiwi". Taãnɛ, á sii sonbore zɛnaa Izirayeli zaman nɛ, Lawa nɛ ka Dɛnaa Lawa a kion kɛ nɛ.

¹⁷Lawa a wúlu-bɔle Zozadaa a gɛ̀ kio, Zudaa a kiãn nə́ daa Zoasi li ǹ nə́ kaa tán ǹ lɛ la a yɔrɔ-a. Kii nə́ n too kɔ ǹ doroon boon li.

¹⁸Izirayeli minin lɛn nə́ n la bɔ Lawa, ǹ digolon Lawa a kion kɛ ganaa kəni, ǹ nə́ gɔn zumiin laanka dì kooron guguru koe. Bɛa sã kɛ lɛ Lawa foo yoo taãn-taãnɛ Izirayeli minin laanka Zudaa minin paǹ li.

¹⁹Bɛ kio, Dɛnaa Lawa na a boo gii-dalin dia mà ǹ da boo da ǹ nɛ ǹ wusoo ǹ da asɛ li, sɛnɛ, min kɔn ba n too koe ǹ lon wa.

²⁰ Bɛ lɛ nɛ, Lawa Yiri gisĩ Lawa a wúlu-bɔle Zozadaa a nɛgiĩ Zakarii la. Zakarii golee lon zaman lɛ yɔrɔ-a á pɛ ǹ nɛ: — Ka n too kɔ Dɛnaa Lawa a da ǹ boon li: «Wáa na á baa ka a koe maa dí-pɛn kɛn lɛ wa? A là bɛ́ a ba ka-a wa. Ka bɛ́ ka n la bɔ ma ganaa, sisia kəni, ma dɔ n die n la boe ka ganaa.»

²¹Bɛ kio, zaman lɛ boo wɔ kɔn Zakarii ganaa, kii nə́ ǹ kaa a ganaa ǹ nə́ kɔlɔ kaã bɔ a ganaa Lawa a kion kɛa sumu-n á gã.

²²Kii Zoasi yiri bɔ ka bǐɛ̃ kɛ nɛ Zakarii ǹ di Zozadaa zɛnaa nɛ, á ǹ kaa a nɛ dɛ ganaa. Zakarii laan mà a n giɛ̃ á pɛ: «Ka bɛ́ sii mɛn zɛnɛɛ, Dɛnaa Lawa yii tá ka ganaa. Á re bɛa gɛ̀ dòo boe ka ganaa!»

²³Lɛ̀ a giala nyɔmɔɔ li, Siirii sɔraasin nə́ yoo Zoasi gialaa ka zia nɛ. Ǹ nə́ daa ǹ nə́ dɔ Zudaa gána nɛ Zeruzalɛmu kiwi. Ǹ nə́ gána lɛ a kiãn tumaa dɛ, ǹ nə́ ǹ bɔ zia la ǹ mànan kɛn dia ǹ kii la Damaasi.

²⁴Siirii minin lɛn dinin nə goã gigiã wa. Sɛnɛ, Dɛnaa Lawa Zudaa minin sɔraasi damata kɛ wɔ ǹ gɔn a giala, maǹ nə́ n la bɔ a ganaa, ǹ digolon Lawa ke. Bɛa yɔrɔ lɛ la, Siirii minin man Lawa a kiri kuri Zoasi la.

²⁵Siirii minin nə́ woo ǹ nə́ toa tán busu kaka gɔn. Bɛ lɛ nɛ, Zoasi a sɔraasin nə́ boo wɔ kɔn a ganaa ǹ tá Lawa a ì la. Ǹ nə́ bĩ "Davida a kiwi" sɛnɛ, n bie ǹ nə́ bĩ kiin yala-n wa.

²⁶Min mɛnɛn nə boo wɔ kɔn a ganaa, ǹ nə́ ke: Amɔnitin lɔ Simeyati a nɛgiĩ Zabaadii ni ka Moabu lɔ Simuriti a nɛgiĩ Zozabaadi ni.

²⁷Zoasi a nɛgiĩn tɔn nɛ, boon kɛn nɛ ǹ nə́ da a ganaa, Lawa a kion a zɛnaa ǹ boon ne, bɛn tumaa tá kiɛ̃ nɛ sɛ́wɔ kɛ nɛ boo diɛ kiin wɔ gɔn la. A nɛgiĩ Amasiya kii baa a bǎã nɛ.