Read Samo, Southern Neh 4 Bible Online

Neh 4 - Samo, Southern bible

Neh 4

¹Sɛnɛ Sanbalaa nɛ, Tobiya nɛ, Larabu gána minin ni, Amɔn tɔrɔn nɛ, ka Asidɔdi minin ni, bɛn bɛ́ ǹ nə́ ma mà Zeruzalɛmu a kungɔn lɛ a dí á tɔ we, a fɔfoɛ̃ bǎãn lɛn nə́ tã giala koe, ǹ foo yoo taãn-taãnɛ.

²Ǹ tumaa tɔ́n yoo ǹ nə́ ǹ wɔ kaa kun, mà man die zia biɛ Zeruzalɛmu ganaa ǹ bɔ̀n da a ganaa.

³Sɛnɛ, wɔ́ wɔa Lawa lɛ nyankɔ, wɔ́ bǎã-lɛduə̃lin koa bɛn nə́ bǎã lɛduĩ penleen laanka tèlò ne, màn mɛn bɛ́ toɛ, ǹ kiwi lɛ tamaa a zia damaa wolen lɛn ganaa.

⁴A laanka bɛ yii ni, Zudaa tɔrɔn man nə́ goã loe loe ǹ nə́ pii mà: Dí-nyalin lɛn pàã na a gialaa nyɛɛ, kɛbɔlɔ dɔ́ la yii ni! Wɔ ba re boe la wɔ kungɔn lɛ dɔ wa!

⁵Wɔa zɔ́ɔn lɛn man nə́ goã pii kɛnɛn: «Ǹ ba re boe sii kɔn siére-a wa, ǹ yii ba re sii kɔn yii wa, yǎa wɔ bɛ́ re die doe ǹ bii biikoo mɛn li, wɔ ǹ dɛ, wɔ ǹ dí lɛ kurəə ka bɛa yɔrɔ lɛ nɛ.»

⁶Sɛnɛ Zuifun mɛnɛn nə goã giã-n wɔa zɔ́ɔn lɛn bii, bɛn nə́ gunyin fù yɛ die gòon yiɛ wɔ-a: «Zɔ́ɔn lɛn tá re boe paǹ yii li ǹ da ka tɔwaa.»

⁷Bɛ lɛ nɛ, má tɔ́n zaman lɛ doa kungɔn lɛ kio fulu-a tanlɛ yii li. Má ǹ doa bii-a ka ǹ gɔyan nɛ, ǹ sɛmiɛ̃n nɛ, ka ǹ san nɛ.

⁸Ma bɛ́ má a yii a koa ǹ bǎã yɛ, má yoo má kɛ pɛ goledɛnan manɛ ka sii yɔrɔ-bɔlen laanka zaman lɛ gialakun ni: «Ka baran nyɛ́ɛ baa ǹ nɛ wa! Ka yiri baran toa a bɔ ka Dɛnaa Lawa-n wa, asɛ mɛn bɛ́ gole, a sii n nyɛ́ɛ diɛ. Ka zia da ka dɔɔ̃nɔn lɛa, kaa nɛgiĩn laanka kaa nɛlɔn lɛa, kaa lɔn laanka kaa kionən lɛa!»

⁹Wɔa zɔ́ɔn lɛn bɛ́ ǹ nə́ ma, mà minin nə́ gòon yiɛ wɔ ganaa, mà Lawa nə́ ǹ sii yɔrɔ bɔ lɛ dɔ ziziɛ̃, wɔ tumaa nə́ n bɔyaa wɔ́ daa kungɔn lɛ li, didie kũ a dí la.

¹⁰Sɛnɛ, a kũ bɛa pinaa kɛ lɛ ganaa lɔn, maa dí-nyalin lɛn talɛɛ goon na á goã dí lɛ nyɛɛ, a talɛɛ kɔsɔ kɛ na á goã bii-a ka sɛmiɛ̃n laanka góoron nə́ ǹ gɔn, ka san laanka ziabaa ǹ dɔnkɛn nɛ. Goledɛnan lɛn man nə́ goã golee ne Zudaa minin lɛn tumaa kio.

¹¹Min mɛnɛn nə goã kungɔn lɛ doe, ǹ mɛnɛn dɔn nə goã guĩ goɛ hinlaa minin yui ka guĩ ni, man nə́ goã dí lɛ nyɛɛ ka ǹ gɔn goon ne, ziabaa ǹ màn nə́ gɔn lɛ a kɔsɔ kɛ nɛ.

¹²Min mɛnɛn nə goã kungɔn lɛ sɛ doe, ǹ didie na á goã doe, a gɔya n yii ni a bɔsɔ̃-n. Min mɛn goã bɛn pii, bɛ na á goã ma genli.

¹³Má tɔ́n pɛ goledɛnan lɛn manɛ kəni, ka sii yɔrɔ-bɔlen laanka zaman gialakun lɛ nɛ: «Di lɛ pàã á gole, wɔ n wɔ́ n pɛsɛ̃ kungɔn lɛ ganaa, wɔ wɔlɔ n lui-n kɔn ganaa.

¹⁴Ka bɛ́ re bɛn wuu miɛ boe bǎã mɛn li, ka da n sɔkɔn wɔ li walan. Wɔa Lawa lɛ á die zia diɛ wɔa lɛa!»

¹⁵Wɔ́ goã dí lɛ nyɛɛ. Sɛmiɛ̃n man nə́ goã wɔa talɛɛ gɔn, a kũ wɔlɔ a fulii ganaa a wo leeren bɔ biikoo yaa.

¹⁶A kun bɛa biikoo lɛ ganaa, má kɛ pɛ zaman lɛ nɛ máa didie laanka a dí-nyali die ǹ waa Zeruzalɛmu. Tèlò-n ǹ die ǹ bǎã lɛduə̃, bɛ̀ lɛ̀ waa ǹ dí nya.

¹⁷Ma din ni, ma dɔɔ̃nɔn nɛ, maa dí-nyalin ni, ka bǎã-lɛduə̃lin kɛn nɛ ǹ nə́ goã koe ma lɛ, wɔa min kɔn din na a mɔnaan waa wa. Didie gusin na á goã a ziabaa ǹ màn ganaa.