Read Samo, Southern KZS2 7 Bible Online

KZS2 7 - Samo, Southern bible

KZS2 7

¹ Bɛ kio, Salomɔn bɛ́ á Lawa nyankɔ á nya, tɛ bɔ lon á daa wúlu màn tiɛ̃n laanka wúlu mànan lɛn kũ. Dɛnaa Lawa daa Lawa a kion lɛ pã ka a gugurubaa nɛ.

²Lawa a wúlu-bɔlen lɛn ba we Lawa a kion lɛ n doɛ̃ wa, a giala, Dɛnaa Lawa pã ka a gugurubaa nɛ.

³ Izirayeli minin tumaa tɛ lɛ yɛ boe lon gisĩ ka Dɛnaa Lawa a gugurubaa kɛ nɛ, Lawa a kion lɛ la. Ǹ nə́ n mìi kuməə ǹ nə́ n nyanlɛ doa tán, ǹ nə́ Lawa tɔ laakalaa ǹ loe loe ǹ nə́ pii: «Hiĩ, á bǐɛ̃ biɛ, a minin narɛɛ n duduu wɔ lɛa!»

⁴Kii laanka zaman lɛ wúlu mànan kɔ Dɛnaa Lawa tɔ bɔ ǹ wɔ lɛa.

⁵Kii Salomɔn wúlu bɔ tɔɔ dadara duu fuəwenpaa nɛ (22 000) ka tɔɔ bisin duu paabiɛ ka fuə (120 000) ne. Kii laanka Izirayeli zaman tumaa Lawa a kion lɛ kɔ Lawa la ka yɔrɔ mɛn nɛ, á ke.

⁶Lawa a wúlu-bɔlen manə ǹ bǎã nɛ, *Levii tɔrɔn dɔn nɛ ka sàn kɔ ǹ mànan kɛn nɛ Lawa wɔn lɛa, Davida nə́ ǹ zɛnaa Lawa tɔ bɔ á lɛa ǹ nə́ loe siɛ nɛ: «Hiĩ, a minin narɛɛ n duduu wɔ lɛa.» Ǹ yɔrɔ-a, Lawa a wúlu-bɔlen man bɛn pii zaman lɛ tumaa n golee-n lon.

⁷Banbaran mɛn lɛ bɛ́ Dɛnaa Lawa a kion lɛ nyɛɛnɛ, a sumu fúlu bii, kii Salomɔn bɛ dɔ *yoreen kɔ *wúlu bɔ ǹ bǎã lɛa. Bɛa bǎã lɛ nɛ á wúlu mànan tã a nɛ, ka zɔ́ɔ da Lawa nɛ ǹ wúlu mànan nyɔɔ nɛ; a na á bɛ zɛnaa miɛ̃, a giala a wúlu bɔ ǹ bǎã mɛn zɛnaa zan lɛa, bɛ́ goã kiɛɛrɛ á la yii ni *wúlu màn tiɛ̃n lɛn laanka Lawa gɔ ǹ mànan lɛn ganaa ka zɔɔ da Lawa nɛ ǹ wúlu mànan lɛn nyɔɔ nɛ.

⁸Salomɔn laanka Izirayeli minin tumaa bɛa zɔ́n lɛ zɛnaa kun bɛa biikoo lɛ li lɛawaa sɔbaa. Ǹ nə́ goã zaman gole lɛa, ǹ nə́ bɔ gána lɛ paǹ tumaa ganaa, ǹ nə́ daa n sɔkɔn. A n siɛ Lebo-Amaati kiwi ganaa, gɔsɛ a lɛ̀gɔn la a da Ezipti a lɛ̀giala gɔn la tà kɛ yaa, gusin a lɛ̀gɔn la.

⁹A lɛawaa kiwisibaa ǹ wɔ pinaa, zɔ́n gole na a tan a giala Izirayeli minin lɛn man nə́ wúlu bɔ ǹ bǎã yoreen kɔ ǹ zɔ́n zɛnaa lɛawaa sɔbaa, ǹ nə́ zɔ́n zɛnaa lɛawaa sɔbaa.

¹⁰Bɛ kio, lɛ̀ a mui sɔbaabaa ǹ wɔ a lɛawaa fuəwensɔɔ, kii nə n gɔn bɔ ǹ ganaa ka nyɛnyɛɛ nɛ ǹ foo piɛ̃, ǹ nə́ woo piɛ. Ǹ foo n kɔɔ̃nɛ, a giala mà Lawa bǐɛ̃ zɛnaa Davida a nɛ Salomɔn nɛ ka a zaman Izirayeli ni.

¹¹Kii Salomɔn Dɛnaa Lawa kion dɔ á nya, ka a din gɔn tɔ́ kii kion nɛ. Màn mɛn tumaa a zɛnaa goã a yiri ni kion màn paan kɛn lɛn wɔ paǹ li, ǹ tumaa yɔrɔ yɛ.

¹²Bɛ kio, Dɛnaa Lawa nə́ n din nyaa-n tèlòn, á pɛ nɛ: — Má n nyankɔ lɛ ma, ma din nə má bǎã kɛ bɔ wúlu bɔ ǹ kion lɛa.

¹³Kɔntan, ǹ kɔn pinaa má a re lɛ̀ gere koe, la ná a ba kiɛ doo wa. Ma á boe la ma zii kɔ bisinin la máa ǹ kaa gána a tán kɔsiɛ̃ màn tumaa sɔ̃ lenlen, hinlaa doo ma piɛ̃ busu dia maa zaman la.

¹⁴Maa zaman lɛ, ǹ mɛn lɛ bɛ́ má n tɔ da la, bɛ̀ á n din gisĩ má yɔrɔ-a, á ma nyankɔ, bɛ̀ á n gɔn bɔ a sii bɔbɔnɛɛ kɛ ganaa á ga ma li, ka bɛ nɛ, masɛ, lon sɔsɔɔ kɛ nɛ, ma á re n too koe a lon, ma a sii baraan toa nɛ, ma a gána a kɛbɔlɔn kɛn zɛnaa.

¹⁵A kũ kanna ganaa, ma nə n yii buĩ. Lawa nyankɔ mɛn tumaa bɛ́ re n woe Lawa a kion kɛ nɛ, ma á re n too koe li sɔnbɔraanɛ.

¹⁶Ma din ni má bɔ má koa a gɔrɔn maa wɔ lɛa, máa ma á re goɛ̃ ma tan a nɛ bii biikoo tumaa li duduu. Ma á re giɛ a walan biikoo tumaa li ka kɔn-narɛɛ gole ne.

¹⁷Nsɛ Salomɔn, bɛ̀ ń tɔ wɔ ma yɔrɔ-a ka ń di Davida goã zɛnɛɛ lɔn, man gɔn waa n nɛ ka sii mɛn tumaa nɛ, bɛ̀ ń bɛn zɛnaa, ń maa landa boon laanka maa sii yɔrɔ bɔ ǹ boon kɛn tamaa,

¹⁸ bɛa biikoo li, man die barka we n pàã lɛ nɛ Izirayeli minin kiibaa lɛ la, ka ma goã má pɛ ń di Davida lɛ-n lɔn, máa a min ba re nyaabiɛ Izirayeli minin kiibaa lɛ la wa.

¹⁹Sɛnɛ bɛ̀ ka n piã ka masɛ nɛ, ma gɔn waa ǹ boon mɛnɛn laanka landa boon mɛnɛn kɔ ka la bɛ̀ ka ǹ tamaa wa, bɛ̀ ka woo dí nya guguru kɔ ǹ mànan kɔsɔn manɛ, bɛ̀ ka kaa tán bɛn giulun,

²⁰bɛa biikoo li kəni, man die ka papaɛ̃ ma ka bɔ tán kɛ la, má kɔ ka la. Kion mɛn dɔ bɛ́ má ma din tɔ da la, ma á re n la boe bɛ dɔ ganaa a susuu da ǹ màn baa, a yaa da ǹ màn baa tɔrɔn tumaa gɔn.

²¹Lawa a kion kɛ laanka a siĩnbaa kɛ nɛ, á re kɛ bɔlɔ biɛ, min woo min tá re kiɛ̃ a li, ǹ dɛnaa tá re n kaãbiɛ, a n mìi papasa, a n toa: «Wàa na á toa Dɛnaa Lawa gána kɛ laanka Lawa a kion kɛ baa kɛnɛn?»

²²Minin tá re a lɛ sii kɛnɛn: «A giala, maǹ nə́ ǹ Dɛnaa Lawa, ǹ digolon Lawa lɛ toa walan, ǹ mɛn lɛ bɛ́ á ǹ waa Ezipti gána nɛ á soo ǹ ne. Maǹ nə́ n paraa guguru kɔ ǹ mànan kɔsɔn ganaa ǹ nə́ dí nya ǹ nɛ, ǹ nə́ ǹ guguru kɔ. Bɛ lɛ nɛ, Dɛnaa Lawa koe kɛ tumaa da ǹ mìi ni.»