Read Samo, Southern KZS2 36 Bible Online

KZS2 36 - Samo, Southern bible

KZS2 36

¹Zudaa minin nə́ Zoziasi a nɛgiĩ Zoakazi bɔ ǹ nə́ koa kii lɛa Zeruzalɛmu ǹ di bǎã nɛ.

²Zoakazi na á kiibaa yɛ bɛ̀ a lɛ̀ fuəwensɔɔ nɛ. Á kii baa Zeruzalɛmu mui sɔɔ.

³Eziptin kii Nekoo ná a kiibaa si la Zeruzalɛmu. Á nyin giɔ̀mɔ saraa da gána lɛ a minin mìi ni, sana kilo pɔsɔɔ ka wɔrɔ tɔnɔ sɔɔ.

⁴ Bɛ kio, Eziptin kii Zoakazi n dɔɔ̃n Eliyakimu bɔ á koa kii lɛa Zeruzalɛmu laanka Zudaa gána mìi la. A ná a tɔ bɔyaa, á Zoakimubaa kɔ a ganaa. Ǹ dɔɔ̃n Zoakazi ke, Nekoo woo ka bɛ nɛ Ezipti gána nɛ.

⁵ Zoakimu kiibaa yɛ bɛ̀ a lɛ̀ fuəwensooro ne. Á kii baa Zeruzalɛmu lɛ̀ fulu goon. Á sii bɔnɛɛ zɛnaa Dɛnaa Lawa, a Lawa yii li.

⁶ Baabiloniin kii Nebukadenezɔɔrɔ daa zia baa a ganaa, á yii ka zan zɔrɔkan nɛ á woo ne *Baabilonii.

⁷Á Dɛnaa Lawa a kion mànan tɛnɛn goa á woo ǹ kaa a kii kion Baabilonii.

⁸Zoakimu a nya ǹ dí gialakunun kɛn tá kiɛ̃ nɛ Izirayeli laanka Zudaan kiin sɛ́wɔ nɛ. A sii bɔbɔnɛɛ mɛn yii zɛnaa ka siin mɛnɛn nə yɛ, bɛn tá kiɛ̃ nɛ bɛa sɛ́wɔ lɛ nɛ. A nɛgiĩ Zoakini na á kii baa a bǎã nɛ.

⁹Zoakini na á kiibaa yɛ bɛ̀ a lɛ̀ kiwisi ni. Á kii baa Zeruzalɛmu mui sɔɔ ka lɛawaa fù. Á sii bɔnɛɛ zɛnaa Dɛnaa Lawa yii li.

¹⁰ Lɛ̀ a giala kɔ waáraa, Nebukadenezɔɔrɔ minin dia die Zoakini kuĩ woe ne Baabilonii kɔnlɛ ka Dɛnaa Lawa a kion màn sonboren kɛn nɛ. Á Zoakini n dɔɔ̃n Sedekiasi bɔ á koa kii lɛa Zeruzalɛmu laanka Zudaa.

¹¹ Sedekiasi kiibaa yɛ bɛ̀ a lɛ̀ fuəwengoon ne. Á kii baa Zeruzalɛmu lɛ̀ fulugoon.

¹²Á sii bɔnɛɛ zɛnaa Dɛna Lawa, a Lawa yii li. Á n piã ka din gisiĩ ni Lawa a boo gii-dali Zeremii yɔrɔ-a, ke boo diɛ Dɛnaa Lawa tɔ nɛ.

¹³ Kii Nebukadenezɔɔrɔ da liɛ wɔ ganaa ka Lawa tɔ nɛ. Sɛnɛ, Sedekiasi nə́ n gòãn dii a ganaa. A n too kɔ a lon wa, á n gɔ́ɔ̃ tii, a n bɔyaa á daa Dɛnaa Lawa, Izirayeli a Lawa li wa.

¹⁴Ka bɛ dɔ nɛ, Lawa a wúlu-bɔlen nyɛɛnaandɛnan laanka zaman tumaa nə́ n bɔyaa ǹ nə́ bɔlɔgoonbaãdɛnan baa Lawa ganaa. Maǹ tɔrɔ kɔsɔn sii bɔbɔnɛɛn lɛn zoɛ̃. Lawa a kion ke Dɛnaa Lawa wɔ lɛa, Zeruzalɛmu, ǹ nə́ bɛ gɔgɔrɛ kɔ.

¹⁵Dɛnaa Lawa, ǹ digolon Lawa á nɛn bɛ̀ a na a dia dí-a wolen dia ǹ la biikoo tɛn li. Taãn nɛ, Lawa a kion lɛ laanka a zaman lɛ makara n boe Dɛnaa Lawa ganaa.

¹⁶Sɛnɛ, Izirayeli minin lɛn man nə́ goã yaa we Lawa a dia dí-a wolen lɛn ganaa, ǹ ba Lawa a boon kɛn diɛ sii li wa, ǹ nə́ Lawa a boo gii-dalin foo saa. Bɛ lɛ nɛ, Dɛnaa Lawa a foo-yoo gole kɛ nə́ n sawaa zaman lɛ la, ǹ nə́ ǹ ba boe sii kɔn la ǹ zɛnaa wa.

¹⁷ Dɛnaa Lawa Baabiloniin kii da gána lɛ ganaa, á woo a zia baa. Bɛa kii lɛ sɔraasin dɛ yǎa Lawa a kion. Min kɔn makara bie boe a ganaa wa: tɔntɔraa tenən ne, nɛlɔ tenən ne, min yii fuliin ni, ka min zizin ni. Lawa nə́ ǹ tumaa wɔ a gɔn.

¹⁸Á Lawa a kion lɛ a dí nya ǹ mànan tumaa goa á woo ǹ ne Baabilonii, a bɔnboɛɛnɛn ne, a dadaran nɛ, a gɔn mànan tumaa nɛ, kii gɔn mànan nɛ ka a gána nyɛɛnaandɛnan wɔn nɛ.

¹⁹ Baabilonii minin nə́ tɛ da Lawa a kion lɛ ganaa, ǹ nə́ Zeruzalɛmu a kungɔn wuru, ǹ nə́ tɛ kaa kii kionən lɛn tumaa ganaa kɔnlɛ kaa màn giɔ̀mɔ kakaa din tumaa nɛ.

²⁰Gɔya sa bɛ́ á min mɛnɛn tumaa kaa bii, ǹ nə́ bɛn goa ǹ nə́ woo ǹ ne Baabilonii. Bɛn man a din laanka a nɛgiĩn bɛ̀rɛn lɛa, yǎa Pɛrsin kii daa pàã saa.

²¹ Dɛnaa Lawa goã á boo mɛn da Zeremii ni, mà a pɛ, bɛa yɔrɔ yɛ n ka kɛ nɛ: «Gána lɛ á re n toɛ walan lɛ̀ pɔsɔbaa, yǎa gána lɛ a susu ǹ lɛwaan lɛ piɛ̃, susui biikoo mɛn bɛ́ ǹ kɔ a zii lɛ wa, bɛ lɛ dòo n ka kɛ nɛ.»

²²Pɛrsin kii Siirusu a kiibaa lɛ̀ bibinaa li, Dɛnaa Lawa goã á boo mɛn wɔ Zeremii lɛ-n, a n li bɛ nə n zɛnaa. Á tɔn Siirusu yiri bũ mà a sɛ́wɔn kɛn nyaa gána lɛ tumaa nɛ. Siirusu bɛa boon lɛn pɛ gána lɛ tumaa nɛ, á baa sɛ́wɔ-kiɛ̃ lɛa dɔn dinin á dia:

²³ — Pɛrsin kii Siirusu a da ǹ boo á ke: «Dɛnaa Lawa, lon a Lawa kanaa gánan tumaa kaa ma pàã giulun, á pɛ ma nɛ mà ma kion dɔ asɛ wɔ lɛa Zeruzalɛmu, Zudaa gána nɛ. Min mɛn tumaa bɛ́ kun ka nɛ, Lawa a zaman lɛa, a Lawa, Dɛnaa Lawa die a goã kun ni, a n bɔyaa a da Zeruzalɛmu!»