Read Samo, Southern Neh 1 Bible Online

Neh 1 - Samo, Southern bible

Neh 1

¹Hakalia a nɛgiĩ Nehemii a da ǹ boon man ka kɛn nɛ. Artagizɛrɛsɛɛsi a kiibaa lɛ̀ fuəbaa ǹ wɔ li, *Kisilə mui ni, masɛ Nehemii n má goã Suzu kiwi gole kɛ nɛ.

²A ma toa walan, Hananii mɛn nə́ ke ma dɔɔ̃ngiĩ goon lɛa, bɛ́ bɔ Zudaa gána nɛ á daa, kun ka giĩ lɛ dan kɔn nɛ. Zuifun mɛnɛn nə bɔ bɛ̀rɛbaa ǹ bǎã lɛ nɛ ǹ nə́ daa, má nɔ̀n da ǹ la ka bɛn sii ni, ka Zeruzalɛmu dɔ wɔ nɛ.

³Ǹ nə́ tɔ́n ma lɛ si kɛnɛn: «Min mɛnɛn nə bɔ bɛ̀rɛbaa ǹ bǎã lɛ nɛ ǹ nə́ daa ǹ gána nɛ, ǹ tá koe gole laanka sìi bii. Zeruzalɛmu a kungɔn lɛ tá fɔfoɛ̃ nɛ, tɛ ná a kiɛnlɛn dɔn kũ.»

⁴Ma bɛ́ má bɛa boon kɛn lɛn ma, ma foo ziziɛ̃, má giã tán, má wuu pɛ lɛawaa damata gɔ́ɔ̃ nɛ. Bɛ kio, má n lɛ sɔɔ má lon a Lawa nyankɔ.

⁵Má pɛ: — E! Lon a Lawa, Dɛnaa Lawa, Lawa gole, nyɛ́ɛbaaman wole, nsɛ mɛn bɛ́ n lɛ kɔ kɔn la lɛ piɛ̃, ń bǐɛ̃ zɛnɛɛ ǹ narɛɛ wolen laanka ǹ gɔn waa ǹ boon kɛn silin manɛ, ma nə n nyankoe.

⁶N yii bũ, ǹ nə n too kɔ maa nyankɔ ganaa. Biikoo kɛ gɔ́ɔ̃ nɛ, penleen laanka tèlò ne, ma nə n nyankoe, n dí-nyalin, Izirayeli minin lɛn lɛa: wɔ sii baraan mɛnɛn zɛnaa, ma nə n nyankoe, n bɛn toa wɔ nɛ. Wɔ́ sii baraa zɛnaa, ma laanka ma dikion minin ni.

⁷A giala wɔ́ wɔ n lon baraa. Ǹ gɔn waa ǹ boon kɛn nɛ, ǹ landa boon kɛn nɛ, sii yɔrɔ bɔ ǹ boon kɛn nɛ, ń nə́ ǹ kɔ n dí-nyali Muizu la, wɔ bɛn tamaa wa.

⁸ Sɛnɛ bǐɛ̃ kɔ n nə n yiri kɔ ka boo kɛ nɛ, ń goã ń nə́ n dí-nyali Muizu da a pɛ ganaa kɛnɛn: «Bɛ̀ ka a bɔlɔgoondɛnan lɛa wa, masɛ dɔ n die ka pɛsɛ̃ tɔrɔ kɔsɔn bii.

⁹ Sɛnɛ, bɛ̀ ká wusoo ka daa masɛ ganaa, bɛ̀ ka masɛ a gɔn waa ǹ boon lɛn tamaa ka kɔ ǹ lɛ, ta kaa pɛsiɛ̃ wolen lɛn man lon lɛ doa ǹ bǎã nɛ, masɛ á die giɛ ǹ li walan ma ǹ sɔkɔn bǎã kɛ nɛ, má bɔ, má n tɔ da la.»

¹⁰Wɔ nə n din a dí-nyalin lɛa, wɔ nə n din a zaman lɛa! Wɔ dinin lɛn manɛ, ń wɔ bɔ sii ni ka n pàã gole laanka n boo sii la nɛ.

¹¹E, Dɛnaa Lawa, n too da doɛ̃ maa nyankɔ li. Ǹ dí-nyalin mɛnɛn bɛ́ giɛ li ǹ nyɛ́ɛ baa n nɛ, n too da doɛ̃ bɛn dɔn nyankɔ li. Toa maa sii bǐɛ̃ kɔ pelo, n toa dɔn bɛa kii kɛ lɛ makara bɔ ma ganaa! Bɛa biikoo lɛ li, bɛ̀ man kii lɛ a mi ǹ mànan kɔ ma la wole lɛa.