Read Samo, Southern Neh 3 Bible Online

Neh 3 - Samo, Southern bible

Neh 3

¹Lawa a wúlu-bɔlen kiã Eliasibu tɔ́n yoo kun ka ǹ miã wúlu-bɔlen ne, kiɛnlɛ ke ǹ nə́ bíi "Sèren kiɛnlɛ" ǹ nə́ bɛ dɔ. Bɛ kio, ǹ nə́ kɔ Lawa la, ǹ ná a goon dɔn wɔ lɛ. A saa tán Meya a sanabolo kɛ li, ǹ nə́ kungɔn lɛ kɔ Lawa la yǎa á daa dɔ Hananeyeli a sanabolo kɛ li.

²Zerikoo minin nə́ goã Eliasibu lɛ genli kungɔn lɛ doe, Imrii a nɛgiĩ Zakuru kɛ dɔ goã a genli doe.

³Kiɛnlɛ ke ǹ nə́ bíi "zɔ̀nɔn kiɛnlɛ", Senaa tɔrɔn man nə́ bɛ dɔ. Ǹ nə́ zũ, ǹ ná a goon wɔ lɛ, ka a tã a sɔɔ ǹ mànan nɛ.

⁴Urii a nɛgiĩ Meromɔti ke Hakɔsi a nɔ̀ɔn lɛa, bɛ dɔ goã ǹ genli dí nyɛɛ, Berekia a nɛgiĩ Mezulaamu ke Mezezabɛli a nɔ̀ɔn lɛa, bɛ dɔ goã ǹ genli dí nyɛɛ, Baanaa a nɛgiĩ Saadɔki dɔ goã ǹ genli dí nyɛɛ.

⁵Tekoa minin dɔn nə́ goã ǹ genli dí nyɛɛ. Sɛnɛ Tekoa minin lɛn min yii guguru-an nə lɛ kɔ ǹ nə́ dí nya ǹ mìilandɛnan lɛn man wa.

⁶Paseyasi a nɛgiĩ Zozadaa nɛ, ka Bezodiaa nɛgiĩ Mesulaamu ni, bɛn man nə́ Kiɛnlɛ Zizi kɛ zɛnaa. Ǹ dinin man nə́ zũ, ǹ ná a goon wɔ lɛ, ka a tã a sɔɔ ǹ mànan nɛ.

⁷Melatia ke boe Gabawɔ̃ kiwi, bɛ nɛ, ka Zadɔn kɛ nɛ boe Meronɔti kiwi, ka Gabawɔ̃ kiwi minin laanka Mispaa kiwi minin ni, bɛn man nə́ goã dí nyɛɛ Zozadaa lɛ laanka Mesulaamu lɛn genli, Efrati tà a lɛ̀nyɛɛn gɔn la a pàãdɛnaa a giã ǹ bǎã kɛ genli.

⁸Sana dí-nyali Haraya a nɛgiĩ Uziili kɛ dɔ goã dí nyɛɛ ǹ genli, a dɔ genli, nyɔɔ gìĩ kɔɔ̃n zɛnaali Hanania kɛ goã dí nyɛɛ. Ǹ nə́ Zeruzalɛmu zɛnaa yǎa kungɔn lɛ a pəməbaa ǹ bǎã kɛ nɛ.

⁹Uuru a nɛgiĩ Refaya ke Zeruzalɛmu gána talɛɛ mìi la, bɛ́ goã dí nyɛɛ ǹ genli.

¹⁰Harumaafu a nɛgiĩ Yedaya dɔ goã dí nyɛɛ ǹ genli a kion yɔrɔ-a. A dɔ genli, Hasabuneya a nɛgiĩ Hatusi goã dí nyɛɛ.

¹¹Harimu a nɛgiĩ Malkiya nɛ, ka Paati-Moabu a nɛgiĩ Hakubu ni, bɛn nə́ kungɔn lɛ a paǹ kɔsɔ zɛnaa, ka zɔ́ɔn sanabolo kɛ dɔ nɛ.

¹²Haloweki a nɛgiĩ Salumu ke Zeruzalɛmu gána talɛɛ mìi la, bɛ dí nya ǹ genli, kun ka a nɛlɔn nɛ.

¹³Yankɔrɔ lɛ kiɛnlɛ ke, Hanunu laanka Zanoa kiwi minin man nə́ bɛ dɔ. Ǹ dinin man nə́ dɔ, ǹ ná a goon wɔ lɛ, ka a tã a sɔɔ ǹ mànan nɛ. Ka bɛ dɔ nɛ, ǹ nə́ kungɔn lɛ zɛnaa ń nə́ woo soo ne yǎa yisi kaa ǹ bǎã a kiɛnlɛ kɛ lɛ-a, a sasabaa n doe mɛtərə biɛsooro.

¹⁴Yisi kaa ǹ bǎã a kiɛnlɛ ke, Rekabu a nɛgiĩ Malkiya mɛn nə́ ke Bɛti-Kerɛmu gána mìi la, bɛ na á bɛ zɛnaa. A din na á dɔ, á ná a kiɛnlɛn wɔ lɛ ka a tã a sɔɔ ǹ mànan nɛ.

¹⁵Mu pìã bǎã a kiɛnlɛ ke, Kɔl-Hoze a nɛgiĩ Salumu mɛn bɛ́ Mispaa gána mìi la, bɛ na á bɛ zɛnaa. A din na á dɔ, á zũ, á ná a goon wɔ lɛ, ka a tã a sɔɔ ǹ mànan nɛ. Silowee pɛrɛ bǎã a kungɔn ke kii a dù gɔrɔ genli, á bɛ dɔ zɛnaa, yǎa á woo dɔ tɔ wɔ ǹ banbaranan kɛn ganaa, n toɛ "Davida a kiwi" li die.

¹⁶Salumu lɛ kio wɔlɔ-a, Azibuki a nɛgiĩ Nehemiã ke Bɛti-Suuru gána talɛɛ mìi la, bɛ́ kungɔn lɛ zɛnaa yǎa Davida a geren bĩ ǹ bǎã kɛ yɔrɔ-a, á woo soo yǎa dɛn kɛ li, ka sɛmɔɔn kion kɛ nɛ.

¹⁷A dɔ kio wɔlɔ-a, *Levii tɔrɔn nə́ goã dí nyɛɛ, ka Banii a nɛgiĩ Rewumu ni. Rewumu lɛ genli, Hakabia ke Kelaa gána talɛɛ mìi la, bɛ dɔ goã dí nyɛɛ a din a bǎã wɔ lɛa.

¹⁸A kio wɔlɔ-a, ǹ dinin dɔɔ̃nɔn dɔn nə́ goã dí nyɛɛ. Henadaadi a nɛgiĩ Babayii ke Kelaa gána talɛɛ mìi la, bɛ́ goã dí lɛ nyɛɛ.

¹⁹A dɔ genli, Zozoe a nɛgiĩ Ezɛɛrɛ ke Mispaa kiwi a kii lɛa bɛ dɔ goã kungɔn lɛ a paǹ kɔsɔ zɛnɛɛ. Bɛ̀ n tá woe ziabaa ǹ mànan koa ǹ kion kɛ nɛ, bɛa bǎã lɛ tá n yɔrɔ-a kungɔn lɛ a gùrù pusu ǹ bǎã nɛ.

²⁰Ezɛɛrɛ dɔ kio wɔlɔ-a, Zabayu a nɛgiĩ Baruku dɔ nə́ n gù kaa kungɔn lɛ a paǹ kɔsɔ zɛnaa li. Á saa kungɔn lɛ a gùrù pusu ǹ bǎã kɛ ganaa, á daa yǎa Lawa a wúlu-bɔlen kiã Eliasibu a kiɛnlɛ-a.

²¹Baruku dɔ kio wɔlɔ-a, Uri a nɛgiĩ Meremɔti ke Hakɔti a nɔ̀ɔn lɛa, bɛ dɔ́ kungɔn lɛ a paǹ kɔsɔ zɛnaa. Á saa Eliasibu a kiɛnlɛ ganaa, á woo yǎa Eliasibu a kion lɛ a lɛ doa ǹ bǎã ganaa.

²²Meremɔti dɔ kio wɔlɔ-a, Lawa a wúlu-bɔlen dɔn nə́ goã dí nyɛɛ, man nə́ n toa lɛkoro lɛ-a bǎãn nɛ ǹ nə́ daa.

²³Ǹ kio wɔlɔ-a, Bɛnzamɛn laanka Hakubu dɔ goã dí nyɛɛ ǹ dinin kion yɔrɔ-a. Bɛn dɔn kio wɔlɔ-a, Maseyaa a nɛgiĩ Azaria ke Anania a nɔ̀ɔn lɛa, bɛ dɔ́ goã dí nyɛɛ a kion genli.

²⁴Azaria dɔ kio wɔlɔ-a, Henadaadi a nɛgiĩ Binuyii dɔ́ kungɔn lɛ a paǹ kɔsɔ zɛnaa. Á saa Azaria a kion kɛ ganaa á woo yǎa kungɔn lɛ gisi ganaa, a gùrù pusu ǹ bǎã nɛ.

²⁵Uzayii a nɛgiĩ Palaala ke, bɛ́ goã dí nyɛɛ kungɔn gùrù pusu ǹ bǎã lɛ yɔrɔ-a ka sanabolo kɛ nɛ wɔlɔ lɛduə̃ ǹ bǎã a sumu kɛ genli, a wo lon miã ná a banban kii a piɛ wa. Palaala dɔ kio wɔlɔ-a, Paarɔsi a nɛgiĩ Pedazaa dɔ goã dí nyɛɛ.

²⁶Min mɛnɛn bɛ́ giã-n Ofɛli ǹ nə́ dí nyɛɛ Lawa a kion, bɛn dɔn nə́ goã ǹ nə́ dí nya yǎa ǹ nə́ dɔ Mu kiɛnlɛ kɛ yɔrɔ-a, lɛ̀giala li, ka sanabolo solo kɛ dɔ nɛ.

²⁷Ǹ kio wɔlɔ-a, Tekoa kiwi minin nə́ goã kungɔn lɛ a paǹ kɔsɔ zɛnɛɛ sanabolo gole solo kɛ yɔrɔ-a, a da yǎa Ofɛli kungɔn kɛ li.

²⁸A kũ sùin kiɛnlɛ kɛ ganaa, Lawa a wúlu-bolen maǹ nə́ goã dí nyɛɛ walan ǹ didie ná a kion yɔrɔ-a.

²⁹Ǹ kio wɔlɔ-a, Imɛɛrɛ a nɛgiĩ Saadɔki dɔ́ goã dí nyɛɛ a kion yɔrɔ-a. A dɔ kio wɔlɔ-a, Sekania a nɛgiĩ Semayia ke lɛ̀giala gɔn la a kiɛnlɛ kɛ a lɛduə̃li lɛa, bɛ dɔ́ goã dí nyɛɛ.

³⁰Ǹ kio wɔlɔ-a doo, Selemia a nɛgiĩ Hanania ke, ka Hanunu kɛ nɛ Salaafu a nɛgiĩ sɔrɔbaa ǹ wɔ lɛa, bɛn dɔn nə́ goã kungɔn lɛ a paǹ kɔsɔ zɛnɛɛ. Ǹ dɔn kio wɔlɔ-a, Berekia a nɛgiĩ Mesulaamu goã dí nyɛɛ a kion yɔrɔ-a.

³¹A dɔ kio wɔlɔ-a, sana dí-nyali Malkiya dɔ goã dí nyɛɛ yǎa á dɔ Lawa a kion dí-nyalin laanka pii-kɔlen kionən kɛn li, Mifukaadi kiɛnlɛ yɔrɔ-a. Á woo yǎa sanabolo kɛ li, kungɔn lɛ gùrù pusii ganaa.

³²Sanabolo mɛn lɛ bɛ́ kungɔn gùrù pusii lɛ ganaa, bɛ laanka Sèren kiɛnlɛ kɛ biin ni, sana dí-nyalin laanka pii-kɔlen nə́ goã dí nyɛɛ walan.

³³Sanbalaa bɛ́ á bɔ a siére-a mà wɔ tá wusii kungɔn lɛ doe, a foo yoo ka kurukuru. Á yaa wɔ Zuifun lɛn ganaa.

³⁴Á boo da ǹ dɔɔ̃nɔn laanka Samarii gána a sɔraasin yii ni, á pɛ: «Maǹ a gialaa wàa sii zɛnɛɛ, bɛa Zuifu fɔ̃madin-baalɛ wolen kɛn lɛn? Wɔ á re toɛ ǹ bɛa sii lɛ zɛnaa? Maǹ die wúlun boboe? Ǹ tá re nyɛɛ pinin goon? Kɔlɔn mɛnɛn nə kukũ, tii kaa ǹ la, ǹ tá re bɛn woɛ ǹ wusoo ǹ dí nya ǹ nɛ doo?»

³⁵Tobiya ke, bɛ́ goã Sanbaalaa lɛ genli, a dɔ na á goã pii: «Ǹ bɛ́ kungɔn mɛn lɛ doe, ta toloka din na á dii kɛ la, a n kiɛ, ǹ kɔlɔ kungɔn kɛ lɛ!»

³⁶Nehemii tɔn pɛ: «Ee wɔa Lawa, n too kɔ, a giala maǹ zɔ̀ɔ doe wɔ nɛ. Toa ǹ sɔ lɛ nə n bɔyaa a kũ ǹ dinin mìi ni. Ǹ wɔ gána kɔsɔ minin gɔn, bɛn nə zɔ̀ɔ dɔ ǹ nɛ, ǹ nə ǹ baa bɛ̀rɛn lɛa.

³⁷N baran ǹ sã toa ǹ nɛ wa. Ǹ sii baraa baran toa a nya a n bɔ bii-a n yɔrɔ-a wa, a giala, ǹ nə́ sɔ kɔ kungɔn-dɔlen lɛn ganaa.»

³⁸Wɔ́ wusoo wɔ́ kungɔn lɛ dɔ. Kungɔn lɛ tumaa nə́ n zɛnaa yǎa a bii lon, a giala zaman lɛ dí lɛ kũ ka a foo ne.