Read Samo, Southern Ɛsid 7 Bible Online

Ɛsid 7 - Samo, Southern bible

Ɛsid 7

¹Bɛa siin kɛn lɛn kiɛ̃ kio, Pɛrsi gána a kii Artagizɛrɛsɛɛsi a kiibaa biikoo li, giĩ goon ne, a tɔ n Ɛsidrasi. Seraya a nɛ n ka Ɛsidrasi lɛ nɛ, Azaria wɔ n ka Seraya nɛ, Ilkiya wɔ n ka Azaria nɛ.

²Salumu wɔ n ka Ilkiya nɛ, Saadɔki wɔ n ka Salumu ni, Ayituubu wɔ n ka Saadɔki ni.

³Amariya wɔ n ka Ayituubu ni, Azaria wɔ n ka Amariya nɛ, Merayɔti wɔ n ka Azaria nɛ,

⁴Zerayaa wɔ n ka Merayɔti ni, Uzii wɔ n ka Zerayaa nɛ, Bukii wɔ n ka Uzii ni,

⁵Abisuwa wɔ n ka Bukii ni, Fineasi wɔ n ka Abisuwa nɛ, Eleyazaara wɔ n ka Fineasi ni, Lawa a wúlu-bɔlen kiã Aarɔn wɔ n ka Eleyazaara nɛ.

⁶Ɛsidrasi lɛ ná n toa *Baabilonii, á daa. A na á goã sɛ́wɔ-kiɛ̃li lɛa, sɛ́wɔ-kiɛ̃li mɛn nə́ ke Muizu a landa sɛ́wɔ kɛ doɛ̃ a tɔ-a. Landa mɛn lɛ á ke, Izirayeli a Lawa, Dɛnaa Lawa goã á kɔ. Ɛsidrasi goã á nɔ̀n da màn mɛn tumaa li, kii lɛ ná a yii kɔ la, a giala Dɛnaa, Lawa goã kɔn li nɛ.

⁷Artagizɛrɛsɛɛsi a kiibaa lɛ̀ sɔbaabaa ǹ wɔ, Izirayeli minin tɛnɛn nɛ, Lawa a wúlu-bɔlen tɛnɛn nɛ, *Levii tɔrɔn tɛnɛn nɛ, loe-lɔlin tɛnɛn nɛ, kiɛnlɛ-lɛduə̃lin tɛnɛn nɛ, ka Lawa a kion dí-nyalin tɛnɛn nɛ, bɛn nə́ woo Zeruzalɛmu.

⁸Ɛsidrasi na á dɔ Zeruzalɛmu, kii lɛ a kiibaa lɛ̀ sɔbaabaa ǹ wɔ a mui soorobaa ǹ wɔ li.

⁹Sonbore, Ɛsidrasi lɛ na á soo Baabilonii, mui bibinaa a giala kɔ pinaa. A Lawa sonbore lɛ bɛ́ kun ni, a na á dɔ Zeruzalɛmu, lɛ̀ a mui soorobaa ǹ wɔ a giala kɔ pinaa.

¹⁰Ɛsidrasi lɛ goã n yiri koɛ li, a tá n darɛɛ Dɛnaa Lawa a dí-pɛn ganaa, á n koe ǹ lɛ, á minin dɔn darɛɛ landa boon laanka sii yɔrɔ bɔ ǹ boon ganaa Izirayeli gána nɛ.

¹¹Kii Artagizɛrɛsɛɛsi sɛ́wɔ mɛn dia Lawa a wúlu-bɔle Ɛsidrasi la, asɛ mɛn bɛ́ landa laanka dí-pɛn darɛɛ Izirayeli gána nɛ, bɛa boon nə́ ke:

¹²«Lawa a wúlu-bɔle Ɛsidrasi sɛ́wɔ-kiɛ̃li, lon a Lawa a dí-pɛn dɔ̃li, kiin kii Artagizɛrɛsɛɛsi n fòo diɛ n nɛ.

¹³Man kɛ pii: maa gána lɛ nɛ, Izirayeli tɔrɔn lɛn bii, a wúlu-bɔlen lɛn laanka a Levii tɔrɔn lɛn bii, bɛ̀ min mɛn bɔ a din ni, mà asɛ á woe Zeruzalɛmu, ǹ dɛnaa die a wo kunun ǹ ni.

¹⁴Sonbore, kii lɛ laanka a yiri kɔmala wole min sɔbaa kɛ nə n diɛ, mà n wo nɔ̀n dada ka Zudaa gána laanka Zeruzalɛmu kiwi a siin ni, bɛ̀ ǹ tá koe Dɛnaa Lawa a dí-pɛn kɛn lɛ n gɔn.

¹⁵Bɛ kio, kii laanka a yiri kɔmala wolen nə bɔ ǹ dinin ni, ǹ nə́ wɔrɔ laanka sana mɛn bɔ, ń die n wo bɛ kɔ Izirayeli a Lawa la, ǹ mɛn lɛ a kion bɛ́ Zeruzalɛmu.

¹⁶Ka bɛ dɔ nɛ, n bɛ́ re wɔrɔ mɛn tumaa laanka sana mɛn yii Baabilonii gána kuturu lɛ nɛ, wo bɛ dɔ kɔ la, kɔnlɛ ka mànan kɛn nɛ, zaman lɛ laanka Lawa a wúlu-bɔlen lɛn nə́ die boe ǹ foo-a ǹ kɔ, ǹ Lawa a kion lɛ wɔ lɛa Zeruzalɛmu.

¹⁷Bɛ kio, n die n nə n yiri koa li kəni, n bɛa wɔrɔ kɛ lɛ saa, n dii gɔ̀lɔ̀n pii ni, ka sère gɔ̀lɔ̀n nɛ, ka sère tenən ne, kɔnlɛ ka tán kɔsiɛ mànan kɛn laanka duvɛ̃ kɛ nɛ, ǹ tá tii bɛa tɔɔn lɛn ganaa. N die n wúlu bɔ ǹ nɛ, n Lawa a kion lɛ a *wúlu bɔ ǹ bǎã la Zeruzalɛmu.

¹⁸Wɔrɔ lɛ laanka sana lɛ gialakun mɛn bɛ́ re boe, n din laanka n dɔɔ̃nɔn nɛ, bɛ̀ sii mɛn dɔ ka yii li, ka die ka zɛnaa ka bɛ nɛ, a kɔnpɛ ka kaa Lawa dùũ ni.

¹⁹Ǹ mànan mɛnɛn kɔ n la, dí n die n nyɛɛ ǹ nɛ, n Lawa a kion lɛ nɛ, bɛn kaa tán Zeruzalɛmu a Lawa lɛ yɔrɔ-a.

²⁰N doamaa bɛ́ nɛ, n màn mɛn kɔsɔ ziziɛ̃ n Lawa a kion lɛ ganaa, n die n bɛ bɔ kii gɔn màn nɛ.

²¹Masɛ kii Artagizɛrɛsɛɛsi, man pii Efrati tà a lɛ̀nyɛɛn gɔn la a wɔrɔ-koalin tumaa nɛ, máa Lawa a wúlu-bɔle Ɛsidrasi mɛn lɛ á ke lon a Lawa a dí-pɛn dɔ̃li lɛa, máa bɛ bɛ́ re màn mɛn tumaa nyankoe ǹ la, máa ǹ na a lɛpiɛ̃ kɔ la.

²²Ǹ kɔ la a wo dɔ yǎa wɔrɔ tɔnɔ sɔɔ, *belee nàn tɔnɔ pɔsɔɔ, duvɛ̃ litiri duu sii, nyɔɔ litiri duu sii, ka yìsi ni, lɛ ná a ba n diɛ la wa.

²³Lon a Lawa bɛ́ mà ǹ màn mɛn tumaa zɛnaa asɛ kion lɛ wɔ paǹ li, ǹ bɛ zɛnaa a giala yii li, màn mɛn bɛ́ toɛ, a foo baran yoo maa gána li wa, a foo baran yoo maa nɛnyaanan dɔn li wa.

²⁴Ka bɛ dɔ nɛ, wɔ n diɛ ka yiri-a, wáa Lawa a wúlu-bɔlen ne, Levii tɔrɔn nɛ, loe-lɔlin ni, kiɛnlɛ-lɛduə̃lin ni, dí-nyalin ni, Lawa a kion kɛ a dí-nyalin ni, bɛn kɔn doamaa bie a nyin giɔ̀mɔ saraa wa, ǹ kɔn doamaa bie a wusuru hinlaa zii tɔ wɔ ǹ wusuru saraa wa.

²⁵Nsɛ Ɛsidrasi, n Lawa a sii-doɛ̃ mɛn lɛ bɛ́ n gɔn, sii yɔrɔ bɔlen laanka kiri-kurulin koa ka bɛ nɛ, ǹ Efrati tà a lɛ̀nyɛɛn gɔn la a zaman tumaa a kiri kuru, ǹ mɛnɛn tumaa bɛ́ n Lawa lɛ a dí-pɛn doɛ̃. Min mɛnɛn bɛ́ ǹ ba bɛa dí-pɛn kɛn lɛn doɛ̃ wa, bɛn daraa ǹ ganaa.

²⁶Bɛ̀ min mɛn nə kɔ n Lawa a dí-pɛn lɛn laanka kii a boo lɛ lɛ ka te wa, dɔlɔ die a n bɔ bɛa dɛnaa ganaa: bɛ̀ gɛ̀ bie wa, loo ne, bɛ̀ bɛ bie wa, wɔrɔ damamìi-n ni, hinlaa kòso ne.»

²⁷Barka tá Dɛnaa Lawa ganaa, wɔ digolon Lawa kɛ lɛ, á wɔ kii lɛ foo ne, mà a gugurubaa kɛ tɔrɔ da Dɛnaa Lawa a kion kɛ la Zeruzalɛmu.

²⁸A din kɛ lɛ dɔ na á bǐɛ̃ kɔ ma ganaa kii yɔrɔ-a, ka kii a yiri kɔmala wolen laanka a kiodɛnaa dadaran nɛ. Maa Lawa, Dɛnaa Lawa mɛn goã kun ka ma nɛ, bɛ bɛ́ á foo tãbaa kɔ ma la, má Izirayeli a nyɛɛnaandɛnan sɔkɔn màn mɛn bɛ́ toɛ, ǹ wo kun ma nɛ.