Read Samo, Southern KZS2 8 Bible Online

KZS2 8 - Samo, Southern bible

KZS2 8

¹Lɛ̀ fuə gɔ́ɔ̃ nɛ, Salomɔn Lawa a kion dɔ á nya Dɛnaa Lawa wɔ lɛa ka a dinmaa a kii kion ne.

²Tiirin kii Uramu kiwi mɛnɛn kɔ la, á wusoo á bɛn dɔ. Á Izirayeli tɔrɔn kaa bɛa kiwin kɛn lɛn nɛ.

³Bɛ kio, á woo zia baa Amaati-Sobaa kiwi ganaa á kũ.

⁴Á kiwin dɔ Amaati gána nɛ, a màn-bii tamaa ǹ bǎãn lɛa. Salomɔn wusoo á bɛa kiwin kɛn dɔ, ka Tadmɔɔrɔ kiwi ni, diə gole bǎã kɛ nɛ.

⁵Bɛti-Ɔrɔn mɛn bɛ́ lon li ka Bɛti-Ɔrɔn mɛn bɛ́ tán li, á bɛn dɔ doo. Kiwin manɛ ǹ yiri nə n dinin li, kungɔn nə́ ǹ lɛnpɛnɛ, a kiɛnlɛn nə́ n soɛ doɛ̃ kaka ka bàbàlan nɛ.

⁶Á wusoo doo á Baalati kiwi dɔ ka kiwi mɛn tumaa bɛ́ á màn-bii koa ǹ nɛ, a nà a ziabaa ǹ wotoron koɛ a nɛ ka a sùin ni. Salomɔn nə́ n foo sii màn tumaa dɔ Zeruzalɛmu kiwi, Liban gána kɛ nɛ, ka gána mɛn tumaa bɛ́ a pàã gɔ́ɔ̃ nɛ.

⁷Amɔɔrɔ tɔrɔn nɛ, Ɛti tɔrɔn nɛ, Perɛzi minin ni, tɔrɔn kɛn ǹ nə́ bíi Evitin, Zebuzu minin ni, ǹsɛn mɛnɛn nə́ ke ǹ ba Izirayeli tɔrɔn lɛa wa, ǹ tɛnɛn yii goã koo gána lɛ nɛ.

⁸Ǹ yɛ ǹ nɛnyaanan mɛnɛn bɛ́ ǹ nə́ goã gána lɛ nɛ, ǹ kio, Izirayeli minin lɛn nə boo la ǹ nə́ ǹ dɛ, ǹ nə́ ǹ nya wa, Salomɔn na á goã bɛn lɛn boe, bɛ̀ a ǹ kaa pàã dí ganaa. Ǹ tá tɔn walan haalɛ pelo.

⁹Sɛnɛ Salomɔn Izirayeli minin lɛn kɔn da pàã dí ganaa wa. A giala ǹsɛn man nə́ goã zia nɛn lɛa, zia wotoron laanka sùin da baa-a wolen mìi la.

¹⁰Gánadɛnan man giĩ biɛpaa posooro (250) Salomɔn na á ǹsɛn lɛn kaa zaman mìi la.

¹¹Salomɔn ná a lɔ, *Faarahɔn a nɛlɔ kɛ bɔ "Davida a kiwi", á wo da kii kion kɛ nɛ á dɔ a wɔ lɛa. Salomɔn tɔ́n pɛ: «Maa lɔ doamaa bie a giã Davida, Izirayelin kii a kiwi wa. A giala, bɛ̀ ǹ nə́ Dɛnaa Lawa a goo sonbore kɛ koakionən mɛnɛn nɛ, maǹ kion sonboren lɛa.»

¹²Salomɔn tɔ́n *wúlu màn tiɛ̃n kɔ Dɛnaa Lawa la *wúlu bɔ ǹ bǎã kɛ lalan á dɔ Dɛnaa Lawa wɔ lɛa, kion kɛa wɔ ǹ kiɛnlɛ yɔrɔ-a.

¹³ Ka Muizu bɛ́ á baraabaraa a wúlu bɔ yɔrɔ nyaa ǹ nɛ lɔn, á wúlu mànan kɔ susu ǹ piin pinaa, mui diin lɛawaa bibinaan pinaa, ka lɛ̀ a zɔ́n dadaraa sɔɔn kɛn nɛ: *yɔ bùbaã buuru zɔ́n, kaa-piɛ ǹ zɔ́n, ka *giã siã giulun zɔ́n.

¹⁴A kɔnpɛ ka ǹ di Davida a gɔn waa ǹ boon ne, Salomɔn Lawa a wúlu-bɔlen kurun kɛn kaa ǹ dí lɛ la. Á *Levii tɔrɔn dɔn koa, maǹ loe lɔ ǹ Dɛnaa Lawa tɔ́ bɔ nɛ baraabaraa, ǹ nə́ n dɔ Lawa a wúlu-bɔlen kɛn lɛ ǹ dí nyɛɛ gɔ́ɔ̃ nɛ. Kiɛnlɛ-lɛduə̃lin kurun kɛn kiɛnlɛ gogoonmaa lɛduĩ, á bɛn dɔn kaa ǹ dí lɛ la. Lawa a min Davida na á bɛa dí-pɛn lɛn kɔ.

¹⁵Maǹ koe bɛa dí-pɛn lɛn lɛ bǎã tumaa nɛ, Lawa a wúlu-bɔlen wɔ paǹ li, Levii tɔrɔn nɛ, ka Lawa a kion gɔn mànan dɔn dinin ni.

¹⁶Salomɔn sii mɛn tumaa koa a yɔrɔ-a, á boo a yii la á nya ka bɛa yɔrɔ kɛ lɛ nɛ, a kũ Lawa a kion lɛ a dí giala koe ganaa, a wo kaa a nya lɛ. Dɛnaa Lawa a kion lɛ bǐɛ̃ kɔ.

¹⁷Salomɔn woo Esiɔn-Gebɛɛrɛ ka Elaati ni, mu la ǹ goon golee ǹ bǎã nɛ Sawɛɛ tà la Edɔmu gána nɛ.

¹⁸Kii Uramu mu la ǹ goon dia Salomɔn la, a da baa-a wolen nə́ Fenisi minin lɛa ǹ nə́ Yìsi mu gole doɛ̃ parsiini. Ǹ nə́ woo kun ka Salomɔn a dí-nyalin ni Ofiiri gána nɛ. Ǹ nə́ sana kɔ Salomɔn la a n liɛ tɔnɔ fulusooro ne.