Read Samo, Southern Neh 8 Bible Online

Neh 8 - Samo, Southern bible

Neh 8

¹Lɛ̀ a mui sɔbaabaa ǹ wɔ a lɛawaa sɔbaabaa ǹ wɔ, zaman lɛ tumaa kɔn ma, ǹ nə́ woo n lɛ sɔkɔn Zeruzalɛmu, bǎã kɛ nɛ mu kiɛnlɛ kɛ yɔrɔ-a. Ǹ nə́ tɔ́n pɛ landa sii-daraali Ɛsidrasi ni, mà a da ka dí-pɛn sɛ́wɔ kɛ nɛ, Dɛnaa Lawa goã á kɔ Muizu la Izirayeli tɔrɔn wɔ lɛa. Ɛsidrasi daa ka bɛa sɛ́wɔ lɛ nɛ zaman lɛ yɔrɔ-a. Giĩn laanka lɔn maǹ nə́ goã bǎã lɛ nɛ, ka min mɛn tumaa goã boe la, ǹ nə́ boo giala miɛ.

³Ɛsidrasi bɛa sɛ́wɔ kɛ lɛ pɛ bii-a Mu kiɛnlɛ lɛ nyɛɛnɛ, giĩn laanka lɔn yɔrɔ-a, ka min mɛn tumaa goã boe la ǹ nə́ boo giala miɛ, ǹ ná a woo ǹ bǎã dɔ doɛ̃. A kũ baayɛlɛ yiisoo ganaa a wo penleen yaa, zaman lɛ tumaa na á goã n too koe doɛ̃ dí-pɛn sɛ́wɔ lɛ a boon ganaa.

⁴Landa sii-daraali Ɛsidrasi lɛ na á goã gɔn banbaran la lon. Bɛa gɔn banbaran lɛ ná n da bii-a sii lɛ taman yii. Min mɛnɛn nə goã golee ne Ɛsidrasi lɛ genli, bɛn nə́ ke: a gusin wɔlɔ-a, Matitia nɛ, Semaa nɛ, Anaaya nɛ, Uriya nɛ, Ilkiya nɛ, ka Maaseya nɛ. A gɔsɛ wɔlɔ-a, Pedayia nɛ, Misayeli ni, Malkiya nɛ, Hasmu ni, Hasibadanaa nɛ, Zekaria laanka Mesulaamu ni.

⁵Ɛsidrasi sɛ́wɔ lɛ lɛ bũ zaman lɛ tumaa yii ni, a giala a na á goã zaman lɛ tumaa lalan lon. A bɛ́ á sɛ́wɔ lɛ lɛ bũ, zaman lɛ tumaa yoo á n doa lon.

⁶Ɛsidrasi barka da Dɛnaa Lawa, Lawa gole lɛ nɛ, zaman lɛ tumaa tɔ́n na a lɛ si, ǹ nə́ n gɔnɔn goa lon "mà a n miɛ̃! Mà a n miɛ̃!" Bɛ kio, ǹ nə́ n kuməə tán ǹ lɛ la Dɛnaa Lawa yɔrɔ-a, ǹ ná a guguru kɔ.

⁷Zozoe ne, Banii ni, Serebia nɛ, Yamini ni, Akubu ni, Sabutayii ni, Hodiya nɛ, Maaseya nɛ, Kelitaa nɛ, Azaria nɛ, Zozabaadi ni, Haman nɛ, Pelaya nɛ, bɛa minin kɛn lɛn *Levii tɔrɔn lɛa, ǹ nə́ goã dí-pɛn sɛ́wɔ lɛ a boo yɔrɔ nyɛɛ zaman lɛ nɛ, bɛ̀ zaman lɛ tá golee ne a giala bǎã nɛ.

⁸Maǹ nə́ goã Lawa a dí-pɛn sɛ́wɔ lɛ pii, bɛ̀ ǹ boo lɛ bɔyaa bɛ̀ ǹ na a giala pɛ ǹ nɛ, bɛ tɔn toa ǹ na a giala ma[2].

⁹Min mɛnɛn nə goã sii lɛ yɔrɔ nyɛɛ zaman lɛ nɛ, pàãdɛnaa Nehemii lɛ nɛ, Lawa a wúlu-bɔle Ɛsidrasi landa sii-daraali lɛ nɛ, ka Levii tɔrɔn lɛn nɛ, bɛn nə́ pɛ zaman lɛ tumaa nɛ: «Pelo a lɛawaa kɛ ná á n kɔ ka Lawa, Dɛnaa Lawa lɛ la. Ka foo baran goã ziziɛ̃ nɛ ka gɛ̀ na á gã ǹ la wa, ka baran wuu pɛ wa.» A giala zaman lɛ tumaa na á goã wuu pii bɛ̀ ǹ bɛ́ dí-pɛn sɛ́wɔ lɛ a boon miɛ.

¹⁰Ɛsidrasi tɔ́n pɛ ǹ nɛ: «Ka wo nyɔɔ mànan bii, ka mi ǹ màn nɔnɔ̀ɔn mi. Bɛ̀ min mɛnɛn nə boo màn kɔn la ǹ nə́ zɛnaa wa, ka die ka bɛn gii bɔ, a giala pelo a lɛawaa kɛ na á n kɔ wɔsɛn Dɛnaa Lawa la. Ka foo baran ziziɛ̃ wa, a giala, Lawa bɛ́ foo kɔɔ̃nbaa mɛn koe, bɛ lɛ nə ka pàã lɛa.»

¹¹Levii tɔrɔn nə́ goã zaman lɛ lɛ tiɛ̃ bɛ̀ ǹ nə́ pii ǹ ni kɛnɛn: «Ka n lɛ tã, a giala lɛawaa kɛ na á n kɔ wɔsɛn Dɛnaa Lawa la. Ka foo baran ziziɛ̃ wa.»

¹²Zaman lɛ tumaa tɔ́n kiɛ̃ ǹ nə́ woo màn bii, ǹ nə́ màn mi, ǹ nə́ minin gii dɔ bɔ a nɛ, ǹ nə́ n nyɛnyɛɛ, a giala ǹ boon mɛnɛn lɛn nimi ǹ ni, ǹ nə́ bɛn giala ma.

¹³A lɛawaa paabaa ǹ wɔ pinaa, zaman lɛ tumaa a kɛdɛnan nɛ, Lawa a wúlu-bɔlen laanka Levii tɔrɔn nɛ, ǹ nə́ n sɔkɔn Ɛsidrasi landa sii-daraali genli, màn mɛn bɛ́ toɛ ǹ dí-pɛn sɛ́wɔ lɛ a boon woo ǹ bǎã yɛ sɔnbɔraanɛ.

¹⁴ Dɛnaa Lawa goã á Muizu da dí-pɛn sɛ́wɔ mɛn lɛ a kɔ ganaa Izirayeli minin lɛn la, ǹ nə́ yɛ kiɛ̃ nɛ bɛ gɔ́ɔ̃ nɛ, mà lɛ̀ a mui sɔbaabaa ǹ wɔ a zɔ́n kɛ li, mà Izirayeli minin lɛn doamaa nɛ ǹ giã siãn giulun.

¹⁵Mà ǹ doamaa dɔ nɛ, ǹ na a boo da, ǹ na a lɛ dia ǹ kiwi dadaran tumaa laanka Zeruzalɛmu kiwi ni ǹ pɛ: «Ka soo ka wo kele la, ka da ká wuru *olivie da luu ni, ka don olivie da luu ni, ka miriti da luu ni, ka sèwo da luu ni, dan mɛnɛn luu bɛ́ punpun, ka bɛn wɔ nɛ, ń giɛ ka tá siãn doe ne, ka a bɛ́ kiɛ̃-n lɔn.»

¹⁶Zaman lɛ tɔ́n soo ǹ nə́ woo, ǹ nə́ daa ka siãn lɛn dɔ ǹ mànan nɛ. Didie siã lɛ dɔ a kalan, ǹ nə́ ǹ dɔ ǹ dinin sumun ni. Ǹ nə́ ǹ dɔ Lawa a kion kɛ a sumun ni, ka Mu kiɛnlɛ bǎã kɛ nɛ, ka Efrayimu kiɛnlɛ bǎã kɛ dɔ nɛ.

¹⁷Zaman lɛ din tumaa, ǹ mɛnɛn lɛn nə bɔ bɛ̀rɛbaa ǹ bǎã lɛ nɛ ǹ nə́ daa, ǹ nə́ siãn dɔ ǹ nə́ giã ǹ nɛ. A da yaa, a kũ Nunu a nɛgiĩ Zozoe a biikoo ganaa, a da dɔ bɛa pinaa kɛ lɛ ganaa, Izirayeli minin lɛn nə tɔn bɛ miã tɔrɔ zɛnaa wa. Á nyɛnyɛɛ gole baa.

¹⁸A saa zɔ́n lɛ a giala-kɔ pinaa ganaa, Lawa dí-pɛn sɛ́wɔ lɛ na á goã n pii, baraabaraa yǎa zɔ́n lɛ a nya pinaa. Maǹ nə́ zɔ́n lɛ zɛnaa lɛawaa sɔbaa, a lɛawaa kiwisibaa ǹ wɔ pinaa, a kɔnpɛ ka a yɔrɔ bɔ ǹ gɔn nɛ, ǹ nə́ n sɔkɔn ǹ nə́ zɔ́n lɛ a zɛnaa gɔn nyɔmɔ.