Read Samo, Southern KZS2 31 Bible Online

KZS2 31 - Samo, Southern bible

KZS2 31

¹Zɔ́n lɛ bɛ́ á nya, Izirayeli minin mɛnɛn tumaa goã ǹ tan, ǹ tumaa woo Zudaa kiwin ni. Ǹ nə́ tíĩ zumiin yiyiɛ, dì gɔnɔn kɛn, ǹ nə́ bɛn kukuru ǹ nə́ ǹ dìn tumaa ziziɛ̃ ka ǹ wúlu bɔ ǹ bǎãn nɛ. Ǹ nə́ zɛnaa miɛ̃ dɔn Zudaa laanka Bɛnzamɛn gána nɛ, ka Efrayimu laanka Manaasee gána dɔ nɛ. Ǹ bɛ́ ǹ nə ǹ tumaa ziziɛ̃, bɛ kio Izirayeli minin nə́ n bɔyaa ǹ nə́ woo ǹ kiwin ni, didie woo piɛ.

²Ezekiasi wusoo á Lawa a wúlu-bɔlen laanka *Levii tɔrɔn kurun koa. Á didie tumaa a nya ǹ dí kɔ la, a kuru gɔ́ɔ̃ nɛ: Dɛnaa Lawa bɛ́ giã-n bǎã mɛn nɛ, Lawa a wúlu-bɔlen laanka Levii tɔrɔn man *wúlu màn tiɛ,̃ ǹ nə́ zɔɔ da Lawa nɛ ǹ wúlu màn koe walan. Ǹ doamaa nɛ dɔn ǹ nə́ dí nyɛɛ Dɛnaa Lawa nɛ, ǹ nə́ barka diɛ nɛ, ǹ nə́ loe loe ǹ ná a tɔ boe ne Lawa a kion lɛ a kiɛnlɛ-a.

³ Kii nə́ n gɔn màn paǹ goon kɔ wúlu màn lɛpiɛ̃n lɛa, baayɛlɛ wɔn nɛ ka wasamiɛ̃n wɔn nɛ, *susu ǹ pii pinaa wɔn nɛ, mui dii pinaa wɔn nɛ ka zɔ́n kɔsɔn kɛn wɔ nɛ, ka Dɛnaa a landa sɛ́wɔ bɛ́ nyɛɛ lɔn.

⁴ Kii pɛ zaman tumaa nɛ, Zeruzalɛmu minin tumaa nɛ, mà màn mɛn bɛ́ Lawa a wúlu-bɔlen laanka Levii tɔrɔn gii lɛa mà ǹ bɛ kɔ ǹ la. Ka bɛa yɔrɔ lɛ nɛ, ǹ tá re koe Dɛnaa Lawa a dí-pɛn kɛn lɛ ka bɔlɔgoondɛnaabaa nɛ.

⁵Ǹ bɛ́ ǹ nə́ bɛa da ǹ boo kɛ ma lɔn gɔrɔ, Izirayeli minin lɛn nə́ daa ka tán kɔsiɛ̃ mànan lɛ binaa ne mɔnaa nɛ: *Belee ne, duvɛ̃ nɛ, nyɔɔ nɛ, zoo nyɔɔ nɛ ka ǹ wuru màn tɔrɔ kɔsɔn nɛ. Ǹ nə́ daa dɔn ka ǹ kaa-piɛ màn tumaa a fùbaa ǹ wɔ nɛ.

⁶Izirayeli laanka Zudaa minin mɛnɛn bɛ́ giã nɛ Zudaa kiwin ni, bɛn nə́ daa ka ǹ tɔɔ dadaran laanka ǹ tɔɔ bibisinin fùbaa ǹ wɔ nɛ. Ǹ nə́ wusoo ǹ nə́ daa ka Dɛnaa Lawa, ǹ Lawa gɔ ǹ màn a fùbaa ǹ wɔ nɛ. Bɛa bǐɛ̃ kɛ lɛ tumaa, ǹ nə́ da kɔn la wɔlɔ gigiã nɛ kɔn li.

⁷Minin ná a da kɔn giala kɔ lɛ̀ a mui sɔɔbaa ǹ wɔ li, ǹ nə́ tɔn nya mui a sɔbaabaa ǹ wɔ li.

⁸Ezekiasi laanka a zaman nyɛɛnaadɛnan bɛ́ ǹ nə́ bɛa bǐɛ̃n kɛn yɛ, ǹ nə́ barka da Dɛnaa Lawa laanka a zaman Izirayeli ni.

⁹Kii lɛ nɔ̀n da Lawa a wúlu-bɔlen la ka Levii tɔrɔn nɛ, bɛa màn da kɔn la lɛn paǹ li.

¹⁰Lawa a wúlu-bɔlen kiã Azaria ke Sadɔki a kion min lɛa bɛ ná a lɛ si kɛnɛn: «Minin dinin ná a giala kɔ ǹ tá die ka ǹ kaa-piɛ màn nɛ Dɛnaa Lawa a kion kɛn lɔn, wɔ́ màn bii gigiã, màn-bii lɛ din la yii ni, a giala Dɛnaa Lawa barka da a zaman lɛ ganaa. Màn da kɔn la mɛnɛn bɛ́ kànaa ke, màn-bii giala nɛ á goã.»

¹¹Ezekiasi pɛ maǹ kionən yɔrɔ bɔ Lawa a kion lɛ gɛnli. Ǹ bɛ́ ǹ ná a yɔrɔ bɔ ǹ nə́ nya,

¹²ǹ nə́ daa ka mangɔ mànan kɛn nɛ ka bɔlɔgoondɛnaabaa nɛ, mànan fùbaa ǹ wɔn nɛ kɔnlɛ ka màn kɔsɔn kɛn nɛ Dɛnaa Lawa wɔ lɛa. Levii tɔrɔ Konania n bɛa mànan lɛn tumaa mìi la, ǹ dɔɔ̃n Simeyii nə n ti a ganaa.

¹³Kii Ezekiasi laanka Azaria mɛn bɛ́ Lawa a kion lɛ mìi la, bɛn man nə́ Konania laanka Simeyii da màn-lɛduə̃lin kɛn mìi la: Yeyieli ni, Azaria nɛ, Nahati ni, Azayeli ni, Yerimɔti ni, Zozabaadi ni, Eliyeli ni, Ismakia nɛ, Mahati ni, ka Benaazaa nɛ.

¹⁴Imunaa a nɛgiĩ Koree ke Levii tɔrɔ lɛa, bɛ n lɛ̀ giala kiɛnlɛ kɛa lɛduə̃li lɛa. Foo sii mànan kɛn ǹ tá ǹ koe Dɛnaa Lawa la, a din ni bɛn mìi la. Ǹ mànan mɛnɛn kɔ Dɛnaa Lawa wɔ lɛa, ka màn sonboren kɛn nɛ, a din nə bɛn gii.

¹⁵Lawa a wúlu-bɔlen kiwin ni, a kialandɛnan nə́ ke: Edɛn ni Miniamini ni, Yesuwa nɛ, Semayia nɛ, Amariya nɛ ka Sekania nɛ. Bɛa minin kɛn doamaa nɛ ǹ màn-bii gii Lawa a wúlu-bɔlen kɔsɔn kɛn manɛ ka yɔrɔ sonbore ne, a tenən ne ka a zizin ni, ǹ kuru lɛ yii li.

¹⁶Ǹ min mɛnɛn nimi a saa lɛ̀ sɔɔ ganaa a wo lon, maǹ bɛn tumaa gii boe. Min mɛnɛn dɔn bɛ́ woe Lawa a kion baraa nɛ, ǹ nə́ Dɛnaa Lawa a dí nyɛɛ bɛ̀ boboe dɔ ǹ ganaa ǹ kuru ni, maǹ bɛn dɔn goe.

¹⁷Lawa a wúlu-bɔlen lɛn tɔn man kiɛ̃ nɛ ǹ kion sumu lɛ yii li. Levii tɔrɔn kɛn tɔn man nə n kiɛ̃ a saa lɛ̀ fuə ganaa a wo lon, ǹ nya ǹ dí wɔ paǹ li ka ǹ kuru ni.

¹⁸Ǹ tɔn man sɛ́wɔ la ka ǹ kion minin tumaa nɛ, ǹ nɛnyaanan nɛ, ǹ lɔn nɛ, nɛgiĩn ni ka nɛlɔn nɛ, a giala maǹ nə́ n dinin kɔ ka bɔlɔgoondɛnaabaa nɛ, Dɛnaa Lawa wɔ lɛa.

¹⁹Lawa a wúlu-bɔlen kɛn Aarɔn tɔrɔn lɛa, giã-n don kion, mɔrɛɛ nɛ Lawa a wúlu-bɔlen kiwin ganaa, don kionən lɛn gogoonmaa nɛ ǹ nə́ minin bɔ, ǹ nə́ màn-bii gii giĩn manɛ, Lawa a wúlu-bɔlen laanka Levii tɔrɔn bii, ǹ mɛnɛn tɔ bɛ́ sɛ́wɔ la.

²⁰Ezekiasi sii mɛn zɛnaa Zudaa gána tumaa nɛ, a din ni ka kɛ nɛ. Á bɔlɔgoondɛnaa baa. Sii mɛn bɛ́ siĩni, a n pepere á bɛ zɛnaa Dɛnaa Lawa, a Lawa yɔrɔ-a.

²¹Á dí gigiã nya Dɛnaa Lawa a kion kɛa dín lɛa ka dí-pɛn laanka gɔn waa ǹ boon kɛn kɔ ma lɛ a lɛa. A bɛ́ á zɛnaa miɛ̃, á ga Dɛnaa Lawa li ka a foo tumaa nɛ, a sii tumaa yɔrɔ yɛ.