Read Samo, Southern Ɛsid 1 Bible Online

Ɛsid 1 - Samo, Southern bible

Ɛsid 1

¹ Lɛlɛ lɛlɛ, Dɛnaa Lawa goã á boo da a boo gii-dali Zeremii ni. Pɛrsi gána a kii Siirusu a kiibaa lɛ̀ bibinaa li, Dɛnaa Lawa na á wɔ Pɛrsi gána a kii Siirusu lɛ yiri ni, mà a lɛ dia a gána lɛ tumaa nɛ, a sɛ́wɔ dɔ din kiɛ̃ a pɛ

² mà Pɛrsi gána a kii Siirusu mà kɛnɛn: «Lon a Lawa, Dɛnaa Lawa lɛ kanaa gánan tumaa kɔ ma la. A dinmaa na á dí kɔ ma la, mà ma kion dɔ a wɔ lɛa Zeruzalɛmu, Zudaa gána nɛ.

³Dien man Lawa a zaman lɛ a minin lɛa kun ka nɛ? Ǹ dɛnan die ǹ wo Zeruzalɛmu, Zudaa gána nɛ, ǹ Izirayeli a Lawa, Dɛnaa Lawa a kion lɛ dɔ. Kaa Lawa ke Zeruzalɛmu bɛ die a goã kun ka nɛ.

⁴Zaman lɛ a gialakun ke, bɛn bɛ́ bǎã woo bǎã nɛ, bɛa bǎã lɛ a minin die ǹ sana kɔ ǹ gogoonmaa la, ka wɔrɔ nɛ, ka gɔn mànan laanka tɔɔn nɛ, ka foo kɔɔ̃nbaa ǹ wúlu mànan nɛ, Lawa a kion lɛ a dɔ ǹ wɔ lɛa Zeruzalɛmu.»

⁵Bɛ kio, Zudaa tɔrɔn laanka Bɛnzamɛn tɔrɔn kɛdɛnan nɛ, Lawa a wúlu-bɔlen laanka *Levii tɔrɔn nɛ, min mɛnɛn tumaa bɛ́ Lawa sii lɛ wɔ ǹ yiri ni, ǹ nə́ yoo ǹ nə́ woo, ń giɛ ǹ tá Dɛnaa Lawa a kion lɛ doe, Zeruzalɛmu.

⁶Ǹ miãkɛnɛn tumaa goã ǹ nə́ n dɔ ǹ lɛ taãn-taãnɛ. Ǹ nə́ sana mànan laanka wɔrɔ mànan kɔ ǹ la, ǹ nə́ gɔn mànan laanka tɔɔn kɔ ǹ la, bǐɛ̃baa ǹ màn sonboren ne, ǹ màn mɛn din tumaa bɔ ǹ foo-a ǹ nə́ kɔ ǹ la, bɛ ná a ba a-n wa.

⁷Nebukadenezɔɔrɔ goã, á Dɛnaa Lawa a kion mànan mɛnɛn goa Zeruzalɛmu á woo ǹ koa a dì kion, kii Siirusu wusoo á min da bɛa mànan lɛn si ganaa.

⁸Kii Siirusu lɛ na á wɔrɔ-koali Meteredaati da bɛa mànan lɛn si ganaa. Meteredaati dɔ́ mànan lɛn nimi á ǹ kɔ Zudaa gána a gánadɛnaa Sesibasara la.

⁹Mànan lɛn lɛ goã lɔn, bɛ á ke: sana tasa n pɔsɔɔ, wɔrɔ tasa n duu goon, gɔya n fuəwenmanangɔrɔ,

¹⁰Sana kaaran nə pɔsɔɔ, wɔrɔ kaaran bisinin bɛn man biɛsii ka fù. Màn gialakunun kɛn man duu goon.

¹¹Sana mànan lɛn laanka wɔrɔ wɔn lɛn kaa-kun nə duu sooro ka biɛsii. Ǹ goã ǹ nə́ min mɛnɛn lɛn goa ǹ nə́ woo ǹ ne bɛ̀rɛbaa ǹ bǎã nɛ, bɛn bɛ́ n toɛ *Baabilonii die Zeruzalɛmu ǹ mɛn waáraa, Sesibasara mànan lɛn yii goa á daa ǹ nɛ.