Read Samo, Southern Ɛsid 8 Bible Online

Ɛsid 8 - Samo, Southern bible

Ɛsid 8

¹Kii Artagizɛrɛsɛɛsi a pàã biikoo li, kɛdɛnan mɛnɛn nə goã ǹ nə́ soo kun ma nɛ *Baabilonii gána nɛ, bɛn nə́ ke ka ǹ tɔrɔ basan nɛ.

²Pinaasi a tanlɛ min: Geresɔn nɛ. Itamaara a tanlɛ min: Daniyeli ni. Davida a tanlɛ min: Atusu ni.

³Sekania laanka Paarɔsi a tanlɛ minin: Zekaria nɛ, ǹ min mɛnɛn nimi kun ni, min paabiɛ ka posooro (150).

⁴Pahati-Moabu a tanlɛ minin: Elionayii kɛ nɛ, Zerayaa a nɛ lɛa. Min biɛpaa (200) na á goã kun ni.

⁵Sekania a tanlɛ minin: Yahaziyɛli a nɛ kɛ nɛ. Min biɛsɔɔ (300) na á goã kun ni.

⁶Edɛn a tanlɛ minin: Evɛdi kɛ nɛ, Zonaatan a nɛ lɛa. Min posooro na á goã kun ni.

⁷Elamu a tanlɛ minin: Zesayaa kɛ nɛ, Atalia a nɛ lɛa. Min pɔsɔbaa na á goã kun ni.

⁸Sefatia a tanlɛ minin: Zebadia kɛ nɛ, Mikayeli a nɛ lɛa. Min pɔkiwisi na á goã kun ni.

⁹Zoabu a tanlɛ minin: Odavia kɛ nɛ, Yeyieli a nɛ lɛa. Min biɛpaa ka fulukiwisi (218) na á goã kun ni.

¹⁰Selomiti a tanlɛ minin: Zozifia a nɛ kɛ nɛ. Min paabiɛ ka pɔsɔrɔ (160) na á goã kun ni.

¹¹Bebayii a tanlɛ minin: Zekaria kɛ nɛ, Bebayii a nɛ lɛa. Min fuəwenkiwisi na á goã kun ni.

¹²Azgaadi a tanlɛ minin: Zoanan kɛ nɛ, Ha-Katan a nɛ lɛa. Min paabiɛ ka fù (110) na á goã kun ni.

¹³Adonikaamu a tanlɛ minin man gɔn nyɔmiɛ̃n lɛa. Ǹ tɔn nə́ ke: Elifelɛti ni, Yeyeili ni, ka Semayia nɛ. Min pɔsɔrɔ na á goã kunun ǹ ni.

¹⁴Bigwayii a tanlɛ minin: Utayii laanka Zabudu ni. Min pɔsɔbaa n kunun ǹ ni.

¹⁵Tà ke, a mu n baa sii n yɔrɔ diɛ Aawaa kiwi li, man má minin lɛn sɔkɔn bɛ genli, wɔ́ golee walan wɔ lɛawaa sɔɔ. Má ga zaman lɛ laanka Lawa a wúlu-bɔlen lɛn ganaa doɛ̃, sɛnɛ ma Levii tɔrɔ kɔn yɛ bǎã lɛ-n wa.

¹⁶Má tɔ́n lɛ dia kɛdɛnaa manangɔrɔ la: Eliezɛrɛ nɛ, Ariyeli ni, Semayia nɛ, Ɛlnaatan nɛ, Zaribu ni, Ɛlnaatan nɛ, Naatan nɛ, Zekaria nɛ, Mesulaamu ni, kun ka minin-daraali paa nɛ: Zozaribu laanka Ɛlnaatan nɛ.

¹⁷Idoo ke Kasifia kiwi a kiã lɛa, má ǹ dia woe bɛ li. Má wɔ ǹ too ne, máa ǹ pɛ Idoo lɛ nɛ, ka Idoo lɛ dɔɔ̃nɔn kɛn nɛ Lawa a kion dí-nyalin lɛa Kasifia kiwi, máa ǹ minin kɔ wɔ la, ǹ dí nya wɔa Lawa a kion lɛ nɛ.

¹⁸Wɔa Lawa lɛ bɛ́ kun wɔ nɛ, bɛ lɛ na á toa ǹ nə́ tɔ́n giĩ sii-dɔ̃li goon dia wɔ la. Mayili tɔrɔ goon nə ka bɛa giĩ lɛ nɛ, Levii tɔrɔ nɛ, Izirayeli min ni, a tɔ n Serebia. A nɛgiĩn laanka ǹ dɔɔ̃nɔn man min fulukiwisi ǹ nə́ daa kun ni.

¹⁹Ǹ nə́ Akabia laanka Merari tɔrɔ Yesayaa dɔ dia wɔ la. Ǹ nɛgiĩn laanka ǹ dɔɔ̃nɔn kaakun nə min fuə kunun ǹ ni.

²⁰Ka bɛ dɔ nɛ, Davida laanka nyɛɛnaandɛnan nə goã ǹ nə́ dí-nyalin mɛnɛn kɔ, mà ǹ dí nya *Levii tɔrɔn giulun, bɛn bii, maǹ nə́ min biɛpaa ka fuə dia, ǹ nə́ màn da ǹ tumaa tɔ li sɛ́wɔ nɛ.

²¹Bɛa bǎã lɛ nɛ, Aawaa tà lɛ genli, má lɛ dia, máa wɔ n lɛ sɔɔ, wɔ n dinin gisĩ wɔa Lawa lɛ yɔrɔ-a, màn mɛn bɛ́ toɛ, a zii fore wɔ nɛ, a fore wɔa nɛnyaanan laanka wɔ gɔn mànan dɔn nɛ.

²²A giala sìi na á goã ma ganaa, ma kii lɛ nyankɔ máa a sùidɛnaa zia-baalin kɔ, ǹ wɔ tamaa zii la wɔa zɔ́ɔn ganaa. A giala, wɔ n wɔ́ goã wɔ́ pɛ kii lɛ nɛ kɛnɛn: «Min mɛnɛn bɛ́ giɛ wɔa Lawa lɛ li, a n kun ka bɛn nɛ. Sɛnɛ, min mɛnɛn bɛ́ n piɛ̃ nɛ, a foo n yoo-n bɛn li taãn-taãnɛ.»

²³Bɛ lɛ n ke, wɔ́ n lɛ sɔɔ, wɔ́ bɛ lɛ nyankɔ wɔa Lawa lɛ lon, á wɔ lɛ si.

²⁴Bɛ kio, má nyɛɛnaandɛnaa fulupaa yii gɔgɔɔ̃ Lawa a wúlu-bɔlen bii, Serebia nɛ, Akabia nɛ, ka ǹ dinin miã wúlu-bɔle fù ni.

²⁵Sana mɛn nə n bɔ, wɔrɔ laanka mànan mɛnɛn nə n bɔ wɔa Lawa a kion lɛ wɔ lɛa, má bɛn zɔɔ̃ ǹ yɔrɔ-a. Kii laanka a yiri kɔmala wolen man nə́ bɛa mànan kɛn lɛn bɔ, kun ka kii a nyɛɛnaandɛnan nɛ, ka min mɛnɛn tumaa goã ǹ tan Izirayeli minin lɛa.

²⁶Má wɔrɔ tɔnɔ fuə kaa ǹ gɔn ka wɔrɔ màn zɛnaa sonbore tɔnɔ sɔɔ nɛ, ka sana tɔnɔ sɔɔ nɛ,

²⁷ka sana kaaran fuə ne, ǹ gugurubaa n doe paa sanadɛnaa duu goon, ka zan kaaran gɔ̀nɔn zɔnɛɛ màn paa nɛ, siĩni taãn-taãnɛ ka sana bɛ́ lɔn.

²⁸Bɛ kio, má pɛ ǹ nɛ kɛnɛn: «Ka dininmaan bɛ́ ka ka dinin kɔ Dɛnaa Lawa la, mànan kɛn dɔn man Lawa wɔn lɛa. Wɔrɔ kɛ laanka sana ke, foo kɔɔ̃nbaa ǹ wúlu mànan man ka bɛn nɛ, wɔ digolon Lawa, Dɛnaa Lawa wɔ lɛa.

²⁹Ka n yii dɔraa, ka mànan lɛn koa yǎa ǹ nə ǹ zoɛ̃ Lawa a wúlu-bɔlen goledɛnan yɔrɔ-a, ka Levii tɔrɔn laanka Izirayeli a kɛdɛnan nɛ, Dɛnaa Lawa a kion lɛ a kionən gɔ́ɔ̃ nɛ, Zeruzalɛmu kiwi.»

³⁰Ǹ mànan mɛnɛn lɛn zɔɔ̃, Lawa a wúlu-bɔlen lɛn laanka Levii tɔrɔn lɛn nə́ tɔ́n bɛn goa ka sana lɛ laanka wɔrɔ lɛ nɛ, màn mɛn bɛ́ toɛ, ǹ wo ǹ ne Zeruzalɛmu, wɔa Lawa a kion lɛ nɛ.

³¹Wɔ n wɔ́ n toa Aawaa tà li, mui bibinaa a lɛawaa fulupaabaa ǹ wɔ pinaa, wɔ́ woo Zeruzalɛmu. Wɔa Lawa lɛ goã kun wɔ nɛ zii tɔ lɛ gɔ́ɔ̃ nɛ, á wɔ si wɔa zɔ́ɔn la, ka kuu-kɔlen kɛn nɛ, minin mànan sii ǹ la ka pàã nɛ.

³²Wɔ́ woo wɔ́ dɔ Zeruzalɛmu, wɔ́ n susu a nɛ wɔ lɛawaa sɔɔ.

³³A lɛawaa siibaa ǹ wɔ pinaa, wɔ́ wɔrɔ lɛ laanka sana lɛ zɔɔ̃ ka mànan lɛn nɛ, wɔ́ ǹ wɔ Uruyaa a nɛgiĩ Meremɔti, Lawa a wúlu-bɔle kɛ gɔn. Pinaasi a nɛgiĩ Eleyazaara kɛ́ goã kun ni, ka Levii tɔrɔ min paa nɛ: Zozoe a nɛgiĩ Zozabaadi laanka Binuyii a nɛgiĩ Noadia nɛ.

³⁴Mànan lɛn nɛ, ǹ gugurubaa nɛ, bɛ yii yɛ. Ǹ gugurubaa lɛ tumaa a kaakun nə́ n kiɛ̃ sɛ́wɔ nɛ. Bɛa biikoo lɛ li,

³⁵goawolen mɛnɛn lɛn nə bɔ walan ǹ nə́ daa, bɛn nə́ dii gɔ̀lɔ̀ fulupaa baa *wúlu màn tiɛ̃ lɛa, ǹ nə́ kɔ Izirayeli a Lawa lɛ la, Izirayeli din tumaa wɔ lɛa. Ǹ nə́ sère gɔ̀lɔ̀ pɔmanangɔrɔwensɔrɔ dɔ baa a lɛa, ka sère ten pɔsɔbaawensɔbaa nɛ, ka butumu fulupaa nɛ, sii baraan sawaa ǹ wɔ lɛa. A tumaa na á n kɔ Dɛnaa Lawa la, wúlu màn tiɛ̃ lɛa.

³⁶Bɛ kio, ǹ nə́ kii a gɔn-waan lɛn kɔ kii a kiodɛnan kɛn la gána lɛ a bǎãn mìi la, ǹ nə́ ǹ kɔ Efrati tà a lɛ̀nyɛɛn gɔn la a pàãdɛnan dɔn la. Bɛa minin kɛn lɛn nə́ n dɔ Lawa a zaman lɛ lɛ ka kion lɛ a dɔ nɛ.