Read Samo, Southern Neh 2 Bible Online

Neh 2 - Samo, Southern bible

Neh 2

¹Kii Artagizɛrɛsɛɛsi a kiibaa lɛ̀ fuəbaa ǹ wɔ li, *Niizã mui ni, ma din a duvɛ̃ sii yɔrɔ bɔ bɛ́ nɛ, yǎa ma tɔn duvɛ̃ lɛ saa, má kɔ la. Ma foo bin bɛ́ a bie á tɔ́n goã ziziɛ̃ nɛ kii lɛ yɔrɔ-a wa,

²á tɔ́n nɔ̀n da ma la: «Wàa na á baa n yɔrɔ á ziziɛ̃ nɛ? Busu dɔ bɛ́ a bie n ganaa wa, foo ziziɛ̃ nɛ, màn kɔsɔ bie wa.» Nyɛ́ɛ tɔ́n ma kũ taãn-taãnɛ.

³ Sɛnɛ má n toa kii lɛ ganaa: «Kii, n yii die a goã koo miɛ̃ duduu? Ma yɔrɔ n siɛ lɔn a ná a goɛ̃ ziziɛ̃-n wa?» Ma wo ma digolon bĩ kiwi mɛn nɛ, ń nə́ bɛ yu, tɛ ná a kiɛnlɛn kũ.

⁴Kii lɛ nɔ̀n da ma la: «N nə n giɛ wàa mɛn li?» Má tɔ́n lon a Lawa nyankɔ.

⁵Bɛ kio, má pɛ kii lɛ-n kɛnɛn: «Bɛ̀ á n din dùũ baa, bɛ̀ maa sii tá kɔɔ̃nɛ n ganaa, n die n ma dia kəni ma wo Zudaa, ma wo ma digolon bĩ ǹ kiwi lɛ nɛ, màn mɛn bɛ́ toɛ ma wusoo ma dɔ.»

⁶Kii lɛ, a lɔ n tán a para li, á nɔ̀n da ma la kɛnɛn: «N nə n die beleboe n zii lɛ nɛ yǎa biĩ kəni? N nə n die n bɔyɛɛ biĩ?» Má tɔ́n biikoo pɛ má kɔ la, bɛ́ kɔɔ̃n kɔ kii lɛ-a, á tɔ́n zii kɔ ma la mà ma woo.

⁷Má wusoo má pɛ kii lɛ nɛ kɛnɛn: «Bɛ̀ á n dùũ baa, n die n sɛ́wɔn kɔ ma la ma wo ǹ kɔ Efrati tà a lɛ̀nyɛɛn gɔn la a pàãdɛnan ma la màn mɛn bɛ́ toɛ, ǹ toa ma kiɛ̃ ma woo, yǎa ma doe Zudaa.

⁸N sɛ́wɔ lɛ a goon dɔ kɔ ma kɔ kii a daã-lɛduə̃li, Asaafu kɛ la, màn mɛn bɛ́ toɛ a gɔn kɔ ma la, kiwi tamaa ǹ kungɔn ke kunu Lawa a kion lɛ ganaa, ma bɛa kiɛnlɛn zɛnaa nɛ, ka kiwi lɛ a kungɔnɔn nɛ ka ma din bɛ́ re woe giɛ̃ kion mɛn dɔ nɛ.» Kii lɛ bɛa sɛ́wɔn lɛn kɔ ma la, a giala maa Lawa lɛ gɔn goã kun manɛ.

⁹Má tɔ́n kiɛ̃ kəni má woo Efrati tà a lɛ̀nyɛɛn gɔn la a pàãdɛnan lɛn li, má kii a sɛ́wɔn lɛn kɔ ǹ la. Kii lɛ goã á sɔraasi mìilandɛnan laanka sùidɛnan dia woe kun ka ma nɛ.

¹⁰Giĩ goon goã a tɔ n Sanbalaa[1] boe Horonayimu kiwi. Bɛ laanka dí-nyali Tobiya kɛ nɛ, Amɔn tɔrɔ lɛa, bɛn bɛ́ ǹ ná a boo ma, ǹ foo ziziɛ̃, a giala, mà min na á daa ga Izirayeli minin bǐɛ̃-kɔ li.

¹¹Má bɛ́ ma woo má dɔ Zeruzalɛmu, má lɛawaa sɔɔ zɛnaa a nɛ.

¹²Bɛ kio, má yoo tèlò-n, kun ka giĩ lɛ dan kɔn nɛ, maa Lawa lɛ goã á màn mɛn wɔ ma foo ne, mà ma zɛnaa Zeruzalɛmu wɔ paǹ li, ma bɛ boo da min kɔn nɛ wa. Tɔɔ kɔsɔ goã kun ka ma-n wa, bɛ̀ á n bɔ kɛ nɛ ma din goã má dii la.

¹³Tèlò-n, má bɔ ka nyankɔrɔ lɛ kiɛnlɛ kɛ nɛ, má woo tolokan mu a pìã lɛ-a ka yisi kaa ǹ bǎã a kiɛnlɛ kɛ lɛ-a nɛ. Zeruzalɛmu kiwi a kungɔn mɛn lɛ fɔfɔ̃, tɛ ná a kiɛnlɛn kukũ, má goã giɛ bɛ ganaa doɛ̃ sɔnbɔraanɛ.

¹⁴Bɛ kio, má tɔ́n kiɛ̃ má woo bɔ mu pìã bǎã a kiɛnlɛ kɛ laanka kii a pɛrɛ kɛ genli, ma goã tɔɔ mɛn la, bǎã goã a tan bɛ ń boe la á kiɛ̃ wa.

¹⁵Tèlò-n, má tɔ́n bɔ ka nyankɔrɔ basa kɛ nɛ, má ga kungɔn lɛ ganaa doɛ̃ sɔnbɔraanɛ. Bɛ kio, má n basa kũ má daa wɔ ka nyankɔrɔ lɛ kiɛnlɛ lɛ nɛ, bɛ nə́ n baa maa bɔyaa lɛa.

¹⁶Kiwi lɛ a nyɛɛnaandɛnan lɛn nə goã maa woo ǹ bǎã doɛ̃ wa, ma goã sii mɛn zɛnɛɛ ǹ goã bɛ dɔ doɛ̃ wa. A da dɔ yǎa bɛa biikoo lɛ ganaa, ma goã má boo kɔn da má nyaa Zuifun lɛn man wa, ma nyaa Lawa a wúlu-bolen man wa, ma nyaa pàãdɛnan man wa, ma nyaa nyɛɛnaandɛnan man wa, min gialakunun mɛnɛn dɔn nə goã giɛ dí lɛ walan, ma nyaa bɛn dɔn man wa.

¹⁷Má tɔn pɛ ǹ nɛ: «Koe mɛn bɛ́ wɔ mìi ni, ka yii ba bɛ ganaa wa? A giala ǹ nə́ Zeruzalɛmu yu. Tɛ ná a kiɛnlɛn kũ. Ka daa wɔ n tan, wɔ wusoo wɔ Zeruzalɛmu a kungɔn lɛ dɔ, wɔ n bɔ sìi bii!»

¹⁸Maa Lawa lɛ bɛ́ á goã kun ma nɛ ka yɔrɔ mɛn nɛ, má tɔn bɛ laakalaa ǹ nɛ. Kii lɛ goã á boon mɛnɛn dɔn da ma nɛ, má bɛn dɔn laakalaa ǹ nɛ. Ǹ nə́ tɔ́n nə n toa: «Ka yoo wɔ kion lɛ dɔ!» Ǹ yoo n ka bɛ nɛ, ǹ nə́ n we bɔ bɛa dí sonbore kɛ lɛ li.

¹⁹Sanbalaa ke boe Horonayimu kiwi, bɛ nɛ, ka dí-nyali Tobiya kɛ nɛ, Amɔn tɔrɔ lɛa, ka Larabu gána min Gesɛmu kɛ nɛ, bɛn bɛ́ ǹ nə́ boo lɛ ma, ǹ nə́ yaa wɔ wɔ ganaa, ǹ nə́ gasɛ̃ wɔ wɔ ganaa. Ǹ nə́ n toa: «Ǹ mɛn baa ǹ wɔ n ka kɛ-n kəni? Ka nə n gòãn dii kii lɛ ganaa?»

²⁰Má tɔ́n nə ǹ lɛ si kɛnɛn: «Lon a Lawa din nə die sii kɛ lɛ bǐɛ̃ koe a kɔ wɔ la. Wɔsɛn kɛn, a dí-nyalin lɛa, wɔ n die yui wɔ kion lɛ dɔ. Sɛnɛ, ka kɛn, ka gii ba re goɛ̃ màn kɔn nɛ Zeruzalɛmu wa, ka sii ba re goɛ̃ sii kɔn nɛ Zeruzalɛmu wa, min ba re n yiri gisĩ ka ni Zeruzalɛmu wa.»