Read Samo, Southern Neh 5 Bible Online

Neh 5 - Samo, Southern bible

Neh 5

¹Ǹ kɔn pinaa, zaman lɛ a min gialakunun ni, ka ǹ lɔn nɛ, ǹ lɛ na á goã suĩ ni taãn-taãnɛ ǹ dinin dɔɔ̃n Zuifun lɛn li.

²Ǹ tɛnɛn man nə́ goã pii: «Wɔsɛn laanka wɔa nɛgiĩn ka wɔa nɛlɔn nɛ, wɔ tá mɔnaa nɛ. Wɔ n giɛ li *belee dɔ wɔ ganaa, ń giɛ wɔ á bii, wɔ la.»

³Ǹ tɛnɛn dɔn man nə́ goã pii kɛnɛn: «Wɔa wurun ni, ka wɔa *rezɛ̃ dan laanka wɔa kionən ne, wɔ n die bɛn biɛ giɔ̀mɔ saa ǹ mànan lɛa bɔrɔ, wɔ boo la wɔ belee yɛ bòo biikoo li.»

⁴Gialakunun dɔn man nə́ goã pii kɛnɛn: «Wɔsɛn man wɔrɔ nyɛnɛɛ diɛ wɔa wurun laanka wɔa rezɛ̃ dan bɔlɔ-a, kii a nyin giɔ̀mɔ saraa ǹ wɔ lɛa.

⁵A da yaa, wɔ dɔɔ̃nɔn lɛn gɔ̀nɔn siĩ bɛ́ lɔn, wɔsɛn dɔn wɔ lɛ n miɛ̃, wɔa nɛgiĩn laanka n nɛgiĩn man goon, sɛnɛ á ke wɔsɛn doamaa nɛ wɔa nɛgiĩn laanka ǹ nɛlɔn kaa bɛ̀rɛbaa nɛ. Wɔa nɛlɔn lɛn gigiã din tá a lɛa gɔrɔ. Wɔa boe sii kɔn la wɔ á zɛnɛɛ wa, wɔa wurun laanka wɔa rezɛ̃ dan man min kɔsɔn gɔn.»

⁶Ma bɛ́ má ǹ lɛ suĩ ǹ boon lɛn ma, ka bɛa boon kɛn lɛn tɔrɔ nɛ, ma foo yoo taãn-taãnɛ.

⁷ Má giã má fɔ̃, máa yǎa ma taãn pii min yii guguru-an lɛn laanka nyɛɛnaandɛnan lɛn manɛ. Má tɔ́n pɛ ǹ nɛ kɛnɛn: «Guĩ n ke ka á diɛ kɔn mìi ni.» Bɛ kio, má lɛ dia ǹ la lɛsɔkɔn gole kɔn ganaa.

⁸Má pɛ ǹ nɛ: «Ǹ wɔ dɔɔ̃n Zuifun mɛnɛn sã tɔrɔ kɔsɔn la, táa wɔ dininmaan lɛn man wɔ́ bɛn nyin si á kɔnpɛ ka wɔ pàã nɛ. Sɛnɛ, kasɛn man ka dɔɔ̃nɔn siɛ̃, ka n li ka ǹ sã wɔ dininmaan dɔn la!» Ǹ nə́ golee ka kiĩkə́ə̃n, ǹ yii din ba boo ganaa ǹ tá diɛ wa.

⁹Má tɔ́n pɛ: «Ka bɛ́ sii mɛn zɛnɛɛ, a siĩn wa. Ka doamaa nɛ ka tɔ wɔ, bɛ̀ ka tá nyɛ́ɛ biɛ wɔa Lawa lɛ yii ni, màn mɛn bɛ́ toɛ, tɔrɔn mɛnɛn bɛ́ wɔa zɔ́ɔn lɛa, sìi baran wɔ kũ bɛn bii wa.

¹⁰Ma dɔ laanka ma dɔɔ̃nɔn nɛ, ka maa dí-nyalin ni, wɔ dɔn bɛ́ wɔ́ wɔrɔ laanka belee giɔ̀mɔ da ǹ ganaa, ka daa wɔ sabara baa wɔ bɛa zɛnaa lɛ da.

¹¹A din pelo kɛ lɛ nɛ, ka sabara baa ǹ wusoo ǹ ka ka wurun lɛn kɔ ǹ la, ǹ rezɛ̃ dan lɛn nɛ, ǹ *olivie dan lɛn laanka ǹ kionən lɛn nɛ. Là mɛn dɔ nə n da wɔrɔ la, ka belee ne, ka duvɛ̃ dii ni, ka nyɔɔ nɛ, ka wusoo ka bɛ kɔ ǹ la.»

¹²Ǹ nə́ tɔ́n pɛ: «Wɔsɛn tá re wusii wɔ kɔ ǹ la, wɔ ba re màn kɔn nɔ̀n diɛ ǹ la wa. Ka n da lɔn, wɔ á re zɛnɛɛ miɛ̃.» Má tɔ́n lɛ dia Lawa a wúlu-bɔlen la, má zaman lɛ kaa liɛ ganaa, máa ǹ sii lɛ zɛnaa ka a bɛ́ á n da lɔn.

¹³Bɛ kio, má maa dɔnkɛ gole lɛkoro kũ, má zuzuu má pɛ: «Bɛ̀ min mɛn kɔ a da ǹ boo lɛ wa, Lawa n die bɛa dɛnaa lɛ kuĩ a zuzuu miɛ̃, a bɔ a kion a da kanaa, a wɔlɔ n sɔsɔɔ a gɔn mànan ganaa. Ǹ dɛnaa n die n zuzui miɛ̃, a n toa walan bii-a a gɔn kooro ne.» Zaman lɛ tumaa nə́ n toa mà a n miɛ̃. Ǹ nə́ Dɛnaa Lawa guguru kɔ. Boo mɛn lɛ nə n da, zaman lɛ bɛa sii zɛnaa.

¹⁴Kii lɛ ma koa ǹ pàãdɛnaa lɛa Zudaa gána nɛ ǹ mɛn pinaa, a kũ bɛa pinaa kɛ lɛ ganaa, kii Artagizɛrɛsɛɛsi a kiibaa lɛ̀ fuəbaa ǹ wɔ li, a da dɔ yǎa a kiibaa lɛ̀ pɔsɔɔwenpaabaa ǹ wɔ ganaa, a lɛ̀ fulupaa n ke, ma laanka ma dɔɔ̃nɔn nɛ, wɔ kɔn nə pàãdɛnaabaa ǹ màn bii wa.

¹⁵Sɛnɛ pàãdɛnan mɛnɛn nə goã masɛ nyɛɛnɛ, bɛn man nə́ goã zaman lɛ nɔmiɛ̃, ǹ nə́ màn-bii laanka duvɛ̃ sii ǹ la, ka wɔrɔ pupusi dɔ nɛ. Haalɛ ǹ dí-nyalin dinin man nə́ goã pàã nyɛɛ zaman lɛ nɛ. Sɛnɛ masɛ, nyɛ́ɛ baa Lawa yii-n lɛ taman yii, ma bɛ miã zɛnaa wa.

¹⁶Man má goã kɔn ka kungɔn lɛ a dí dɔ nɛ, wɔ wuru pii wa, maa dí-nyalin lɛn tumaa na á goã soe-n kɔn kànaa, dí nyɛɛ.

¹⁷Ma goã Zuifun mɛnɛn laanka ǹ goledɛnan màn-bii boe, bɛn man nə́ goã min paabiɛ ka posooro, ǹ mɛnɛn nə goã n toɛ lɛ-a ǹ gánan nɛ die wɔ li, bɛ n nə́ ǹ ba a-n wa.

¹⁸Lɛawaa gogoonmaa, wɔ n wɔ́ goã dii goon dii, ka sère sonbore sɔrɔ nɛ, ka màn kanaan nɛ. Lɛawaa fù woo lɛawaa fù, duvɛ̃ tɔrɔ tumaa na á goã n koe, gigiã dɔn. Bɛ tumaa na á goã boe ma din ni. Sɛnɛ a laanka bɛ yii ni, ma pàãdɛnaabaa ǹ màn-bii liɛ min la wa, a giala dí lɛ goã guguru zaman lɛ mìi ni.

¹⁹«Ee maa Lawa, ma sii mɛn tumaa zɛnaa zaman kɛ nɛ, n yiri kɔ ma li, n bǐɛ̃ zɛnaa ma nɛ bɛ taman yii.»