Read Samo, Southern Ɛsid 5 Bible Online

Ɛsid 5 - Samo, Southern bible

Ɛsid 5

¹ Ǹ kɔn pinaa, Lawa a boo gii-dali Azee ne, ka Lawa a boo gii-dali Zakari kɛ nɛ Idoo a nɛ lɛa, bɛn nə́ Lawa a boo gii da Zuifun kɛn manɛ nə́ goã Zeruzalɛmu laanka Zudaa kiwi. Izirayeli a Lawa mɛn goã kunun ǹ ni, maǹ nə́ boo lɛ da ka bɛ tɔ nɛ.

² Salatieli a nɛgiĩ Zorobabeli laanka Zozadaaki a nɛgiĩ Zozoe tɔ́n yoo ǹ nə́ kaa Lawa a kion lɛ a dɔ la Zeruzalɛmu. Lawa a boo gii-dalin nə́ goã kunun ǹ ni, n doe ǹ lɛ.

³Bɛa biikoo lɛ li, Tatenayii mɛn bɛ́, Efrati tà a lɛ̀nyɛɛn gɔn la a pàãdɛnaa lɛa, bɛ nɛ, ka Setara-Bozinayii ni, ka ǹ miãn nɛ, ǹ nə́ daa Zuifun lɛn yaa, ǹ nə́ tɔ́n nɔ̀n da ǹ la: «Die na á pɛ ka nɛ, mà ka kion kɛ dɔ ka a kungɔnun zɛnaa?

⁴Wɔ ǹ nɔ̀n din diɛ ka la: Giĩn kɛn lɛn kion kɛ lɛ a dí nyɛɛ ǹ tɔn man die?»

⁵Sɛnɛ Lawa goã giɛ Zuifun min golen lɛn walan. Pɛrsi gána minin lɛn nə ǹ kurəə dí lɛ a nyɛɛ ganaa wa, yǎa sii lɛ a boo woo dɔ Dariusu li, a binyəə dɔ wusoo á n bɔyaa á daa.

⁶Tatenayii lɛ Efrati tà kio a pàãdɛnaa lɛa, bɛ nɛ, Setara-Bozinayii laanka ǹ miãn kɛn nɛ Afarasataaki kiwi Efrati tà a lɛ̀nyɛɛn gɔn la, bɛn nə goã ǹ nə́ sɛ́wɔ mɛn dia kii Dariusu la, bɛ á ke:

⁷Maǹ nə́ sii lɛ a sɛ́wɔ kiɛ̃ ǹ nə́ dia Kii Dariusu lɛ la. Kɛ na á goã kiɛ̃-n sɛ́wɔ lɛ nɛ. — Kii Dariusu, là nyantoro lɛpiɛ̃ die a yɛ n lon.

⁸Wɔ n giɛ li, wáa n dɔ̃, wáa wɔ́ woo Lawa gole a kion Zudaa gána nɛ. Zuifun lɛn tá a gialaa kion lɛ doe ka kɔlɔ dadaran nɛ, ǹ nə́ gɔnɔn kaa a kungɔnɔn nɛ. Ǹ wen tá waa nɛ dí lɛ li, dí lɛ dɔ á tɔ we ǹ gɔn.

⁹Wɔ́ tɔ́n boo da ka bɛa min golen lɛn nɛ, wɔ́ nɔ̀n da ǹ la: «Die na á pɛ ka nɛ, mà ka kion kɛ dɔ, ka a kungɔnun zɛnaa?»

¹⁰Ka bɛ dɔ nɛ, min mɛnɛn bɛ́ n mìi la, wɔ́ bɛn tɔn goa sɛ́wɔ nɛ, màn mɛn bɛ́ toɛ, wɔ ǹ pɛ n nɛ.

¹¹Ǹ bɛ́ re wɔ lɛ sii ka boo mɛn nɛ, bɛ á ke: «Lawa mɛn bɛ́ tán laanka lon a Lawa lɛa, wɔsɛn man bɛa dí-nyalin lɛa. Wɔsɛn man wusii kion kɛ doe, kion mɛn lɛ a doe bɛ́ á lɛ̀ damata yɛ. Izirayeli gána a kii gole goon na á goã á bɛa kion lɛ dɔ á nya.

¹² Sɛnɛ, wɔsɛn digolon lɛn bɛ́ ǹ nə́ lon a Lawa foo yoo, a na á ǹ wɔ *Baabilonii gána a kii, Nebukadenezɔɔrɔ kɛ gɔn. Bɛ́ kion lɛ wuru, á zaman lɛ goa á woo ne bɛ̀rɛbaa ǹ bǎã nɛ, Baabilonii gána nɛ.

¹³ Sɛnɛ, Baabilonii gána a kii Siirusu a kiibaa lɛ̀ bibinaa li, kii Siirusu lɛ pɛ, mà wɔ wusoo wɔ Lawa a kion lɛ dɔ.

¹⁴Ka bɛ dɔ nɛ, Lawa a kion a sana mànan laanka a wɔrɔ mànan kɛn, Nebukadenezɔɔrɔ goã á minin kaa ǹ goa ganaa Lawa a kion Zeruzalɛmu ǹ nə́ woo ǹ ne Baabilonii a dì kion, kii Siirusu minin kaa bɛn goa ganaa walan, ǹ nə́ ǹ kɔ Sesibasara la, Siirusu nə ǹ mɛn lɛ koa pàãdɛnaa lɛa.

¹⁵Siirusu na á pɛ Sesibasara lɛ nɛ kɛnɛn: Mànan kɛn goa n wo ǹ kaa Lawa a kion Zeruzalɛmu. N die n wusoo, n Lawa a kion lɛ dɔ a lɛlɛ a bǎã nɛ.

¹⁶Sesibasara lɛ tɔ́n daa Lawa a kion lɛ gòã daa Zeruzalɛmu. A kũ bɛa biikoo lɛ ganaa, a da sisia yaa, wɔsɛn man kion lɛ doe. Sɛnɛ, a tɔn nya wa.»

¹⁷Kanna kəni, bɛ̀ á kɔɔ̃n kɔ kii lɛ ganaa, ka die ka ga kii gɔn mànan koa ǹ bǎã kɛ-n walan Baabilonii, màn mɛn bɛ́ toɛ ka dɔ̃, bɛ̀ kii Siirusu lɛ pɛ sonbore, mà wɔ Lawa a kion kɛ lɛ dɔ Zeruzalɛmu. Bɛ kio, kii lɛ lɛ die a dɔ wɔsɛn ganaa, a na a taasiɛ nyaa wɔsɛn manɛ bɛa sii lɛ wɔ paǹ li.