Read Samo, Southern KZS2 26 Bible Online

KZS2 26 - Samo, Southern bible

KZS2 26

¹Oziasi bɛ́ á dɔ lɛ̀ fulusɔrɔ, Zudaa zaman tumaa koa kii lɛa ǹ di Amasiya bǎã nɛ.

²Ǹ di a gɛ̀ kio, a din na á wusoo á Elaati kiwi si á dɔ.

³Oziasi na á kiibaa yɛ bɛ̀ a lɛ̀ fulusɔrɔ nɛ. Á kii baa Zeruzalɛmu lɛ̀ posoorowenpaa. Ǹ dan nə boe Zeruzalɛmu, a tɔ n Zekolia.

⁴Sii mɛn bɛ́ siĩni Dɛnaa Lawa yii li, Oziasi na á bɛ zɛnaa ka ǹ di Amasiya bɛ́ lɔn ka te.

⁵Oziasi ga Lawa li Zakarii[2] a yiikoonaabaa tumaa waáraa, asɛ mɛn bɛ́ Lawa a sii-yɛn doɛ̃. A goã giɛ li biikoo mɛn tumaa li, Lawa toa a siin ni yɔrɔ yɛ.

⁶Oziasi woo zia baa Filisiti minin ganaa. Á Gaati laanka Yabneyeli ka Asidɔdi kiwin kungɔnɔn wuru. Á kiwi kɔsɔn dɔ Asidɔdi gána laanka Filisiti minin gánan tɛnɛn nɛ.

⁷Lawa daa a gu ganaa bɛ̀ a bɛ́ zia biɛ Filisiti minin ganaa ka Larabun ni, giã-n Guuru-Baali ka Mehuniti tɔrɔn nɛ.

⁸Amɔn tɔrɔn man nyin giɔ̀mɔ sarɛɛ la zia wɔ lɛa. Oziasi pàã yɛ parsiini, a tɔ bɔ yǎa Ezipti gèlè la.

⁹Oziasi gɔnda ǹ kionən dɔ Zeruzalɛmu, tamaa nɛ sɔnbɔraanɛ, gùrù ganaa ǹ kiɛnlɛ kɛ lalan, nyankɔrɔ basa kiɛnlɛ kɛ lalan ka kungɔnɔn wɔ kɔnlɛ ǹ bǎã kɛ nɛ gùrù yiɛ lɛa.

¹⁰Á gɔnda ǹ kionən dɔ diə gole gánan kɛn dɔn nɛ. Á mu kurəə ǹ yala gigiã fɔ̃, a giala, a tɔɔn man mɔnaa nɛ *Sefelaa a nyankɔrɔ lɛ kɛ nɛ, ka yìsi mu lɛ a bǎãn kɛn nɛ. A Buu-kɔsɔlen tan, a duvɛ̃ wuru dí-nyalin tan dí nyɛɛ tenenən mìi ni ka Karmɛli kele ne, a giala, tán dí n kɔɔ̃n a ganaa.

¹¹Oziasi a sɔraasin tan ǹ nə́ boe ziabaa la. Maǹ tatalɛɛ-n kɔn kuru lɛ yii li. Sɛ́wɔ-kiɛnli Yeyieli laanka sii yɔrɔ-bɔle Maseya nə ǹ nimii, a giala kii a sɔraasin goledɛnaa Anania na á ǹ da bɛa zɛnaa ganaa.

¹²Kɛdɛnan man bɛa zia-baali foo taãnaan lɛn mìi la. Maǹ min duu paa ka biɛsɔrɔ (2 600).

¹³Maǹ sɔraasi duu biɛsɔɔwensɔbaa ka biɛsooro (307 500) mìi la. Maǹ boe ziabaa la ka pàã nɛ ka foo tãbaa nɛ ǹ kii kanbaa a zɔ́ɔn ganaa.

¹⁴Kii Oziasi goóron zɛnaa, sɛmiɛ̃n nɛ, ziabaa ǹ bafolon ne, fɔlɔ dɔnkɛn nɛ, san nɛ, ka baragii kɔlɔn nɛ a sɔraasin wɔ lɛa.

¹⁵Oziasi gɔn dí-nyali yiridɛnaa goon da mansinin zɛnaa ganaa Zeruzalɛmu, ǹ nə́ ǹ kaa gɔnda ǹ kionən kɛn la ka kungɔn gùrù wɔ kɔnlɛn bǎãn kɛn nɛ. Maǹ boe la, ǹ kiɛ zũ ni ka kɔlɔ dadaran nɛ. Oziasi dɔmalɛ yɛ ǹ miã din da yɛ. Bɛ lɛ nɛ, á pàã yɛ taãn-taãnɛ, a tɔ bɔ bǎã yii ni.

¹⁶Sɛnɛ, a pàã taman yii, a nə́ n din gole kɔ, bɛ́ tɔn daa ka a mɛnaa nɛ. Á bɔlɔgoonbaãdɛnaa baa Dɛnaa Lawa, a Lawa nɛ. Ǹ kɔn pinaa, á wɔ Lawa a kion mà asɛ n màn gìĩ kɔɔ̃n tiɛ̃ màn gìĩ kɔɔ̃n tã ǹ bǎã kɛ nɛ.

¹⁷Lawa a wúlu-bɔle Azaria laanka Dɛnaa Lawa a wúlu-bɔle foo taãnaan pɔkiwisi wɔ Oziasi kio.

¹⁸ Ǹ nə́ n doa a nyɛɛnɛ, ǹ nə́ pɛ nɛ: «Wɔa kii, n dinmaa doamaa bie n màn gìĩ kɔɔ̃n kɔ Dɛnaa Lawa la wa. Lawa a wúlu-bɔlen kɛn Aarɔn tɔrɔn lɛa, ǹ nə ǹ mɛnɛn bɔ ǹ nə́ ǹ koa, bɛn dininsɔɔ̃nɔn nyan-di ni. Soo n nə n bɔ Lawa a kion kɛ nɛ! Sii baraa n ka kɛ nɛ n zɛnaa. Dɛnaa Lawa yɔrɔ-a, kɛ a nya ǹ dí sonbore lɛa wa.»

¹⁹Oziasi foo yoo Lawa a wúlu-bɔlen lɛn li, *wúlu màn donkolon lɛ na á gɔn. A din bǎã-n gɔrɔ, gɔ̀nɔn ki busu babaraa soo a nyanlɛ-a, Lawa a wúlu-bɔlen lɛn yii ni, Lawa a kion lɛ nɛ, màn gìĩ kɔɔ̃n tã ǹ *wúlu bɔ ǹ bǎã lɛ genli.

²⁰Lawa a wúlu-bɔlen kiã Azaria laanka Lawa a wúlu-bɔle gialakunun lɛn bɛ́ giɛ a ganaa, ǹ yii n gɔ̀nɔn ki busu babaraa lɛ ganaa soe a nyanlɛ-a. Ǹ nə́ loo fufuu. A dinmaa dɔ nə n nanaa á soo, a giala, Dɛnaa Lawa gɔn kũ.

²¹Kii Oziasi na á goã baàlaa lɛa miɛ̃ yǎa á gã. Gɔ̀nɔn ki busu babaraa lɛ taman yii, a doamaa nɛ a giã kion tiãlɛa. A kɔnbɔ a wusoo a da Dɛnaa Lawa a kion kɛ-n doo wa. A nɛgiĩ Zoatamu n kii kion lɛ a siin yɔrɔ boe, a n gána lɛ a zaman mìi la.

²²Oziasi a zɛnaa ǹ siin kɛn, a kũ a bibinaan ganaa a wo a giala nyɔmiɛ̃n yaa, Amɔsi a nɛgiĩ Izayii Lawa a boo gii-dali na á bɛn kiɛ̃.

²³ Oziasi bɛ́ á gã, ǹ nə́ bĩ kun ka ǹ digolon ne, kiin gere bĩ ǹ bǎã nɛ. Maǹ nə́ goã pii mà gɔ̀nɔn ki busu babaraa na a ganaa. A nɛgiĩ Zoatamu na á kii baa a bǎã nɛ.