Read Samo, Southern KZS2 30 Bible Online

KZS2 30 - Samo, Southern bible

KZS2 30

¹ Bɛa lɛ̀ kɛ lɛ-a, *kiɛ̃mala ǹ zɔ́n nə n zɛnaa a biikoo li wa. A giala Lawa a wúlu-bɔle gigiã nə n din *yoreen kɔ wa, zaman lɛ dɔ nə n sɔkɔn Zeruzalɛmu wa. Bɛ lɛ nɛ, kii Ezekiasi ni ka zaman nyɛɛnaandɛnan nɛ, Zeruzalɛmu a zaman tumaa nɛ, ǹ nə́ n sɔkɔn ǹ nə́ nyaa mà maǹ die kiɛ̃mala ǹ zɔ́n zɛnɛɛ lɛ̀ a mui a paabaa ǹ wɔ li. Bɛa sii lɛ goã siĩni kii yii li ka zaman lɛ nɛ. Ǹ nə́ golee li maǹ Izirayeli minin tumaa bii wɔ, a saa Bɛɛr-Sebaa ganaa gusin a lɛ̀gɔn la, a wo Dan yaa gɔsɛ a lɛ̀gɔn la, mà ǹ da Dɛnaa Lawa, Izirayeli a Lawa a kiɛ̃mala ǹ zɔ́n kɛ zɛnaa Zeruzalɛmu. Taãnɛ, min mɛnɛn bɛ́ tɔn zɛnɛɛ a zii li, ka a bɛ́ kiɛ-n lɔn, ǹ ba tɛ doo wa. Kii lɛ minin dia Izirayeli laanka Zudaa gána tumaa nɛ. Á sɛ́wɔ kiɛ̃ á dia Efrayimu laanka Manaasee tɔrɔn la, á lɛ dia min tumaa la mà ǹ da kiɛ̃mala ǹ zɔ́n zɛnaa Lawa a kion Zeruzalɛmu.

⁶Dia dí-a wolen lɛn nə́ woo Izirayeli ka Zudaa gánan nɛ ka sɛ́wɔn lɛn nɛ kii gɔn nɔɔ n la ka zaman nyɛɛnaandɛnan wɔ nɛ. Ká kii pɛ ǹ nɛ lɔn, ǹ nə́ pɛ kɛnɛn: «Izirayeli minin lɛn, kasɛn mɛnɛn nə n si Asiiriin kii a pàã la, ka wusoo ka da Dɛnaa Lawa li, Abrahamu, Izaaki ka Zakɔba a Lawa ke, á re wusii a da ka li.

⁷Ka nyan kɔ ka din laanka ka dɔɔ̃nɔn lɛn zɛnaa ǹ siin lɛ wa. Ǹ bɔlɔgoondɛnan baa Dɛnaa Lawa, ǹ digolon Lawa-n wa, á bɔ̀n da ǹ ganaa ka ka yii bɛ́ a ganaa lɔn.

⁸Kanna kəni, ka nyan nə n gòan dii ka kaa díin wɔ bɛ́ lɔn wa, ka n dinin kɔ Dɛnaa Lawa la, ka wusoo ka da Lawa a kion kɛ nɛ, á bɔ á koa a din wɔ lɛa duduu. Ka Dɛnaa Lawa kaa Lawa guguru kɔ, màn mɛn bɛ́ toɛ a na a foo-yoo baraa kɛ saa a bɔ ka la.

⁹Bɛ̀ ka wusoo ka daa Dɛnaa Lawa li, min mɛnɛn nə ka dɔɔ̃nɔn laanka kaa nɛgiĩn goa ǹ nə́ woo ǹ ne bɛ̀rɛbaa ǹ bǎã nɛ, ǹ makara á re boe ǹ ganaa, ǹ nə n gɔn bɔ ǹ ganaa, ǹ wusoo ǹ da gána kɛ nɛ. Dɛnaa Lawa n makaradɛnaa lɛa, a n foo basiɛ̃wole lɛa. Bɛ̀ ka wusoo ka daa a li, a ba re n yɔrɔ bɔyɛɛ a bɔ ka la wa.»

¹⁰Dia dí-a wolen lɛn nə́ woo Efrayimu laanka Manaasee gána nɛ, ǹ nə́ kiwin saa a giala-a gogoon ǹ nə́ bɔ ǹ nɛ, ǹ nə́ tɔn woo Zabulɔn gána nɛ. Sɛnɛ minin manə ǹ diɛ yaa lɛa, ǹ nə́ sɔ kiɛ ǹ la.

¹¹A da yaa minin tɛnɛn nə́ ǹ siɛ̃ dɔ̃ Asɛɛrɛ tɔrɔn bii, Manaasee laanka Zabulɔn wɔn nɛ, ǹ nə́ daa Zeruzalɛmu.

¹²Zudaa gána dɔ nɛ, Lawa sii zɛnaa a minin manɛ. Bɛ lɛ nɛ, ǹ nə́ lɛ kɔ, ǹ nə́ kii laanka a zaman nyɛɛnaandɛnan da ǹ boo kɛ sii bǎã goon ne, Dɛnaa Lawa nə ǹ mɛnɛn lɛn kɔ ǹ la.

¹³Lɛ̀ a mui paabaa ǹ wɔ li, min gigiã nə́ n sɔkɔn Zeruzalɛmu ǹ nə́ *yɔ bùbaã buuru zɔ́n zɛnɛɛ. Ǹ nə́ mɔnaa parsiini.

¹⁴Maǹ ná a giala kɔ dì wúlu bɔ ǹ bǎãn ziziɛ̃ ganaa kiwi lɛ nɛ. Da yon gìĩ kɔɔ̃n tã ǹ bǎãn kɛn, ǹ nə́ ǹ yii tumaa woɛ̃ ǹ nə́ woo kaa Sedrɔn a nyankɔrɔ lɛ kɛ nɛ.

¹⁵A din mui goon kɛ lɛ a lɛawaa fulusii, ǹ nə́ kiɛ̃mala ǹ zɔ́na sèren bɔlɔ kuru. Sìi goã Lawa wúlu-bɔlen laanka *Levii tɔrɔn gialaa, ǹ nə́ woo n dinin yoreen kɔ. Ǹ nə́ *wúlu màn tiɛ̃ kɔ Dɛnaa Lawa a kion kɛ nɛ.

¹⁶Ǹ nə́ giã ǹ baraabaraa a bǎã nɛ ka Lawa a min Muizu a dí-pɛn bɛ́ nyɛɛ lɔn. Tɔɔn mà ke wúlu màn lɛa, Levii tɔrɔn nə́ bɛ saa ǹ nə́ woo kɔ Lawa a wúlu-bɔlen la, ǹ nə́ kaa *wúlu bɔ ǹ bǎã lɛ la.

¹⁷Zaman lɛ bii, min gigiã nə n din yoreen kɔ wa. Bɛ lɛ nɛ, min mɛnɛn bɛ́ ǹ nə n dinin yoreen kɔ wa, Levii tɔrɔn nə́ bɛn bǎã saa, ǹ nə́ sère tenən bɔlɔ kuru màn mɛn bɛ́ toɛ ǹ *gɔ̀ bɔ ǹ ganaa Dɛnaa Lawa wɔ lɛa.

¹⁸Min gigiã, sanparɛ Efrayimu minin kɛn, Manaasee wɔn nɛ, Isakaara ka Zabulɔn wɔn nɛ, bɛn nə n dinin yoreen kɔ wa, sɛnɛ, ǹ nə́ kiɛ̃mala ǹ zɔ́n màn bii dɔn, a ná a bie kiɛ̃-n miɛ̃ dɔn landa sɛ́wɔ-n wa. Bɛ lɛ nɛ, Ezekiasi Lawa nyankɔ ǹ lɛa á pɛ: «Dɛnaa Lawa, nsɛ mɛn bɛ́ makara doɛ̃,

¹⁹min mɛn tumaa bɛ́ giɛ n li ka ǹ foo tumaa nɛ, ǹ sii baraa toa ǹ nɛ, nsɛ Dɛnaa Lawa wɔ digolon Lawa, haalɛ ta ǹ ba yoreen wa ka ǹ doamaa bɛ nɛ ǹ goã yoreen lɔn màn sonboren kɛn lɛa.»

²⁰Dɛnaa Lawa nə́ n too kɔ Ezekiasi lon, á zaman lɛ kirisibaa.

²¹A bɛ́ miɛ̃, lɛawaa sɔbaa gɔ́ɔ̃ nɛ, Izirayeli minin mɛnɛn bɛ́ Zeruzalɛmu, ǹ nə́ yɔ bùbaã buuru zɔ́n lɛ zɛnaa ka foo kɔɔ̃n nɛ. Lɛawaa tumaa li, Levii tɔrɔn lɛn laanka Lawa a wúlu-bɔlen man loe loe ǹ tá Dɛnaa Lawa tɔ boe ne ka sàn kɔ ǹ mànan nɛ, ǹ wuu n kaka.

²²Ezekiasi Levii tɔrɔn lɛn tumaa foo taã, a giala maǹ tá Dɛnaa Lawa a siin giala miɛ parasiini. Lɛawaa sɔbaa gɔ́ɔ̃ nɛ, minin man die kiɛ̃mala ǹ zɔ́n lɛ a mànbii. Maǹ barka da Lawa nɛ ǹ wúlu mànan koe, ǹ nə́ loe loe Dɛnaa Lawa, ǹ digolon Lawa tɔ boe ne.

²³Zaman lɛ tumaa golee li mà ǹ màn da zɔ́n lɛ li yǎa lɛawaa sɔbaa kɔsɔ doo, ǹ nə́ zɛnaa ka foo kɔɔ̃n nɛ.

²⁴Bɛ lɛ nɛ, Zudaan kii Ezekiasi dii gɔ̀lɔ̀ duu goon (1 000) ka sère duu bsɔbaa (7 000) kɔ zaman lɛ la. Kiãn nə́ dii gɔ̀lɔ̀ duugoon kɔ ǹ la, ka sère duu fù (10 000) ni. Ka bɛ dɔ din ni, Lawa a wúlu-bɔle gigiã nə́ n din yoreen kɔ.

²⁵Min tumaa n nyɛnyɛɛ la. Zudaa minin ni, Lawa a wúlu-bɔlen ne, Levii tɔrɔn nɛ, min mɛnɛn nə bɔ Izirayeli gána nɛ kɔnlɛ ka tiin mɛnɛn nə bɔ Izirayeli hinlaa ǹ nə́ giã-n Zudaa gána nɛ.

²⁶Zeruzalɛmu minin foo kɔɔ̃n kɔ á la yii ni. Taãnɛ, a kũ Davida a nɛgiĩ Izirayelin kii Salomɔn a waáraa ganaa, Izirayeli minin nə tɔn zɔ́n kɛ miã zɛnaa Zeruzalɛmu kiwi wa.

²⁷Lawa a wúlu-bɔlen mɛnɛn bɛ́ Levii tɔrɔn lɛa bɛn nə́ tɔn yoo kəni, ǹ nə́ barka da zaman lɛ-a. Ǹ Lawa nyankɔ dii lon, Lawa sonbore bɛ́ giã bǎã mɛn nɛ, á ǹ lɛ si.